1. Fruteri san den waktiman fu Yehovah ben e du èn san ben pasa baka dati.

 WAN waktiman e tanapu na tapu den skotu fu Yerusalem èn a e luku go na a sei pe a son e dongo. A e pruberi fu si efu feanti e kon. Wantronso a e bigin blo na tapu a tutu fu en fu warskow a pipel. A legre fu Babilon e kon! Ma a lati tumusi gi den sma fu a foto fu du wan sani. Moro leki 100 yari den waktiman, den profeiti fu Yehovah, ben warskow den gi a dei disi, ma a pipel no ben wani arki. Now a legre fu Babilon lontu a foto. Baka omeni mun den srudati e broko den skotu fu a foto, den e pori a tempel èn den e kiri den sma fu Yerusalem noso den e tyari den gowe.

2, 3. (a) San o miti den sma fu grontapu heri esi èn sortu bosroiti den musu teki? (b) Sortu aksi wi o luku?

² Na ini a ten disi a hemel legre fu Yehovah e sreka fu go feti nanga den ogrisma fu grontapu (Openb. 17:12-14). Fosi a feti dati wan bigi banawtu o de di libisma no ondrofeni noiti ete (Mat. 24:21). Ma a no lati tumusi gi sma fu arki a warskow fu den waktiman fu Yehovah.

³ Fu san ede Yehovah ben poti waktiman? Sortu boskopu  den waktiman ben abi? Suma ben de den waktiman? Sortu frantwortu wi abi? Meki wi go luku den aksi disi.

4. Fu san ede Yehovah ben poti waktiman? (Luku a prenki na a bigin fu a kapitel.)

⁴ Leisi Esekièl 33:7. Na ini Bijbel ten den waktiman ben tanapu na tapu den skotu fu a foto fu kibri den sma na ini a foto. A sani disi ben sori taki a tiriman fu a foto ben e broko en ede nanga a pipel fu en. Te a waktiman ben o blo tapu a tutu fu en, dan kande den sma di ben e sribi ben o skreki wiki. Ma efu den ben arki a warskow fu a waktiman den ben kan tan na libi. Na so a de tu taki Yehovah no ben poti waktiman fu frede den Israelsma nanga takru boskopu, ma a ben du dati fu di a ben broko en ede nanga en pipel èn a ben wani kibri den.

5, 6. San na wan sani di e sori taki Yehovah na wan Gado fu retidu?

⁵ Di Yehovah poti Esekièl leki waktiman a meki wi kon si wan tu moi fasi fu en. Meki wi go luku tu fu den fasi dati.

⁶ Retidu: Wi e si taki Yehovah na wan Gado fu retidu fu di a no e krutu ala sma na a srefi fasi, ma a e luku san ibri sma e du. Fu eksempre, bigi grupu sma yere a boskopu di Esekièl ben prati, ma den no ben arki. Toku Yehovah no ben luku san a heri grupu ben du, ma a ben luku sortu bosroiti ibri sma ben teki. Na ini a buku Esekièl Yehovah e taki ibri tron baka dati a e taki nanga „wan ogri sma” èn nanga „wan reti-ati sma”. Sobun, Yehovah e krutu ibri sma gi den sani di den e du baka te den yere a boskopu.​—Esek. 33:8, 18-20.

7. San Yehovah e luku te a e krutu sma?

⁷ Wan tra fasi fa wi e si a retidu fu Yehovah na a fasi fa a e krutu sma. Yehovah no e luku den sani di wi ben du na ini a ten di pasa, ma a e luku san wi e du now. A e luku efu wi e gi yesi na a warskow fu en. Yehovah ben taigi Esekièl: „Te mi taigi wan ogri sma: ’Yu o dede trutru’, ma a e tapu fu du ogri, a e bigin du bun, [èn] a tron wan reti-ati sma, . . . dan a o tan na libi trutru.” Baka dati Yehovah e taki: „Mi no o memre nowan fu den sondu fu en èn mi no o strafu en” (Esek. 33:14-16). Ma na a tra sei wan sma di ben du san reti na ini a ten di pasa no musu denki taki Yehovah no o strafu en efu a bigin du ogri. Yehovah ben taki dati efu wan sma e „frutrow na tapu en eigi retidu èn a e bigin du ogri, dan [a] no o memre nowan fu den bun sani di a ben du. Na fu di a du ogri, meki a o dede.”​—Esek. 33:13.

