1-3. Fa den Babilonsma ben e spotu den anbegiman fu Yehovah èn fu san ede?

 KON meki wi taki dati yu na wan fu den Dyu di de na ini a foto Babilon èn di e dini Yehovah ete. Unu de na ini katibo sowan 50 yari kaba. Soleki fa yu gwenti du na a Sabat-dei, yu e go miti nanga tra Dyu fu anbegi Yehovah. Te yu e waka na ini den druk strati, yu e pasa bigi tempel nanga bun furu pikin gado-oso. Ipi-ipi sma e go na den presi disi pe den e tyari ofrandi èn pe den e singi gi falsi gado soleki Marduk.

² Yu nanga tra anbegiman e suku wan tiri presi fu anbegi Gado. a Unu feni wan presi na wan fu den liba fu a foto. Drape unu e begi, unu e singi psalm èn unu e taki fu Gado Wortu. Te unu e begi makandra, yu kan yere fa udu boto e naki na makandra na a syoro. Yu breiti taki unu no de ini a dyugudyugu fu a foto. Yu e howpu taki nowan fu den sma di e tan drape kon bruya a konmakandra leki fa den du furu leisi kaba. Fu san ede den e du dati?

³ Babilon wini furu feti èn a pipel fu en e bribi taki na den  falsi gado fu den yepi den fu wini den feti disi. Den e bribi taki den ben man pori Yerusalem fu di Marduk, a gado fu den, tranga moro Yehovah! Dati meki den e spotu yu Gado nanga en pipel. Son leisi den e taki: „Un singi wan fu den singi fu Sion gi unu” (Ps. 137:3). Furu psalm e taki fa Sion noso Yerusalem wini den feanti fu Yehovah. Kande den Babilonsma ben lobi spotu den psalm dati. Ma tra psalm e taki fu den Babilonsma srefi. Wan fu den psalm dati e taki: „Den meki Yerusalem kon tron wan brokopresi. . . . Den pipel di e libi krosibei fu wi, e spotu wi èn den e lafu wi.”​—Ps. 79:1, 3, 4.

4, 5. Sortu howpu den profeititori fu Esekièl ben e gi den Dyu èn san wi o luku na ini a kapitel disi? (Luku a prenki na a bigin fu a kapitel.)

⁴ Yu abi Dyu tu di drai baka gi Yehovah. Den lobi spotu yu fu di yu e bribi na ini Yehovah èn na ini den profeiti fu en. Ma awinsi fa den e spotu yu, a tru anbegi e trowstu yu nanga yu osofamiri. Unu e firi bun te unu e begi èn e singi nanga makandra. A e gi unu prisiri fu leisi Gado Wortu (Ps. 94:19; Rom. 15:4). Kon meki wi taki dati na a konmakandra disi, wan fu den tra anbegiman tyari wan spesrutu sani kon. Dati na wan bukulolo di abi den profeititori fu Esekièl na ini. Yu lobi den profeititori di e taki fa Yehovah ben o meki en pipel drai go baka na den kondre. Yu e firi bun te sma e leisi den profeititori disi gi yu èn yu e prakseri fa a o de te wan dei yu nanga yu osofamiri o drai go baka na un kondre fu yepi seti a tru anbegi baka!

⁵ A buku Esekièl lai nanga profeititori di e sori fa a tru bribi ben o seti baka. Meki wi luku den profeititori disi moro fini. Fa den pramisi disi kon tru na a ten di den Dyu ben de na ini katibo na Babilon? Fa den profeititori disi kon tru na ini a ten fu wi? Wi o si tu taki sonwan fu den profeititori disi o kon tru na ini a ten di e kon.

6. Fa Gado warskow en trangayesi pipel ibri tron baka?

⁶ Yehovah meki Esekièl sori a pipel krin fa a ben o strafu den efu den ben o trangayesi en. Yehovah ben taki: „Sma o tyari den go na ini katibo” (Esek. 12:11). Soleki fa wi si na ini kapitel 6 fu a buku disi, Esekièl ben du wan tu sani fu sori fa Yehovah ben o strafu den. Ma disi no ben de a fosi leisi taki Yehovah ben warskow den. Na ini a ten fu Moses, pikinmoro wán dusun yari na fesi, Yehovah warskow en pipel taki efu den ben o tan trangayesi en, tra kondre ben o tyari den gowe leki katiboman (Deut. 28:36, 37). Den profeiti Yesaya nanga Yeremia ben warskow den fu a srefi sani disi tu.​—Yes. 39:5-7; Yer. 20:3-6.

