1-3. (a) Sortu problema opo kon di kan tyari pratifasi kon na ini a Kresten gemeente fu a fosi yarihondro? (b) Sortu wini wi kan kisi te wi e luku a tori disi na ini a buku Tori fu den apostel?

 DIDYONSRO Paulus nanga Barnabas di e prisiri drai kon baka na Antiokia, wan foto fu Siria. Den kmoto na a fosi preikiwaka di den teki leki zendeling. Den breiti srefsrefi taki Yehovah „ben opo a pasi gi den trakondre sma, so taki den ben kan teki a bribi tu” (Tori 14:26, 27). Iya, den sma fu Antiokia e taki fu noti moro leki a bun nyunsu èn „furu” sma di no de Dyu e tron wan memre fu a gemeente.​—Tori 11:20-26.

² Heri esi den sma na Yudea e kisi fu yere fa den gemeente e kon moro bigi. A nyunsu disi bun srefsrefi. Ma a no ala sma breiti nanga a nyunsu. Wan heri pisi ten kba wan problema ben de di abi fu du nanga a besnèi di sma musu besnèi èn now a problema disi opo kon baka. Fa den Dyu bribiman musu libi nanga den bribiman di no de Dyu? Fa den bribiman di no de Dyu musu si a Wet di Gado gi Moses? A problema disi e tyari so wan bigi trobi kon taki a kan meki a Kresten gemeente prati na ini difrenti grupu. Fa den o lusu a tori disi?

³ Te wi e luku a tori disi na ini a buku Tori fu den apostel, dan wi o leri furu prenspari sani. Disi o yepi wi fu teki koni besroiti te problema de di kan tyari pratifasi kon na ini a ten disi.

4. Sortu fowtu denki son bribiman ben e leri trawan èn san na a aksi di e opo kon?

⁴ A disipel Lukas ben skrifi: „Wan tu disipel ben kon [na Antiokia kmoto] fu Yudea èn den bigin leri den brada: ’Efu unu no besnèi soleki fa Moses ben taki, dan unu no o kisi ferlusu’” (Tori 15:1). Bijbel no e taki efu den man disi ben de Fariseiman, fosi den tron Kresten. Awansi fa a no fa, a gersi leki a denki fu a Dyu kerkigrupu dati, di ben lobi meki wan lo pkinpkin wet, ben abi krakti na tapu den man disi. Boiti dati, kande den ben gi sma a denki taki den apostel nanga den owruman fu Yerusalem seni den kon (Tori 15:23, 24). Ma fu san  ede Dyu bribiman ben e taki ete taki sma musu besnèi, aladi sowan 13 yari ben psa kba sensi na apostel Petrus ben gi trakondre sma di no besnèi, wan switikon na ini a Kresten gemeente?​—Tori 10:24-29, 44-48. a

5, 6. (a) Fu san ede son Dyu Kresten ben wani nomonomo taki sma musu besnèi? (b) A ben de so, taki a ferbontu di Gado meki nanga Abraham taki a ben musu besnèi, ben de na ini a ferbontu di a ben meki nanga Abraham taki a ben o blesi den bakapkin fu en? Tyari disi kon na krin. (Luku a futuwortu.)

⁵ Furu sani de di ben kan meki taki den ben denki so. Wán sani na taki Yehovah srefi ben taki dati mansma musu besnèi èn dati ben sori taki wan sma abi wan spesrutu matifasi nanga en. A fosi leisi di den bigin besnèi sma ben de na ini na osofamiri fu Abraham. Na a ten dati a Wetferbontu no ben de ete, ma bakaten a seti disi tron wan fu den wet na ini a Wetferbontu (Lef. 12:2, 3). b A Wet di Gado gi Moses ben taki dati srefi trakondre sma ben musu besnèi, fosi den ben kan abi spesrutu grani soleki a nyan di sma ben mag nyan a Paska n’nyan (Eks. 12:43, 44, 48, 49). Iya, soleki fa den Dyu ben e si en, dan wan man di no ben besnèi no ben krin èn den ben wiswasi en.​—Yes. 52:1.

