1, 2. Fruteri fa sani waka di Maria ben de na pasi, èn fruklari fu san ede a no ben makriki gi en.

MARIA ben e pruberi fu sidon moro bun na tapu a pikin buriki. Na omeni yuru kaba a ben de na pasi. A heri pisi ten dati, Yosef ben e waka leti na en fesi. Den ben e go na Betlehem di ben de farawe. Maria firi baka fa a beibi ben e buweigi na ini en bere.

² Na a ten dati, Maria ben de nanga bere omeni mun kaba. Bijbel e taki dati „en bere ben bigi kaba” (Luk. 2:5). Di Yosef nanga Maria ben e pasa a wán gron baka a trawan, dan a kan taki sonwan fu den gronman di ben e wroko na ini den gron, aksi densrefi fu san ede wan uma nanga so wan bigi bere ben e teki waka. Fu san ede Maria gowe libi en oso na ini Nasaret fu go na so wan farawe presi?

3. Sortu frantwortu Maria ben kisi, èn san wi wani kon sabi fu en?

³ We, wan tu mun na fesi, a yongu Dyu uma disi ben kisi wan frantwortu di noiti ete wan sma ben kisi. A ben o kisi wan pikin di ben o tron a Mesias, a Manpikin fu Gado (Luk. 1:35). Di a ten ben e doro taki a kisi a pikin, dan wan sani pasa di meki taki a ben musu teki a waka disi. Na a srefi ten, Maria kisi fu du nanga wan tu problema di ben o de wan tesi gi en. Meki wi go luku san yepi en fu tan abi wan tranga bribi.

4, 5. (a) Fu san ede Yosef nanga Maria ben e go na Betlehem? (b) Sortu profeititori kon tru di a grankownu gi a komando fu en?

⁴ Yosef nanga Maria no ben de den wan-enkri sma di  ben e hari go na wan tra presi. No so langa na fesi, Grankownu Augustus ben gi a komando taki ala sma na ini a kondre musu go na a foto pe den gebore, fu skrifi den nen na lantibuku. San Yosef du? Bijbel e taki: „Dati meki Yosef komoto fu a foto Nasaret na ini Galilea èn a go na Betlehem, a foto fu David na ini Yudea. Yosef ben de wan bakapikin fu David èn wan famiri fu en.”​—Luk. 2:1-4.

⁵ A komando di a grankownu gi, yepi fu meki wan profeititori kon tru di ben skrifi sowan 700 yari na fesi. A profeititori disi ben taki dati a Mesias ben o gebore na ini Betlehem. A tru taki wan foto Betlehem ben de 11 kilometer moro fara fu Nasaret. Ma a profeititori ben taki krin taki a Mesias ben o gebore na ini „Betlehem fu Efrata”. (Leisi Mika 5:2.) Sma di ben e komoto fu Nasaret fu go na a pikin dorpu disi, ben musu waka sowan 130 kilometer pasa na ini a bergikontren fu Samaria fu doro drape. Na a Betlehem dati Yosef ben musu go, fu di den afo fu Kownu David ben de fu a foto dati. Yosef nanga en wefi ben de bakapikin fu a famiri dati.

6, 7. (a) Fu san ede a kan taki a no ben makriki gi Maria fu go na Betlehem? (b) Fa Maria ben e teki bosroiti leki wefi fu Yosef? (Luku sosrefi den sani di skrifi na ondrosei fu bladzijde 178.)

⁶ Maria ben o horibaka gi a bosroiti di Yosef ben teki fu gi yesi na a komando? A no de fu taki dati a waka di den ben o teki ben o hebi gi Maria. Soleki fa a sori, a dreiten ben e kon na wan kaba na a ten dati, èn a kan taki alen ben o bigin fadon. Boiti dati, a presi pe Betlehem ben de ben hei sowan 760 meter. Sobun, wan sma di ben komoto fu Galilea fu go na Betlehem, ben o abi fu waka wan tu dei, èn a ben o abi fu kren wan moi pisi. Kande a ben o teki moro langa gi Maria nanga Yosef fu doro drape, fu di Maria di ben de nanga bigi bere, ben o abi fu rostu difrenti leisi. Te wan yongu uma de nanga bigi bere, dan a no de fu taki dati a no wani gowe tumusi fara fu en oso, fu di a ben o wani taki famiriman nanga mati yepi en te a e bigin firi taki a o kisi a pikin.  Sobun, Maria ben musu abi deki-ati fu teki a waka disi go na so wan farawe presi.