7. Fa Yehovah strafu en pipel?

⁷ Ma a sari taki furu sma no gi yesi na den warskow dati.  Yehovah ben e sari taki en pipel drai baka gi en. Den go anbegi falsi gado, den no gi yesi na en èn den ogri-ati fesiman ben meki den du soso ogri. Dati meki Yehovah gi pasi taki angriten kon na ini a kondre. Disi ben de wan bigi rampu èn wan bigi syen tu te yu e prakseri taki a kondre fu den ben „lai merki nanga oni” (Esek. 20:6, 7). Soleki fa Yehovah ben taki langa ten kaba, a meki en trangayesi pipel go na ini katibo. Na ini 607 Fosi Krestes, Nebukadnesar fu Babilon pori Yerusalem nanga a tempel. Den tyari dusundusun Dyu gowe leki katiboman na Babilon. Drape den Babilonsma ben e spotu den èn den ben e gens den, soleki fa wi si na a bigin fu a kapitel disi.

8, 9. Fa Gado ben warskow a Kresten gemeente gi sma di drai baka gi a tru bribi?

⁸ Wan srefi sortu sani ben miti a Kresten gemeente? Iya! Neleki den Dyu fu owruten, Yesus ben warskow den bakaman fu en na fesi. Di Yesus ben du en diniwroko na grontapu, a taki: „Luku bun nanga den falsi profeiti. Den e kon na unu leki skapu, ma na ini den ati den na ogri busidagu” (Mat. 7:15). Furu yari baka dati, Yehovah ben meki na apostel Paulus warskow den Kresten gi a srefi sani: „Mi sabi taki te mi gowe, ogri busidagu o kon na un mindri èn den o du ogri nanga den skapu. Sma na un mindri o taki sani di no tru, fu hari den disipel kon na den baka.”​—Tori 20:29, 30.

⁹ Den Kresten ben kisi rai di ben yepi den fu sabi efu wan sma ben drai baka gi a tru bribi èn den ben leri taki den no ben musu moksi nanga den sma dati. Kresten owruman ben kisi a rai fu puru den man disi na ini a gemeente (1 Tim. 1:19; 2 Tim. 2:16-19; 2 Petr. 2:1-3; 2 Yoh. 10). Toku safrisafri furu Kresten no gi yesi na den warskow di den ben kisi, neleki Israel nanga Yuda fu owruten. Na a ten fu a yari 100, den sma di ben drai baka gi a tru bribi ben lai na ini a Kresten gemeente. Yohanes ben de a lasti apostel di ben de na libi ete na a ten dati. A ben si taki furu sma na ini a gemeente ben e waka baka den wan di drai baka gi a Kresten bribi èn den no ben e hori densrefi na den wet fu Yehovah. Yohanes ben de a wan-enkri sma di ben tapu den man disi fu pori a heri gemeente (2 Tes. 2:6-8; 1 Yoh. 2:18). San pasa baka di Yohanes dede?

10, 11. Fa na agersitori di Yesus gi fu na aleisi nanga a takru wiwiri kon tru baka a yari 100?

¹⁰ Baka di Yohanes dede, na agersitori di Yesus ben gi fu na aleisi nanga a takru wiwiri bigin kon tru. (Leisi Mateyus 13:24-30.) Soleki fa Yesus ben taki, dan Satan sai „takru wiwiri” na ini a gemeente. A „takru wiwiri” disi noso den falsi Kresten meki taki a Kresten gemeente pori moro esi. Yehovah ben musu fu sari di a si taki furu sma na ini a gemeente  di en Manpikin ben seti, bigin anbegi falsi gado. Den ben e teki den fesa nanga den gwenti abra fu den sma di e anbegi falsi gado èn den teki den leri abra fu filosofiaman! San Yehovah du? Soleki fa a ben du nanga Israel, a meki en pipel go na ini katibo. Wan pisi ten baka a yari 100 a no ben de krin moro suma ben de trutru Kresten, fu di furu falsi Kresten ben de. Na agersifasi a Kresten gemeente ben de na ini katibo na Babilon a Bigiwan, dati na ala den falsi bribi na heri grontapu. Den falsi Kresten tron wan pisi fu Babilon a Bigiwan. Na so furu falsi Kresten kerki kon de.

