1, 2. (a) Sortu bosroiti ibriwan fu wi musu teki? (b) San wan engel du di Yohanes ben wani anbegi en?

 IBRIWAN fu wi musu piki a prenspari aksi disi: Suma mi o anbegi? Furu sma feni taki a muilek fu piki na aksi disi fu di so furu gado de di sma e anbegi. Ma te yu luku en bun, a no muilek fu bosroiti suma wi o anbegi. Tu sma nomo de di wi kan anbegi: Yehovah Gado noso Satan Didibri.

² Satan wani taki sma anbegi en. A sani disi ben de krin fu si di a kon tesi Yesus. Soleki fa wi si na ini kapitel 1 fu a buku disi Satan taigi Yesus taki a o gi en ala den kownukondre fu grontapu. San Didibri ben wani fu Yesus? A taigi Yesus: „Anbegi mi wán leisi nomo” (Mat. 4:9). Ma na a tra sei na engel di ben tyari a boskopu fu a buku Openbaring gi na apostel Yohanes no ben wani taki sma anbegi en. (Leisi Openbaring 22:8, 9.) Di Yohanes ben wani anbegi na engel, na engel taigi en: „No du dati!” Na engel disi ben abi sakafasi. Na presi fu taki ’anbegi mi’, a taki „anbegi Gado”.

3. (a) Fa a buku disi e yepi wi? (b) San wi o luku?

 ³ A buku disi e yepi wi fu du san na engel taigi Yohanes. A e yepi wi fu tan anbegi Yehovah Gado wawan (Deut. 10:20; Mat. 4:10). Meki wi go luku baka san den profeititori nanga den fisyun na ini a Bijbel buku Esekièl e leri wi fu a tru anbegi. Baka dati wi o luku san Bijbel e taki fu a ten di e kon te ala sma o kisi wan lasti tesi. Den sma di o pasa a tesi disi o libi fu têgo èn den o si fa a tru anbegi o seti na heri grontapu.

4. San na den dri prenspari sani di wi leri na ini a buku Esekièl?

⁴ Na ini a buku Esekièl wi leri taki na ini a tru anbegi (1) wi musu anbegi Yehovah wawan, (2) wi musu anbegi Yehovah na a fasi di a feni bun makandra nanga a pipel fu en, èn (3) wi musu sori lobi gi trawan. Meki wi go luku san den profeititori nanga den fisyun na ini a buku disi leri wi fu den dri sani disi.

5-9. Fa den kapitel disi e sori taki wi musu anbegi Yehovah wawan?

⁵ Kapitel 3: a Na ini wan fisyun Esekièl e si taki wan alenbo de lontu Yehovah èn taki Yehovah e tiri den makti engel fu hemel. A fisyun disi e leri wi taki na Almakti Gado wawan warti fu kisi anbegi.​—Esek. 1:4, 15-28.

⁶ Kapitel 5: Kande yu skreki di yu si fa sma ben doti a tempel fu Yehovah. A fisyun di e taki fu a tori disi e leri wi taki noti no kibri gi Yehovah. Awinsi tra sma no e si, Yehovah sabi te en pipel drai baka gi en èn te den e anbegi falsi gado. A sani disi e hati en èn a e strafu den sma di e du den sani disi.​—Esek. 8:1-18.

⁷ Kapitel 7: Den krutuboskopu di Yehovah ben abi gi den kondre di ben „spotu” Israel ben sori taki Yehovah o strafu den sma di e du ogri nanga en pipel (Esek. 25:6). Ma wi e leri tu taki Yehovah musu de a moro prenspari sma gi wi. Noiti wi musu trangayesi Yehovah soso fu plisi wi famiri di no e dini en. Boiti dati, wi no o frutrow tapu den gudu fu wi èn wi o gi yesi na Yehovah te libisma tiriman e aksi wi fu du sani di a no feni bun.

⁸ Kapitel 13 nanga 14: A fisyun fu a tempel di de tapu wan hei bergi e leri wi taki wi musu hori wi na den wet fu Yehovah, fu di a hei moro ala tra gado.​—Esek. 40:1–48:35.

⁹ Kapitel 15: Den profeititori di e agersi Israel nanga Yuda nanga huru-uma, e leri wi taki Yehovah no lobi en srefisrefi te anbegiman fu en e go dini falsi gado.​—Esek., kap. 16, 23.

10-14. Fa den profeititori disi e sori taki a pipel fu Gado musu abi wánfasi èn taki den musu anbegi en na a fasi di a feni bun?

¹⁰ Kapitel 8: A profeititori di e pramisi taki Yehovah o poti „wán skapuman” fu sorgu gi en pipel, e leri wi taki wi musu saka wisrefi na ondro a tiri fu Yesus. Boiti dati, freide nanga wánfasi musu de na wi mindri.​—Esek. 34:23, 24; 37:24-28.

