Na a owstusei fu a Se fu Galilea, Yesus ben du wan wondru fu gi dusundusun sma nyanyan. Baka dati a lowe gi den sma di ben wani poti en leki kownu. A neti dati, a waka na tapu a krasi se èn Petrus ben waka na tapu a watra tu. Ma Petrus bigin sungu di a bigin tweifri èn Yesus ben abi fu yepi en. Yesus ben meki a winti kon tiri tu èn na so wan fasi a sorgu kande taki a boto fu den no sungu.

Now Yesus de baka na a westsei fu a se, na ini a kontren fu Kaperna-um. Te den sma di a ben gi nyanyan nanga yepi fu wan wondru feni en, den e aksi en: „O ten yu kon dya?” Yesus e piri-ai gi den èn a e taigi den taki den e suku en soso fu di den e howpu taki a o gi den nyanyan baka. A e gi den deki-ati fu ’no wroko gi nyanyan di e pori, ma fu wroko gi nyanyan di e tan langa èn di e gi sma têgo libi’. Dati meki den e aksi en: „San wi musu du, so taki Gado e feni wi bun?”​—Yohanes 6:25-28.

Kande den e denki taki Yesus o gi den deki-ati fu du san a Wet e taki, ma a e taigi den san na a moro prenspari sani di den musu du: „Disi na san Gado e aksi fu unu: Un musu bribi na ini a sma di Gado seni kon.” Ma den sma no e bribi na ini Yesus, aladi a du furu sani gi den. Den e taigi en fu sori den wan marki, so taki den kan poti bribi na ini en. Den e aksi en: „Sortu sani yu o du? Den afo fu wi ben nyan a mana na ini a sabana soleki fa Gado Buku taki: ’A gi den brede fu hemel meki den nyan.’”​—Yohanes 6:29-31; Psalm 78:24.

Te den sma aksi Yesus fu sori den wan marki, dan Yesus e taigi den suma na a sma di gi den nyanyan nanga yepi fu wan wondru. A e taki: „Mi e taigi unu: A no Moses gi unu a brede fu hemel, ma na mi Tata e gi unu a trutru brede fu hemel, bika a sma di e saka komoto fu hemel èn di e gi libi na sma fu grontapu, na a brede fu Gado.” Fu di den no e frustan san Yesus wani taigi den, meki den e begi en: „Masra, gi wi a brede disi ala ten” (Yohanes 6:32-34). Ma fu sortu „brede” Yesus e taki?

A e taki: „Mi na a brede di e gi libi. Noiti angri o kiri a sma di e kon na mi, èn noiti moro watra o kiri a sma di e bribi na ini mi. Ma mi taigi unu: Unu si mi, ma toku unu no e bribi. . . . Mi no saka komoto fu hemel fu du mi wani, ma fu du a wani fu en di seni mi kon. Disi na a wani fu a sma di seni mi kon: Mi no musu lasi nowan fu den sma di a gi mi, ma mi musu gi den wan opobaka na a lasti dei. Bika mi Tata wani taki ibri sma di sabi a Manpikin èn di e sori taki a e bribi na ini en, musu kisi têgo libi.”​—Yohanes 6:35-40.

A sani disi e tyari bruya kon, èn den Dyu e bigin krutu fu den sani di Yesus taki. Fa a kan taki dati en na „a brede di komoto fu hemel”? (Yohanes 6:41) Den sabi en nomo leki a manpikin fu sma di e tan na ini Nasaret, wan foto na ini Galilea. Den sma e aksi: „A no en na Yesus, a manpikin fu Yosef? Wi sabi en papa nanga mama, a no so?”​—Yohanes 6:42.

Yesus e taki: „Un no musu krutu nanga makandra moro. Nowan sma kan kon na mi, efu a Tata di seni mi kon no e hari en kon. Mi o gi a sma dati wan opobaka na a lasti dei. Den Profeiti skrifi: ’Den alamala o de sma di kisi leri fu Yehovah.’ Ibri sma di yere fu a Tata èn di teki leri, e kon na mi. Nowan sma si a Tata, boiti a sma di kon fu Gado. Na a sma disi si a Tata. Fu tru, mi e taigi unu: A sma di e bribi, o kisi têgo libi.”​—Yohanes 6:43-47; Yesaya 54:13.

Di Yesus ben taki nanga Nikodeimus wan pisi ten pasa, a taki dati wan sma musu bribi na ini a Manpikin fu libisma fu man kisi têgo libi. A taki: „Ala sma di e bribi na ini [a wan-enkri Manpikin  fu Gado] no sa dede, ma sa kisi têgo libi” (Yohanes 3:15, 16). Ma now a e taki nanga wan moro bigi grupu sma, èn a e taigi den taki a kan yepi den fu kisi têgo libi. A mana fu Moses no ben man du dati gi den èn a brede di sma gwenti nyan na ini Galilea no man du dati tu. Fa den kan kisi têgo libi dan? Yesus e taki baka san a ben taki: „Mi na a brede di e gi libi.”​—Yohanes 6:48.

Yesus e taki go moro fara fu a brede fu hemel. Ma a tori e kon moro span te Yesus e gi sma leri na ini wan snoga na ini Kaperna-um.