Den Dyu di e libi na a noord-westsei syoro fu a Se fu Galilea kon sabi taki Yesus drai kon baka fu Dekapolis. A kan taki furu fu den yere taki Yesus meki wan bigi winti tan tiri na se èn kande son sma yere tu fa a puru ogri yeye na tu man tapu. Dati meki „wan heri ipi sma” e kon na a sesyoro di de na a sei fu Kaperna-um, fu miti Yesus (Markus 5:21). Te Yesus e komoto na ini a boto, den wani si sortu wondru a o du now.

Wan fu den sma di no man wakti fu si Yesus, na Yairus di de wan fesiman fu wan snoga. Kande a de wan fesiman fu a snoga na Kaperna-um. A man disi e trowe ensrefi na Yesus futusei, dan a e begi Yesus furu leisi: „Mi yongu umapikin siki te fu dede. Grantangi, kon poti yu anu na en tapu, so taki a kan kon betre èn a kan tan na libi” (Markus 5:23). San Yesus o du? Yairus begi en omeni leisi fu yepi a wan-enkri umapikin fu en di abi 12 yari nomo èn di a lobi trutru.​—Lukas 8:42.

Te Yesus e waka go na a oso fu Yairus, wan tra sani e pasa. Furu fu den sma di e waka makandra nanga Yesus, no man wakti fu si san o pasa. Den e aksi densrefi efu a o du wan wondru baka. Ma wan uma di e waka na den mindri e prakseri en eigi problema. Na uma disi abi wan seryusu siki.

Twarfu yari langa a Dyu uma disi e lasi brudu. A go suku yepi na wan lo datra èn a gebroiki ala en moni fu bai den dresi di den datra taigi en fu bai. Ma nowan fu den dresi dati yepi en. Fu taki en leti, sani „kon moro ogri” gi en.​—Markus 5:26.

Wi kan frustan taki a siki disi e meki na uma kon moro swaki. Boiti dati, a e firi syen taki a abi a siki disi. Nofo tron wan sma no e taki so makriki fu so wan siki. Boiti dati, a Wet di Gado ben gi Moses e taki dati wan uma di lasi brudu no de krin. Iniwan sma di e fasi en noso di e fasi en krosi di abi a brudu musu wasi en skin èn a no krin teleki mofoneti.​—Lefitikus 15:25-27.

Na uma disi „yere san Yesus ben e du” èn dati meki a go suku en now. Fu di a sabi taki a no krin, meki a e du ala san a man fu no meki sma si en te a e waka na mindri a bigi grupu sma. A e prakseri na ensrefi: ’Efu mi fasi en dyakti nomo, mi o kon betre.’ Te a e fasi a franya fu a krosi fu Yesus, wantewante a e firi taki a no e lasi brudu moro! ’A takru siki gowe èn a kon betre.’​—Markus 5:27-29.

Di a sani disi pasa Yesus taki: „Suma fasi mi?” Fa yu denki taki na uma e firi te a e yere Yesus taki a sani dati? Petrus no man frustan fa Yesus kan aksi so wan sani. Dati meki a e taki: „Den sma e tanapu na yu lontu èn den e pusu kon na yu tapu.” Sobun, fu san ede Yesus e aksi: „Suma fasi mi?” Yesus e taki: „Wan sma fasi mi, bika mi firi taki krakti komoto na ini mi” (Lukas 8:45, 46). Iya, di na uma kon betre Yesus firi taki krakti komoto fu en.

Te na uma si taki Yesus sabi san pasa, a e kon frede èn a e beifi. Dan a e saka kindi na Yesus futusei. Na fesi ala den sma drape a e taki krin sortu siki a ben abi èn a e taki dati a kon betre. Na wan switi fasi Yesus e trowstu en nanga den wortu disi: „Mi umapikin, a bribi fu yu meki yu kon betre. No broko yu ede moro. Yu o de gosontu now, bika yu no abi a takru siki moro.”​—Markus 5:34.

A de krin taki a sma di Gado poti fu tron tiriman fu grontapu, na wan sma di abi sari-ati èn a e firi gi sma. Yesus no e broko en ede nomo nanga sma, ma a abi a makti tu fu yepi den!