⁶ Fu dati ede den Dyu bribiman ben musu abi bribi nanga sakafasi fu teki wan nyun leri. A nyun ferbontu ben kon na ini a presi fu a Wetferbontu. Sobun, te wan sma gebore leki wan Dyu, dan dati no ben wani taki dati a ben tron wan memre fu Gado pipel wantewante. Den Dyu Kresten di ben e libi na ini Dyu libimakandra, soleki fa a ben de nanga den bribiman na Yudea, ben abi dek’ati fanowdu fu sori krin taki den bribi na ini Krestes. Dek’ati ben de fanowdu tu fu teki den trakondre sma di no ben besnèi, leki den Kresten brada fu den.​—Yer. 31:31-33; Luk. 22:20.

7. Sortu tru tori „wan tu disipel” fu Yudea no ben e ferstan?

⁷ A no de fu taki dati den markitiki fu Gado no kenki. Disi ben kon na krin fu di prenspari sani fu a Wet di Gado gi Moses ben de fu feni tu na ini a nyun ferbontu (Mat. 22:36-40). Fu eksempre, bakaten Paulus ben skrifi a sani disi fu a besnèi di sma musu besnèi: „San de na ini wan sma ati, na dati e meki taki a de wan trutru Dyu èn na en ati  besnèi. A no wan wet di skrifi meki taki a de so, ma na a yeye” (Rom. 2:29; Deut. 10:16). „Wan tu disipel” fu Yudea no ben ferstan den tru tori disi, ma den ben feni taki Gado no ben puru a wet di e taki dati sma musu besnèi. Den ben o wani kenki a denki fu den?

8. Fu san ede den tyari a problema di ben abi fu du nanga a besnèi di sma musu besnèi, go na a tiri skin na ini Yerusalem?

⁸ Lukas e taki moro fara: „Ma Paulus nanga Barnabas no ben agri nanga den [„wan tu disipel di ben kon fu Yudea”] èn a sani disi tyari wán dyugudyugu kon. Fu dati ede den meki Paulus, Barnabas, nanga wan tu trawan go na den apostel nanga den owruman na ini Yerusalem fu taki fu a tori disi” (Tori 15:2). c Di ’den no ben agri nanga makandra èn di a sani disi tyari wán dyugudyugu kon’, dan dati sori krin fa den ben e denki fu sani. Ala tu sei ben feni taki den abi leti èn a gemeente na Antiokia no ben man lusu a problema disi. Fu di den ben wani taki freide nanga wánfasi tan na ini a gemeente, meki den teki a koni besroiti fu go „na den apostel nanga den owruman na ini Yerusalem”, di ben de a tiri skin, so taki den ben kan lusu a problema. San wi kan leri fu den owruman fu Antiokia?

9, 10. Fa den brada na Antiokia èn Paulus nanga Barnabas na wan moi eksempre gi wi na ini a ten disi?

⁹ Wan prenspari sani di wi kan leri na taki wi musu fertrow Gado en organisâsi. Luku a sani disi: Den brada fu Antiokia ben sabi taki ala den brada fu a tiri skin ben de Dyu Kresten. Ma tòg den ben abi a fertrow taki a tiri skin ben o lusu a problema di abi fu du nanga a besnèi di sma musu besnèi, na wan fasi di e kruderi nanga Bijbel. Fu san ede? A gemeente ben de seiker taki Yehovah ben o gebroiki en santa yeye nanga Yesus Krestes, na Edeman fu a Kresten gemeente, fu tiri sani (Mat. 28:18, 20; Ef. 1:22, 23). Te bigi problema e opo kon na ini a ten disi, dan wi musu teki a moi eksempre fu den bribiman fu Antiokia, fu di wi e fertrow Gado en organisâsi nanga a Tiri Skin fu salfu Kresten.

¹⁰ A tori disi e leri wi tu taki a prenspari fu abi sakafasi nanga pasensi. Na a santa yeye srefi ben sori taki den brada ben musu teki Paulus nanga Barnabas fu go na den trakondre sma. Ma di Paulus nanga Barnabas ben de na Antiokia, den no gebroiki a posisi fu den  fu lusu a problema di ben abi fu du nanga a besnèi di sma musu besnèi (Tori 13:2, 3). Boiti dati, Paulus ben skrifi bakaten: „Mi go [na Yerusalem] fu di Masra sori mi taki mi musu go” (Gal. 2:2). Disi e sori taki Gado ben e tiri sani. Owruman na ini a ten disi e pruberi fu abi a srefi sakafasi nanga pasensi te problema e opo kon di kan tyari pratifasi kon na ini a gemeente. Na presi fu strei nanga makandra suma abi leti, den e suku yepi na Yehovah, fu di den e luku san Bijbel e taki fu a tori èn den e luku tu san a srafu di de fu fertrow e taki.​—Fil. 2:2, 3.

