Gi ala sma di lobi Yehovah:

Na ini a yari 1971, den sma di go na a „Gado nen” Distrikt Kongres ben breiti di den kisi wan tu nyun buku. Furu sma no ben fruwakti taki den ben o kisi den buku disi. Wan brada ben taki fu wan fu den buku dati: „A buku disi na wan fu den moro moi sani di wi kisi èn a e sori san o pasa na ini a ten di e kon!” Fu sortu buku a brada ben e taki? A ben e taki fu a buku di ben nen „De natiën zullen weten dat ik Jehovah ben”​—Hoe? Fu san ede so furu sma ben breiti nanga a buku disi? Fu di na ini a buku disi, den brada ben fruklari den profeititori fu a buku Esekièl moro bun. Furu fu den profeititori disi e sori san o miti ala sma na grontapu na ini a ten di e kon.

Di a buku disi kon na doro yu ben abi sowan 1.5 milyun anbegiman fu Yehovah. Ma na ini den yari baka dati a nomru disi kren esi-esi. Now moro leki 8 milyun sma e dini Yehovah (Yes. 60:22). Den milyunmilyun anbegiman disi fu Yehovah e taki moro leki 1000 difrenti tongo (Sak. 8:23). Furu fu den noiti no kisi na okasi fu studeri wan buku di e fruklari den profeititori fu Esekièl finifini.

Boiti dati, na ini den yari baka 1971 Yehovah yepi wi fu frustan furu leri fu Bijbel moro bun (Odo 4:18). Na ini 1985 wi kon frustan taki Gado e si den „tra skapu” leki en mati (Yoh. 10:16; Rom. 5:18; Yak. 2:23). Na ini 1995 wi kon frustan taki na a ten fu a bigi banawtu Krestes o krutu sma èn a o taki suma na „den skapu” èn suma na „den bokoboko” (Mat. 24:21; 25:31, 32). Ala den kenki disi yepi wi fu frustan a buku Esekièl moro bun.

Na ini den yari di pasa, Yehovah yepi wi fu frustan furu tra sani moro krin. Prakseri den sani di wi leri fu den agersitori fu Yesus. Now wi e frustan krin san Yesus ben wani leri wi nanga den agersitori disi. Wan tu fu den agersitori dati e taki fu sani di o pasa heri esi na a ten fu a bigi banawtu. Wi kon frustan son profeititori fu a buku Esekièl moro bun tu. Wan tu fu den profeititori dati na a wan fu Gok fu Magok (kapitel 38 nanga 39), a profeititori fu a man nanga na enkikokro fu wan sekretarsi (kapitel 9), a profeititori fu den drei bonyo na ini a lagipresi èn a profeititori fu den tu tiki di e tron wán tiki (kapitel 37). Wi e frustan den profeititori disi tra fasi leki san ben skrifi na ini a buku „De natiën zullen weten dat ik Jehovah ben”​—Hoe?

Dati meki wi kan frustan taki furu anbegiman fu Yehovah ben aksi: „O ten wi o kisi wan nyun buku pe den brada e fruklari den profeititori fu Esekièl moro bun?” Fu dati ede wi meki a buku Yehovah seti a tru anbegi baka. Te yu o leisi den 22 kapitel, dan teki ten tu fu luku san yu kan leri fu den moi prenki na ini a buku disi. Yu o si taki wi ondrosuku sani finifini fosi wi skrifi a buku disi. Wi denki dipi fu den tori disi èn wi begi Yehovah fayafaya fu yepi wi fu frustan fu san ede a meki Esekièl skrifi den profeititori fu en. Wi prakseri bun fu den aksi disi: San den sma di ben e libi na ini a ten fu Esekièl ben leri fu den profeititori èn san wi na ini a ten disi e leri fu den? Sortu profeititori e taki fu sani di musu kon tru ete na ini a ten di e kon? Sortu sani na ini den profeititori fu Esekièl e prenki wan moro  bigi sani? Den piki tapu den aksi disi e yepi wi fu frustan a moi buku disi moro bun.

Te yu o leisi a heri buku Esekièl, dan yu o kon abi furu warderi gi a pisi fu Yehovah en organisâsi di de na hemel. A no de fu taki dati yu o kisi moro warderi tu gi den wet fu Yehovah di e sori fa den sma na hemel èn na grontapu musu anbegi en. A Tru anbegi-buku o yepi yu fu de nanga moro tangi gi den sani di Yehovah du kaba gi en pipel èn gi den sani di a o du gi wi heri esi. Yu o si taki a buku disi e poti prakseri na tu prenspari sani. A fosi sani na taki efu wi wani taki Yehovah feni wi bun, dan wi musu kon sabi en moro bun èn wi musu si en leki a sma di abi a reti fu tiri hemel nanga grontapu. A di fu tu sani na taki wi musu anbegi Yehovah na a fasi di a feni bun èn wi musu libi soleki fa en wani.

Wi e winsi trutru taki a buku disi o yepi yu fu du moro muiti fu dini Yehovah na wan fasi di e tyari glori gi en bigi, santa nen. Wi howpu tu taki a buku disi o yepi yu fu tan fruwakti a ten te ala sma na grontapu sa musu fu sabi taki Yehovah na a Moro Hei Tiriman.​—Esek. 36:23; 38:23.

Wi e begi taki wi lobi Papa Yehovah yepi yu fu frustan a buku di a meki a profeiti Esekièl skrifi.