KAPITEL 11
’Den ben e go doro nanga prisiri èn santa yeye ben de na den tapu’
Na eksempre fu Paulus e sori fa fu du te sma e teige wi èn te den no wani arki a bun nyunsu
A pisi disi abi fu du nanga Tori fu den apostel 13:1-52
1, 2. San de so spesrutu na a waka di Barnabas nanga Saulus o teki èn fa a wroko fu den o yepi fu meki Tori fu den apostel 1:8 kon tru?
NA WAN span dei gi a gemeente fu Antiokia. Fu ala den profeiti nanga den leriman di de drape, a santa yeye sori taki na Saulus nanga Barnabas musu go preiki a bun nyunsu na farawe presi (Tori 13:1, 2). a A tru taki den ben seni koni man fu go preiki na tra presi kba. Ma fosi, den zendeling ben go preiki na kontren pe sma ben e teki a Kresten bribi kba (Tori 8:14; 11:22). Disi leisi den o seni Barnabas nanga Saulus, makandra nanga Yohanes Markus di o go nanga den fu yepi den, go na kondre pe furu sma no yere a bun nyunsu ete.
2 Sowan 14 yari na fesi, Yesus ben taigi den bakaman fu en: „Unu o de kotoigi fu mi na ini Yerusalem, na ini heri Yudea nanga Samaria èn te na den moro farawe presi fu grontapu” (Tori 1:8). A wroko di Saulus nanga Barnabas kisi fu dini leki zendeling o meki moro sani fu Yesus en profeititori kon tru. b
Teki den „fu du a wroko” (Tori fu den apostel 13:1-12)
3. Fu san ede a no ben de makelek te sma na ini a fosi yarihondro ben e teki waka go na farawe presi?
3 Na ini a ten disi wi abi sani soleki wagi nanga opolani di e meki taki sma kan go na farawe presi na ini wan tu yuru nomo. Dati no ben de so na ini a fosi yarihondro. Na ini a ten dati, moro furu sma ben e waka nanga futu te den ben e go na tra presi èn nofo tron den ben abi fu teki bergibergi pasi. Te sma ben waka 30 kilometer, a ben kan teki wan heri dei èn a ben e weri den skin! c Sobun, aladi Barnabas nanga Saulus ben de klarklari fu bigin nanga a zendelingwroko, tòg den ben musu fu sabi tu taki den ben o abi fu du furu muiti èn den no ben o man du ala sani di den ben wani du.—Mat. 16:24.
4. (a) San yepi den brada fu besroiti taki den ben musu teki Barnabas nanga Saulus èn fa a gemeente firi di den poti den brada disi? (b) Fa wi kan horbaka gi den wan di e kisi frantwortu na ini a gemeente?
4 Ma fu san ede a santa yeye ben sori den brada taki na Barnabas nanga Saulus den ben musu teki „fu du a wroko”? (Tori 13:2) Bijbel no e taki fu san ede. Ma wi sabi taki na a santa yeye ben tiri den brada di den ben teki den man disi. Noti no e sori taki den profeiti nanga den leriman na Antiokia no ben e agri nanga a besroiti dati. Na presi fu dati, den horbaka gi a besroiti nanga den heri ati. Den brada no ben dyarusu, ma den faste èn den begi. Baka di den ’poti den anu na tapu Barnabas nanga Saulus, den seni den gwe’ (Tori 13:3). Prakseri fa Barnabas nanga Saulus ben musu firi di a sani disi psa. Wi musu horbaka tu gi den wan di e kisi frantwortu na ini a gemeente, soleki den man di den poti leki gemeente owruman. Na presi fu dyarusu na tapu den wan di e kisi den sortu grani disi, wi musu „abi furu lespeki gi den èn lobi den gi a wroko di den e du”.—1 Tes. 5:13.
