Yesus gi den fo disipel Petrus, Andreas, Yakobus nanga Yohanes a kari fu tron fisiman di ben o fanga libisma. Now, na a Sabat-dei, den e go na wan snoga na ini Kaperna-um. Yesus e gi leri na ini a snoga. Disi leisi sma e fruwondru tu fu a fasi fa a e gi leri. A no e gi leri leki den leriman fu Wet, ma a e gi leri leki wan sma di kisi makti fu Gado.

Na a Sabat-dei disi, wan man di abi wan ogri yeye na en tapu, de na ini a snoga tu. Leti drape na ini a snoga, a man e bari: „Wi no abi noti fu du nanga yu, Yesus fu Nasaret. Yu kon dya fu kiri wi? Mi sabi heri bun suma na yu. Yu na a Santawan fu Gado.” Ma Yesus e piri-ai gi na ogri yeye di de na a man tapu èn a e taki: „Tapu yu mofo èn komoto na a man tapu!”​—Markus 1:24, 25.

Ne na ogri yeye e trowe a man na tapu a gron, a e meki a man kisi stoipi èn a e bari bun tranga. Dan a e komoto na a man tapu „sondro fu gi en mankeri” (Lukas 4:35). Den sma di e tanapu na a man lontu na ini a snoga e fruwondru trutru! „San na a sani disi?”, na so den e aksi. „A man disi man taigi den ogri yeye san den musu du èn den e arki en” (Markus 1:27). Wi kan frustan taki a nyunsu fu a wondru disi e panya go na ala sei fu Galilea.

Yesus nanga den disipel fu en e komoto na ini a snoga, dan den e go na a oso fu Simon di den e kari Petrus tu. A mama fu a wefi fu Simon siki srefisrefi. A de nanga hebi korsu. Den e begi Yesus fu yepi en. Dati meki Yesus e go na en, dan a e hori en na en anu meki a opo. Wantewante a mama e kon betre, èn a e bigin sreka nyanyan gi Yesus nanga den disipel.

Te son dongo sma fu ala sei e tyari den siki sma fu den kon na a oso fu Petrus. Te fu kaba a gersi leki a heri foto kon makandra na Petrus mofodoro. Fu san ede? Den wani taki Yesus dresi den. „Sma tyari den siki sma fu den di ben abi difrenti sortu siki, kon na en. A poti en anu na tapu ibriwan fu den èn a meki den kon betre” (Lukas 4:40). Iya, awinsi sortu siki den sma abi, Yesus e dresi den soleki fa a profeiti Yesaya ben taki na fesi (Yesaya 53:4). A e puru ogri yeye na sma tapu srefi. Te den ogri yeye e komoto na den sma tapu, den e bari: „Yu na a Manpikin fu Gado” (Lukas 4:41). Den ogri yeye sabi taki Yesus na a Krestes, ma Yesus e piri-ai gi den. A no e gi den pasi fu taki go doro fu di den kan gi sma a denki taki den e dini a tru Gado.