No so langa pasa Yesus ben de na a oso fu a Fariseiman Simon pe a leri den sma taki den musu gi trawan pardon. Now a e bigin preiki baka na ini a heri kontren fu Galilea. Na tu yari kaba a e du a diniwroko fu en èn now a de nanga tra sma tu. Den 12 apostel de nanga en. Son uma di a „ben puru ogri yeye na den tapu èn di a ben meki kon betre baka” de nanga en tu (Lukas 8:2). Wan tu fu den na Maria Makdalena, Susana nanga Yohana di ben de a wefi fu a fesiman na ini na oso fu Kownu Herodes Antipas.

Furu sma e haritaki fu den sani di Yesus e du. Disi de krin fu si te sma e tyari wan breni man kon na en. A man disi no man taki tu èn a abi wan ogri yeye na en tapu. Baka te Yesus puru na ogri yeye na en tapu, a man disi man si èn a man taki. Den sma e fruwondru fu a sani disi èn den e taki: „A man disi a no a Manpikin fu David?”​—Mateyus 12:23.

Ipi-ipi sma e lontu na oso pe Yesus e tan. So furu sma e kon taki Yesus nanga den disipel fu en no man nyan srefi. Ma a no ala sma e denki taki Yesus na a „Manpikin fu David” di Gado ben pramisi. Son leriman fu Wet nanga son Fariseiman komoto te na Yerusalem. Ma den no kon fu leri wan sani fu Yesus noso fu horibaka gi en. Den e taigi den sma: „A e wroko nanga Beyelsebub . . . a tiriman fu den ogri yeye” (Markus 3:22). Ma te den famiri fu Yesus e yere a dyugudyugu, den e kon drape fu tyari en gowe. Fu san ede den wani du dati?

We, Yesus eigi brada no wani bribi srefi taki Yesus na Gado Manpikin (Yohanes 7:5). A Yesus disi di e tyari dyugudyugu kon, no gersi a Yesus di den ben sabi na Nasaret pe den gro kon bigi. Fu di den e denki taki Yesus ede no e wroko bun, meki den e taki: „A lasi en frustan.”​—Markus 3:21.

Ma san den sani di Yesus du e sori? Didyonsro a  dresi wan man di ben abi wan ogri yeye na en tapu. Now a man e si èn a e taki. Ala sma si a sani disi. Dati meki den leriman fu Wet nanga den Fariseiman e suku wan tra sani fu gi en porinen. Den e taki: „A man disi e yagi ogri yeye puru na sma tapu soso nanga yepi fu Beyelsebub, a tiriman fu den ogri yeye.”​—Mateyus 12:24.

Yesus sabi san den leriman fu Wet nanga den Fariseiman e denki. Dati meki a e taki: „Ibri kownukondre di prati o fadon èn nowan foto noso osofamiri di prati o tan. Sosrefi, efu Satan e yagi Satan puru, dan ensrefi prati tu. We dan fa a kownukondre fu en o man tan?”​—Mateyus 12:25, 26.

A sani di Yesus taki de so krin fu frustan! Den Fariseiman sabi taki son Dyu e puru ogri yeye na sma tapu (Tori 19:13). Dati meki Yesus e aksi: „Efu mi e yagi ogri yeye puru na sma tapu nanga yepi fu Beyelsebub, dan nanga suma den bakaman fu unu e yagi ogri yeye puru na sma tapu?” Sobun, efu na Beyelsebub gi Yesus a makti fu puru ogri yeye na sma tapu, dan na Beyelsebub gi den Dyu a makti tu fu du a srefi sani. Yesus e taki moro fara: „Ma efu mi e yagi ogri yeye puru na sma tapu nanga Gado en yeye, dan fu tru a Kownukondre fu Gado kon na unu sondro taki unu fruwakti disi.”​—Mateyus 12:27, 28.

Yesus man puru ogri yeye na sma tapu fu di a abi moro makti leki Satan. Fu tyari a tori disi kon na krin, a e taki: „Fa wan sma kan broko go na ini na oso fu wan tranga man èn fufuru den gudu fu a man, efu a no tai a tranga man fosi? Baka te a du dati, dan a kan fufuru ala sani na ini na oso fu a man. A sma di no de na mi sei, de teige mi. A sma di no e tyari sani kon na wán makandra nanga mi, e tyari bruya kon” (Mateyus 12:29, 30). Den leriman fu Wet nanga den Fariseiman de krinkrin teige Yesus. Sobun, a de krin taki den na bakaman fu Satan. Fu di den e bruya den sma, meki den sma no wani sabi noti fu Yehovah en Manpikin di e du sani nanga a krakti fu en Papa.

Yesus e warskow den man disi di de bakaman fu Satan: „Libisma o kisi pardon gi ala sondu, awansi sortu sondu den e du èn awansi sortu kosi den e kosi. Ma a sma di e taki ogri fu a santa yeye, no o kisi pardon noiti, bika a sondu fu en e tan na en tapu fu têgo” (Markus 3:28, 29). Prakseri nomo san disi wani taki gi den sma di e taki dati son sani na wroko fu Satan, aladi a de krin taki na a yeye fu Gado du den sani disi!