⁷ Toku Lukas e taki dati Yosef „skrifi en nen na lantibuku makandra nanga Maria”. Lukas e taki tu dati Maria „ben trow kaba” nanga Yosef (Luk. 2:4, 5). Leki wefi fu Yosef, Maria no ben kan teki bosroiti en wawan. A ben e si en masra leki edeman èn fu dati ede a ben e tyari a frantwortu di Gado ben gi en fu horibaka gi den bosroiti di en masra ben e teki. * Sobun, a go nanga en masra, aladi a no ben makriki gi en.

8. (a) Sortu tra sani ben kan meki taki Maria go na Betlehem makandra nanga Yosef? (b) San sma di abi bribi kan leri fu na eksempre fu Maria?

⁸ Sortu tra sani ben kan meki taki Maria gi yesi? A ben sabi a profeititori di e taki dati a Mesias ben o gebore  na ini Betlehem? Bijbel no e taki dati. Ma a kan taki Maria ben sabi a profeititori disi, fu di den kerki fesiman èn a pipel sosrefi ben sabi a tori disi (Mat. 2:1-7; Yoh. 7:40-42). Maria ben sabi Gado Wortu bun (Luk. 1:46-55). Wi no sabi efu Maria ben go na Betlehem fu di a ben wani gi yesi na en masra, na lantiwèt, noso fu di a ben sabi a profeititori fu Yehovah. Awansi fa a no fa, Maria na wan tumusi moi eksempre gi wi. Yehovah abi warderi gi mansma nanga umasma di abi sakafasi èn di e gi yesi na en. Na ini a ten disi, furu sma no e si en leki wan prenspari sani fu gi yesi, ma a moi eksempre fu Maria na wan deki-ati gi sma di e gi yesi na Gado.

9, 10. (a) San Maria nanga Yosef ben e prakseri kande di den ben e doro Betlehem? (b) Pe Yosef nanga Maria bosroiti fu tan, èn fu san ede?

⁹ Maria ben musu fu breiti di a si taki den ben e doro a foto Betlehem. Di Maria nanga Yosef ben e kren go moro hei na tapu a bergi, den ben e pasa den gron nanga  olèifbon, den lasti froktu di sma ben e piki na ini a yari. Kande den ben e prakseri den sani di ben pasa na ini a pikin dorpu disi hondrohondro yari na fesi. Soleki fa a profeiti Mika ben taki, a foto disi ben pikin tumusi fu sma teri en leki wan fu den foto fu Yuda. Ma moro leki wán dusun yari na fesi Boas, Naomi, èn bakaten David ben gebore na ini a foto disi.

¹⁰ Di Maria nanga Yosef doro na ini a foto, dan sma ben lai drape. Tra sma ben doro drape fosi den, èn fu dati ede presi no ben de gi den fu tan. * Den ben musu tan na ini wan pen a neti dati. Wi kan frustan fa Yosef ben e broko en ede nanga en wefi, di a si taki Maria no ben e firi bun, èn taki en bere ben e hati en moro nanga moro. Fu ala presi, na dyaso Maria ben o kisi en pikin.

11. (a) Fu san ede umasma na ala sei kan frustan fa Maria ben e firi? (b) Na sortu fasi Yesus ben de wan „fosi” pikin?

¹¹ Umasma na ala sei kan frustan fa Maria ben e firi. Sowan 4000 yari na fesi, Yehovah ben taki dati umasma ben o kisi furu skin-ati te den ben o meki pikin, èn dati ben kon fu di den ben kon abi sondu (Gen. 3:16). Nowan buweisi de taki Maria no ben abi pen. Lukas no e taki finifini fu a tori dati, ma a e taki nomo: „A kisi en fosi manpikin” (Luk. 2:7). Iya, disi ben de a „fosi” pikin fu Maria, èn ala nanga ala a kisi seibi pikin, noso moro leki dati (Mark. 6:3). Ma a fosi pikin disi ben o de wan apartiwan. Boiti taki a ben de a fosi pikin fu Maria, a ben de sosrefi „a fosiwan fu ala sani di [Yehovah] meki”, iya, a ben de a wan-enkri Manpikin fu Gado.​—Kol. 1:15.

12. Pe Maria poti a beibi, èn fa sani ben de heri tra fasi leki fa toneel, skedrei, nanga tra sani e sori?

¹² Now a tori e taki fu wan sani di furu sma sabi: „A [Maria] domru en na ini wan krosi. Dan a poti en na ini wan nyanyan-baki fu meti” (Luk. 2:7). Toneel, skedrei, nanga prenki di abi fu du nanga a tori disi, e meki a tori disi moro moi leki fa a ben de. Ma luku fa sani waka trutru.  A baki di Maria ben poti a pikin na ini ben de a nyanyan-baki fu den meti. No frigiti taki na osofamiri disi ben musu tan na ini wan pen. So wan presi noiti no e smeri switi èn a no krin tu. A no de fu taki dati nowan papa noso mama ben o wani kisi en pikin na ini so wan presi, efu tra moro bun presi ben de. Nofo tron papa nanga mama wani den moro bun sani gi den pikin. Wi kan de seiker taki Maria nanga Yosef ben wani dati tu gi a Manpikin fu Gado!