¹¹ Na ini den hondrohondro yari di pasa den falsi Kresten kerki ben kon abi furu makti. Ma neleki fa Yesus ben taki na ini na agersitori fu na „aleisi” wan tu tru Kresten ben de ete. Neleki den Dyu di kari na Esekièl 6:9, den no ben frigiti a tru Gado. Sonwan fu den no ben frede fu taki dati den kerki e leri sma sani di no tru. Sma ben e spotu den èn frufolgu den. Yehovah ben o libi en pipel na ini katibo? Nôno! Neleki fa a ben de nanga Israel fu owruten, Yehovah no strafu den tumusi hebi èn a no strafu den tumusi langa tu (Yer. 46:28).  Boiti dati, Yehovah gi en pipel howpu. Wi o luku now fa Yehovah gi den Dyu na ini Babilon a howpu taki den ben o kisi frulusu.

12, 13. Fu san ede Yehovah no ben o ati bron moro tapu den Dyu fu a ten fu Esekièl?

¹² Yehovah ben sori en pipel krin taki en ati ben bron na den tapu, ma a ben taigi den tu taki a no ben o ati bron na den tapu fu ala ten. Luku san a ben taigi den: „Te mi puru atibron na den tapu, mi ati o kon kowru èn mi o firi bun baka. Te mi puru atibron na den tapu, dan den sa musu fu sabi taki mi, Yehovah, taki nanga den fu di mi wani taki den musu anbegi mi wawan” (Esek. 5:13). Fu san ede Yehovah no ben o ati bron na den tapu moro?

¹³ Wan reide na taki a no soso den Dyu di ben trangayesi Yehovah ben go na ini katibo, ma sosrefi tra Dyu di ben e gi yesi na Yehovah ala ten. Boiti dati, Gado ben meki Esekièl skrifi na fesi taki son Dyu ben o abi berow te den ben o de na ini katibo. Den Dyu dati ben o prakseri den syen sani di den ben du èn a fasi fa den ben trangayesi Yehovah. Dati  meki den ben o aksi Yehovah fu gi den pardon (Esek. 6:8-10; 12:16). Esekièl, Danièl nanga den dri mati fu Danièl ben de wan tu fu den Dyu di ben tan dini Yehovah. Fu taki en leti, Danièl ben de na libi kaba di a pipel go na ini katibo èn a ben de na libi ete di den komoto na ini katibo. Na ini Danièl kapitel 9 wi kan leisi a begi fu Danièl pe a e sori taki a abi berow fu den sondu fu Israel. A no de fu taki dati na so dusundusun fu den Dyu ben firi. Den ben wani taki Yehovah gi den pardon èn taki a blesi den baka. Dati meki den profeititori fu Esekièl di ben sori taki den ben o kisi frulusu èn taki a tru anbegi ben o seti baka, ben gi den deki-ati!

14. Fu san ede Yehovah ben o meki a pipel drai go baka na den kondre?

¹⁴ Ma wan moro prenspari reide de fu san ede Yehovah meki en pipel drai go baka na den kondre èn fu san ede a seti a tru anbegi baka na den mindri. Den no ben o komoto na ini katibo fu di den ben frudini dati, ma Yehovah ben o frulusu den fu di a ten ben doro fu santa en nen na fesi ala den tra kondre (Esek. 36:22). Den Babilonsma ben o sabi taki na Almakti Gado Yehovah ben tranga moro den ogri-ati gado fu den, leki Marduk! Meki wi go luku feifi pramisi di Yehovah meki Esekièl skrifi gi den Dyu di ben de na ini katibo. Wi o luku fosi sortu deki-ati den pramisi dati ben o gi den reti-ati Dyu fu Esekièl en ten. Baka dati wi o si fa den pramisi disi kon tru na ini a ten fu wi èn fa den o kon tru na ini a ten di e kon.

