KAPITEL 23
„Arki mi meki mi ferteri unu san psa”
Paulus e opo taki gi a tru bribi na fesi bigi grupu ogr’ati sma èn na fesi a Grankrutu fu den Dyu
A pisi disi abi fu du nanga Tori fu den apostel 21:18–23:10
1, 2. San meki na apostel Paulus go na Yerusalem? Sortu problema o miti en drape?
PAULUS de baka na ini Yerusalem! A e waka na den smara strati pe bun furu sma de. Nowan enkri tra foto na grontapu de so prenspari na ini a historia fu a pipel fu Yehovah leki Yerusalem. Furu sma fu a foto feni en wan bigi grani taki a foto fu den abi so wan moi historia. Paulus sabi taki furu Kresten dyaso e poti tumsi furu prakseri na a historia fu den èn dati meki den no e ferstan taki Yehovah no e wroko moro nanga a pipel fu en leki fa a ben du fosi. Di Paulus ben de na Efeise, a yere taki den brada nanga sisa fu Yerusalem ben de na nowtu èn dati meki a besroiti fu go baka na a bigi foto disi. Drape a e si taki den abi yepi fanowdu tu fu kon ferstan moro krin san na a wani fu Gado now (Tori 19:21). Aladi a ben kan lasi en libi, tòg a go drape leki fa a ben abi na prakseri.
2 San o miti Paulus na Yerusalem? Wan fu den problema di o miti en abi fu du nanga sonwan fu den bakaman fu Krestes di bruya fu di sma taki sani fu Paulus di no tru. Ma den feanti fu Krestes o gi en moro bigi problema. Den o taki omeni lei fu Paulus, den o fon en èn den o pruberi fu kiri en. Na mindri ala den dyugudyugu disi Paulus o kisi na okasi tu fu opo taki gi ensrefi. A sakafasi fu en, a dek’ati fu en nanga a bribi di a e sori te a e kisi fu du nanga den sortu problema disi, na wan moi eksempre gi Kresten na ini a ten disi. Kon meki wi go luku fa.
„Den bigin gi Gado glori” (Tori fu den apostel 21:18-20a)
3-5. (a) Na sortu konmakandra Paulus go di a ben de na ini Yerusalem èn san den taki drape? (b) San wi kan leri fu a konmakandra di Paulus hori nanga den owruman na ini Yerusalem?
3 A dei baka di Paulus nanga den mati fu en doro na Yerusalem, den go na den owruman di ben abi a frantwortu fu a gemeente. Nowan fu den apostel di de na libi ete, kari na ini a tori disi. Kande na a ten dati den alamala ben gwe libi Yerusalem fu go dini na tra presi. Ma Yakobus, a brada fu Yesus, ben de drape ete (Gal. 2:9). Soleki fa a sori, dan na Yakobus ben teki fesi di „ala den owruman ben de drape” makandra nanga Paulus.—Tori 21:18.
4 Paulus taki den owruman odi „èn a bigin ferteri den finfini fu a preikiwroko di Gado meki a du na mindri den sma di no de Dyu” (Tori 21:19). A no de fu taki dati den brada e kisi dek’ati te den e yere den tori dati. Wi na ini a ten disi e kisi dek’ati tu te wi e yere fa a wroko e go na fesi na ini tra kondre.—Odo 25:25.
5 Kande baka wan pisi ten Paulus taki fu a moni di a tyari kon fu Europa. A musu fu de so taki den arkiman fu Paulus ben breiti srefsrefi di den si taki den brada na ini den farawe kondre ben e broko den ede nanga den. Iya, Bijbel e taki dati baka di Paulus kba ferteri den sani disi, „den [owruman] bigin gi Gado glori”! (Tori 21:20a) Na so a de tu na ini a ten disi. Furu Kresten di e kisi fu du nanga rampu noso nanga hebi siki, breiti te tra brada nanga sisa e yepi den nanga sani di den abi fanowdu noso te den e gi den dek’ati.