11, 12. Fu san ede a prenspari fu wakti Yehovah?

¹¹ A kan taki wi musu wakti Yehovah son leisi fu tyari wan tori kon na krin. Hori na prakseri taki den Kresten brada fu Paulus en ten ben musu wakti teleki a yari 49 fosi Yehovah tyari kon na krin efu trakondre sma ben musu besnèi noso no besnèi. Gado tyari a tori disi kon na krin sowan 13 yari baka di Kornelius ben salfu nanga santa yeye na ini a yari 36. Fu san ede a ben teki so langa? Kande Gado ben wani gi ret’ati Dyu nofo ten fu kon gwenti so wan bigi kenki na ini a fasi fa den ben e si sani. Na owru ferbontu di Gado ben meki nanga den lobi afo Abraham taki en nanga den bakapkin fu en musu besnèi, ben kon na wan kba baka 1900 yari. Sobun, a kenki disi no ben de wan pkin sani gi den Dyu!​—Yoh. 16:12.

¹² A de wan bigi grani trutru fu kisi leri fu wi hemel Tata di abi pasensi nanga switifasi, so taki wi kan kenki den fasi fu wi. Den bakapisi bun èn wi e kisi wini fu dati ala ten (Yes. 48:17, 18; 64:8). Sobun, bigimemre no musu meki wi hori nomo na wi eigi denki èn wi no musu kisi atibron te sani e kenki na ini na organisâsi noso te wan kenki e kon na ini a fasi fa wi ben gwenti ferklari son Bijbeltekst (Preik. 7:8). Efu yu kon si taki yu e kisi a  firi fu du dati, awansi na pkinso nomo, dan fu san ede yu no e begi èn e denki dipi fu den moi gronprakseri di de fu feni na ini Tori fu den apostel kapitel 15? d

13. Fa wi kan sori pasensi na ini a preikiwroko neleki Yehovah?

¹³ A kan de fanowdu fu abi pasensi te wi e studeri Bijbel nanga sma di feni en muilek fu lusu falsi kerkileri noso gwenti di no e kruderi nanga Bijbel, ma di den lobi. Na den momenti dati, wi musu gi a studenti nofo ten fu meki a yeye fu Gado doro en ati (1 Kor. 3:6, 7). A ben o bun tu fu begi fu a tori disi. Na a yoisti ten Gado o sori wi wan fasi fu kon sabi san na a moro koni sani fu du.​—1 Yoh. 5:14.

14, 15. Fa a gemeente fu Antiokia gi Paulus, Barnabas nanga den tra sma di ben de nanga den, grani? Fa den ben de wan blesi gi den Kresten brada nanga sisa fu den?

¹⁴ Lukas e taki moro fara: „Baka di a gemeente tyari den man disi af’pasi, den drai go baka. Ne Paulus, Barnabas nanga den tra brada waka go na Fenisia nanga Samaria. Den ben e ferteri den brada drape finfini fa den sma di no de Dyu ben drai den libi. A sani disi ben meki den prisiri” (Tori 15:3). Iya, a gemeente ben tyari Paulus, Barnabas nanga den tra sma di ben de nanga den af’pasi fu gi den grani èn fu sori den Kresten lobi. Nanga dati a gemeente ben sori taki den wani taki Gado blesi den man disi. Dyaso wi e si baka fa den brada fu Antiokia e gi wi wan moi eksempre. Yu e sori taki yu e lespeki den Kresten brada nanga sisa fu yu, „spesrutu den wan [den owruman] di e wroko tranga fu taki fu a wortu fu Gado èn fu leri sma a wortu dati”?​—1 Tim. 5:17.

