Fu di Yesus no ben abi nowan sondu, meki a no kisi fu du nanga furu fu den problema nanga broko-ede di tra libisma abi. Toku a sori taki a ben e firi gi sma trutru. A ben e du ala muiti fu yepi den èn a ben e du moro leki san ben de fanowdu srefi. Iya, sari-ati ben meki taki a ben e yepi sma. Luku wan tu eksempre na ini kapitel 32, 37, 57, 99.

Furu sma, yonguwan nanga owruwan, no ben frede fu go na Yesus, fu di a no ben e gi den a firi taki a no ben abi ten gi den noso taki a ben prenspari moro den. Fu di den ben man si taki Yesus ben e broko en ede nanga den, meki den ben e firi bun te den ben de nanga en. Luku wan tu eksempre na ini kapitel 25, 27, 95.

Doronomo Yesus ben e begi en Papa nanga en heri ati te a ben de en wawan èn te a ben de nanga den tru anbegiman fu Gado. A no ben e begi soso te a ben o nyan, ma a ben e begi na furu tra okasi tu. A ben begi fu taki en Papa tangi, fu prèise en èn fu suku rai na en te a ben o teki seryusu bosroiti. Luku wan tu eksempre na ini kapitel 24, 34, 91, 122, 123.

Son leisi Yesus ben wani rostu noso a ben wani blo en ede pikinso. Ma toku a ben e du muiti fu yepi sma. A no ben e denki ensrefi nomo. Disi na ete wan moi sani di wi kan leri fu en. Luku fa a sori a fasi disi te yu o leisi kapitel 19, 41, 52.

Yesus no ben e leri sma nomo taki den musu gi trawan pardon, ma a ben e gi den disipel nanga tra sma pardon tu. Teki ten fu prakseri fu den eksempre na ini kapitel 26, 40, 64, 85, 131.

Bijbel ben taki na fesi dati furu Dyu no ben o bribi na ini a Mesias èn taki den ben o kiri en. Sobun, Yesus no ben abi fu meki so furu muiti fu yepi sma. Ma a tan horibaka fayafaya gi a tru anbegi. Te den bakaman fu Yesus e kisi frufolgu noso te sma no wani arki a boskopu fu den, dan den kan leri fu a moi eksempre fu en. Luku kapitel 16, 72, 103.

Na ala sortu fasi Yesus ben bun moro libisma di abi sondu. A ben abi moro sabi nanga koni leki wi. Fu di a no ben abi sondu, meki wi kan frustan taki a ben man du moro leki iniwan sma fu en ten èn a ben abi moro koni leki den. Ma sakafasi ben meki taki a ben lobi du sani gi trawan. Yu kan leri moro fu a tori disi te yu e leisi kapitel 10, 62, 66, 94, 116.

Ala ten Yesus ben abi pasensi nanga den apostel fu en èn nanga tra sma te den no ben teki na eksempre fu en noso te den no ben e du san a taki. Nanga pasensi a ben e leri den son sani ibri tron baka, so taki den ben kan tron mati fu Yehovah. Teki ten fu prakseri fa Yesus sori pasensi te yu e leisi kapitel 74, 98, 118, 135.