5. Ferteri fa sani waka di Barnabas nanga Saulus preiki na tapu na èilanti Siprus.
5 Baka di Barnabas nanga Saulus waka go na Selesia, wan lanpe krosbei fu Antiokia, dan den teki boto go na a èilanti Siprus. Dati ben de sowan 200 kilometer moro fara. d A no de fu taki dati Barnabas di gebore na Siprus ben de fayafaya fu tyari a bun nyunsu gi den kondreman fu en. Di den man disi doro Salamis, wan foto na a syoro na owstusei fu na èilanti, den no draidrai. Wantewante „den bigin preiki a wortu fu Gado na ini den snoga fu den Dyu” (Tori 13:5). e Barnabas nanga Saulus waka fu a wan sei fu Siprus go na a tra sei èn a kan taki den preiki na ini den prenspari foto di den ben de na pasi. Wi no sabi sortu pasi den zendeling disi teki, ma kande den waka sowan 220 kilometer.
6, 7. (a) Suma ben de Sergiyus Paulus èn fu san ede Bar-Yesus ben e suku fu tapu en fu arki a bun nyunsu? (b) San Saulus du di Bar-Yesus gens a bun nyunsu?
6 Na ini a fosi yarihondro, den sma na Siprus ben de dipi na ini a falsi anbegi. Disi ben de krin fu si di Barnabas nanga Saulus doro Pafos, na a syoro na a west-sei fu na èilanti. Drape den miti „wan bonuman èn wan falsi profeiti. A man disi ben de wan Dyu èn a ben nen Bar-Yesus. A ben wroko gi Granman Sergiyus Paulus di ben de wan koni man.” f Na ini a fosi yarihondro, furu Romesma di ben kisi bun skoroleri ben go na wan towfruman, noso wan lukuman fu suku yepi te den ben musu teki prenspari bosroiti. Srefi wan koni man leki Sergiyus Paulus ben du a sani dati. Tòg Sergiyus Paulus ben wani kon sabi moro fu a Kownukondre boskopu èn „a ben angri fu yere a wortu fu Gado”. Ma Bar-Yesus no ben lobi a sani disi. Sma ben sabi Bar-Yesus tu leki Elimas, san wani taki „Towfruman”.—Tori 13:6-8.
7 Bar-Yesus ben e gens a Kownukondre boskopu. Iya, a wan-enkri fasi fa a ben man hori a prenspari posisi di a ben abi leki raiman fu Sergiyus Paulus, na te a ben o du sani fu no „meki a granman bribi na ini Masra” (Tori 13:8). Ma Saulus no ben o meki wan towfruman puru a prakseri fu Sergiyus Paulus na a bun nyunsu. Sobun, san Saulus du? A tori e taki: „Ne santa yeye kon na tapu Saulus di sma sabi tu leki Paulus. A luku a bonuman [Bar-Yesus] langalanga na ini en fesi, dan a taigi en: ’Yu bedrigiman yu, ala sortu ogri yu e du. Yu na wan manpkin fu Didibri èn wan feanti fu ala san bun. O ten yu o kba drai den reti pasi fu Yehovah? Yehovah o strafu yu èn yu o kon breni. Yu no o si a leti fu a son fu wan pisi ten.’ Wantronso en ai kon dungru èn ala sani kon blaka. Fu dati ede a ben e firfiri e suku sma fu hori en na en anu, so taki den ben kan sori en a pasi.” g San ben de a bakapisi fu a wondru disi? „Di a granman si san psa, a bigin bribi na ini Masra. A ben ferwondru fu den sani di a ben leri fu Yehovah” (Tori 13:9-12).
Neleki Paulus, wi e opo taki gi a tru leri fu Bijbel sondro fu frede te sma e gens wi
8. Fa wi na ini a ten disi kan sori dek’ati neleki Paulus?
8 Paulus no meki Bar-Yesus tapu skreki gi en. Neleki Paulus wi no musu frede tu te gensman e suku fu swaki a bribi fu sma di wani sabi moro fu a Kownukondre boskopu. A no de fu taki dati wi musu „taki na wan switi fasi ala ten” (Kol. 4:6). Ma na a srefi ten wi no o tapu fu preiki gi wan sma di wani sabi moro, soso fu di wi frede taki gensman o hartaki nanga wi. Wi no musu draidrai tu fu sori sma san na den fowtu fu den falsi kerki di e „drai den reti pasi fu Yehovah” soleki fa Bar-Yesus ben du (Tori 13:10). Neleki Paulus, wi e ferteri sma krin san na den tru sani fu Bijbel èn na so wi e hari a prakseri fu ret’ati sma. Awansi a fasi fa Yehovah e horbaka gi wi no de so krin fu si neleki di a ben e horbaka gi Paulus, wi kan de seiker taki Yehovah o gebroiki en santa yeye fu hari sma kon di warti fu yere den tru tori fu Bijbel.—Yoh. 6:44.