Furu sma de ete di „e du fayafaya san a Wet e taki” (Tori fu den apostel 21:20b, 21)
6. Fu sortu problema den owruman taki nanga Paulus?
6 Ne den owruman ferteri Paulus taki wan problema ben de na Yudea di ben abi fu du nanga en. Den taigi en: „Brada, yu srefi si omeni dusundusun Dyu tron bribiman. Den alamala e du fayafaya san a Wet e taki. Ma den yere taki yu e leri ala den Dyu di e libi na mindri den trakondre sma, taki den musu drai baka gi a Wet di Gado gi Moses, bika yu taigi den fu no besnèi den pkin fu den èn fu no du leki fa den ben gwenti du sensi ten.”—Tori 21:20b, 21. a
7, 8. (a) Sortu fowtu denki furu Kresten na ini Yudea ben abi? (b) Fu san ede wi no kan taki dati den Dyu Kresten di ben abi wan fowtu denki, ben fadon kmoto na bribi?
7 Fu san ede someni Kresten ben de fayafaya ete fu hori a Wet, aladi moro leki 20 yari ben psa kba taki a Wet no ben e teri moro? (Kol. 2:14) Na ini a yari 49, den apostel nanga den owruman di ben kon makandra na ini Yerusalem seni wan brifi gi den gemeente. Na ini a brifi dati den tyari kon na krin taki den trakondre sma di ben tron bribiman no ben abi fu besnèi noso hori a Wet di Gado gi Moses (Tori 15:23-29). Ma a brifi dati no ben taki fu den Dyu Kresten èn furu fu den Dyu disi no ben ferstan taki den no ben abi fu hori a Wet moro.
8 Ma a fowtu denki dati ben meki taki den Dyu bribiman disi no ben kan de Kresten moro? Kwetkweti. A no ben de so taki den ben e anbegi falsi gado fosi èn taki den ben tan hori den gwenti fu a falsi bribi dati. Na Yehovah ben gi den Dyu bribiman disi a Wet di ben de so prenspari gi den. Nowan sani na ini a Wet ben fowtu noso ben abi fu du nanga ogri yeye. Ma a Wet dati ben abi fu du nanga na owru ferbontu, aladi Kresten ben de na ini wan nyun ferbontu now. Sobun, wan sma di ben abi a soifri anbegi, no ben abi fu du den sani moro di ben skrifi na ini a Wetferbontu. Hebrew Kresten di ben de fayafaya fu hori a Wet, no ben ferstan den leri fu a Kresten bribi bun. Fu dati ede den ben feni en prenspari fu tan hori den Dyu gwenti fu den fu di den ben wani meki Gado feni den bun. Den ben musu kenki a denki fu den so taki den ben kan kon si a Wet leki fa Gado ben e si en now. b—Yer. 31:31-34; Luk. 22:20.
„Den sani di trawan ferteri . . . no tru” (Tori fu den apostel 21:22-26)
9. San Paulus ben leri sma fu a Wet di Gado gi Moses?
9 Sma ben taki tu dati Paulus ben e leri den Dyu di ben e libi na mindri den trakondre sma „fu no besnèi den pkin fu den èn fu no du leki fa den ben gwenti du sensi ten”. Fa a de nanga a tori dati dan? Paulus ben de wan apostel gi den trakondre sma èn a sori den taki den no ben abi fu hori a Wet, soleki fa den owruman na Yerusalem ben besroiti. Paulus ben sori tu taki efu wan sma ben o pruberi fu meki trakondre sma di tron bribiman, besnèi fu sori taki den ben e hori a Wet, dan a sma dati no ben si sani na a yoisti fasi (Gal. 5:1-7). Paulus preiki a bun nyunsu tu gi den Dyu di ben e libi na ini den foto pe a ben go. A musu fu de so taki a ferteri den Dyu di ben wani arki taki a dede fu Yesus ben meki taki a no ben de fanowdu moro fu hori a Wet. A kan tu taki a taigi den taki Gado ben o si wan sma leki wan ret’ati sma te a ben o abi bribi èn no te a ben o hori a Wet.—Rom. 2:28, 29; 3:21-26.
