FU SAN EDE A PRENSPARI: Efu „den prakseri na ini na ati fu wan man de leki dipi watra”, dan den aksi di wi e poti de leki wan emre di o hari den kon na tapu (Odo 20:5). Den aksi fu wi kan yepi wan sma fu poti prakseri na san wi e taki. Te wi e poti bun aksi, dan den piki di den sma e gi o yepi wi fu kon sabi fa den e denki. Yesus ben poti bun aksi gi sma. Fa wi kan teki na eksempre fu en?

FA FU DU DATI:

• Poti aksi fu kon sabi fa a sma e denki. Yesus ben poti aksi gi den disipel fu en fu kon sabi fa den ben e denki (Mt 16:13-16; be 238 ¶3-5). Sortu aksi yu kan poti gi sma fu kon sabi fa den e denki?

• Poti aksi fu yepi a sma fu denki fu a tori. Yesus poti aksi gi Petrus fu yepi en fu kon si sani na a yoisti fasi (Mt 17:24-26). Sortu aksi yu kan poti gi sma fu yepi den fu kon si sani na a yoisti fasi?

• Prèise a sma. Di wan leriman fu Wet „piki na wan koni fasi”, dan Yesus prèise en (Mr 12:34). Fa yu kan prèise wan sma di e gi wan bun piki?

LUKU A FOSI PISI FU A FELEM DU A WROKO DI YESUS BEN DU​—GI LERI. BAKA DATI PIKI DEN AKSI DISI:

• Fu san ede a fasi fa a preikiman e gi leri no bun, aladi den sani di a e taki tru?

• Fu san ede a no nofo fu fruklari sani nomo?

LUKU A DI FU TU PISI FU A FELEM. BAKA DATI PIKI DEN AKSI DISI:

• Fa a brada gebroiki aksi fu yepi a man?

• Sortu tra sani wi kan leri fu en?