15. Fa den Dyu ben o anbegi Yehovah te den ben o drai go baka na den kondre?

¹⁵ PRAMISI 1. Den no ben o anbegi falsi gado moro èn den ben o tapu nanga den fisti gwenti di den ben teki abra fu den trakondre sma. (Leisi Esekièl 11:18; 12:24.) Soleki fa wi ben si na ini kapitel 5 fu a buku disi, den Dyu na ini Yerusalem ben dini falsi gado na ini a foto èn na ini a tempel.  Dati meki Yehovah no ben feni den bun moro. Ma Yehovah meki Esekièl skrifi taki den Dyu di ben de na ini katibo ben o man anbegi en baka na a fasi di a feni bun. Den ben o kisi ala tra blesi, soso te a tru anbegi ben seti baka.

16. Sortu sani Yehovah ben pramisi a pipel fu den kondre?

¹⁶ PRAMISI 2. Den ben o drai go baka na den kondre. Yehovah ben taki: „Mi o gi den a kondre Israel” (Esek. 11:17). Den Dyu ben musu fu fruwondru di den yere a pramisi disi, fu di den Babilonsma di ben lobi spotu den ben taigi den taki noiti den ben o drai go baka na den kondre (Yes. 14:4, 17). Yehovah pramisi den tu taki solanga den wan di drai go baka na den kondre ben o tan gi yesi na en, sani ben o gro bun na ini a kondre, den ben o abi nofo nyanyan èn den ben o abi switi wroko fu du. Noiti moro angriten ben o de na ini a kondre.​—Leisi Esekièl 36:30.

17. Pe a pipel ben o tyari ofrandi gi Yehovah èn fa a ben o feni den ofrandi dati?

¹⁷ PRAMISI 3. Den ben o tyari ofrandi baka gi Yehovah na tapu en altari. Soleki fa wi si na ini kapitel 2 fu a buku disi, dan a Wet ben sori taki a pipel ben musu tyari ofrandi fu anbegi Yehovah. Solanga den ben gi yesi na Yehovah èn den ben anbegi en wawan a ben o feni den ofrandi fu den bun. Yehovah ben o gi a pipel pardon fu den sondu èn den ben o abi wan bun matifasi nanga en. Yehovah ben pramisi: ’Ala den Israelsma o anbegi mi na ini a kondre. Na drape mi o prisiri nanga den èn na drape mi o meki unu kon nanga den moro bunwan fu ala den santa sani di unu e tyari leki presenti’ (Esek. 20:40). A tru anbegi ben o seti baka èn Gado ben o blesi a pipel fu en.

18. Fa Yehovah ben o sorgu den skapu fu en?

¹⁸ PRAMISI 4. A ben o puru den takru skapuman na den mindri. Wan prenspari reide fu san ede a pipel ben du so furu ogri, na taki den no ben abi bun fesiman. Yehovah pramisi  den taki a sani dati ben o kenki. Yehovah ben taki fu den ogri skapuman: „Mi no o meki den gi mi skapu nyanyan moro . . . Mi o frulusu mi skapu fu a mofo fu den.” A taigi den tu: „Mi o sorgu mi skapu” (Esek. 34:10, 12). Fa Yehovah ben o du dati? A ben o gi den bun skapuman di ben gi yesi na en.

19. San Yehovah ben taki fu a wánfasi fu a pipel?

¹⁹ PRAMISI 5. Wánfasi o de na mindri a pipel fu Yehovah. Reti-ati sma di ben dini Yehovah ben sari te den ben si taki wánfasi no ben de na mindri a pipel fu Yehovah. Den falsi profeiti nanga den ogri skapuman ben gi a pipel deki-ati fu opo densrefi teige den profeiti fu Yehovah. Yu ben abi difrenti grupu srefi na ini a kondre di ben feti nanga densrefi. Sobun, wan fu den moi sani di Yehovah ben pramisi den na disi: „Mi o meki den tron wán èn mi o meki den kisi wan nyun denki” (Esek. 11:19). Solanga den Dyu ben gi yesi na Yehovah Gado èn den ben abi wánfasi, dan nowan fu den feanti fu den ben o man wini den. A pipel ben o gi Yehovah grani baka na presi taki den gi en syen.