10. Fa Paulus sori taki a ben e hori den firi fu trawan na prakseri te disi ben abi fu du nanga a Wet èn nanga a besnèi di sma ben musu besnèi?
10 Tòg Paulus ben ferstan taki son Dyu Kresten ben feni en bun fu hori wan tu fu den Dyu gwenti soleki fu no wroko na tapu a Sabat-dei noso fu no nyan son sani (Rom. 14:1-6). Boiti dati, a no ben meki wet di ben abi fu du nanga a besnèi di sma musu besnèi. A tru taki Paulus ben meki Timoteyus besnèi so taki den Dyu no ben o naki futu te den ben o kon sabi taki a papa fu Timoteyus de wan Grikisma (Tori 16:3). Efu wan sma ben wani besnèi, dan dati ben de en eigi besroiti. Paulus taigi den Galasiasma: ’A no prenspari efu sma besnèi noso efu den no besnèi. Ma a sani di de prenspari na a bribi di den e sori fu di den abi lobi’ (Gal. 5:6). Ma te wan sma ben o besnèi fu sori taki a ben hori a Wet noso te a ben o gi sma a firi taki den ben musu du dati fu meki Yehovah feni den bun, dan dati ben o sori taki a no ben abi nofo bribi.
11. Sortu rai den owruman gi Paulus èn san a ben musu du te a ben o teki a rai dati? (Luku san skrifi na ondrosei.)
11 Sobun, aladi den sani di sma ben taki fu Paulus no ben tru kwetkweti, tòg den sani dati ben bruya furu Dyu Kresten ete. Dati meki den owruman gi Paulus a rai disi: „Wi abi fo man dyaso di meki wan sweri. Meki den go nanga yu, èn krin yusrefi makandra nanga den soleki fa a Wet e taki, dan yu gi den moni fu krebi den ede. Na so ala sma o sabi taki den sani di trawan ferteri fu yu no tru. Den o sabi taki yu e tyari yusrefi na wan fasi di fiti èn taki yu e gi yesi na a Wet.”—Tori 21:23, 24. c
12. Di den owruman fu Yerusalem gi Paulus rai, dan fa a sori taki a ben man fiti ensrefi na sma èn taki a ben wani wroko makandra nanga den?
12 Paulus ben kan taki dati a problema no ben abi fu du nanga den lei di sma ben ferteri fu en, ma taki a ben abi fu du nanga den Dyu Kresten di ben de nomonomo fu hori a Wet di Gado gi Moses. Ma a ben wani fiti ensrefi na trawan, solanga a no ben abi fu psa den gronprakseri fu Gado. Wan leisi a ben skrifi kba: „Gi den sma di e gi yesi na a Wet, mi kon de leki wan sma di e gi yesi na a Wet, aladi misrefi no abi fu gi yesi na a Wet. Na so mi kan yepi den sma di e gi yesi na a Wet” (1 Kor. 9:20). Ma a leisi disi Paulus du san den owruman fu Yerusalem taki èn a ben kon de „leki wan sma di e gi yesi na a Wet”. Na so fasi a gi wi na ini a ten disi wan moi eksempre di e sori taki wi musu wroko makandra nanga den owruman èn taki wi no musu de nomonomo fu du sani soleki fa wi srefi wani.—Hebr. 13:17.
Paulus ben e lespeki a besroiti fu trawan, solanga dati no ben e psa Bijbel gronprakseri. Fa a de nanga yu?
„A no fiti fu tan na libi!” (Tori fu den apostel 21:27–22:30)
13. (a) Fu san ede son Dyu meki wan dyugudyugu na ini a tempel? (b) Fa a du kon taki sma no kiri Paulus?