¹⁵ Di a grupu disi ben de na pasi, dan den ben de wan blesi gi den Kresten brada fu den na Fenisia nanga Samaria, fu di den ben ferteri den „finfini” san den ondrofeni di den ben e preiki gi den trakondre sma di no de Dyu. A kan taki na mindri den arkiman yu ben abi Dyu bribiman tu di ben lowe go na den kontren dati, baka di sma kiri Stefanus fu en bribi ede. Na so a de tu na ini a ten disi, taki te den Kresten brada fu wi e yere fa Yehovah e blesi a wroko fu meki disipel, dan dati e gi den dek’ati, spesrutu den wan di e kisi tesi. Yu e go na den Kresten konmakandra, den kongres nanga den tra bigi konmakandra fu kan kisi wini fu den sortu ondrofeni disi? Yu e kisi wini tu fu di yu e leisi den ondrofenitori fu Kresten brada nanga sisa di skrifi na ini den papirawan fu den buku noso den tijdschrift fu wi noso na tapu jw.org?

16. San e sori taki a tori di abi fu du nanga a besnèi di sma musu besnèi, ben tron wan bigi problema?

 ¹⁶ Baka di a grupu di ben kmoto na Antiokia, waka sowan 550 kilometer go na zuidsei, dan te fu kba den doro a presi pe den ben e go. Lukas skrifi: „Di den doro na ini Yerusalem, dan a gemeente, den apostel nanga den owruman gi den man disi wan switikon èn den man ferteri den ala den sani di Gado ben meki den du” (Tori 15:4). Ma „wan tu fu den sma di ben teki a bribi, ben de bakaman fu den Fariseiman fosi. Den sma disi opo fu den sturu èn den taki: ’Den musu besnèi èn wi musu taigi den fu du san a Wet di Gado gi Moses e taki’” (Tori 15:5). A de krin, taki a tori di abi fu du nanga a besnèi di Kresten di no ben de Dyu musu besnèi, ben kon tron wan bigi problema èn a ben musu kisi wan lusu.

17. Suma ben de na ini a tiri skin na Yerusalem èn fu san ede „den owruman” ben de na ini tu?

¹⁷ „Den wan di e suku rai na trawan, abi koni”, na so Odo 13:10 e taki. Soleki fa a bun gronprakseri disi e taki, dan „den apostel nanga den owruman kon makandra fu taki fu a tori disi” (Tori 15:6). Di „den apostel nanga den owruman” du dati, dan den ben e teki presi gi a heri Kresten gemeente, neleki fa a Tiri Skin e du dati na ini a ten disi. Fu san ede „den owruman” ben e wroko makandra nanga den apostel? Hori na prakseri taki sma ben kiri na apostel Yakobus èn taki den ben poti Petrus na straf’oso wan pisi ten. A kan taki den srefi sortu sani disi ben kan psa tu nanga den tra apostel? Fu di tra man ben de drape di ben salfu nanga santa yeye èn di ben sabi du a wroko fu den, meki ala ten brada ben o de di ben o man teki fesi na ini den gemeente na wan fasi di fiti.

18, 19. Sortu krin sani Petrus taki èn san den arkiman fu en ben musu kon ferstan?

¹⁸ Lukas e taki moro fara: „Di den no ben man agri nanga makandra, dan Petrus opo èn a taigi den: „Mi brada, unu sabi heri bun taki  mi ben de a foswan di Gado seni fu tyari a bun nyunsu gi den sma di no de Dyu, so taki den ben kan teki a bribi. Gado di sabi fa sma ati de, sori taki a feni den bun, fu di a gi den a santa yeye leki fa a gi wi dati tu. A no si nowan enkri difrenti na mindri wi nanga den, ma a krin den ati fu di den ben bribi’” (Tori 15:7-9). Wan wortubuku e taki dati a Griki wortu di vertaal nanga „agri nanga makandra” na ini vers 7 wani taki tu ’suku fu kon ferstan’ noso ’fu ondrosuku’. Soleki fa a sori, dan nanga wan krin ati den brada ben e sori taki den no e agri nanga makandra, ma den ben e taki krin san den ben denki.

