1-3. (a) San o pasa te Yehovah kisi „bigi atibron”? (b) Sortu aksi wi o luku?

 MANSMA, umasma nanga pikin e tanapu èn den e singi Kownukondre singi. Baka dati wan owruman e begi gi a grupu èn a e aksi Yehovah fu kibri den. Ala den brada nanga sisa fu a gemeente de seiker taki Yehovah o kibri den, ma toku den abi trowstu nanga deki-ati fanowdu. Na dorosei yu kan yere fa sma e feti. Armagedon bigin!​—Openb. 16:14, 16.

² Na a feti fu Armagedon Yehovah o kiri sma fu di a abi „bigi atibron”. (Leisi Esekièl 38:18.) En ati no o bron nanga wán legre nomo noso nanga wán kondre, ma en ati o bron nanga milyunmilyun sma na heri grontapu. Na a dei dati den dedeskin fu den sma di Yehovah kiri, o panya fu „a wan sei fu grontapu te na a tra sei”.​—Yer. 25:29, 33.

³ Fu san ede Yehovah, wan Gado fu lobi, wan Gado „di abi sari-ati nanga switifasi” èn di „ati no e bron esi”, o du so wan sani? Fu san ede a o kisi so wan „bigi atibron”?  (Eks. 34:6; 1 Yoh. 4:16) A piki tapu den aksi disi o trowstu wi, a o gi wi deki-ati èn o meki taki wi preiki fayafaya.

4, 5. Fu san ede wi kan taki dati Yehovah ati no e bron leki sondu libisma?

⁴ Wi musu hori na prakseri taki Yehovah no e atibron leki sondu libisma. Te libisma e atibron, den no man hori densrefi moro èn nofo tron den e du don sani. Fu eksempre, Kain, a fosi manpikin fu Adam kisi „bigi atibron” fu di Yehovah no ben feni na ofrandi fu en bun, ma a ben lobi na ofrandi fu Abel. San ben de a bakapisi? Kain kiri en brada (Gen. 4:3-8; Hebr. 11:4). Prakseri David tu, wan man di Yehovah ben lobi (Tori 13:22). Srefi a bun man disi kisi so wan atibron taki bijna a du wan ogri. Di a yere taki Nabal, wan gudu man kosi en nanga den man fu en, en ati bron so te taki en nanga den srudati fu en ’tai den feti-owru na den seibere’ fu go kiri Nabal nanga ala den man fu en oso. Koloku taki Abigayil, a wefi fu Nabal, ben man taki David nanga den man fu en fu no du a sani disi (1 Sam. 25:9-14, 32, 33). Wi kan frustan fu san ede Yehovah meki Yakobus skrifi a sani disi: „Na atibron fu libisma, e meki den du sani di Gado no feni bun.”​—Yak. 1:20.

⁵ Tra fasi leki libisma, Yehovah man hori ensrefi te en ati e bron èn wi sabi sortu sani e meki en ati bron. Awinsi Yehovah e kisi bigi atibron, toku a no e du sani di no bun. Te a e feti nanga wan feanti fu en, dan noiti a e kiri „den reti-ati sma makandra nanga den ogriwan” (Gen. 18:22-25). Boiti dati, Yehovah en ati e bron soso te sma e du sani di a no feni bun. Meki wi go luku tu sani di sma e du di Yehovah no feni bun èn san wi kan leri fu dati.

6. San Yehovah e du te sma e pori en nen?

⁶ A fosi sani: Te sma e pori Yehovah nen. Den sma di e taki dati den e dini Yehovah, ma den e du ogri e gi Yehovah porinen èn den e meki taki en ati bron (Esek. 36:23). Soleki fa wi ben si na ini den kapitel na fesi, den Israelsma ben du sani di ben gi Yehovah porinen. Dati meki Yehovah ben ati bron nanga den. Ma noiti a ati bron so te, taki a lasi ensrefi. A ben gi den a strafu di den ben frudini (Yer. 30:11). Èn te Yehovah strafu wan sma kaba, en ati no e bron moro.​—Ps. 103:9.

7, 8. Fa den Israelsma de wan warskow gi wi?

