WI KRESTEN LIBI
Fa fu preiki moro bun—Preiki nanga yepi fu telefon
FU SAN EDE A PRENSPARI: Te wi e preiki nanga yepi fu telefon, dan disi na wan prenspari fasi fa wi kan ’preiki a bun nyunsu finifini’ (Tori 20:24) *. A e yepi wi fu preiki gi sma di wi no e miti makriki.
FA FU DU DATI:
-
Sreka yusrefi. Luku wan tori di e hari a prakseri fu furu sma. Baka dati skrifi syatu san yu wani taki. Yu kan luku tu san yu o taki efu yu no kisi a sma, ma yu wani libi wan boskopu na a telefon. A bun fu sidon na wan tafra èn fu gebroiki a papira pe yu skrifi den sani di yu wani taki. Opo yu tablet noso telefon na JW Library® noso jw.org®.
-
De relaks. Taki soleki fa yu gwenti. Lafu èn meki gebaar neleki yu e si a sma. No stop taki efu a no de fanowdu. A moro bun fu wroko nanga wan tra sma. Efu na ososma poti wan aksi, dan taki en ete wan leisi fu yu patna kan yere so taki a kan yepi yu fu suku a piki.
-
Seti sani fu bel a sma baka. Efu a sma wani sabi moro, yu kan libi wan aksi gi en di yu o piki a tra leisi te yu bel en. Yu kan aksi en fu seni wan link fu wan felem noso buku gi en nanga yepi fu Internet. Yu kan fruteri en fu wan tra sani fu a website fu wi.
^ paragraaf 3 Efu yu mag preiki nanga yepi fu telefon na ini a kontren fu yu, dan yu musu hori yusrefi na den wet fu lanti di e sori fa yu mag gebroiki den nen nanga adres fu sma.
