Den 12 apostel ben preiki na ini heri Galilea. Nanga prisiri den e fruteri Yesus „ala san den du èn san den ben leri sma”. A no de fu taki dati den weri. Ma den no abi ten fu nyan srefi fu di bun furu sma e kon èn e gowe. Dati meki Yesus e taki: „Kon meki wi wawan go na wan presi fu kan rostu pikinso.”​—Markus 6:30, 31.

Kande den de krosibei fu Kaperna-um te den e go na ini wan boto. Den e pasa Betsaida go na wan presi na owstusei fu Yordan-liba pe nowan sma e tan. Ma furu sma e si te den e gowe èn trawan e kon sabi disi tu. Ala den sma disi e lon na a syoro go na a presi pe a boto o doro. Te a boto doro, den sma de drape kaba.

Te Yesus e komoto na ini a boto èn a e si den ipi-ipi sma, dan a e bigin sari den fu di den de leki skapu sondro skapuman. Dati meki a e bigin „leri den furu sani” fu a Kownukondre (Markus 6:34). A e meki „den siki sma kon betre tu” (Lukas 9:11). Baka wan pisi ten den disipel e taigi en: „Sma no e libi dyaso èn a lati kaba. Seni den sma gowe, so taki den kan go na den pikin foto fu bai sani fu nyan.”​—Mateyus 14:15.

Yesus e piki den: „Den no abi fu gowe. Gi den wan sani fu nyan” (Mateyus 14:16). Yesus sabi kaba san a o du, ma fu di a wani luku san Filipus o taki, meki a e aksi en: „Pe wi o bai brede, so taki den sma disi kan nyan?” A e aksi Filipus fu di Filipus na fu Betsaida di de krosibei. Ma awinsi den bai brede, a problema no o lusu. Sowan 5000 man de drape. Te yu ben o teri den uma nanga den pikin, dan kande den ben o de tu tron so furu. Filipus e piki: „Tu hondro solfru moni no sari fu bai brede gi ala den sma, awansi ibri sma ben o kisi wan pikin pisi nomo.” Sma ben wroko wan heri dei gi wán solfru moni.​—Yohanes 6:5-7.

Andreas e taki: „Wan pikin boi de dya èn a abi feifi brede nanga tu pikin fisi. Ma disi no sa sari gi den someni sma di de dya” (Yohanes 6:9). Kande Andreas e taki disi fu sori taki den no man gi ala sma nyanyan.

A de a pisi ten fu maart noso april leti fosi a Paskafesa fu a yari 32. Grun grasi e gro na tapu a bergi. Yesus e taigi den disipel taki den musu taigi den sma fu go sidon na tapu a grasi na ini grupu fu 50 noso 100 sma. A e teki den feifi brede nanga den tu fisi èn a e taki Gado tangi. Dan a e broko den brede pisipisi èn a e prati den fisi. Yesus e gi den disipel den pisi brede nanga fisi meki den prati den gi den sma. Ala den sma e nyan te den bere furu!

Bakaten Yesus e taigi den disipel: „Go piki den pisi brede di tan abra, so taki noti no e frumorsu” (Yohanes 6:12). Den disipel man furu 12 baskita nanga den pisi brede di tan abra!