⁷ San wi e leri: Den Israelsma fu owruten musu de wan warskow gi wi. Neleki den wi abi a grani fu tyari Yehovah nen. Wi na Yehovah Kotoigi (Yes. 43:10). Den sani di wi e taki èn di wi e du kan meki sma denki bun noso ogri fu  Yehovah. Noiti wi wani du ogri fu espresi èn noiti wi wani gi Yehovah porinen, fu di dati o meki en ati bron èn te fu kaba a o du wan sani fu krin en nen.​—Hebr. 3:13, 15; 2 Petr. 2:1, 2.

⁸ Wi musu frede fu kon krosibei na Yehovah fu di wi sabi taki a man kisi „bigi atibron”? Nôno. Wi sabi taki Yehovah abi pasensi èn taki a e gi sma pardon (Yes. 55:7; Rom. 2:4). Ma wi e frustan tu taki a e strafu sma te dati de fanowdu. Disi e yepi wi fu no du sani di Yehovah no feni bun. Wi sabi taki en ati o bron nanga den sma di e tan sondu èn taki a no o meki den tan na ini a gemeente (1 Kor. 5:11-13). Yehovah sori wi krin sortu sani e meki en ati bron. A de na wi fu no du den sani disi.​—Yoh. 3:36; Rom. 1:26-32; Yak. 4:8.

9, 10. San Yehovah e du te sma wani du ogri nanga en pipel? Gi wan tu eksempre.

⁹ A di fu tu sani: Te sma wani du ogri nanga Yehovah en pipel. Yehovah en ati e bron te den feanti fu en wani du ogri nanga den sma di e gi yesi na en èn di e suku kibri na en. Fu eksempre, baka di den Israelsma gowe libi Egepte, Farao nanga a bigi legre fu en hari go baka a pipel fu Yehovah di ben de na a syoro fu a Redi Se. Di Farao go na baka a pipel di ben waka tapu a drei gron fu a se, Yehovah bigin puru den wiel na den asiwagi fu den Egeptesma èn a meki a watra kon na den tapu. Bijbel e taki dati „nowan fu den ben tan na libi” (Eks. 14:25-28). Yehovah en ati bron nanga den Egeptesma fu di a „lobi” en pipel.​—Leisi Eksodes 15:9-13.

¹⁰ Na ini a ten fu Kownu Heskia, Yehovah kibri en pipel tu fu di a ben lobi den. Den Asiriasma di ben abi wan makti legre èn di ben du ogri-ati sani nanga sma, ben kon feti nanga a foto Yerusalem. Den feanti ben taigi den Israelsma taki den ben o dede na wan ogri-ati fasi (2 Kow. 18:27). Ma Yehovah seni wán engel di kiri 185.000 srudati fu den Asiriasma na ini wán neti! (2 Kow. 19:34, 35) Prakseri fa sani ben de na ini a kampu fu den Asiriasma a tra mamanten. Ala den lansri, den skelt nanga den feti-owru ben didon drape sondro taki wan sma gebroiki den. Nowan sma no ben blo tapu tutu. Nowan sma ben taigi den srudati san fu du. Ala sani ben de pî na ini a kampu èn dedeskin ben de na ala sei.

11. Fa den eksempre di wi luku e trowstu wi èn e gi wi deki-ati?

¹¹ San wi e leri: Den eksempre disi na wan warskow gi den feanti fu wi. Bijbel e taki: „A de wan tumusi takru sani fu fadon na ini na anu fu a libilibi Gado” (Hebr. 10:31). Ma den eksempre disi e gi wi trowstu nanga deki-ati. A de wan  trowstu taki Satan, a moro bigi feanti fu wi, noiti o man wini wi. Dyonsro a no o tiri moro! (Openb. 12:12) Leki anbegiman fu Yehovah wi no abi fu frede fu di wi sabi taki nowan sma, nowan organisâsi èn nowan regering kan tapu wi fu du a wani fu Gado. (Leisi Psalm 118:6-9.) Den wortu fu na apostel Paulus e sori fa wi e denki: „Efu Gado de nanga wi, dan suma sa man du wi wan sani?”​—Rom. 8:31.

12. Fu san ede Yehovah ati o bron na a ten fu a bigi banawtu?

¹² Na a ten fu a bigi banawtu Yehovah o kibri wi neleki fa a ben kibri den Israelsma na a Redi Se èn neleki fa a kibri den Dyu di den Asiriasma ben kon feti nanga den. Te den feanti fu wi o pruberi fu du ogri nanga wi, Yehovah en ati o bron fu di a lobi wi. Te sma o kon feti nanga wi a o de neleki den e fasi a popki fu Yehovah en ai. Wantewante Yehovah o kiri den feanti fu wi (Sak. 2:8, 9). Bun furu sma o lasi den libi. Noiti ete Yehovah kiri so furu sma. Ma den  feanti fu Gado no musu skreki te Yehovah o feti nanga den. Fu san ede?