20, 21. Fa den pramisi fu Gado kon tru di den Dyu drai go baka na den kondre?

²⁰ Den Dyu di komoto na ini katibo si fa den feifi pramisi  disi fu Yehovah kon tru? Wi musu prakseri den wortu disi fu Yosua: „Yehovah un Gado du ala den bun sani di a ben pramisi unu. Ala den sani disi kon tru, soleki fa unu srefi si. Iya, a du ala den sani di a pramisi” (Yos. 23:14). Neleki fa Yehovah ben du san a ben pramisi na ini a ten fu Yosua, na so a du san a pramisi den Dyu di drai go baka na den kondre.

²¹ Den Dyu tapu fu dini falsi gado èn den tapu nanga den fisti gwenti di abi fu du nanga falsi anbegi. Na den sani dati ben meki taki Yehovah no ben feni den bun moro. Aladi den no ben fruwakti dati, den go libi baka na ini den eigi kondre, den ben man prani a gron èn den ben abi wan bun libi. Wan fu den fosi sani di den du na taki den meki na altari fu Yehovah baka na ini Yerusalem èn den bigin tyari ofrandi gi Yehovah drape (Esra 3:2-6). Yehovah gi den bun skapuman, soleki Esra di ben de wan priester èn di ben meki kopi fu Gado Wortu. Nehemia, Serubabel, Granpriester Yosua, èn den profeiti Hagai, Sakaria, nanga Maleaki ben de bun skapuman tu. Langa ten a pipel no ben abi wánfasi. Ma solanga den ben gi  yesi na Yehovah, wánfasi ben o de na den mindri.​—Yes. 61:1-4; leisi Yeremia 3:15.

22. Fa wi du sabi taki den pramisi fu Yehovah na ini a buku Esekièl musu kon tru na wan moro prenspari fasi?

²² A no de fu taki dati a ben de wan deki-ati gi reti-ati Dyu di den pramisi fu Yehovah kon tru a fosi leisi! Ma den pramisi disi ben o kon tru na wan moro bigi fasi. Fa wi du sabi dati? We, Yehovah ben o du san a ben pramisi soso te a pipel ben o tan gi yesi na en. Bakaten den Dyu bigin trangayesi Yehovah baka èn den ben opo densrefi teige en. Ma soleki fa Yosua ben taki, ala ten Yehovah e du san a pramisi. Sobun, den pramisi disi ben o kon tru na wan moro moi fasi èn den blesi ben o tan fu têgo. Meki wi go luku fa Yehovah du a sani disi.

23, 24. Bijbel e taki fu ’a ten te ala sani o kon bun baka’. O ten èn fa dati pasa?

²³ Fu di wi e studeri Bijbel, meki wi sabi taki den lasti dei bigin na ini 1914. Ma a sani disi no e meki wi sari. Fu taki en leti, Bijbel e sori taki ’wan ten o doro taki ala sani o kon bun baka’ èn a ten dati bigin na ini 1914 (Tori 3:21). Fa wi du sabi dati? We, san pasa na ini 1914? Yesus Krestes tron a Mesias Kownu. Fu san ede wi kan taki dati disi na wan fu den sani di kon bun baka? Hori na prakseri taki Yehovah ben pramisi Kownu David taki wan bakapikin fu en ben o tiri leki kownu fu têgo (1 Kron. 17:11-14). Di den Babilonsma pori Yerusalem na ini 607 Fosi Krestes, bakapikin fu David no tiri moro leki kownu.

²⁴ Yesus, „a Manpikin fu libisma”, na a bakapikin fu David di kisi a reti fu tiri leki kownu (Mat. 1:1; 16:13-16; Luk. 1:32, 33). Na ini 1914 di Yehovah poti Yesus leki Kownu ’a ten bigin taki ala sani o kon bun baka’! Now Yehovah ben o  gebroiki a Kownu dati di no abi sondu fu seti sani kon bun baka.

