Wan tu sani di wi e frustan tra fasi now
Wi kon frustan wan tu fu den profeititori fu Esekièl moro bun èn den kenki disi kon na ini den Waktitoren na ini den yari di pasa. A buku disi di nen Yehovah seti a tru anbegi baka abi wan tu tra sani di wi e frustan moro krin. Luku efu yu kan piki den aksi di e kon now.
San den fo fesi fu den libisani e prenki?
Fa wi ben frustan en fosi: Den fo fesi fu den libisani noso den kerub-engel e prenki den fo prenspari fasi fu Yehovah.
Fa wi e frustan en now: Aladi den fo fesi fu den libisani e prenki den fo moro prenspari fasi fu Yehovah, toku ala fo fesi makandra e prenki ala den fasi fu Yehovah. Boiti dati, den fo fesi e meki wi frustan o bigi a krakti nanga a glori fu Yehovah de.
Fu san ede wi e frustan en tra fasi now: Na ini Gado Wortu, a nomru fo e prenki wan sani di no e mankeri noti. Sobun, te Bijbel e taki fu den fo fesi makandra, dan den no e prenki fo fasi nomo, ma ala den moi fasi fu Yehovah. Boiti dati, ibriwan fu den fesi na fu wan libisani di e prenki glori, krakti nanga makti. Den fo makti kerub-engel di abi fo fesi de na ondro a kownusturu fu Yehovah. Disi e sori taki Yehovah na a Moro Hei Tiriman fu hemel nanga grontapu.
Suma a man nanga na enkikokro fu wan sekretarsi e prenki?
Fa wi ben frustan en fosi: A man nanga na enkikokro e prenki den salfu Kresten di de na grontapu ete. Nanga yepi fu a preikiwroko den salfuwan e poti wan marki na wan agersifasi tapu na fesi-ede fu den sma di de fu a „bigi ipi”.—Openb. 7:9.
Fa wi e frustan en now: A man nanga na enkikokro fu wan sekretarsi e prenki Yesus Krestes. Na a ten fu a „bigi banawtu”, Yesus o krutu sma èn na wan agersifasi a o poti wan marki na a fesi-ede fu den sma fu a bigi ipi. Den sma disi a e si leki skapu.—Mat. 24:21.
Fu san ede wi e frustan en tra fasi now: Yehovah gi en Manpikin a frantwortu fu krutu sma (Yoh. 5:22, 23). Soleki fa Mateyus 25:31-33 e sori, dan Yesus o bosroiti suma o de „skapu” èn suma o de „bokoboko”.
A de so taki den tu sisa Ohola nanga Oholiba di e huru, e prenki a Lomsu Kerki nanga a Protestant Kerki di de den tu moro bigi Kresten kerki?
Fa wi ben frustan en fosi: A moro bigi sisa Ohola (Samaria, a mamafoto fu Israel) e prenki Lomsu Kerki. A moro yongu sisa Oholiba (Yerusalem, a mamafoto fu Yuda) e prenki a Protestant Kerki.
Fa wi e frustan en now: Den tu sisa disi di e huru, no e prenki den falsi Kresten kerki. Ma den e sori wi fa Yehovah e firi te sma di ben anbegi en fosi, e go dini tra gado. Yehovah no feni nowan falsi kerki bun.
Fu san ede wi e frustan en tra fasi now: Noti na ini Bijbel e sori taki Ohola nanga Oholiba e prenki falsi Kresten kerki. Fosi, Yehovah ben si Israel nanga Yuda leki en wefi. Ma Yehovah noiti no ben si den falsi Kresten kerki leki en wefi. Boiti dati, soleki fa kapitel 16 nanga 23 fu a Bijbel buku Esekièl e sori, dan Yehovah ben o meki sani bun baka nanga Yerusalem èn nanga Samaria efu den ben o kenki. Ma Yehovah no o meki sani bun baka nanga den falsi Kresten kerki. A o pori den fu têgo neleki ala den tra bribi fu Babilon a Bigiwan.
Yerusalem fu owruten e prenki den falsi Kresten kerki?
Fa wi ben frustan en fosi: Yerusalem di drai baka gi Yehovah e prenki den falsi Kresten kerki. Dati meki a pori di Yerusalem kisi e prenki a pori di den falsi Kresten kerki o kisi.
Fa wi e frustan en now: Den sani di ben pasa na ini Yerusalem e memre wi na den sani di den falsi Kresten kerki e du. Den e anbegi falsi gado tu èn den e du kruka sani. Ma wi no e taki moro dati Yerusalem e prenki den falsi Kresten kerki.
Fu san ede wi e frustan en tra fasi now: Bijbel no e sori taki Yerusalem e prenki den falsi Kresten kerki. Noiti den kerki disi ben e anbegi a tru Gado, neleki fa Yerusalem ben e du dati. Fu wan pisi ten Yehovah ben gi Yerusalem pardon. Ma noiti a o gi den falsi Kresten kerki pardon.