¹¹ Kapitel 9: Den profeititori fu Esekièl di e sori taki Gado pipel ben o komoto na ini katibo fu Babilon èn taki den ben o drai go baka na den kondre, e leri den sma di wani dini Yehovah wan moi sani. A e leri den taki den musu komoto na ini falsi bribi èn taki den no musu abi noti fu du nanga falsi anbegi moro. Aladi wi de fu difrenti ras, aladi wi gudu noso pôti èn aladi wi kweki na difrenti fasi, toku wi musu abi wánfasi. A sani disi e sori sma taki wi na Gado pipel.​—Esek. 11:17, 18; 12:24; Yoh. 17:20-23.

¹² Kapitel 10: A fisyun fu den drei bonyo di e kon na libi baka e sori taki Gado pipel o abi wánfasi. A de wan grani fu de na ini na organisâsi fu Gado di a krin èn pe ala sma e wroko makandra leki wán legre!​—Esek. 37:1-14.

¹³ Kapitel 12: A profeititori fu den tu tiki di e tron wán e sori krin taki a pipel fu Gado ben o abi wánfasi. A e tranga wi bribi fu si fa den salfuwan nanga den tra skapu abi wánfasi soleki fa a profeititori ben taki. Aladi politiek nanga kerki e prati sma na ini a ten disi, toku wi abi wánfasi fu di wi lobi makandra.​—Esek. 37:15-23.

¹⁴ Kapitel 16: A fisyun fu a man nanga na enkikokro nanga den man di abi fetisani fu kiri sma, abi wan warskow gi wi. A e leri wi taki soso den sma di e anbegi Gado na a fasi di a feni bun, o kisi wan marki na a ten fu a „bigi banawtu”, fu tan na libi.​—Mat. 24:21; Esek. 9:1-11.

15-18. Fu san ede wi musu tan sori lobi èn fa wi kan du dati?

¹⁵ Kapitel 4: A fisyun fu den fo libisani e leri wi fu den fasi fu Yehovah. A moro prenspari fasi fu en na lobi. A fasi fa wi e taki èn den sani di wi e du, musu sori taki wi lobi trawan. Te wi e du dati, dan sma o si taki Yehovah na wi Gado.​—Esek. 1:5-14; 1 Yoh. 4:8.

¹⁶ Kapitel 6 nanga 11: Fu di Gado lobi wi, meki a poti son sma leki waktiman. Esekièl ben de wan fu den waktiman disi. Gado na lobi èn dati meki a no wani taki nowan sma dede te a o pori a grontapu disi di Satan e tiri (2 Petr. 3:9).  Wi kan sori lobi neleki Gado te wi e horibaka gi den wan di Yehovah poti leki waktiman na ini a ten disi.​—Esek. 33:1-9.

¹⁷ Kapitel 17 nanga 18: Yehovah e sori sari-ati, ma a sabi taki furu sma no o wani kenki èn taki den o pruberi fu pori den anbegiman fu en. Fu di Yehovah lobi en pipel, meki a o kibri den te „Gok fu a kondre Magok” o kon feti nanga den. Lobi e meki taki wi e du muiti fu warskow so furu sma leki wi man gi a dei fu Yehovah te a o kiri den sma di e pina en pipel.​—Esek. 38:1–39:20; 2 Tes. 1:6, 7.

¹⁸ Kapitel 19, 20, nanga 21: Den fisyun pe wi e si wan liba di e gi libi èn pe sma e prati a kondre, e sori wi taki Yehovah lobi en pipel. Den fisyun e sori wi fa wi o kisi wini fu a moro bigi fasi fa Yehovah sori lobi gi wi. A seni en Manpikin kon fu dede gi wi, so taki wi kan kisi pardon fu den sondu fu wi èn so taki wi kan libi fu têgo leki pikin fu Gado. A moro bun fasi fa wi kan sori lobi gi sma na fu fruteri den fu den moi sani di Yehovah o du gi den sma di e bribi na ini en Manpikin.​—Esek. 45:1-7; 47:1–48:35; Openb. 21:1-4; 22:17.

19. San Yesus o du na ini den dusun yari te a o tiri?

¹⁹ Na ini den dusun yari te Yesus o tiri, a o gi milyardmilyard sma wan opobaka èn wi no o sari moro fu di ’dede, a feanti’ fu wi, no o de moro (1 Kor. 15:26; Mark. 5:38-42; Tori 24:15). Sensi a ten di Adam nanga Eva sondu, libisma e pina èn den e dede. Ma Yesus o tyari wan kenki kon te a o gi dedesma wan opobaka. A o gi den na okasi fu abi wan switi libi na grontapu soleki fa a ben de fosi Adam nanga Eva sondu. Nanga yepi fu a lusu-paiman a o puru siki, feti nanga angriten. Ma san moro prenspari na taki a o puru a rutu fu ala den problema fu wi. Dati na a sondu di wi kisi fu Adam (Rom. 5:18, 19). Yesus o „tyari wan kaba kon na den wroko fu Didibri”.​—1 Yoh. 3:8.