13 Ma sani no waka bun na ini a tempel. Di den dei ben e kon na wan kba taki den man di ben de nanga Paulus du san den sweri fu du, dan den Dyu fu Asia si Paulus èn den lei gi en taki a tyari trakondre sma kon na ini tempel. A sani disi tyari wán bruya kon! Efu a legre-edeman fu Rome no ben kon na ini a tori, dan den sma ben o fon Paulus teleki a dede. Ma a legre-edeman disi tyari Paulus go sroto èn a ben o teki moro leki fo yari fosi den ben o lusu en baka. Tòg ogri ben kan miti Paulus ete. Di a legre-edeman aksi den Dyu fu san ede den ben wani fon Paulus, dan den bari taki ala sortu sani fu Paulus. Den sma meki so wan bigi b’bari taki a legre-edeman no ben man ferstan noti. Te fu kba den ben abi fu opo Paulus tyari gwe fu drape. Di Paulus nanga den Rome srudati ben de fu go na a presi pe den srudati ben e tan, dan Paulus taigi a legre-edeman: „Mi e begi yu, gi mi primisi fu taki nanga a pipel” (Tori 21:39). A legre-edeman gi en primisi fu du dati. Ne Paulus sori dek’ati èn a opo taki gi a bribi fu en.
14, 15. (a) San Paulus ferteri den Dyu? (b) San a Rome legre-edeman du fu kon sabi fu san ede den Dyu ati ben e bron so nanga Paulus?
14 „Arki mi meki mi ferteri unu san psa” (Tori 22:1). Na so Paulus bigin taki nanga den sma na ini Hebrewtongo èn a sani dati kowru den ati pkinso. A ferteri den krin fu san ede a ben de wan bakaman fu Krestes now èn na wan koni fasi a taki fu sani di den Dyu ben kan go ondrosuku efu den ben wani. Paulus ben kisi leri fu a pôpi Gamaliyel èn nomonomo a ben suku fu du ogri nanga den bakaman fu Krestes soleki fa sonwan fu den sma di ben de drape ben sabi kande. Ma di Paulus ben de na pasi fu go na Damaskus, dan a kisi wan fisyun. Na ini a fisyun dati Krestes di ben kisi wan opobaka, ben taki nanga en. Den sma di ben waka nanga Paulus si wan brenki leti èn den yere wan sten, ma den no „ben ferstan” san a sten ben taki (Luku Tori 9:7; 22:9). Bakaten den mati fu Paulus ben abi fu tyari en na en anu go na Damaskus fu di a fisyun di a si meki a kon breni. Drape Ananias, wan man di den Dyu fu a kontren dati ben sabi, du wan wondru fu meki Paulus kon si baka.
15 Ne Paulus ferteri den taki, baka di a doro na Yerusalem, dan Yesus sori ensrefi na en na ini a tempel. Di Paulus taki a sani dati, dan den Dyu kisi bigi atibron èn den bari bun tranga: „Un kiri a man disi puru na grontapu, bika a no fiti fu tan na libi!” (Tori 22:22) Fu di den Dyu ben kan kiri Paulus, meki a legre-edeman taigi den srudati fu tyari Paulus go na a presi pe den srudati ben e tan. A legre-edeman ben wani kon sabi finfini fu san ede den Dyu ati ben e bron so nanga Paulus. Dati meki a taigi den srudati taki den ben musu tyari Paulus gwe fu wipi en fu meki a taki. Ma Paulus ben sabi taki a wet fu lanti ben gi en a dyaranti taki a ben kan kisi kibri. Ne a taigi den taki a ben de wan borgu fu Rome. Na so a de tu taki anbegiman fu Yehovah na ini a ten disi, e suku yepi na lanti so taki den kan kisi na okasi fu opo taki gi a bribi fu den. (Luku den faki di nen „ Den borgu fu Rome nanga a wet fu den Romesma”, nanga a faki di nen „ Den krutu-afersi fu Yehovah Kotoigi na ini a ten disi”.) Di a legre-edeman yere taki Paulus na wan borgu fu Rome, dan a kon ferstan taki a ben abi fu suku wan tra fasi fu kon sabi moro fu a tori. A tamara fu en a tyari Paulus go na wan spesrutu konmakandra fu a Grankrutu fu den Dyu.
