1, 2. Fu san ede Yehovah gebroiki fisyun fu leri den futuboi fu en prenspari sani fu hemel?

 KON MEKI WI taki dati wan papa nanga mama e sidon na tafra e studeri Bijbel nanga den yongu pikin fu den. A papa e sori den pikin wan tu prenki fu yepi den frustan wan tori fu Bijbel. Den pikin e lafu, den e bigin fruteri san den e si èn a papa e si taki den e frustan a tori. Fu di den pikin yongu ete, meki den prenki yepi den fu frustan sani fu Yehovah di den no ben o frustan efu den ben o leisi den nomo.

² Na a srefi fasi Yehovah gebroiki fisyun nanga dren fu yepi den anbegiman fu en fu frustan fa sani de na hemel. Fu eksempre, Yehovah sori Esekièl wan tu moi fisyun fu yepi en frustan prenspari sani fu en. Na ini a kapitel fosi a wan disi, wi taki fu wan fu den fisyun dati. Now wi o poti prakseri na wan fu den sani di Esekièl si na ini a moi fisyun dati èn san wi kan leri fu en. Disi o yepi wi fu kon moro krosibei na Yehovah.

3. (a) Soleki fa Esekièl 1:4, 5 e sori, dan san Esekièl si na ini wan fisyun? (Luku a prenki na a bigin fu a kapitel.) (b) Fa Esekièl ben fruklari san a si?

³ Leisi Esekièl 1:4, 5. Esekièl fruteri taki a si „fo libisani” di ben abi frei leki engel, nanga fesi fu libisma nanga meti. Esekièl taki dati den libisani „ben gersi” libisma. Te yu e leisi kapitel 1, dan yu o si taki a profeiti gebroiki den wortu „gersi” nanga „de leki” furu leisi (Esek. 1:13, 24, 26). A de krin taki den sani di Esekièl si no ben de so trutru, ma Yehovah ben gebroiki den fu sori en fa sani de na hemel.

4. (a) Fa a fisyun ben meki Esekièl firi? (b) San Esekièl ben sabi fu den kerub-engel?

⁴ Esekièl ben musu fu fruwondru fu den sani di a ben si èn di a ben yere na ini a fisyun. A ben taki dati den fo libisani ben gersi „krofaya di e bron”. Den ben buweigi so esi taki den ben gersi „faya di ben e koti na hemel”. A babari di den frei fu den ben meki ben de „leki a babari fu wan bigi sula”. Te den ben e gowe, a babari di Esekièl yere ben de „leki a babari fu wan legre” (Esek. 1:13, 14, 24-28; luku a faki „Mi ben luku den libisani”). Bakaten Esekièl e fruteri taki den fo libisani disi na „kerub-engel” di abi furu makti (Esek. 10:2). Esekièl en papa ben de priester, sobun a musu fu de so taki a ben sabi taki den kerub-engel e dini krosibei fu Yehovah.​—1 Kron. 28:18; Ps. 18:10.

5. (a) Fu san ede wi kan taki dati den fo kerub-engel nanga den fo fesi e leri wi furu fu a makti nanga a glori fu Yehovah? (b) Fu san ede a pisi disi fu a fisyun e memre wi san a nen fu Yehovah wani taki? (Luku a futuwortu.)

⁵ Leisi Esekièl 1:6, 10. Esekièl e fruteri tu taki den kerub-engel abi fo fesi. Den abi a fesi fu wan libisma, wan lew, wan mankaw nanga wan aka. Den fo fesi disi di Esekièl si leri en furu fu a makti nanga a glori fu Yehovah. Fu san ede wi kan taki dati? Fu di den fesi e prenki difrenti moi fasi. Den e prenki krakti, makti nanga glori. A lew na wan meti di furu sma e frede, a mankaw nanga na aka na tranga meti èn libisma na a moro moi sani di Yehovah meki na grontapu. A meki libisma fu basi ala tra sani di a meki na grontapu (Ps. 8:4-6). Na ini a fisyun Esekièl si taki den fo kerub-engel di abi den fo fesi de na ondro a kownusturu fu Yehovah, a Moro Hei Tiriman fu hemel nanga grontapu. A sani disi e sori wi taki Yehovah kan gebroiki ala den sani di a meki fu du iniwan sani di a abi na prakseri. a A psalm skrifiman ben abi leti di a skrifi den wortu disi: „Yehovah seti en kownusturu steifi na ini hemel fu ala ten. A de kownu fu ala sani di de.”​—Ps. 103:19; 148:13.