’Taigi den wan sani fu gi den dek’ati’ (Tori fu den apostel 13:13-43)
9. Fa Paulus nanga Barnabas ben de wan moi eksempre gi den brada di e teki fesi na ini a gemeente na ini a ten disi?
9 Soleki fa a sori, dan wan sani kenki di den man gwe libi a foto Pafos èn den teki boto fu go na Perga, na a syoro fu Pikin Asia, sowan 250 kilometer moro fara. Tori fu den apostel 13:13 e taki fu a grupu disi leki „Paulus nanga den man”. Den wortu disi e sori taki Paulus ben e teki fesi now te a grupu disi ben e du a wroko fu den. Ma noti e sori taki Barnabas ben e dyarusu na tapu Paulus. Nôno, den tu man disi tan wroko makandra fu du a wani fu Gado. Paulus nanga Barnabas de wan moi eksempre gi den wan di e teki fesi na ini a gemeente na ini a ten disi. Na presi taki Kresten e strei nanga makandra fu kisi grani na ini a gemeente, den e hori den wortu disi fu Yesus na prakseri: „Un alamala na brada.” A taki moro fara: „Gado o saka a sma di e hei ensrefi èn a o hei a sma di e saka ensrefi.”—Mat. 23:8, 12.
10. Ferteri fa a ben de te sma ben e teki pasi fu kmoto na Perga go na Antiokia na ini Pisidia.
10 Di den doro na Perga, Yohanes Markus gwe libi Paulus nanga Barnabas èn a drai go baka na Yerusalem. Bijbel no e taki fu san ede Yohanes Markus gwe wantronso. Paulus nanga Barnabas go doro èn den kmoto na Perga fu go na Antiokia na ini Pisidia, wan foto na ini a kontren fu Galasia. A no ben de makelek fu waka a pasi disi, fu di Antiokia di de na ini Pisidia, de sowan 1100 meter moro hei leki se. Boiti taki sma ben man kisi bigi mankeri na tapu den bergipasi, sma ben sabi tu taki wan lo f’furman ben de na ini a kontren dati. Ma dati no ben de ala. A kan taki Paulus ben abi problema nanga en gosontu. h
11, 12. Fa Paulus ben hari a prakseri fu den arkiman fu en di a ben e taki na ini a snoga na Antiokia na ini Pisidia?
11 Na Antiokia na ini Pisidia, Paulus nanga Barnabas go na ini a snoga na tapu wan sabat-dei. Bijbel e taki: „Baka di den leisi a Wet nanga den buku fu den Profeiti gi den sma di ben de drape, dan den fesiman fu a snoga seni sma fu go taigi den: ’Brada, efu wan sani de di unu wani taigi a pipel fu gi den dek’ati, dan unu kan taki’” (Tori 13:15). Ne Paulus opo tnapu fu taki.
12 Baka dati Paulus bigin taki nanga den arkiman fu en. A taki: „Un Israelsma nanga den tra sma di abi lespeki gi Gado, un arki mi” (Tori 13:16). Na mindri den arkiman fu Paulus yu ben abi Dyu nanga sma di ben teki a Dyu bribi. San Paulus taki fu hari a prakseri fu den arkiman disi di no ben ferstan fa Gado gebroiki Yesus fu meki den sani di Gado abi na prakseri kon tru? Na a fosi presi Paulus bigin taki fu a historia fu a Dyu pipel. A tyari kon na krin fa Yehovah „meki den tron wan bigi pipel di den ben e libi na ini wan tra kondre, Egepte” èn fa Gado „ferdrage den na ini a sabana” sowan 40 yari langa, baka di a ferlusu den. Paulus ferteri tu fa den Israelsma ben man teki a Pramisi Kondre abra èn fa Yehovah ’gi den afo fu den a kondre’ (Tori 13:17-19). Son sma denki taki Paulus ben taki fu wan tu pisi fu den Buku fu Bijbel di den ben kba leisi nanga wan tranga sten na a srefi Sabat dati. Efu dati de so, dan disi na wan tra eksempre di e sori taki Paulus ben sabi fa fu „tron ala sani gi ala sortu sma”.—1 Kor. 9:22.
