A Memrefesa e gi wi wan moi okasi fu denki fu den blesi di wi kan kisi nanga yepi fu a lusu-paiman. Wan fu den blesi disi na a opobaka. Noiti Yehovah ben wani taki libisma musu dede. Dati meki wan fu den moro hati sani di kan miti wi na te wan lobiwan fu en dede (1Kor 15:26). A ben e hati Yesus fu si fa den disipel fu en ben e sari di Lasarus dede (Yoh 11:33-35). Fu di Yesus de soifri leki en Papa, meki wi kan de seiker taki a musu hati Yehovah te a e si fa wi e sari te wan lobiwan fu wi dede (Yoh 14:7). Yehovah e angri fu tyari den futuboi fu en kon na libi baka, èn wi musu angri fu si dati tu.—Yob 14:14, 15.

Fu di Yehovah na wan Gado di e orga sani na wan bun fasi, meki wi kan bribi taki na opobaka o pasa na wan fasi di orga bun tu (1Kor 14:33, 40). Na presi fu go na beri, wi o kon makandra fu gi wan switikon na den sma di kon na libi baka. Yu e prakseri na opobaka, spesrutu te yu e sari? (2Kor 4:17, 18) Yu e taki Yehovah tangi fu di a sorgu gi a lusu-paiman èn fu di a sori na ini Bijbel taki den dedesma o kon na libi baka?—Kol 3:15.

• Sortu mati noso famiriman yu e angri fu si baka?

• Sortu sma fu Bijbel ten yu wani miti fu man taki nanga den?