13. Sortu warskow Yehovah gi sma?

¹³ Yehovah „en ati no e bron esi” èn a e warskow sma na fesi taki a o pori den wan di e opo densrefi teige en èn di wani du ogri nanga en pipel (Eks. 34:6, 7). Yehovah gebroiki profeiti soleki Yeremia, Esekièl, Danièl, Yesus Krestes, den apostel Petrus, Paulus nanga Yohanes fu warskow sma gi a bigi dei fu en.​—Luku a faki „Yehovah e warskow sma gi a bigi dei fu en”.

14, 15. San Yehovah e meki en pipel du èn fu san ede a e du dati?

¹⁴ Yehovah meki sma skrifi den warskow disi na ini en Wortu. A sorgu tu taki Bijbel vertaal na ini moro tongo leki iniwan tra buku èn taki a prati na heri grontapu. Na heri grontapu a tyari sma kon na wan di de klariklari fu yepi trawan fu tron mati fu en èn fu warskow den gi „a bigi dei fu  Yehovah” (Sef. 1:14; Ps. 2:10-12; 110:3). A meki sma vertaal buku di e taki fu Bijbel na ini furu tongo èn ibri yari en pipel e preiki milyunmilyun yuru. Den e fruteri sma san Gado pramisi na ini en Wortu èn sortu warskow a abi gi den.

¹⁵ Yehovah e meki en pipel du ala den sani disi fu di „a no wani taki wan sma lasi libi. A wani taki ala sma musu kisi na okasi fu sori berow” (2 Petr. 3:9). Na wan grani fu wroko makandra nanga wi lobi-ati Gado di abi pasensi èn fu yepi fu prati a boskopu fu en. Ma dyonsro den sma di no e gi yesi na a warskow no o abi na okasi moro fu tyari kenki kon.

16, 17. Fa Yehovah sabi o ten den feanti fu en o kon feti nanga en pipel?

¹⁶ Yehovah poti wan dei gi a lasti feti fu en. A sabi kaba o ten sma o go feti nanga a pipel fu en (Mat. 24:36). Fa Yehovah sabi o ten den feanti o kon feti nanga en pipel?

¹⁷ Soleki fa wi ben si na ini a kapitel na fesi, Yehovah ben  taigi Gok: „Mi o poti aka na ini yu kakumbe.” A o meki sani waka na so wan fasi taki den kondre o kon feti nanga en pipel (Esek. 38:4). Disi no wani taki dati na Yehovah e bigin a feti noso taki na en o meki den feanti kon feti nanga en pipel. Na presi fu dati a e sori taki Yehovah sabi san de na ini sma ati èn a sabi san den feanti fu en o du te den de na ini wan spesrutu situwâsi.​—Ps. 94:11; Yes. 46:9, 10; Yer. 17:10.

18. Fu san ede libisma o bigin feti nanga na Almaktiwan?

¹⁸ Efu a no Yehovah o bigin a feti èn efu a no en o meki den feanti kon feti nanga en pipel, dan fu san ede libisma o bigin feti nanga na Almaktiwan? A kan taki den o du disi fu di den no e bribi taki wan Gado de noso fu di den e denki taki a no e bumui nanga den sani di e pasa na grontapu. Kande den o denki so fu di Gado no o du noti te den o pori ala den falsi kerki na grontapu. Den no o sabi taki na Gado o meki den du san a abi na prakseri èn taki a o gebroiki den fu pori den kerki di ben pori en nen.​—Openb. 17:16, 17.

19. San o pasa kande baka te den falsi kerki kisi pori?

 ¹⁹ Baka te den falsi kerki kisi pori, dan a kan taki Yehovah o meki en pipel preiki wan boskopu di sma no lobi srefisrefi. A buku Openbaring e agersi a boskopu disi nanga bigi pisi ijs fu 20 kilo di e fadon tapu sma (Openb. 16:21). Kande a pipel fu Yehovah o prati a boskopu taki Gado o pori ala den politiekman nanga den bisnisman. A boskopu disi o meki den ati bron so te taki den o bigin kosi Gado. A kan taki na a boskopu disi o meki taki den kondre o kon feti nanga Gado en pipel di de na heri grontapu. Den o denki taki wi no man yepi wisrefi èn taki a o makelek fu kiri wi. Ma dati na wan fowtu denki!

