Didyonsro Yesus dresi wan man di ben abi wan siki di ben e meki en skin sweri. Yesus de ete na a oso fu a Fariseiman èn a e luku fa den sma di kon drape e suku den moro prenspari presi fu sidon. A e gebroiki na okasi disi fu leri den sma fu abi sakafasi.

Yesus e taki: „Te wan sma kari yu kon na wan trow-oso, dan yu no musu go sidon na a moro bun presi. Kande a sma disi kari wan trawan kon tu di de prenspari moro yu èn a sma di gi yu nanga a trawan wan kari, o kon taigi yu: ’Meki a man disi sidon na a presi disi.’ Dan nanga syen yu sa musu opo go sidon na a moro lagi presi.”​—Lukas 14:8, 9.

Baka dati Yesus e taki: „Ma te yu kisi wan kari, go sidon na a moro lagi presi, dan a sma di gi yu a kari o kon taigi yu: ’Mati, go sidon na wan moro bun presi.’ Dan yu o kisi grani na fesi ala den tra sma di drape.” A sani disi di Yesus taki no abi fu du nomo nanga bun maniri. Yesus e tyari disi kon na krin. A e taki: „Bika ibriwan sma di e hei ensrefi, den o saka en èn a sma di e saka ensrefi, den o hei en” (Lukas 14:10, 11). Iya, a e sori den arkiman taki den musu leri fu abi sakafasi.

Baka dati Yesus e leri a Fariseiman di gi en a kari wan tra sani. A e sori en sortu sma a musu kari kon nyan efu a wani taki Gado feni en bun. A e taki: „Te yu o aksi sma fu kon nyan na brekten noso na neti, dan no kari den mati fu yu, yu brada, yu famiri, noso den guduman di e libi na ini yu birti. Kande wan ten o de taki den o gi yu wan kari baka, dan a o de leki den pai yu baka. Ma te yu o sreka wan fesa, dan kari den pôti sma kon, nanga den malengri sma, den lan sma, nanga den breni sma. Dan yu o de koloku, bika den no abi noti fu pai yu baka.”​—Lukas 14:12-14.

Yesus no e taki dati a fowtu fu kari yu mati, famiri noso birtisma kon nyan. Ala sma e du dati. Ma Yesus wani sori dyaso taki wan sma kan kisi bigi blesi te a e kari pôti sma, malengri sma, lan sma, breni sma, nanga tra mofina sma kon nyan nanga en. A e taigi a Fariseiman: „Gado o pai yu baka te den sma di du san reti o opo baka.” Wan sma di de drape tu e taki: „Koloku fu a sma di o nyan na ini a Kownukondre fu Gado” (Lukas 14:15). A sma disi e frustan taki a de wan bigi grani fu nyan nanga Gado. Ma a no ala sma e frustan disi soleki fa Yesus o sori now.

A e taki: „Wan man ben sreka wan bigi neti-nyanyan èn a ben kari wan lo sma kon. . . . A seni en srafu go taigi den sma di kisi wan kari: ’Un kon, bika ala sani sreka kaba.’ Ma ala den sma taki dati den no man kon. A fosiwan taki: ’Mi bai wan gron èn mi musu go luku en. Mi e aksi yu: Gi mi pardon fu di mi no man kon.’ Wan trawan taki: ’Mi bai tin kaw èn mi o go luku den fosi. Mi e aksi yu: Gi mi pardon fu di mi no man kon.’ Wan trawan taki tu: ’Didyonsro mi trow nanga wan uma èn dati meki mi no man kon.’”​—Lukas 14:16-20.

Te yu luku en bun, den sma disi no abi nowan reide fu no go. Nofo tron te wan sma o bai wan gron noso wan kaw, a e luku den sani disi fosi a bai den. Sobun, a man di bai a gron èn a wan di bai den kaw no abi fu go luku den sani fu den wantewante. A di fu dri man no abi fu sreka sani fu trow, bika a trow kaba. Sobun, disi no musu tapu en fu teki so wan prenspari kari. A masra ati bron di a si taki den sma no wani kon. Dati meki a e taigi a srafu fu en:

„Go esi-esi na den bigi strati èn na den pikin pasi fu a foto, dan yu tyari den pôti sma, den malengri sma, den breni sma nanga den lan sma kon.” Baka di a srafu du disi, presi ben de ete. Dan a masra e taigi a srafu: „Go na den pasi èn na den presi di tapu nanga skotu èn dwengi den sma fu kon na inisei, so taki mi oso kan kon furu.  Bika mi e taigi unu: Nowan fu den sma di kisi wan kari o tesi a neti-nyanyan fu mi.”​—Lukas 14:21-24.

Den sani di Yesus fruteri didyonsro e sori krin fa Yehovah Gado meki Yesus Krestes gi sma wan kari fu kon na ini a Kownukondre fu hemel. Den Dyu, spesrutu den kerki fesiman, ben de den fosiwan di kisi a kari disi. Furu fu den no teki a kari di Yesus gi den na ini a heri pisi ten di a ben e du a diniwroko fu en. Ma tra sma ben o kisi wan kari tu. Yesus e sori krin taki bakaten a di fu tu grupu sma ben o kisi wan kari. Den sma disi na den mofinawan fu a Dyu pipel èn den trakondre sma di ben teki a Dyu bribi. Baka dati a di fu dri grupu ben o kisi a lasti kari. Den sma disi na den wan di den Dyu e si leki sma di Gado no feni bun.​—Tori 10:28-48.

Iya, den sani di Yesus taki e sori taki a man ben abi leti di a taki: „Koloku fu a sma di o nyan na ini a Kownukondre fu Gado.