Den buku San Bijbel kan leri wi? nanga San Bijbel e leri wi trutru? pikinmoro na a srefi. Den tu buku disi na fu gi sma leri èn den e taki fu den srefi tori. Den kapitel seti na a srefi fasi. Ma a nyun buku e taki sani moro makriki. A buku disi meki gi sma di no man frustan na owru buku so bun. A nyun Bijbel leri-buku no abi wan pisi di nen „Tra prenspari sani”. Ma na a kaba fu a buku yu abi wan pisi di nen „Ete wan tu sani”. A pisi disi e fruklari son wortu di de fu feni na ini den kapitel. Na a bigin fu den kapitel aksi no de èn wan faki no de na a kaba fu den kapitel fu luku baka san wi leri. Na presi fu dati, na a kaba fu den kapitel den penti skrifi di kon na krin na ini a kapitel dati. Neleki a buku San Bijbel e leri wi trutru?, wi kan gi sma a nyun buku San Bijbel kan leri wi? awansi wi no abi fu prati en a mun dati. Fa wi kan gebroiki den moi sani na ini a nyun buku disi te wi e hori wan Bijbelstudie?

SAN WI LERI: Nofo tron te wi e studeri nanga sma, wi gwenti leisi den paragraaf na ini a Bijbel leri-buku, dan wi e poti na aksi baka dati. Gi furu sma a sani disi e wroko bun. Ma kon meki wi taki dati a studenti no man taki a tongo di a buku skrifi na ini, noso kande a no man leisi bun. Efu dati de so, dan kande yu kan gebroiki a buku San Bijbel kan leri wi? Yu kan gebroiki a pisi di nen „San wi leri” fu studeri nanga a studenti. Gi a sma deki-ati fu leisi a heri kapitel gi ensrefi. Yu kan gebroiki sowan 15 miniti gi ibriwan fu den penti na ini a pisi dati. Fu di a pisi disi no e taki fu den tra finifini tori di skrifi na ini a kapitel, meki a leriman musu sreka bun èn a musu hori na prakseri san a studenti abi fanowdu. Efu a leriman e gebroiki a heri kapitel fu studeri nanga wan studenti, dan na a kaba a kan poti prakseri na den penti na ini a pisi „San wi leri”, fu luku efu a studenti frustan san a leri.

ETE WAN TU SANI: Den wortu na ini a pisi disi skrifi baka makandra soleki fa den de fu feni na ini den kapitel. A leriman srefi kan bosroiti efu a o taki fu den penti na ini a pisi „Ete wan tu sani” fu a buku San Bijbel kan leri wi?