Na ini Esekièl kapitel 23 wi e si fa Yehovah krutu a pipel fu en fu di den go dini falsi gado. Kapitel 23 e taki fu furu fu den sani di de na ini kapitel 16. Ala den tu kapitel e agersi a pipel nanga huru-uma. Na ini na agersitori fu kapitel 23 Yerusalem na a pikin sisa èn Samaria na a bigi sisa. Ala tu kapitel e sori taki a pikin sisa bigin huru neleki a bigi sisa. Ma a pikin sisa kon moro ogri leki a bigi sisa. Na ini kapitel 23 Yehovah gi den tu sisa disi nen: Ohola na a bigi sisa, dati na Samaria, a mamafoto fu a tin-lo kownukondre Israel. Oholiba na a moro yongu sisa, dati na Yerusalem, a mamafoto fu Yuda. a​—Esek. 23:1-4.

Tra sani de di ala tu kapitel e taki fu en. Den moro prenspariwan na disi: Fosi den uma disi tron huru-uma den ben de wefi fu Yehovah. Bakaten den drai baka gi en. Boiti dati, ala tu kapitel ben gi a pipel howpu. Kande disi no de so krin fu si na ini kapitel 23 pe Yehovah e taki: „Mi o meki yu tapu nanga na ogri di yu e du sondro fu syen èn nanga a huru di yu ben bigin huru.” Ma toku a sani disi e kruderi nanga a boskopu na ini kapitel 16 pe Yehovah e taki krin taki a o meki en bun baka nanga a pipel.​—Esek. 16:16, 20, 21, 37, 38, 41, 42; 23:4, 11, 22, 23, 27, 37.

Na ini a ten di pasa, den buku fu wi ben taki dati den tu sisa, Ohola nanga Oholiba ben prenki a Lomsu Kerki nanga a Protestant Kerki, den tu moro bigi Kresten kerki. Ma den brada begi fu a tori disi èn den ondrosuku sani moro bun. Den ben aksi densrefi: A de so taki den falsi Kresten kerki ben de a wefi fu Yehovah? Yehovah ben meki wan frubontu nanga den kerki disi? Nôno. Den falsi Kresten kerki no ben de ete di Yesus meki a „nyun frubontu” nanga na Israel fu Gado èn noiti den kerki disi ben de wan pisi fu a salfu grupu disi (Yer. 31:31; Luk. 22:20). Na baka di den apostel dede, yu bigin kisi falsi Kresten kerki. Dati ben de baka a yari 300. Den falsi Kresten disi ben de a „takru wiwiri” di Yesus ben taki fu en na ini na agersitori fu en.​—Mat. 13:24-30.

Wan tra prenspari difrenti na disi: Yehovah ben sori taki efu Yerusalem nanga Samaria ben kenki, dan Yehovah ben o meki sani bun baka nanga den (Esek. 16:41, 42, 53-55). Bijbel e sori taki Gado o meki sani bun baka nanga den falsi Kresten kerki? Kwetikweti! Yehovah o pori den fu têgo neleki ala den tra bribi fu Babilon a Bigiwan.

Sobun, Ohola nanga Oholiba no e prenki den falsi Kresten kerki. Ma den e yepi wi fu frustan wan prenspari sani: Den e sori wi fa Yehovah e si den wan di e taki dati den na en pipel, ma di e pori a nen fu en èn di no e anbegi en leki fa a wani. Na a sani disi den falsi Kresten kerki e du. Den e meki sma bribi taki den e dini a Gado fu Bijbel, ma dati no de so. San moro ogri na taki den e taki dati a lobi Manpikin fu Yehovah, Yesus Krestes, na den fesiman. Ma disi na wan lei fu di den e leri sma taki Yesus, Yehovah nanga a santa yeye na wán sma èn den e trangayesi a wet fu „no de wan pisi fu grontapu” (Yoh. 15:19). Den falsi Kresten kerki tan dini falsi gado èn den tan bumui nanga politiek. Dati meki a de krin taki den de wan pisi fu Babilon a Bigiwan, di Bijbel e kari „a bigi huru-uma” (Openb. 17:1). Wi kan de seiker taki den o kisi pori neleki ala den tra falsi bribi.