13. Fa wi kan hari a prakseri fu den arkiman fu wi?
13 Wi musu pruberi tu fu hari a prakseri fu sma di wi e miti na ini a preikiwroko. Te wi sabi sortu bribi a sma abi, dan dati kan yepi wi fu taki fu sani di a sma lobi spesrutu. Boiti dati, wi kan taki fu pisi fu Bijbel di a sma sabi kande. A ben o bun fu meki a sma leisi kmoto na ini en eigi Bijbel. Suku fu taki fu sani di o meki taki a sma wani kon sabi moro fu Yehovah.
14. (a) Fa Paulus bigin taki fu a bun nyunsu fu Yesus èn sortu warskow a gi? (b) San den sma du di Paulus kba taki?
14 Baka dati, Paulus ferteri fa „Yesus”, wan bakapkin fu den kownu fu Israel, ben o tron „wan ferlusuman”. Na gi a sma disi Yohanes a Dopuman ben sreka a pasi. Dan Paulus ferteri fa sma kiri Yesus èn fa a ben kisi wan opobaka (Tori 13:20-37). Paulus taki: „Fu dati ede brada, un musu sabi taki a sma disi kan meki taki unu kisi pardon fu sondu . . . Fu di Yesus dede, meki Gado e si ala sma di e bribi na ini Yesus, leki ret’ati sma.” Baka dati na apostel e warskow den arkiman fu en: „Luku bun taki den sani di skrifi na ini den buku fu den Profeiti no psa nanga unu. Drape skrifi: ’Un spotuman, luku san mi e du na ini a ten fu unu. Mi e du wan sani di unu no o bribi noiti, awinsi wan sma ferteri unu dati finfini.’” A moi fu si san den sma du di Paulus kba taki. „Den sma begi den fu ferteri den moro fu den tori disi tapu a tra Sabat-dei”, na so Bijbel e taki. Boiti dati, baka a konmakandra di den hori na ini a snoga, „furu fu den Dyu nanga den sma di ben drai den libi fu tron anbegiman fu Gado bigin waka baka Paulus nanga Barnabas”.—Tori 13:38-43.
„Wi e go na den tra pipel” (Tori fu den apostel 13:44-52)
15. San psa na tapu a Sabat-dei, baka di Paulus taki nanga den Dyu?
15 A Sabat-dei na en baka „bijna ala sma na ini a foto” kon makandra fu arki Paulus. Son Dyu no ben lobi a sani disi èn „den bigin ferteri sma taki Paulus e lei”. En nanga Barnabas taigi den krin: „Na unu ben musu yere a wortu fu Gado fosi. Ma fu di unu no wani bribi èn fu di unu e sori taki unu no fiti fu kisi têgo libi, meki wi e go na den tra pipel. Yehovah taigi wi krinkrin: ’Mi poti yu leki wan leti gi den pipel, so taki yu kan ferteri sma te na den moro farawe presi fu grontapu fa mi o tyari ferlusu kon.’”—Tori 13:44-47; Yes. 49:6.
Sma „ben wani du ogri nanga Paulus nanga Barnabas . . . Den disipel ben e go doro nanga prisiri èn a santa yeye ben de na den tapu.”—Tori fu den apostel 13:50-52