13. (a) Fa Maria nanga Yosef du ala san den man fu meki sani waka bun? (b) Sortu sani prenspari tu gi koni papa nanga mama na ini a ten disi?

¹³ Maria nanga Yosef no meki a situwâsi disi broko den saka, ma den du ala san den man fu meki sani waka bun. Fu eksempre, luku taki Maria srefi sorgu gi a beibi. A domru en na ini krosi, èn a poti en safri na ini a nyanyan-baki so taki a ben kan sribi. Na so a beibi no ben o kowru èn noti no ben o pasa nanga en. Maria no ben o meki a muilek situwâsi disi tapu en fu sorgu bun gi a pikin. En nanga Yosef ben sabi tu taki a moro prenspari sani di den ben kan du gi a pikin, na fu leri en fu kon lobi Yehovah. (Leisi Deuteronomium 6:6-8.) Na ini a ten disi, a sani disi prenspari srefisrefi gi koni papa nanga mama di e kweki den pikin fu den na ini wan grontapu pe furu sma no e anbegi Gado.

14, 15. (a) Fu san ede den skapuman ben de fayafaya fu si a pikin? (b) San den skapuman du baka di den si Yesus na ini a pen?

¹⁴ Wantronso, Maria nanga Yosef yere wan babari. Wan tu skapuman lon kon na ini a pen, fu di den ben wani si na osofamiri èn spesrutu a pikin. Den man disi ben breiti srefisrefi, èn yu ben kan si dati na den fesi. Den ben komoto esi-esi fu den kontren na sei den bergi pe den ben e tan nanga den skapu fu den. * A papa  nanga a mama fu a pikin ben fruwondru fu a sani disi. Ne den skapuman fruteri den sortu moi sani den ben ondrofeni syatu na fesi. Den ben de na den bergi na mindrineti, di wantronso wan engel kon na den. A glori fu Yehovah ben e skèin na den lontu, èn na engel fruteri den taki no langa na fesi, Krestes, noso a Mesias gebore na ini Betlehem. Den ben o feni a pikin e didon na ini wan nyanyan-baki, domru na ini wan krosi. Baka dati, wan moro kefalek sani pasa. Wan heri ipi engel ben de fu si, èn den ben e prèise Gado.​—Luk. 2:8-14.

¹⁵ Wi kan frustan fu san ede den reti-ati man disi hasti densrefi go na Betlehem. A ben musu fu de so taki den ben breiti srefisrefi fu si a beibi di ben e didon na ini wan baki, soifri soleki fa na engel ben taki. Den ben fruteri trawan „san na engel taigi den . . . Ala sma di yere disi, ben fruwondru fu den sani di den skapuman fruteri den” (Luk. 2:17, 18). Soleki fa a sori, den kerki fesiman fu a ten dati ben e wisiwasi skapuman. Ma a de krin taki Yehovah ben e si den sakafasi skapuman disi leki warti sma. Fa Maria ben feni en taki den skapuman kon luku a beibi Yesus?

16. Fa Maria sori taki a ben e denki dipi fu sani? Fa a du kon taki a ben abi so wan tranga bribi?

¹⁶ A no de fu taki dati Maria ben weri baka di a kisi a pikin. Toku a arki bun san den skapuman ben abi fu taki. Ma a du moro leki dati srefi. Bijbel e taki: „Maria ben denki fu den sani di den sma ben e taki èn a ben aksi ensrefi san den sani disi ben wani taki” (Luk. 2:19). A yongu uma disi trutru ben e denki dipi fu sani. A ben sabi taki a boskopu fu na engel ben prenspari srefisrefi. Yehovah, a Gado fu en, ben wani taki a frustan bun sortu pikin a ben kisi èn o prenspari a pikin  dati ben o de. Fu dati ede, Maria no arki nomo, ma a sorgu taki a no frigiti den wortu disi. Na so a ben o man denki dipi fu den na ini den mun nanga den yari di ben o kon. Disi na wan prenspari sani di e sori fa a du kon taki Maria ben abi so wan tranga bribi en heri libi langa.​—Leisi Hebrewsma 11:1.