20. Fa Yesus nanga den 144.000 sma o sori taki den abi sakafasi trutru? Tyari disi kon na krin. (Luku a prenki na a bigin fu a kapitel.)

²⁰ Leisi 1 Korentesma 15:24-28. San o pasa te libisma no abi sondu moro èn te grontapu de wan paradijs soleki fa Yehovah ben abi na prakseri? Yesus nanga den 144.000 sma o sori taki den abi sakafasi trutru. Den o de klariklari fu gi a Kownukondre baka na Yehovah, aladi den tiri dusun yari langa. Ala den sani di a Kownukondre du o tan fu ala ten.

21, 22. (a) Fa grontapu o de na a kaba fu a Dusun Yari Tiri? (b) Fu san ede Yehovah o lusu Satan nanga den ogri yeye?

²¹ Na a ten dati Yehovah o du wan sani di e sori taki a e frutrow den anbegiman fu en na grontapu. A o puru Satan nanga den ogri yeye na ini a dipi peti pe den ben tai dusun yari. (Leisi Openbaring 20:1-3.) Satan nanga den ogri yeye o si taki grontapu nanga den sma na tapu o de heri tra fasi. Fosi Armagedon, Satan ben kori bun furu sma èn wánfasi no ben de fu di sma ben abi bita-ati èn den ben desko makandra (Openb. 12:9). Ma na a kaba fu a Dusun Yari Tiri, ala sma o anbegi Yehovah leki wán famiri. Heri grontapu o de wan paradijs pe freide de.

²² Fu san ede Yehovah o lusu Satan nanga den ogri yeye na ini a moi paradijs? Furu fu den sma di o libi na a ten dati no kisi na okasi fu sori taki den o tan dini Yehovah te den  e kisi tesi. Furu fu den dede sondro taki den ben sabi Yehovah èn te den o kisi wan opobaka den o de na ini a paradijs. Yehovah no o gi den libi wawan, ma a o sorgu taki den abi ala sani fu tan na libi èn fu abi wan bun matifasi nanga en. Nowan sma na ini a paradijs o tapu den fu dini Yehovah. Ala sma na den lontu o lobi Yehovah èn den o dini en. Kande Satan o taki a srefi sani fu den sma di kisi wan opobaka, leki san a ben taki fu Yob. A o feni taki den e dini Gado soso fu di a e kibri den èn fu di a e blesi den (Yob 1:9, 10). Yehovah o gi wi na okasi fu sori taki wi o tan horibaka gi en fu di en na wi Papa èn wi Tiriman. Te wi pasa a tesi disi, dan a nen fu wi o tan na ini a buku fu libi.​—Openb. 20:12, 15.

23. Sortu bosroiti ibri sma o abi fu teki?

²³ Wan syatu pisi ten Satan o kisi na okasi fu kori libisma  fu drai baka gi Gado. Fa a o tesi den? A sori leki ala sma o kisi a srefi tesi di Adam nanga Eva ben kisi. Den o abi fu bosroiti efu den o tan dini Yehovah èn efu den o tan gi yesi na den wet fu en, noso efu den o horibaka gi Satan.

24. Fu san ede Bijbel e kari den sma di o opo densrefi teige Gado, Gok nanga Magok?

²⁴ Leisi Openbaring 20:7-10. Bijbel e kari den sma di o opo densrefi teige Gado na a kaba fu a dusun yari, Gok nanga Magok. Den o abi den srefi fasi leki den sma di o feti nanga Gado pipel na a ten fu a bigi banawtu, soleki fa a profeititori fu Esekièl ben sori. Esekièl e kari a grupu di o gens Gado pipel na a ten fu a bigi banawtu „Gok fu a kondre Magok” (Esek. 38:2). A grupu disi na den difrenti kondre di o opo densrefi teige Gado. Ma na a ten fu a Dusun Yari Tiri, grontapu no o prati moro na ini difrenti kondre. Ala sma o saka densrefi na ondro wán regering, dati na Gado Kownukondre. Ala sma na grontapu o de wán pipel. Ma a profeititori fu Yohanes e kari den sma di o opo densrefi teige Gado, Gok nanga Magok èn a e kari den „den pipel” tu. Disi e sori  taki Satan o man tyari pratifasi kon na mindri son anbegiman fu Gado. Nowan sma o dwengi den sma disi fu teki a sei fu Satan. Ibriwan fu den sma disi di no abi sondu o teki den eigi bosroiti.