25, 26. (a) O ten Gado pipel komoto na ini katibo fu Babilon a Bigiwan èn fa wi du sabi dati? (Luku sosrefi a faki „Fa wi kon tapu a yari 1919?”) (b) Sortu profeititori bigin kon tru na wan moro prenspari fasi sensi a yari 1919?

²⁵ Wan fu den fosi sani di Krestes du leki Kownu, na taki en nanga en Papa ben kon luku efu a pipel fu Gado ben e anbegi Gado na wan krin fasi (Mal. 3:1-5). Soleki fa Yesus ben taki na ini na agersitori fu na aleisi nanga a takru wiwiri, dan langa ten sma no ben man si a difrenti na mindri na aleisi nanga a takru wiwiri. Yu no ben sabi suma ben de wan salfu Kresten trutru èn suma ben de wan falsi Kresten. b Ma di a kotiten bigin na ini 1914 a difrenti na mindri tru Kresten nanga falsi Kresten ben de krin fu si. Langa ten fosi 1914, den Bijbel Ondrosukuman ben meki sma kon sabi sortu lei den falsi Kresten kerki e leri sma. Den ben bigin hari densrefi puru fu den kerki disi. A ten ben doro taki Yehovah ben o seti a tru anbegi baka. Sobun, na a bigin fu 1919, dati ben de wan tu yari baka di „a kotiten” bigin, Yehovah en pipel komoto na ini katibo fu Babilon a Bigiwan (Mat. 13:30). Den ben fri now!

²⁶ Na a ten dati den profeititori fu Esekièl bigin kon tru na wan moro prenspari fasi leki na ini a ten fu Gado pipel fu owruten. Meki wi go luku fa den feifi pramisi di wi ben luku kaba kon tru na wan moro bigi fasi.

27. Fa Gado krin en pipel?

²⁷ PRAMISI 1. Den no e anbegi falsi gado moro èn den tapu nanga den fisti gwenti di abi fu du nanga falsi anbegi. Syatu fosi a yari 1900, tru Kresten ben bigin kon makandra na ini pikin grupu èn den ben tapu nanga den gwenti di abi fu du nanga falsi bribi. Den ben kon si taki furu sani di den kerki e leri no ben komoto fu Bijbel, ma fu falsi bribi. Fu eksempre, den kon frustan taki Gado a no dri sma na ini  wán, taki libisma no abi wan sili di no man dede èn taki wan hel no de. Den ben frustan tu taki den no musu gebroiki popki fu anbegi Gado. Te fu kaba, Gado en pipel kon si tu taki a kroisi abi fu du nanga falsi anbegi.​—Esek. 14:6.

28. Na sortu fasi Gado pipel drai go baka na den kondre?

²⁸ PRAMISI 2. Na wan agersifasi Gado pipel drai go baka na den kondre. Di tru Kresten komoto na ini den kerki fu Babilon a Bigiwan a ben de neleki den ben drai go baka na den eigi kondre pe noiti moro angri ben o kiri den. (Leisi Esekièl 34:13, 14.) Soleki fa wi o si na ini kapitel 19 fu a buku disi, Yehovah blesi en pipel èn a sorgu taki den kisi bun furu leri.​—Esek. 11:17.

29. San yepi Gado pipel fu poti moro prakseri na a preikiwroko na ini 1919?

²⁹ PRAMISI 3. Den e tyari ofrandi gi Yehovah baka na tapu en altari. Na ini a ten fu den apostel, den Kresten ben  leri taki den no ben o tyari meti leki ofrandi moro, ma den ben o tyari moro warti ofrandi. Den ben o tyari ofrandi nanga den mofo. Sobun, den ben o prèise Yehovah èn den ben o taki nanga tra sma fu en (Hebr. 13:15). Di den ben de na ini katibo fu Babilon a Bigiwan, Yehovah no ben abi wan organisâsi na grontapu ete di ben yepi den fu tyari den ofrandi disi. Ma di a ten ben doro taki den ben o komoto na ini katibo, Gado en pipel ben bigin tyari den sortu ofrandi disi kaba. Den ben preiki fayafaya èn den ben prèise Gado na den konmakandra fu den. Sensi a yari 1919, „a koni srafu di de fu frutrow” bigin poti moro prakseri na a preikiwroko èn den bigin orga a wroko moro bun (Mat. 24:45-47). Sobun, moro nanga moro sma bigin tyari ofrandi tapu na altari fu Yehovah. Moro sma bigin dini Yehovah èn den bigin fruteri tra sma fu en.