16. San den Dyu du, baka di den zendeling pir’ai gi den èn san Paulus nanga Barnabas du di den gens den?
16 Den arkiman di no ben de Dyu, ben prisiri èn „ala den sma di ben abi a yoisti denki fu man kisi têgo libi, tron bribiman” (Tori 13:48). Heri esi a wortu fu Yehovah panya na ini a heri kondre. Ma den Dyu ben denki heri tra fasi. Fu taki en leti, den zendeling taigi den Dyu taki aladi den fosi ben yere Gado wortu, tòg den ben teki a besroiti fu drai baka gi a Mesias. Fu dati ede Gado ben taki dati a ben o strafu den. Baka di den Dyu sutu faya gi den heihei uma èn gi den bigiman fu a foto. Sma „ben wani du ogri nanga Paulus nanga Barnabas èn den yagi den kmoto fu drape”. San Paulus nanga Barnabas du? Den „naki a doti puru fu den futu, dan den go na Ikoniyum.” Disi wani taki dati a Kresten bribi no ben de moro na Antiokia na ini Pisidia? Kwetkweti! Den disipel di ben tan na baka, „ben e go doro nanga prisiri èn a santa yeye ben de na den tapu”.—Tori 13:50-52.
17-19. Fa wi kan teki a moi eksempre fu Paulus nanga Barnabas èn fa wi o kisi moro prisiri te wi e du dati?
17 Den sani di den ret’ati Kresten disi du di sma gens den, e leri wi wan moi sani. Wi no e tapu fu preiki, srefi te sma di abi wan hei posisi na ini a grontapu disi e pruberi fu gens wi so taki wi no e preiki a boskopu fu wi moro. Hori na prakseri tu taki di den sma fu Antiokia no ben wani arki a boskopu fu Paulus nanga Barnabas, dan den man disi „naki a doti puru fu den futu”. Den no du dati fu di den ati ben bron nanga den sma fu Antiokia, ma den du en fu sori taki den no ben tyari a frantwortu gi san ben o psa nanga den sma fu a foto. Den zendeling disi ben sabi taki den no ben kan taki na fesi san sma ben o du te den yere a boskopu. Ma san den srefi ben man du na fu go doro nanga a preikiwroko. Dati na san den du tu di den ben e go na Ikoniyum.
18 San psa nanga den disipel di tan na ini Antiokia? A tru taki den sma na ini a kontren ben teige den. Ma a sani dati no pori den prisiri, awansi sma ben wani arki noso no ben wani arki. Yesus ben taki: „Koloku fu den sma di e yere a wortu fu Gado èn di e du san a wortu e taki!” (Luk. 11:28) Dati na soifri san den disipel na Antiokia na ini Pisidia bosroiti fu du.
19 Neleki Paulus nanga Barnabas, wi musu hori na prakseri taki a frantwortu di wi abi na fu preiki a bun nyunsu. A d’don na den sma efu den wani arki a boskopu noso efu den no wani arki. Efu a gersi leki den sma di wi e preiki gi no wani arki, dan wi kan teki na eksempre fu den disipel fu a fosi yarihondro. Te wi e warderi a tru anbegi èn te wi e meki a santa yeye tiri wi, dan wi kan prisiri tu, srefi te sma e gens wi.—Gal. 5:18, 22.
a Luku a faki di nen „ Barnabas, ’Manpkin fu Trowstu’”.
b Na a pisi ten disi gemeente de kba te na Antiokia na ini Siria. Dati de sowan 550 kilometer na noordsei fu Yerusalem.
c Luku a faki di nen „ Te sma ben de na pasi”.
d Na ini a fosi yarihondro wan boto ben kan waka sowan 150 kilometer na ini wán dei efu winti ben wai tranga. Ma efu winti no ben e wai, dan a ben e teki moro langa.
e Luku a faki di nen „ Na ini den snoga fu den Dyu”.
f Na Asamblei fu Rome ben e tiri Siprus. A moro prenspari tiriman fu na èilanti ben de wan edeman fu drape di den ben e si leki granman.
g Sensi a ten dati sma bigin kari Saulus, Paulus. Son sma denki taki a teki a Rome nen fu gi Sergiyus Paulus grani. Ma fu di a tan gebroiki a nen Paulus, srefi baka di a gwe libi Siprus, dan disi e sori taki dati no ben de so. Sensi a ten dati, Paulus, „wan apostel gi den trakondre sma”, besroiti fu gebroiki a Rome nen fu en. A kan taki a gebroiki a nen Paulus tu, fu di a fasi fa Grikisma e taki Saulus, a Hebrew nen fu en, gersi wan Griki wortu di no wani taki wan bun sani.—Rom. 11:13.