25, 26. Omeni sma o teki a sei fu Satan èn san o pasa nanga den?

²⁵ Omeni sma o teki a sei fu Satan? A nomru fu sma di o teki a sei fu Satan o de „leki a santi fu a se”. Ma disi no wani taki dati bun furu sma o opo densrefi teige Gado. Fa wi du sabi dati? Prakseri a sani di Gado ben pramisi Abraham. Yehovah taigi Abraham taki den bakapikin fu en ben o kon furu leki „den aisanti na sesyoro” (Gen. 22:17, 18). Ma a grupu disi abi 144.001 sma (Gal. 3:16, 29). Aladi disi na wan bigi grupu, toku a no furu te yu luku den milyardmilyard sma di e libi na grontapu. Na so a o de tu taki furu sma o teki a sei fu Satan, ma toku a grupu no o bigi tumusi. A grupu dati no o man pori den sma di o tan na Yehovah sei.

²⁶ Yehovah no o draidrai fu pori den sma di o opo densrefi  teige en. Makandra nanga Satan nanga den ogri yeye, den o kisi pori èn noiti moro den o kon na libi baka. A wan-enkri sani di sma o memre fu den, na den don bosroiti di den teki èn den takru bakapisi di dati tyari kon gi den.​—Openb. 20:10.

27-29. Fa a libi o de gi den sma di o pasa a lasti tesi? (Luku a faki tu „A lasti tesi”.)

²⁷ Ma a nen fu den sma di o pasa a lasti tesi o tan na ini „a buku fu libi” (Openb. 20:15). Na a ten dati ala den pikin fu Yehovah o de leki wán famiri èn den o dini en.

²⁸ Prakseri fa a o de na a ten dati. Yu o abi switi wroko fu du èn yu o lai bun mati. Noiti moro yu nanga den famiri nanga den mati fu yu o pina. Fu di yu no o abi sondu moro, meki yu no o abi a lusu-paiman fanowdu fu kon krosibei na Gado. Noti no o tapu wi fu de mati fu Yehovah. San moro prenspari na taki ala sma na hemel nanga grontapu o anbegi Yehovah na a yoisti fasi.

²⁹ Yu o de drape fu si a bigi dei disi? Efu yu du den dri prenspari sani di wi leri na ini a buku Esekièl, dan yu o man de drape. Yu musu anbegi Yehovah wawan, yu musu anbegi en na a fasi di a feni bun makandra nanga en pipel èn yu  musu sori lobi gi trawan. Den profeititori na ini a buku Esekièl e leri wi wan lasti prenspari sani. San na a sani dati?

30, 31. San den wortu „den sa musu fu sabi taki mi na Yehovah” wani taki gi (a) den feanti fu Gado? (b) a pipel fu Gado?

³⁰ Den wortu „den sa musu fu sabi taki mi na Yehovah” de furu na ini a buku Esekièl (Esek. 6:10; 39:28). Gi den feanti fu Gado den wortu disi wani taki feti nanga dede. Den no o sabi nomo taki Yehovah de. Ma nanga tranga di o leri san a nen fu en wani taki. A nen disi wani taki „A o meki kon tron”. „Yehovah di e tiri den legre” o tron „wan tranga fetiman” di o feti nanga den (1 Sam. 17:45; Eks. 15:3). Den o frustan wan prenspari sani fu Yehovah: Noti no kan tapu en fu du san a abi na prakseri. Ma a o lati tumusi gi den.

³¹ Ma gi Gado pipel den wortu „den sa musu fu sabi taki mi na Yehovah” wani taki freide nanga libi. Yehovah o meki wi tron san a ben abi na prakseri sensi a bigin. Wi o tron manpikin nanga umapikin di no abi sondu èn di e sori den fasi fu en (Gen. 1:26). Nownow kaba Yehovah de leki wan lobi Papa èn wan Skapuman di e kibri wi. Heri esi a o tron wan Kownu di o wini den feanti fu en. Fosi a dei dati doro, meki wi gi yesi na a boskopu fu Esekièl. Meki den sani di wi e taki èn den sani di wi e du ibri dei sori taki wi sabi Yehovah. Dan te a bigi banawtu o bigin, wi no o abi fu frede. Na presi fu dati wi o opo wi ede luku go na loktu, fu di wi sabi taki wi frulusu de krosibei (Luk. 21:28). Now na a ten fu yepi sma na ala sei fu kon sabi a wan-enkri tru Gado, fu lobi en èn fu anbegi en. Den musu kon sabi a bigi nen fu en, Yehovah.​—Esek. 28:26.