Yesus wroko heri dei èn a weri. Te neti e fadon a e taigi den disipel fu en: „Kon meki wi abra go na a tra sei fu a se” (Markus 4:35). Sobun, den e go na abrasei fu Kaperna-um.

Na a owstusei syoro fu a Se fu Galilea den Gerasasma e tan. Sma sabi a kontren disi leki Dekapolis tu. Den sma na ini den foto fu Dekapolis e hori densrefi na a Griki kulturu. Furu Dyu e libi drape tu.

Sma e si taki Yesus e teki boto fu gowe libi Kaperna-um. Wan tu sma e teki tra boto fu abra a se tu (Markus 4:36). A no fara fu abra a se. A Se fu Galilea de leki wan bun bigi kriki di langa sowan 21 kilometer èn a moro bradi pisi na sowan 12 kilometer. Ma disi no wani taki dati a no dipi.

Aladi Yesus no ben abi sondu, toku wi kan frustan taki a e kon weri te a e du a wroko fu en. Fu dati ede, te a boto gowe fu a syoro, a e go didon na bakasei fu a boto, a e poti en ede na tapu wan kunsu èn a e fadon na sribi.

Wan tu fu den apostel na man di sabi tyari boto, ma disi leisi sani no o go so makriki. Nofo tron tapusei fu a watra fu a Se fu Galilea waran èn lontu a se yu abi bergi. Son leisi te a kowru winti na den bergi e wai kon na tapu a waran watra fu a se, dan bigi winti e opo kon wantronso. Na dati e pasa now. Heri esi bigi skwala e naki a boto. „Watra bigin furu a boto èn den ben o sungu” (Lukas 8:23). Ma toku Yesus e sribi ete!

Den botoman sabi fa fu tyari boto te bigi winti e wai èn den e du furu muiti fu tyari a boto pe den wani go. Ma toku sani no e waka so bun disi leisi. Fu di den e frede taki den o lasi den libi, meki den e wiki Yesus èn den e taki: „Masra, yepi wi, wi o sungu!” (Mateyus 8:25) Den disipel e frede taki den o dede na watra!

Te Yesus wiki a e taigi den apostel: „Fu san ede unu e frede so? Na bribi unu no abi?” (Mateyus 8:26) Dan Yesus e bari a winti èn a taigi a se: „Tapu! Tan tiri!” (Markus 4:39) A bigi winti e tapu èn a se e kon tiri. (Markus nanga Lukas e taki fu a kefalek sani disi. Den e fruteri fosi fa Yesus du wan wondru fu tapu a winti èn baka dati den e fruteri taki den disipel no ben abi bribi.)

Prakseri nomo sortu krakti disi abi na tapu den disipel! Didyonsro den si fa Yesus meki wan bigi winti nanga wan krasi se kon tiri krinkrin. Ma now den e frede. Den e taigi makandra: „Suma na a sma disi? Srefi a winti nanga a se e du san a e taki.” Te fu kaba den e doro na a tra sei fu a se sondro taki wan sani pasa nanga den (Markus 4:41–5:1). Kande den tra boto di ben de na tapu a se ben drai go baka na a west-sei syoro fu a se.

A moi fu sabi taki Gado Manpikin abi a makti fu basi sani soleki a winti nanga a se. Disi e gi wi a dyaranti taki te a o tiri leki Kownu na heri grontapu, nowan sma o frede fu di rampu soleki gronseki noso bigi winti no o de moro!