„Mi na wan Fariseiman” (Tori fu den apostel 23:1-10)
16, 17. (a) Ferteri san psa di Paulus taki nanga a Grankrutu fu den Dyu. (b) Fa Paulus sori sakafasi di den naki en?
16 Di Paulus opo taki gi ensrefi na fesi a Grankrutu, dan a bigin so: „Un man, brada, te na a dei fu tide mi tyari misrefi na so wan fasi, taki mi abi wan krin konsensi na fesi Gado” (Tori 23:1). Ma a no ben man taki go moro fara. Bijbel e taki: „Di Paulus taki disi, a granpriester Ananias taigi den sma di ben e tnapu krosbei fu en fu naki en na tapu en mofo” (Tori 23:2). Dati ben de wan bigi syen! A ben sori taki sondro fu yere san Paulus ben abi fu taki, den ben feni kba taki en na wan leiman. Fu dati ede a no e ferwondru wi taki Paulus taki: „Yu hoigriman [noso, yu skotu di ferfi weti], Gado o naki yu. Yu sdon drape fu krutu mi nanga a Wet, ma yu srefi psa a Wet di yu taigi sma fu naki mi”—Tori 23:3.
17 Sonwan fu den sma di ben tnapu drape skreki, ma a no fu di wan sma naki Paulus, ma na fu a sani di a taki. Den taigi en: „Na kosi yu e kosi a granpriester fu Gado?” A fasi fa Paulus piki den, sori taki a ben abi sakafasi èn taki a ben e lespeki a Wet. A taki: „Brada, mi no ben sabi taki en na a granpriester. Bika Gado Buku taki: ’Yu no musu taki ogri fu wan tiriman fu yu pipel’” (Tori 23:4, 5; Eks. 22:28). d Now Paulus bigin taki nanga den na wan tra fasi. Di a si taki Fariseiman nanga Saduseiman ben de na ini a Grankrutu, a taki: „Brada, mi na wan Fariseiman, wan bakapkin fu Fariseiman. Mi ben musu kon na fesi krutu fu di mi abi a howpu taki den dedewan o kisi wan opobaka.”—Tori 23:6.
Te wi e taki nanga sma di abi wan tra bribi, dan neleki Paulus, wi e taki fu sani di wi nanga den e agri
18. Fu san ede Paulus kari ensrefi wan Fariseiman? Fa wi kan taki-go-taki-kon nanga sma na a srefi fasi te wi de na ini son situwâsi?
18 Fu san ede Paulus kari ensrefi wan Fariseiman? Na fu di a ben de „wan bakapkin fu Fariseiman”. Sobun, a ben de fu wan famiri di ben de fu a kerkigrupu dati. Dati meki a kan taki furu sma ben e si en leki wan Fariseiman ete. e Ma fa Paulus ben kan kari ensrefi wan Fariseiman, aladi den man disi ben e bribi na ini wan tra sortu opobaka? Soleki fa sma e taki, dan den Fariseiman ben e bribi taki wan sili e tan na libi, baka te wan sma dede èn taki den sili fu den ret’ati sma ben o libi baka na ini wan libisma skin. Paulus no ben e bribi den sortu sani dati. A ben e bribi na ini na opobaka soleki fa Yesus ben e leri sma (Yoh. 5:25-29). Tòg Paulus ben e agri nanga den Fariseiman taki howpu de taki dedesma kan kon na libi baka, aladi den Saduseiman no ben e bribi a sani dati kwetkweti. Wi kan taki-go-taki-kon na a srefi fasi disi te wi e taki nanga sma di e bribi na ini Krestes. Wi kan taigi den taki neleki den, wi e bribi na ini Gado tu. A kan de so taki den e bribi na ini a Dri-wánfasi, aladi wi e bribi na ini a Gado fu Bijbel. Ma tòg wi nanga den e bribi taki wan Gado de.