¹⁹ Den sani di Petrus taki na wan krin fasi ben memre ala brada taki a ben de drape di den fosi trakondre sma di no ben besnèi, ben salfu nanga santa yeye na ini a yari 36. Den trakondre sma dati ben de Kornelius nanga en osofamiri. Sobun, efu Yehovah no ben e si wan difrenti moro na mindri Dyu nanga sma di no de Dyu, dan suma ben e gi libisma a reti fu du dati? Boiti dati, wan sma en ati no ben o kon krin te a ben o hori a Wet di Gado gi Moses, ma te a ben o bribi na ini Krestes.​—Gal. 2:16.

20. Fa den sma di ben wani nomonomo taki sma besnèi, ben „e tesi Gado”?

²⁰ Baka di a kon na krin san Gado wortu nanga a santa yeye e taki fu a tori, dan Petrus tapu nanga den wortu disi: „We dan fu san ede unu e tesi Gado fu di unu e poti wan hebi lai na tapu den disipel? Den afo fu wi no ben man tyari a lai dati èn wi srefi no ben man tyari en tu. Ma wi e bribi taki a bun-ati fu Masra Yesus o meki wi kisi ferlusu neleki den” (Tori 15:10, 11). Fu taki en leti, den Dyu Kresten di ben wani nomonomo taki sma musu besnèi, ben „e tesi Gado”, noso den ben e du sani di ben o meki taki Gado lasi en pasensi te fu kba. Den Dyu Kresten ben e pruberi fu dwengi den trakondre sma fu hori wan wet di den Dyu srefi no ben man hori finfini, san ben abi leki bakapisi taki den ben o kisi dede leki strafu (Gal. 3:10). Na presi fu dati, den Dyu arkiman fu Petrus ben musu de nanga tangi taki Gado sori den bun-ati nanga yepi fu Yesus.

21. Di den brada ben e taki fu a problema di abi fu du nanga a besnèi di sma musu besnèi, dan san Barnabas nanga Paulus ferteri den?

²¹ Soleki fa a sori, dan den sani di Petrus taki, naki na ati fu den arkiman èn dati meki „ala sma tan pî”. Baka dati Barnabas nanga Paulus ferteri „fa Gado meki den du furu wondru nanga bigi sani gi den sma di no de Dyu” (Tori 15:12). Te fu kba, den apostel nanga den owruman ben abi na okasi fu luku ala bewijs èn fu teki wan besroiti di ben o sori krin san na a wani fu Gado te a abi fu du nanga a besnèi di sma musu besnèi.

22-24. (a) Fa a Tiri Skin na ini a ten disi e teki na eksempre fu a tiri skin na ini a fosi yarihondro? (b) Fa ala owruman kan sori taki den e lespeki a tiri fu Gado?

²² Te den memre fu a Tiri Skin na ini a ten disi e kon makandra, dan  den e suku rai na ini Gado Wortu èn den e begi fayafaya fu kisi yepi fu a santa yeye (Ps. 119:105; Mat. 7:7-11). Fu man teki bun besroiti, dan ibri memre fu a Tiri Skin e kisi fu yere biten fu sortu sani den o taki na tapu a konmakandra. Na so fasi den kan denki dipi fu den sani disi èn begi fu dati (Odo 15:28). Na a konmakandra, den salfu brada disi e taki fri san den e denki. Den e du dati na wan lespeki fasi èn den e gebroiki Bijbel furu tron.

²³ Den gemeente owruman musu teki na eksempre disi. Efu den kon makandra fu taki fu wan seryusu tori èn den no man lusu en, dan den kan aksi a bijkantoro na ini a kondre fu den, noso den brada di e teki presi gi den soleki den kring-owruman di e go na difrenti gemeente, fu yepi den. Efu a de fanowdu, dan a bijkantoro kan skrifi a Tiri Skin.

²⁴ Yehovah e blesi den sma di abi sakafasi, di e tai hori na en èn di abi pasensi. Iya, a e blesi den wan di e horbaka gi den seti fu en na ini a Kresten gemeente. Soleki fa wi o si na ini kapitel 14, dan Gado e blesi den sma di e du den sani disi. A o meki taki sani waka bun na ini a gemeente, den o ferstan krin fa Gado e tiri den èn fa den musu gi yesi na en, èn den o abi wánfasi leki Kresten.