30. Fa Yesus sorgu taki en pipel ben abi bun skapuman?

³⁰ PRAMISI 4. Den puru den takru skapuman. Yesus frulusu Gado en pipel fu den ogri-ati skapuman fu den falsi kerki di e suku den eigi bun. Na ini a gemeente fu Krestes, a puru ala skapuman di ben tyari densrefi leki den ogri-ati skapuman dati (Esek. 20:38). Yesus, a moro bun skapuman, ben sorgu taki en pipel ben abi bun skapuman fu luku den. Na ini 1919 a poti a koni srafu di de fu frutrow. A pikin grupu dati fu salfu Kresten ben sorgu taki den skapu ben kisi leri èn taki sani ben go bun nanga den. Bakaten den bigin leri tra owruman fa den kan yepi fu sorgu „den skapu fu Gado” (1 Petr. 5:1, 2). A koni srafu e gebroiki den wortu na ini Esekièl 34:15, 16 fu memre owruman san Yehovah Gado nanga Yesus Krestes e fruwakti fu den.

31. Fa Yehovah meki a profeititori na ini Esekièl 11:19 kon tru?

³¹ PRAMISI 5. Wánfasi de na mindri Gado en pipel. Furu Kresten kerki de, ma den no abi wánfasi fu di den no e agri nanga makandra èn den e leri sma difrenti sani. Ma wi si taki Yehovah du wan moi sani nanga en pipel. A ben meki Esekièl skrifi a sani disi: „Mi o meki den tron wán” (Esek. 11:19). A pramisi disi kon tru na wan moi fasi. Na heri grontapu Krestes abi milyunmilyun bakaman di de fu difrenti ras, di gudu noso pôti èn di kweki na difrenti fasi. Ma toku den alamala e kisi a srefi leri èn den e du a srefi wroko. A lasti neti di Yesus ben de na grontapu leki libisma, a begi taki den bakaman fu en ben o abi wánfasi. (Leisi Yohanes 17:11, 20-23.) Na ini a ten fu wi Yehovah piki a begi fu Yesus. Noiti ete a wánfasi na mindri a pipel fu Gado ben tranga so.

32. Fa yu feni den profeititori fu Esekièl di e sori taki a tru anbegi ben o seti baka? (Luku sosrefi a faki „Profeititori di e sori taki Gado pipel ben o de na ini katibo èn taki a tru anbegi ben o seti baka”.)

³² Yu no breiti taki yu e libi na ini a ten pe Yehovah e seti  a tru anbegi baka? Wi kan si krin taki den profeititori fu Esekièl e kon tru. Wi kan de seiker taki Yehovah breiti nanga en pipel. A ben meki Esekièl taki na fesi: „Mi o prisiri nanga unu” (Esek. 20:41). Iya, baka omeni yari a pipel fu Yehovah kon fri fu Babilon a Bigiwan. A de wan bigi grani fu de na ini wan organisâsi pe ala sma abi wánfasi, pe wi e kisi furu leri èn pe wi e prèise Yehovah na heri grontapu. Ma toku sonwan fu den profeititori fu Esekièl musu kon tru ete na ini a ten di e kon.

33-35. (a) San a profeititori na ini Esekièl 36:35 ben wani taki gi den Dyu di ben de na ini katibo? (b) Fa a profeititori e kon tru na ini a ten disi? (Luku sosrefi a faki „A ten te ala sani o kon bun baka”.)