6. San yepi Esekièl fu frustan san den fo fesi e prenki?

 ⁶ A kan taki baka di Esekièl go sidon denki fu den sani di a si, a ben man memre taki tra futuboi fu Gado di ben libi fosi a ten fu en, ben agersi sma nanga son meti. Fu eksempre, Yakob ben agersi en manpikin Yuda nanga wan lew èn a ben agersi Benyamin nanga wan busidagu (Gen. 49:9, 27). Fu san ede? Fu di a lew nanga a busidagu e prenki spesrutu fasi di den man disi nanga den bakapikin fu den ben o abi. Sobun, a kan taki den eksempre disi na ini Gado Wortu ben yepi Esekièl fu frustan taki den fo fesi fu den kerub-engel ben prenki moi fasi. Ma sortu fasi den ben prenki?

7, 8. Sortu fasi den fo fesi fu den kerub-engel e prenki?

⁷ San den Bijbel skrifiman di ben e libi fosi Esekièl ben taki fu a lew, na aka nanga a mankaw? Wan Bijbeltekst e taki fu ’man di abi deki-ati leki lew’ (2 Sam. 17:10; Odo 28:1). Wan tra tekst e taki: ’A bigi aka e frei so hei’ èn „a e tan luku fu si sani di de bun fara” (Yob 39:27, 29). Odo 14:4 e taki: „A krakti fu wan mankaw e meki taki nyanyan de fu koti bogobogo.” Den tekst disi yepi wi fu si sortu fasi den meti disi e prenki. Dati meki furu leisi den buku nanga tijdschrift fu wi e taki dati a lew e prenki a deki-ati di Yehovah abi fu du san reti, na aka e prenki a koni fu en fu si na fesi san o pasa èn a fesi fu a mankaw e prenki a bigi krakti fu en.

⁸ Ma san „a fesi fu wan libisma” e prenki? (Esek. 10:14) A musu fu de so taki a e sori go na wan fasi di meti no abi. Tra fasi leki den meti, Gado meki libisma leki fa ensrefi de (Gen. 1:27). Dati meki a gi libisma den wet disi: „Un musu lobi Yehovah un Gado nanga un heri ati” èn „un musu lobi tra sma leki fa unu lobi unsrefi” (Deut. 6:5; Lef. 19:18). Te wi e sori lobi gi trawan soleki fa den wet disi e taki, dan wi e teki na eksempre fu Yehovah. Na apostel Yohanes ben skrifi: „Wi abi lobi, fu di na Gado fosi ben lobi wi” (1 Yoh. 4:8, 19). Dati meki wi kan taki dati „a fesi fu wan libisma” e prenki lobi.

9. Suma abi den fasi di den fo fesi fu den kerub-engel e prenki?

⁹ Suma abi den fasi disi? Na den kerub-engel abi den fo fesi èn den kerub-engel e prenki ala den tra engel na hemel. Sobun, wi kan taki dati ala den engel na ini na osofamiri fu Yehovah abi den moi fasi disi (Openb. 5:11). Fu di Yehovah gi den kerub-engel libi, meki na en gi den engel  den moi fasi disi (Ps. 36:9). Sobun, den fo fesi fu den kerub-engel e sori go na den moi fasi di Yehovah srefi abi (Yob 37:23; Ps. 99:4; Odo 2:6; Mika 7:18). Fa Yehovah e sori taki a abi den fasi disi?

10, 11. Fa wi e kisi wini fu a fasi fa Yehovah e sori den prenspari fasi fu en?

¹⁰ Retidu. Fu di Yehovah na wan Gado di „lobi retidu”, meki a „no lobi a wan sma moro a trawan” (Ps. 37:28; Deut. 10:17). Sobun, awinsi suma na wi, awinsi wi gudu noso wi pôti, wi kan tron anbegiman fu en. Ala sma abi na okasi fu libi fu têgo na ini a Paradijs. Koni. Yehovah „koni srefisrefi”. Dati meki a gi wi wan buku di lai nanga „koni” rai (Yob 9:4; Odo 2:7). Den rai fu Bijbel e yepi wi nanga den problema di wi e kisi ibri dei èn den e yepi wi fu abi wan koloku libi. Krakti. Yehovah „abi furu krakti”. A e gebroiki en santa yeye fu gi wi „krakti di bigi pasa marki”. Disi e gi wi a krakti fu pasa iniwan hebi tesi di wi e kisi.​—Nah. 1:3; 2 Kor. 4:7; Ps. 46:1.

¹¹ Lobi. Yehovah „abi bun-ati pasa marki”. Dati meki noiti a o gowe libi den reti-ati futuboi fu en (Ps. 103:8; 2 Sam. 22:26). Sobun, awinsi wi no man du so furu moro gi Yehovah fu di wi siki noso fu di wi owru, wi kan de seiker taki Yehovah no o frigiti den sani di wi du gi en (Hebr. 6:10). A de krin taki a retidu, a koni, a krakti nanga a lobi fu Yehovah e tyari furu wini kon gi wi nownow kaba èn noiti dati o kenki.

