Syatu baka di Yesus dopu, wan feanti kon tesi en. A ben wani meki Yesus trangayesi Gado, fosi Yesus bigin du a wroko fu en srefi. Iya, ibri tron baka Didibri pruberi fu tesi Yesus. Bakaten Yesus taki fu na ogri feanti dati: „A tiriman fu grontapu e kon. A no abi krakti na mi tapu.”​—Yohanes 14:30.

Na ini wan fisyun na apostel Yohanes si san ben o pasa nanga ’a bigi kaiman, a fosi sneki, a wan di den e kari Didibri nanga Satan’. Den ben o fringi na ogri-ati feanti disi fu libisma komoto fu hemel. Te disi ben o pasa a ben o de nanga „bigi atibron fu di a sabi taki en ten syatu” (Openbaring 12:9, 12). Kresten abi nofo buweisi fu bribi taki den e libi na ini a syatu pisi ten dati èn taki heri esi ’a bigi kaiman, sobun a fosi sneki’ Satan Didibri o sroto na ini a dipi peti di no abi gron. Drape a no o man du noti 1000 yari langa. Na a pisi ten dati Yesus o tiri grontapu leki Kownu fu Gado Kownukondre.​—Openbaring 20:1, 2.

San o pasa na grontapu na ini den 1000 yari dati? Suma o libi na grontapu èn fa grontapu o de? Yesus srefi gi a piki. Na ini na agersitori fu den skapu nanga den bokoboko, a sori san o pasa nanga den reti-ati sma di de leki skapu, di e wroko makandra nanga den brada fu Yesus èn di e du bun gi den. A sori krin tu san o pasa nanga den sma di no e du den sani disi èn di de leki bokoboko. Yesus taki: „Den sma disi [sobun den bokoboko] o dede fu têgo, ma den sma di Gado feni bun [sobun den skapu] o kisi têgo libi.”​—Mateyus 25:46.

Disi e yepi wi fu frustan san Yesus taigi wan fu den ogriman di ben anga na wan postu na en sei. Yesus no pramisi en taki a ben o de nanga en na ini a Kownukondre fu hemel, soleki fa a ben pramisi den apostel di ben de nanga en ala ten.  Na presi fu dati, Yesus pramisi na ogriman disi di ben abi berow wan tra sani. A taigi en: „Fu tru, mi e taigi yu tide: Yu o de nanga mi na ini Paradijs” (Lukas 23:43). Sobun, a man disi ben kisi a howpu fu libi na ini wan paradijs di o de leki wan moi dyari. A no de fu taki dati den sma di de leki skapu èn di o „kisi têgo libi” o de na ini a Paradijs tu.

Disi e kruderi nanga den sani di na apostel Yohanes skrifi fu a situwâsi na grontapu na a ten dati. Yohanes ben skrifi: „A tenti fu Gado de na libisma. Gado o tan nanga den èn den o de en pipel. Gado srefi o de nanga den. A o figi ala watra puru na den ai èn dede no o de moro. Nowan sari, noso krei, noso pen no o de moro. Den fositen sani pasa kaba.”​—Openbaring 21:3, 4.

Na ogriman o abi fu kisi wan opobaka fu man libi na ini Paradijs. Ma a no en wawan o kisi wan opobaka. Yesus sori disi krin di a taki: „A yuru o kon te ala den sma di de na ini den grebi o yere en sten èn den o komopo drape. Den sma di du bun sani, o opo baka fu kisi libi èn den sma di du takru sani, o opo baka fu kisi krutu.”​—Yohanes 5:28, 29.

Ma san o pasa nanga den apostel di ben de nanga Yesus ala ten? San o pasa nanga den tra sma di o de nanga en na ini hemel? Bijbel e taki: „Den o de priester fu Gado èn fu Krestes, èn na ini den wán dusun yari, den o tiri leki kownu makandra nanga en” (Openbaring 20:6). Den sma disi di o tiri makandra nanga Krestes o de man nanga uma di ben libi fosi na grontapu. Sobun, wi kan de seiker taki te den o tiri na hemel, den o abi sari-ati nanga den libisma na grontapu èn den o frustan fa libisma e firi.​—Openbaring 5:10.

Yesus o gebroiki a lusu-paiman fu en fu puru sondu di de leki wan fluku na tapu libisma na grontapu. En nanga den tra sma di o tiri makandra nanga en o sorgu taki te fu kaba libisma no o abi sondu moro. Iya, na a ten dati ala sma o nyan bun fu a libi di Gado ben wani gi libisma di a ben taigi Adam nanga Eva fu meki pikin furu grontapu. Srefi dede, di de wan bakapisi fu a sondu fu Adam, no o de moro!

Na so Yesus o du ala sani di Yehovah wani en fu du. Na a kaba fu den 1000 yari te Yesus o tiri, a o gi a Kownukondre baka na en Papa èn a o meki en Papa tiri libisma di no abi sondu moro. Na apostel Paulus ben skrifi fu a moi fasi fa Yesus sori sakafasi. A skrifi: „Te ala sani de na a Manpikin ondro kaba, dan a o saka ensrefi na ondro Gado di ben poti ala sani na en ondro. Na so Gado kan de ala sani gi ala sma.”​—1 Korentesma 15:28.

A de krin taki Yesus abi wan prenspari frantwortu fu meki den sani di Gado abi na prakseri kon tru. Awinsi san e Papa o meki a du na ini a ten di e kon, fu têgo a o de ’a pasi, san tru, èn a libi’.​—Yohanes 14:6.