³³ Soleki fa wi si, dan ’a ten te ala sani ben o kon bun baka’ bigin di Yesus, a bakapikin fu David, tron Kownu na ini 1914 (Esek. 37:24). Baka dati Yehovah gi Yesus a makti fu seti a tru anbegi baka. A frulusu Gado pipel di ben de na ini katibo fu Babilon a Bigiwan hondrohondro yari. Ma di Yesus du a sani disi a wroko fu en ben kaba? Nôno! A wroko dati o go doro na ini a ten di e kon èn den profeititori fu Esekièl e sori wi wan tu moi sani di o pasa.

³⁴ Prakseri den wortu disi: „Sma o taki: ’A kondre drape di ben de wan brokopresi, tron leki a dyari fu Eden’” (Esek. 36:35). Fa Esekièl nanga den tra Dyu di ben de na ini katibo ben frustan den wortu disi? A no de fu taki dati den no ben fruwakti taki a kondre fu den ben o kon tron wan trutru paradijs leki a Dyari fu Eden, di Yehovah srefi ben prani! (Gen. 2:8) Ma den ben frustan taki Yehovah ben wani sori den taki a kondre fu den ben o moi èn taki a gron ben o gi furu nyanyan.

³⁵ Fa a profeititori e kon tru na ini a ten disi? Na ini a ten disi wi no e fruwakti taki wi o abi wan trutru dyari fu Eden, fu di wi e libi na ini wan ogri grontapu di Satan Didibri e tiri. Ma den wortu disi e kon tru na wan agersifasi. Den anbegiman fu Yehovah de na ini wan agersi paradijs pe den e dini Yehovah fayafaya èn den e poti na anbegi fu en na a fosi presi. Dei fu dei na agersi paradijs e kon moro moi. Ma fa sani o de na ini a ten di e kon?

36, 37. Sortu pramisi o kon tru na ini Paradijs?

³⁶ Baka a feti fu Armagedon, Yesus o go doro nanga a wroko fu en. A o meki heri grontapu tron wan paradijs. Na a ten fu a Dusun Yari Tiri a o yepi libisma fu meki grontapu kon de leki a dyari fu Eden, soleki fa Yehovah ben abi na prakseri (Luk. 23:43). Na a ten dati wánfasi o de na mindri ala libisma èn den o sorgu bun gi grontapu. Wi no o abi fu frede noti èn nowan sma o du ogri nanga wi. Prakseri fa a o de te a pramisi disi o kon tru: „Mi o meki wan frubontu fu freide  nanga den èn mi o meki taki ogri meti no de moro na ini a kondre. Den o tan na ini a sabana sondro fu frede èn den o sribi na busi.”​—Esek. 34:25.

³⁷ Yu e si kaba fa a o switi? Sondro fu frede yu o man go na ala sei fu grontapu. Nowan meti o du ogri nanga yu. Nowan ogri o miti yu. Yu wawan o man waka go na ini den moro bigi busi, yu o man prisiri nanga ala den moi sani di de fu si èn yu o man sribi drape srefi. Te yu o wiki yu o si taki yu sribi switi èn taki noti no pasa nanga yu!

38. Fa yu o firi te a profeititori na ini Esekièl 28:26 kon tru?

³⁸ A pramisi disi o kon tru tu: „Den no o abi nowan broko-ede te den e libi [na ini a kondre]. Den o bow oso èn den o prani droifidyari. Iya, den o libi drape sondro broko-ede te mi o strafu den pipel di ben spotu den. Den sa musu fu sabi taki mi na Yehovah, a Gado fu den” (Esek. 28:26). Te den feanti fu Yehovah no de moro, freide o de na heri grontapu èn sani o go bun. Wi o sorgu grontapu, wi o man sorgu wisrefi nanga wi osofamiri, wi o man bow bun oso, wi o man libi na ini den èn wi o man prani droifidyari.

39. Fu san ede yu de seiker taki den profeititori fu Esekièl di e taki fu a paradijs o kon tru?

³⁹ Yu e si den pramisi disi leki dren nomo? Hori na prakseri san Yesus du kaba na ini a ten disi pe ’ala sani e seti kon bun baka’. Awinsi san Satan wani du, Yesus kisi a makti fu Gado fu seti a tru anbegi baka na ini na ogri ten disi. A sani disi e gi wi a dyaranti taki ala den sani di Yehovah pramisi na ini den profeititori fu Esekièl o kon tru!