Fa a fisyun fu den drei bonyo na ini a lagipresi kon tru?
Fa wi ben frustan en fosi: Na ini 1918 den salfuwan di ben kisi frufolgu ben dede na wan agersifasi fu di den ben de na ini katibo na Babilon a Bigiwan. Na ini 1919 Yehovah puru den na ini katibo èn den bigin du a Kownukondre preikiwroko baka.
Fa wi e frustan en now: Den salfu Kresten ben de na ini katibo langa ten fosi 1918. Den go na ini katibo syatu baka a yari 100 èn den komoto na ini katibo na ini 1919. Den tan na ini katibo hondrohondro yari, soleki fa na agersitori di Yesus fruteri fu na aleisi nanga a takru wiwiri e sori.
Fu san ede wi e frustan en tra fasi now: Israel fu owruten ben de na ini katibo wan langa pisi ten. Dati ben de fu a yari 740 Fosi Krestes teleki 537 Fosi Krestes. A profeititori fu Esekièl e taki dati den bonyo „drei” èn taki den „drei srefisrefi”. Disi e sori taki den bonyo e prenki sma di ben dede wan langa pisi ten. A profeititori e sori taki den bonyo e kon na libi safrisafri.
San den tu tiki di e tron wán tiki e prenki?
Fa wi ben frustan en fosi: Na a ten fu a Fosi Grontapufeti pratifasi ben de na mindri den salfuwan fu wan syatu pisi ten. Ma na ini 1919 den ben abi wánfasi baka.
Fa wi e frustan en now: A profeititori e sori taki Yehovah ben o meki den anbegiman fu en „tron wán”. Sensi 1919 moro nanga moro sma di ben abi a howpu fu libi na grontapu bigin moksi nanga den salfuwan. Den tu grupu disi e dini Yehovah leki wán pipel.
Fu san ede wi e frustan en tra fasi now: A profeititori no e taki fu wan tiki di broko na ini tu èn di tron wán baka. Sobun, a profeititori no e taki fu wan grupu di ben prati èn di ben tron wán baka. Na presi fu dati a e taki fu tu grupu di e tron wán.
Suma na Gok fu Magok?
Fa wi ben frustan en fosi: Gok fu Magok na a nen di Satan Didibri kisi, baka di Yesus trowe en komoto na hemel.
Fa wi e frustan en now: Gok fu Magok na den kondre di o span anu makandra fu kon feti nanga Gado pipel na a ten fu a bigi banawtu.
Fu san ede wi e frustan en tra fasi now: Bijbel e taki dati fowru o nyan Gok èn taki a o kisi wan grebi na grontapu. Ala den sani disi e sori taki Gok a no wan yeye. Boiti dati, profeititori na ini Danièl èn na ini Openbaring e taki fu a srefi feti disi. Den profeititori disi e sori taki na sma fu grontapu o feti nanga Gado pipel.—Dan. 11:40, 44, 45; Openb. 17:14; 19:19.
A de so taki Esekièl si a bigi agersi tempel di na apostel Paulus ben taki fu en bakaten?
Fa wi ben frustan en fosi: A tempel di Esekièl si, na a srefi tempel di na apostel Paulus ben taki fu en.
Fa wi e frustan en now: Esekièl no si na agersi tempel di ben seti na ini a yari 29. Ma a si wan fisyun di e sori fa den Dyu di ben o komoto na ini katibo ben o seti a tru anbegi baka. Den ben o anbegi Yehovah baka soleki fa skrifi na ini a Wet fu Moses. Di Paulus fruklari na agersi tempel, a ben e poti moro prakseri na a wroko di Yesus ben o du leki Granpriester fu a yari 29 te go miti 33. A fisyun di Esekièl si fu a tempel, no e taki noti fu wan granpriester, ma a e poti prakseri na a tru anbegi di ben o bigin seti baka na ini 1919. Dati meki wi no e taki dati ala den sani fu a tempel di Esekièl si e prenki wan sani. Na presi fu dati, wi musu luku san a fisyun fu Esekièl e leri wi fu a fasi fa Yehovah wani taki wi musu anbegi en.
Fu san ede wi e frustan en tra fasi now: Wan tu prenspari difrenti de na mindri a tempel di Esekièl ben si nanga na agersi tempel di Paulus ben taki fu en. Fu eksempre, na a tempel di Esekièl ben si sma e tyari furu meti leki ofrandi. Ma na ini a bigi agersi tempel na wán ofrandi tyari fu ala ten (Hebr. 9:11, 12). Na ini den hondrohondro yari fosi Krestes kon, a ten no ben doro gi Yehovah fu tyari den dipi tori fu na agersi tempel kon na krin.