20, 21. Suma na Gok èn san o pasa nanga en?

²⁰ Na ini kapitel 17 fu a buku disi, Esekièl e gebroiki a nen „Gok fu a kondre Magok” gi den kondre di o span anu makandra fu kon feti nanga wi (Esek. 38:2). Ma den kondre disi no o abi trutru wánfasi. A o gersi leki den e wroko makandra, ma den o tan strei nanga makandra, den o abi heimemre èn den o feni taki a kondre fu den bun moro di fu trawan. A o makelek gi Yehovah fu meki den „feti nanga makandra” (Esek. 38:21). Ma toku a o de krin taki na Gado pori den kondre disi.

²¹ Fosi Gado pori den feanti fu wi, den o si a marki fu a Manpikin fu libisma. Kande kefalek sani o de fu si na hemel fu sori a makti fu Yehovah nanga Yesus. Den feanti fu wi o si sani di o meki den frede srefisrefi. Soleki fa Yesus ben taki, dan „sma o lasi-ati krinkrin, fu di den o frede te fu dede èn fu di den no sabi san o pasa nanga grontapu” (Luk. 21:25-27). Den o frustan taki a ben de wan fowtu fu kon feti nanga Yehovah en pipel. Den o musu fu sabi now taki Yehovah na a Mekiman èn taki a abi wan bigi hemel legre di a e tiri (Ps. 46:6-11; Esek. 38:23). Yehovah o gebroiki en hemel legre nanga sani soleki faya, watra nanga winti fu kibri en pipel èn fu pori den feanti fu en.​—Leisi 2 Petrus 2:9.

22, 23. Suma o kibri a pipel fu Gado èn fa den o feni en fu du a wroko disi?

²² Prakseri fa Yesus o firi te a o go feti nanga den feanti fu Gado èn fa a o breiti fu kibri den wan di lobi en Papa èn di e dini en. Prakseri tu fa den salfuwan o firi. Fosi Armagedon bigin den salfuwan di de na grontapu ete o go na hemel, so taki ala den 144.000 sma kan go feti makandra nanga Yesus (Openb. 17:12-14). A no de fu taki dati furu fu den salfuwan ben de bun mati fu den brada nanga sisa di  de fu den tra skapu, fu di den ben wroko makandra nanga den na ini den lasti dei. Na a feti fu Armagedon den salfuwan o abi a makti fu kibri den wan di ben horibaka gi den di den ben kisi tesi.​—Mat. 25:31-40.

²³ Engel o de tu na ini a hemel legre fu Yesus (2 Tes. 1:7; Openb. 19:14). Den ben yepi kaba fu puru Satan nanga den ogri yeye na hemel (Openb. 12:7-9). Den yepi tu fu tyari den sma na grontapu kon na wán di ben wani dini Yehovah (Openb. 14:6, 7). Sobun, den engel de klariklari fu kibri den wan di e dini Yehovah. Dati meki a fiti taki Yehovah o gi den na okasi fu du dati. Ma san moro prenspari na taki ala sma na ini a legre fu Yehovah o si en leki wan grani fu yepi krin a nen fu Yehovah te den o pori den feanti fu en.​—Mat. 6:9, 10.

24. San a pipel fu Yehovah o du?

²⁴ A pipel fu Yehovah no o abi fu frede fu di wan makti legre o de klariklari fu kibri den. Fu taki en leti, den o ’opo tanapu leti-opo èn den o opo den ede luku go na loktu, bika a frulusu fu den de krosibei’ (Luk. 21:28). Wi hemel Papa abi sari-ati trutru èn a o kibri wi. Fosi a dei fu Yehovah kon, a prenspari taki wi yepi so furu sma leki wi man fu kon sabi en èn fu kon lobi en.​—Leisi Sefanya 2:2, 3.

25. San wi o luku na ini a tra kapitel?

²⁵ Te libisma e feti nanga makandra, dan dati e tyari soso bruya nanga sari kon. Ma baka Armagedon, sani o go bun èn ala sma o de koloku. Fa a libi o de baka Armagedon? Na ini a tra kapitel wi o taki fu den moi sani di o pasa na a ten dati.