Yesus preiki fayafaya sowan tu yari kaba. Ma yu denki taki a o teki en moro safri now? Nôno. Na presi fu dati a e go preiki na moro presi. A e ’bigin waka go na ala den foto nanga dorpu na ini Galilea fu gi sma leri na ini den snoga fu den èn fu preiki a bun nyunsu fu a Kownukondre. A e dresi ibri sortu siki nanga ibri sortu mankeri’ (Mateyus 9:35). Den sani di a e si e gi en na overtoigi taki moro sma de fanowdu fu du a preikiwroko. Ma fa a o du disi?

Te Yesus e waka na den difrenti presi, a e si sma di abi trowstu fanowdu èn den musu kisi yepi fu tron mati fu Gado. Sma e pina den èn den e waka bruyabruya leki skapu di no abi skapuman. Yesus e sari den sma èn a e taigi den disipel: „Iya, a kotiwroko bigi, ma furu wrokoman no de. Fu dati ede, begi a Masra fu a kotiwroko meki a seni wrokoman fu go du a kotiwroko fu en.”​—Mateyus 9:37, 38.

Yesus sabi fa a kan yepi den sma. A e kari den 12 apostel, dan a e prati den tu na tu. Sobun, siksi grupu de. Dan a e taigi den krin san den musu du: „No go na a kontren fu den trakondre sma èn no go na wan foto na ini Samaria. Na presi fu dati, un musu go soso na den lasi skapu fu Israel. Te unu e go preiki, dan un musu taki: ’A Kownukondre fu hemel kon krosibei kaba.’”​—Mateyus 10:5-7.

Den musu preiki fu a Kownukondre di Yesus ben taki fu en di a ben e leri den fa fu begi. ’A Kownukondre fu hemel kon krosibei kaba’ fu di Yesus Krestes, a sma di Gado o poti leki Kownu,  de drape. Ma fa den sma o sabi taki den disipel e teki presi gi a Kownukondre disi trutru? Yesus e gi den a makti fu man dresi den sikiwan èn fu wiki den dedewan srefi. Den musu du den sani disi sondro fu aksi den sma fu pai den. Ma fa den apostel o kisi nyanyan nanga den tra sani di den abi fanowdu ibri dei?

Yesus e taigi den disipel taki den no abi fu sreka nyanyan nanga tra sani te den o go preiki na difrenti presi. Den no abi fu tyari wan monisaka nanga gowtu, solfru, noso kopro. Den no abi fu tyari wan nyanyan-saka, krosi noso susu srefi. Fu san ede? Yesus e gi den a dyaranti disi: „A wrokoman warti fu kisi a nyanyan fu en” (Mateyus 10:10). Den sma di o arki a boskopu fu den disipel o gi den san den abi fanowdu. Yesus e taki: „Efu wan sma teki unu na ini oso, dan tan drape teleki unu komopo fu a presi dati.”​—Markus 6:10.

Yesus e sori den tu fa fu tyari a Kownukondre boskopu gi den sma. A e taki: „Te unu e go na ini na oso, taki den sma na ini na oso odi. Efu den e teki unu na ini oso, dan un musu blesi den. Ma efu den no e teki unu na ini oso, dan na unu o kisi a blesi. Efu wan presi de pe sma no kari unu kon na inisei noso den no arki san unu taki, dan un musu komoto na ini na oso noso a foto dati èn un musu naki a doti puru na un futu.”​—Mateyus 10:12-14.

A kan taki na ini son foto noso dorpu nowan sma o wani arki a boskopu fu den. San o pasa nanga so wan presi? Yesus e taki dati den o kisi hebi krutu. A e taki: „Fu tru, mi e taigi unu: Na tapu a Krutudei a o moro hebi gi a foto dati, leki gi Sodom nanga Gomora.”​—Mateyus 10:15.