19. San meki a konmakandra fu a Grankrutu kon tron wan bigi dyugudyugu?
19 A sani di Paulus taki meki wan trobi kon na ini a Grankrutu. Bijbel e taki: „Den sma bigin meki wán bigi b’bari èn wan tu fu den leriman fu Wet na ini a grupu fu den Fariseiman opo, dan den bigin meki bigi trobi. Den taki: ’Wi no feni taki a man disi du wan ogri. Kande wan yeye noso wan engel taki nanga en’” (Tori 23:9). Di den sma taki dati wan engel taki nanga Paulus, dan dati ben de wan tegu sani gi den Saduseiman di no ben e bribi na ini engel. (Luku a faki di nen „ Den Saduseiman nanga den Fariseiman”.) A dyugudyugu kon so bigi taki a Rome legre-edeman ben abi fu kon yepi na apostel baka (Tori 23:10). Ma a tori no ben kba. Sma ben kan du Paulus ogri ete. San ben o miti na apostel now? Wi o leri moro fu a tori disi na ini a kapitel di e kon.
a Fu di someni Dyu Kresten ben de, meki yu ben abi furu gemeente kande di ben e hori konmakandra na ini oso fu brada nanga sisa.
b Wan tu yari na baka, na apostel Paulus skrifi wan brifi gi den Hebrewsma pe a sori taki a nyun ferbontu betre moro na owruwan. Na ini a brifi dati a sori krin tu taki a nyun ferbontu ben meki taki na owru ferbontu no ben de fanowdu moro. Paulus ben taki sani di ben sori krin fu san ede Kresten no abi fu hori a Wet moro. Den sani disi ben o man yepi den Dyu Kresten fu piki den tra Dyu di ben feni nomonomo taki den ben musu hori a Wet. Boiti dati, a fasi fa Paulus ben e taki-go-taki-kon ben tranga a bribi fu son Kresten di ben poti tumsi furu prakseri na a Wet di Gado gi Moses.—Hebr. 8:7-13.
c Sabiman e taki dati den fo man disi ben sweri fu libi leki wan Nasireisma (Num. 6:1-21). A tru taki sma ben meki a sweri dati fu di den ben e hori a Wet di Gado gi Moses. Ma a Wet dati no ben de fanowdu moro. Tòg Paulus ben kan denki taki a no ben o fowtu efu den man disi du a sani di den sweri fu du gi Yehovah. Fu dati ede a no ben de wan fowtu sani di a gi den a moni fu krebi den ede èn di a go nanga den. Wi no sabi sortu sweri den man disi ben meki. Ma awansi fa a no fa, Paulus no ben o agri efu den man disi ben o tyari wan meti leki ofrandi (soleki fa den Nasireisma ben gwenti du) fu krin den fu sondu. Krestes en ofrandi di bun dorodoro ben meki taki den sortu ofrandi dati no ben o tapu a sondu fu wan sma moro. Awansi san Paulus du, wi kan de seiker taki a no ben o agri nanga wan sani di ben o meki a kisi konsensi fonfon.
d Son sma e taki dati Paulus no ben man si bun èn dati meki a no ben man si taki na a granpriester ben de drape. Noso kande a ben gwe so langa kba fu Yerusalem taki a no ben sabi suma ben de granpriester na a ten dati. A kan de so tu taki someni sma ben tnapu na en lontu taki a no si suma ben taki dati den musu naki en.
e Na ini a yari 49, di den apostel nanga den owruman ben kon makandra fu luku efu den trakondre sma ben abi fu hori a Wet, dan sma ben taki fu sonwan fu den Kresten drape taki den ben de „bakaman fu den Fariseiman fosi” (Tori 15:5). Soleki fa a sori, dan sma ben e si den Kresten disi leki Fariseiman ete.