12. San wi musu hori na prakseri fu den fasi fu Yehovah?

¹² Ma wi musu hori na prakseri taki wi leki libisma no man frustan ala sani fu Yehovah. Bijbel e taki dati wi sabi „wan tu sani nomo” fu en (Yob 26:14). „Wi no man sabi finifini fa na Almaktiwan de” fu di „en glori bigi so te, taki sma no man kon sabi ala sani fu en” (Yob 37:23; Ps. 145:3). Sobun, wi no sabi ala den fasi fu Yehovah. (Leisi Romesma 11:33, 34.) Sortu sani na ini a fisyun e poti prakseri na a prenspari sani disi?

13, 14. San den fo fesi fu den kerub-engel e prenki èn fu san ede wi kan taki dati?

¹³ Esekièl ben si taki ibriwan fu den kerub-engel abi fo fesi, den no ben abi wán fesi nomo. San disi e sori? Nofo tron te Bijbel e gebroiki a nomru fo, dan a e sori go na wan sani di no e mankeri noti (Yes. 11:12; Mat. 24:31; Openb. 7:1). Na ini a fisyun disi Esekièl kari a nomru fo, tin leisi! (Esek. 1:5-18) San disi e leri wi? Neleki fa den fo kerub-engel e prenki ala den tra engel na hemel, na so  den fo fesi fu den kerub-engel e prenki ala den fasi di Yehovah abi. b

¹⁴ Den fo wiel di Esekièl si na ini a fisyun disi kan yepi wi tu fu frustan taki den fo fesi no e prenki fo fasi nomo. Den fo bigi wiel disi de wan pisi fu a hemel wagi. Na so a de tu nanga den fo fesi fu den kerub-engel. Ala den fo fesi makandra e prenki ala den moi fasi fu Yehovah.

15. Sortu moi sani Esekièl leri fu a fosi fisyun di a kisi?

¹⁵ A fosi fisyun fu Esekièl leri en wan moi sani fu en matifasi nanga Yehovah. San na dati? Wi kan si dati te wi e luku den fosi sani di a taki na ini a Bijbel buku di a skrifi. Baka di Esekièl taki dati a ben de „na ini a kondre fu den Kaldeyasma”, a taki san a ondrofeni. A taki: „Drape mi firi a krakti fu Yehovah” (Esek. 1:3). Luku taki Esekièl no kisi a fisyun na ini Yerusalem, ma a taki dati  a kisi en drape na ini Babilon. c San disi leri Esekièl? A leri en a sani disi: Aladi a ben de wan katiboman di no ben e libi na ini Yerusalem pe a tempel ben de, toku Yehovah no ben de fara fu en. A fisyun di Yehovah gi Esekièl na ini Babilon e sori taki Esekièl ben kan anbegi Gado awinsi pe a ben de èn awinsi a ben de wan katiboman. San ben prenspari gi Yehovah na taki Esekièl ben wani dini en nanga en heri ati.

16. (a) Fa a fisyun fu Esekièl e trowstu wi? (b) Fu san ede yu e dini Yehovah nanga yu heri ati?

¹⁶ Fu san ede a fisyun fu Esekièl e trowstu wi na ini a ten disi? A e sori wi taki te wi e dini Yehovah nanga wi heri ati, a e tan krosibei fu wi awinsi pe wi e libi, awinsi o furu broko-ede wi abi èn awinsi na ini sortu situwâsi wi de (Ps. 25:14; Tori 17:27). Fu di Yehovah lobi den futuboi fu en, meki a abi furu pasensi nanga wi (Eks. 34:6). Dati meki noti no o man tapu Yehovah fu sori lobi gi wi (Ps. 100:5; Rom. 8:35-39). A fisyun disi e sori tu taki Yehovah santa èn taki a abi furu makti. Disi e memre wi taki na Yehovah wawan wi musu anbegi (Openb. 4:9-11). Wi breiti trutru taki Yehovah e gebroiki den sortu fisyun disi fu yepi wi fu kon sabi en moro bun! Te wi kon frustan den moi fasi fu Yehovah moro bun, dan wi o lobi en moro, wi o prèise en èn wi o dini en nanga wi heri ati èn nanga ala wi krakti.​—Luk. 10:27.

17. Sortu aksi wi o luku na ini a kapitel di e kon?

¹⁷ Ma a sari taki na ini a ten fu Esekièl sma ben pori a tru anbegi. Fa dati du kon? Fa Yehovah ben feni en? Èn san wi kan leri fu den sani di pasa na a ten dati? Wi o piki den aksi disi na ini a kapitel di e kon.