17. Fa wi kan teki na eksempre fu Maria te a abi fu du nanga den tru tori fu Gado?

¹⁷ Yu o teki na eksempre fu Maria? Yehovah meki sma skrifi tumusi prenspari tru tori na ini a Wortu fu en. Ma wi no o kisi wini fu den tru tori disi efu wi no e poti prakseri na den. Dati meki wi musu leisi Bijbel doronomo, èn wi no musu si en leki wan buku di e fruteri wi moi tori nomo, ma wi musu si en leki a Wortu fu Gado (2 Tim. 3:16). Neleki Maria, wi musu kon sabi den tru tori fu Gado èn wi no musu frigiti den. Na so wi o man denki dipi fu den. Te wi e denki dipi fu den sani di wi leisi na ini Bijbel, èn te wi e luku fa wi kan fiti den rai fu Yehovah moro bun na ini wi libi, dan a bribi fu wi o kon moro tranga.

18. (a) Fa Maria nanga Yosef hori densrefi na a Wèt na a ten di Yesus ben de wan beibi? (b) San wi e kon sabi fu Yosef nanga Maria te wi e luku sortu ofrandi den tyari?

¹⁸ Aiti dei baka di a pikin gebore, Yosef nanga Maria besnèi en soleki fa a Wèt fu Moses ben e taki, èn den gi en a nen Yesus soleki fa na engel ben taigi Maria (Luk. 1:31). Tapu a di fu 40 dei, den gowe libi Betlehem nanga en èn den tyari en go na a tempel na ini Yerusalem, di ben de sowan 10 kilometer moro fara. Drape den tyari na ofrandi di pôti sma ben musu tyari fu krin densrefi soleki fa a Wèt ben taki. Den tyari tu stondoifi noso tu osodoifi leki ofrandi. Awansi Maria nanga Yosef ben e syen taki den no ben man gi wan manskapu nanga wan stondoifi, toku den du ala san den man fu hori densrefi na a Wèt. Awansi fa a no fa, den kisi furu deki-ati di den ben de drape.​—Luk. 2:21-24.

19. (a) Sortu tra prenspari sani Simeon fruteri Maria? (b) San Ana du di a si Yesus?

¹⁹ Wan owru man di nen Simeon kon na Maria nanga  Yosef, èn a fruteri Maria moro sani di a no ben musu frigiti. Gado ben pramisi Simeon taki a ben o si a Mesias fosi a dede, èn Yehovah en santa yeye sori en taki a beibi Yesus ben o tron a pramisi Frulusuman. Simeon ben warskow Maria sosrefi fu a pen di a ben o abi wan dei. A ben taki dati Maria ben o firi neleki wan langa feti-owru boro en (Luk. 2:25-35). Aladi den wortu dati ben e warskow Maria taki wan ogri ben o miti en, toku a kan taki den yepi en fu horidoro di a muilek ten dati doro sowan 30 yari baka dati. Baka di Simeon taki nanga den, wan umaprofeiti di nen Ana, si a beibi Yesus. A taki fu a pikin disi nanga ala sma di ben abi a howpu taki Yerusalem ben o kisi frulusu.​—Leisi Lukas 2:36-38.

20. Fu san ede a ben de wan bun sani taki Yosef nanga Maria bosroiti fu tyari Yesus go na a tempel?

²⁰ A ben de wan bun sani taki Yosef nanga Maria ben teki a bosroiti fu tyari a beibi go na a tempel fu Yehovah na ini Yerusalem. Bakaten, a manpikin disi ben o abi a gwenti fu go na a tempel fu Yehovah doronomo. Di Yosef nanga Maria ben de drape, den gi Yehovah ala san den ben man, èn den kisi rai nanga deki-ati. A no de fu taki dati a bribi fu Maria ben kon moro tranga di a gowe libi a tempel a dei dati. A ben kon sabi furu tru tori fu Gado, a ben o denki dipi fu den, èn a ben o fruteri trawan den tori disi tu.

21. San wi musu du fu sorgu taki a bribi fu wi e kon moro tranga neleki fa dati ben pasa nanga a di fu Maria?

²¹ A moi fu si taki papa nanga mama na ini a ten disi e teki na eksempre dati. Papa nanga mama di de Yehovah Kotoigi e tyari den pikin go doronomo na den Kresten konmakandra. Den papa nanga mama disi e du ala san den man na ini a diniwroko fu Gado, èn den e gi den brada nanga sisa fu den deki-ati. Te den e komoto fu den Kresten konmakandra, den e firi taki a bribi fu den kon moro tranga, den e firi moro koloku, èn den abi furu bun sani fu fruteri trawan. A e gi prisiri fu miti den sma disi. A sani disi o meki taki a bribi fu wi o kon moro tranga, neleki fa dati ben pasa nanga a di fu Maria.