Baka di Yesus tan sowan tu dei na ini Samaria, a e go na a kontren pe a ben e tan. A preiki furu na ini Yudea, ma a no e drai go na Galilea fu go rostu. Na presi fu dati, a e bigin preiki nanga moro faya na ini a kontren pe a kweki. Kande Yesus no e fruwakti taki den sma drape o lespeki en, fu di en srefi ben taki dati „wan profeiti no e kisi grani na ini en eigi kondre” (Yohanes 4:44). Den disipel no e tan nanga en, ma den e drai go baka na den famiri èn den e bigin du a wroko di den ben e du fosi.

Sortu boskopu Yesus e tyari? A e preiki: „A Kownukondre fu Gado kon krosibei kaba. Un abi berow èn bribi a bun nyunsu” (Markus 1:15). San sma e du te den yere a boskopu? Fu taki en leti, furu sma na ini Galilea e arki a boskopu fu Yesus èn den e gi en grani. Ma den no e du disi fu di den lobi a boskopu fu en. Son sma fu Galilea ben de na a Paskafesa na ini Yerusalem wan tu mun na fesi èn den si den bigi wondru di Yesus du drape.​—Yohanes 2:23.

Yesus o preiki na furu presi na ini Galilea, ma pe a o bigin? Soleki fa a sori, dan Yesus o bigin na ini Kana pe a ben kenki watra kon tron win na wan trowfesa. Now di Yesus de drape fu a di fu tu leisi, a e yere taki wan boi siki te fu dede. A boi disi na a manpikin fu wan futuboi fu Kownu Herodes Antipas. Na a kownu disi o meki sma koti Yohanes a Dopuman en ede puru bakaten. A futuboi fu Herodes yere taki Yesus komoto na Yudea kon na Kana. Dati meki a e komoto na en oso na Kaperna-um, dan a e go na Kana fu suku Yesus. A man disi di e sari srefisrefi, e begi Yesus: „Masra, kon bifo a yongu pikin fu mi dede.”​—Yohanes 4:49.

Yesus e taigi a man wan sani di e meki a fruwondru. A taki: „Yu kan go, yu manpikin de na libi” (Yohanes 4:50). A futuboi fu Herodes e bribi Yesus èn a e drai go na oso baka. Te a de na pasi a e miti wan tu srafu fu en di lon kon taigi en a bun nyunsu. Iya, a boi e libi èn a no siki moro! Fu di a wani sabi efu na Yesus dresi a boi trutru, meki a e aksi den srafu: ’O ten a boi kon betre?’

Den srafu e piki en: „Esde na wan ten fu wán yuru bakadina a korsu fu en saka.”​—Yohanes 4:52.

A futuboi fu Herodes e frustan taki a boi kon betre na a ten di Yesus taki: „Yu manpikin de na libi.” Baka dati a man disi di gudu so te taki a abi srafu, nanga ala sma na ini en oso, tron disipel fu Krestes.

Sobun, Yesus e du tu wondru na ini Kana. A fosi leisi a meki watra kon tron win èn a di fu tu leisi a dresi wan boi di ben de sowan 25 kilometer moro fara. Ma disi a no den wan-enkri wondru di a du. Toku a dresi di a dresi a boi disi prenspari, fu di a de a fosi wondru di a du di a drai kon baka na Galilea. A de krin taki en na wan profeiti di Gado feni bun. Ma omeni ’grani a profeiti disi o kisi na ini en eigi kondre’?

Disi o kon na krin te Yesus o go na en oso na ini Nasaret. San o pasa nanga en drape?