Ibri yari, furu brada nanga sisa di no e preiki moro e kon na a Memrefesa. Den ben bigin lon a streilon fu libi, ma den no e lon moro. A brochure Drai kon baka na Yehovah e kari wan tu sani di meki taki den tapu fu lon (Heb 12:1). Toku den sma disi warti ete gi Yehovah fu di a bai den nanga a brudu fu en Manpikin (Tor 20:28; 1Pe 1:18, 19). Fa wi kan yepi den fu drai kon baka na a gemeente?

Neleki fa wan skapuman e du ala muiti fu feni wan skapu di lasi, na so owruman e meki muiti fu go suku brada nanga sisa di no e preiki moro èn den e pruberi fu yepi den (Lu 15:4-7). A sani disi e sori taki Yehovah lobi den brada nanga sisa disi (Yer 23:3, 4). Ma a no den owruman wawan kan gi den Kresten disi deki-ati, wi alamala kan du dati. Te wi e du muiti fu sori switifasi gi den èn te wi e sori taki wi e firi gi den, dan Yehovah o breiti èn wi o kisi furu blesi tu (Odo 19:17; Tor 20:35). Sobun, prakseri suma yu kan gi deki-ati èn no wakti fu du dati!

LUKU A FELEM GI SMA DI NO E PREIKI MORO DEKI-ATI. BAKA DATI PIKI DEN AKSI DISI:

• San Abbey du di a miti wan Kotoigi di a no ben sabi?

• Fu san ede wi musu taki nanga den owruman efu wi wani yepi wan Kresten di no e preiki moro?

• Fa Abbey sreka ensrefi fosi a go na Laura a di fu tu leisi?

• Di Abbey pruberi fu gi Laura deki-ati, dan fa a sori taki a ben abi pasensi nanga lobi?

• San wi kan leri fu na agersitori fu Yesus di skrifi na Lukas 15:8-10?

• Sortu blesi a tyari kon fu di Abbey nanga den owruman du muiti fu yepi Laura?