8. San na wan tra fasi fa Yehovah e sori taki en na wan Gado fu retidu?

⁸ Ete wan fasi fa wi e si a retidu fu Yehovah na taki a e gi sma nofo ten fu gi yesi na den warskow fu en. Esekièl bigin wroko leki profeiti sowan siksi yari fosi a legre fu Babilon  pori Yerusalem. Ma Esekièl no ben de a fosi sma di ben warskow Gado en pipel taki a ben o strafu den. Moro leki 100 yari fosi Yerusalem kisi pori, Yehovah ben seni den profeiti Hosea, Yesaya, Mika, Oded, nanga Yeremia fu warskow a pipel. Yehovah ben meki Yeremia taigi den Israelsma: „Mi ben seni waktiman fu taigi unu: ’Un poti prakseri na a babari fu a tutu!’” (Yer. 6:17) A fowtu no ben de na Yehovah nanga den waktiman fu en di someni sma lasi den libi di den Babilonsma pori Yerusalem.

9. Fa Yehovah sori lobi?

⁹ Lobi: Yehovah sori lobi di a seni den waktiman fu en fu warskow reti-ati sma nanga ogrisma. A du dati aladi den ogrisma ben du sani di ben hati en èn di ben gi en porinen. Prakseri a sani disi: Den Israelsma ben de Yehovah en pipel, ma toku den ben drai baka gi en ibri tron baka èn den ben dini falsi gado. Fu sori o furu a sani disi ben hati en, Yehovah agersi den Israelsma nanga wan uma di e waka gi en masra (Esek. 16:32). Toku Yehovah tan yepi den. A ben wani meki en bun nanga den, a no ben wani strafu den. A lasti sani di a ben wani du na strafu den. Fu san ede? A ben taigi Esekièl: „Mi no e prisiri te wan ogri sma e dede, ma mi e prisiri te wan ogri sma e drai en libi èn te a e tan na libi” (Esek. 33:11). Na so Yehovah ben denki na a ten dati èn na so a e denki te now ete.​—Mal. 3:6.

10, 11. San wi e leri fu a fasi fa Yehovah sori lobi nanga retidu gi den Israelsma?

 ¹⁰ San wi e leri fu a fasi fa Yehovah sori lobi nanga retidu gi den Israelsma? Wan sani di wi e leri na taki te wi e preiki, wi no musu denki taki ala sma na a srefi. A no bun srefisrefi fu denki taki wan sma no abi fu yere a boskopu fu di a ben du ogri fosi, fu di a gudu noso pôti, fu di a de fu wan tra ras, wan tra lo noso fu di a e taki wan tra tongo. Yehovah leri na apostel Petrus wan sani di prenspari te now ete: „Gado no lobi a wan sma moro a trawan, ma awansi fu sortu kondre wan sma de, efu a e lespeki Gado èn a e du san reti, dan Gado feni en bun.”​—Tori 10:34, 35.

¹¹ Wan tra prenspari sani di wi e leri na taki wi musu tan ondrosuku wisrefi. Den bun sani di wi du na ini a ten di pasa no wani taki dati wi kan bigin du ogri now. Wi musu hori na prakseri taki wi na sondusma neleki den sma di wi e miti na ini a preikiwroko. A rai di na apostel Paulus ben gi a gemeente na ini Korente e teri gi wi tu: „A sma di denki taki a e tanapu, musu luku bun taki a no fadon. Nowan tesi di unu e kisi, na tesi di tra libisma no e kisi” (1 Kor. 10:12, 13). Noiti wi musu ’frutrow na tapu wi eigi retidu’. Wi no musu denki taki Yehovah no o strafu wi gi den ogri di wi e du fu di wi e du bun sani tu (Esek. 33:13). Awinsi o langa wi e dini Yehovah kaba, a prenspari taki wi e tan sori sakafasi èn taki wi e tan gi yesi na en.

12. San wi musu hori na prakseri efu wi du seryusu sondu na ini a ten di pasa?

 ¹² Ma san wi musu du efu wi ben du seryusu sondu fosi, ma wi abi konsensi fonfon ete? A boskopu fu Esekièl e leri wi taki Yehovah o strafu ogrisma di no abi berow. Ma wi leri tu taki Yehovah na wan Gado fu lobi (1 Yoh. 4:8). Efu wi e du sani di e sori taki wi abi berow, dan noiti wi musu denki taki Yehovah no o gi wi pardon (Yak. 5:14, 15). Yehovah ben de klariklari fu gi den Israelsma di ben go dini falsi gado pardon èn a de klariklari fu gi wi pardon tu.​—Ps. 86:5.

13, 14. (a) Sortu boskopu den waktiman ben abi? (b) Sortu boskopu Yesaya ben prati?

¹³ Leisi Esekièl 33:2, 3. Sortu boskopu den waktiman fu Yehovah ben abi? Wan prenspari sani di den ben du na taki den ben warskow sma. Ma den prati bun nyunsu tu. Meki wi luku wan tu eksempre.

¹⁴ Yesaya ben dini leki profeiti na a pisi ten fu 778 te go miti 732 Fosi Krestes. A ben warskow a pipel taki den Babilonsma ben o teki Yerusalem abra èn taki den ben o tyari den gowe leki strafuman (Yes. 39:5-7). Ma a ben skrifi tu: „Arki! Den waktiman fu yu opo den sten. Leki wán man den e bari fu prisiri, bika nanga den eigi ai den o si fa Yehovah e tyari den sma fu Sion kon baka” (Yes. 52:8). A sani disi ben de bun nyunsu trutru! A tru anbegi ben o seti baka.

15. Sortu boskopu Yeremia ben abi?

¹⁵ Yeremia ben dini leki profeiti na a pisi ten fu 647 te go miti 580 Fosi Krestes. Sma ben feni taki Yeremia ben tyari soso takru boskopu. Ma disi no de so. Yeremia ben du ala san a man fu warskow den ogri Israelsma taki Yehovah ben o tyari rampu kon na den tapu. a Ma a ben prati bun nyunsu tu. A ben taki dati a pipel fu Gado ben o drai go baka na den kondre èn a tru anbegi ben o seti baka.​—Yer. 29:10-14; 33:10, 11.

16. Fa a boskopu fu Esekièl ben yepi den Dyu na ini Babilon?

¹⁶ Na ini a yari 613 Fosi Krestes Yehovah poti Esekièl leki waktiman èn a tan du a wroko fu en teleki a yari 591 Fosi Krestes. Soleki fa wi si na ini kapitel feifi nanga siksi fu a buku disi, dan Esekièl ben tan warskow den Israelsma taki Yerusalem ben o kisi pori. Dati meki a no ben o abi brudu-paiman te den ben o lasi den libi. A ben warskow den Dyu na ini Babilon tu taki Yehovah ben o strafu den sma na ini Yerusalem di ben drai baka gi a tru bribi. Ma a ben yepi den tu fu abi wan bun matifasi nanga Yehovah èn fu de srekasreka gi a wroko di den ben o abi fu du na ini a ten di e kon. Baka di den ben de 70 yari na ini katibo, Yehovah ben o tyari wan tu Dyu go baka na a kondre Israel pe den ben o abi wan bun libi (Esek. 36:7-11). Den Dyu disi ben de den pikin  nanga den granpikin fu den sma di ben arki a warskow fu Esekièl. Soleki fa den tra kapitel na ini Pisi 3 fu a buku disi e sori, dan Esekièl ben abi furu bun nyunsu. A ben sori taki a tru anbegi ben o seti baka na ini Yerusalem.

17. O ten Yehovah e poti waktiman?

¹⁷ Na den profeiti disi wawan Yehovah gebroiki leki waktiman? Nôno. Ala ten te Yehovah o du wan prenspari sani, a e poti waktiman fu warskow den ogrisma èn fu prati bun nyunsu.

18. Sortu wroko Yohanes a Dopuman ben du?

¹⁸ Na ini a ten fu Yesus, Yehovah ben poti Yohanes a Dopuman leki waktiman. A ben warskow den Dyu taki Yehovah no ben o si den moro leki en pipel (Mat. 3:1, 2, 9-11). Ma a ben du moro. Yesus ben taki dati Yohanes ben de a „boskopuman” di ben sreka a pasi gi a Mesias (Mal. 3:1; Mat. 11:7-10). Leki boskopuman Yohanes ben musu prati a bun nyunsu taki Yesus, „a Pikin Skapu fu Gado”, ben doro èn taki a ben o puru „a sondu fu grontapu”.​—Yoh. 1:29, 30.

19, 20. Fa Yesus nanga den disipel ben du den wroko leki waktiman?

¹⁹ Fu ala den waktiman di Yehovah ben poti, Yesus ben de a moro prenspariwan. Neleki Esekièl Yehovah ben seni en go na „den Israelsma” (Esek. 3:17; Mat. 15:24). Yesus ben warskow den Dyu taki den no ben o de Gado pipel moro èn taki Yerusalem ben o kisi pori (Mat. 23:37, 38; 24:1, 2; Luk. 21:20-24). Ma a moro prenspari sani di a ben du na taki a ben prati bun nyunsu.​—Luk. 4:17-21.

²⁰ Di Yesus ben de na grontapu a ben taigi den disipel: „Tan na ai” (Mat. 24:42). Den ben gi yesi na en èn leki waktiman den ben warskow den Dyu taki Yehovah no ben wani den leki en pipel moro èn taki a no ben si Yerusalem moro leki wan prenspari foto (Rom. 9:6-8; Gal. 4:25, 26). Den disipel ben prati bun nyunsu tu, neleki den waktiman di Yehovah ben poti na wroko fosi den. Den ben fruteri sma taki trakondre sma ben man tron memre fu na „Israel fu Gado” di ben salfu nanga santa yeye. Den ben o kisi a grani fu yepi Krestes fu seti a tru anbegi baka na grontapu.​—Tori 15:14; Gal. 6:15, 16; Openb. 5:9, 10.

21. Fu san ede Paulus ben de wan bun eksempre?

²¹ Yehovah ben poti na apostel Paulus tu leki waktiman èn a ben de wan bun eksempre. A ben du en wroko fayafaya. Neleki Esekièl a ben sabi taki a ben o abi brudu-paiman efu a no ben du a wroko di Yehovah ben gi en (Tori 20:26, 27). Neleki den tra waktiman Paulus no ben warskow sma nomo, ma a ben prati bun nyunsu tu (Tori 15:35; Rom. 1:1-4). Paulus ben taki san a profeiti Yesaya ben skrifi: „Luku den moi futu fu den sma di e waka na tapu den bergi fu tyari bun  nyunsu.” A ben taki dati den bakaman fu Krestes e du a sani disi te den e preiki a bun nyunsu fu Gado Kownukondre.​—Yes. 52:7, 8; Rom. 10:13-15.

22. San pasa baka di den apostel dede?

²² Baka di den apostel dede, furu sma na ini a Kresten gemeente bigin leri sma sani di no tru (Tori 20:29, 30; 2 Tes. 2:3-8). Wan langa pisi ten, moro falsi Kresten ben de leki tru Kresten èn falsi leri ben furu so te taki sma no ben sabi a boskopu fu Gado Kownukondre (Mat. 13:36-43). Ma di a ten doro taki Yehovah ben o krin a gemeente, a poti waktiman baka fu warskow sma èn fu prati bun nyunsu. Na so a sori taki en na wan Gado fu lobi nanga retidu. Suma ben de den waktiman disi?

23. Sortu wroko Brada Charles Russell nanga den mati fu en ben du?

²³ Na ini den yari fosi 1914, Brada Charles Taze Russell nanga den mati fu en ben de a „boskopuman” di ben o „sreka a pasi” fosi a Mesias Kownukondre seti (Mal. 3:1). b Den brada disi ben wroko tu leki waktiman èn den ben gebroiki a tijdschrift „Sion Waktitoren nanga Boskopuman di e sori taki Krestes kon” (Zion’s Watch Tower and Herald of  Christ’s Presence) fu warskow sma gi a dei fu Yehovah èn fu prati a bun nyunsu fu Gado Kownukondre.

24. (a) Fa a koni srafu e du a wroko fu wan waktiman? (b) San yu leri fu den waktiman di Yehovah poti na ini a ten di pasa? (Luku a faki „Waktiman di de wan bun eksempre”.)

²⁴ Baka di a Kownukondre seti, Yesus poti wan pikin grupu brada fu dini leki a koni srafu (Mat. 24:45-47). Sensi a ten dati, na den e du a wroko fu wan waktiman. Wi sabi a grupu brada disi leki a Tiri Skin. Den e warskow sma gi „a dei fu wi Gado en atibron”. Ma a no dati wawan den e du. Den e fruteri sma tu fu „a ten te Yehovah o sori sma bun-ati”.​—Yes. 61:2; luku sosrefi 2 Korentesma 6:1, 2.

25, 26. (a) Sortu wroko ala den bakaman fu Krestes musu du èn fa wi e du en? (b) San wi o luku na ini a tra kapitel?

²⁵ Aladi Yesus poti a koni srafu leki waktiman na ini a ten disi, a taigi „ala” den bakaman fu en fu „tan na ai” (Mark. 13:33-37). Wi e gi yesi na Yesus te wi e du muiti fu tan abi wan tranga bribi èn te wi e horibaka gi a koni srafu. Wi e sori taki wi de na ai te wi e tan preiki fayafaya (2 Tim. 4:2). Fu san ede wi e du dati? Wi e du en fu di wi wani yepi sma fu tan na libi (1 Tim. 4:16). Na ini a ten di e kon furu sma o lasi den libi fu di den no arki a warskow fu a koni srafu (Esek. 3:19). Ma a moro prenspari reide fu san ede wi e preiki na taki wi wani fruteri sma a moro bun nyunsu di de. Dati na taki a tru anbegi seti baka! Now na ’a ten te Yehovah e sori sma bun-ati’. A doro opo ete gi sma fu kon dini wi lobi-ati Gado Yehovah makandra nanga wi. Dyonsro a grontapu disi o kisi pori. Ala sma di o tan na libi o kisi blesi te Yesus Krestes, a Manpikin fu Gado, o tiri. A no de fu taki dati wi o du ala san wi man fu yepi a koni srafu fu prati a bun nyunsu disi!​—Mat. 24:14.

²⁶ Aladi wi e libi na ini na ogri grontapu disi, toku Yehovah sorgu taki a pipel fu en abi wánfasi. Fa a du disi? Na ini a tra kapitel wi o kisi piki tapu na aksi disi te wi o luku wan profeititori fu tu tiki.