Heri esi a pasensi di Yehovah abi nanga a grontapu disi o kon na wan kaba. Falsi kerki o kisi pori, den kondre fu grontapu o kon feti nanga Gado pipel, èn Yehovah o kiri den ogriwan na ini Armagedon. Leki Kresten wi e wakti a ten te den prenspari sani disi o pasa.

A no de fu taki dati wi no sabi finifini fa ala sani o waka na a ten fu a bigi banawtu. Fu eksempre, wi no sabi finifini o ten a bigi banawtu o bigin. Wi no sabi fu san ede den tirimakti o go feti nanga falsi kerki. Wi no sabi o langa den kondre o feti nanga Gado pipel èn san den o du nanga wi. Wi no sabi soifri tu san Yehovah o gebroiki fu kiri den feanti fu en na ini Armagedon.

Ma toku Bijbel e fruteri wi ala san wi abi fanowdu fu abi deki-ati èn fu no frede den sani di o pasa na ini a ten di e kon. Fu eksempre, wi sabi taki wi e libi na a kaba fu „den lasti dei” (2Ti 3:1). Wi sabi taki te den tirimakti o go feti nanga falsi kerki, dan ’Gado o syatu a ten dati’ so taki a tru anbegi no kisi pori (Mt 24:22). Wi sabi taki Yehovah o frulusu en pipel (2Pe 2:9). Èn wi sabi tu taki a Sma di Yehovah poti fu kiri den ogriwan èn fu frulusu en pipel na ini Armagedon, abi furu makti èn a e du san reti.​​—Opb 19:11, 15, 16.

Den sani di o pasa na ini a ten di e kon o meki sma na grontapu „lasi-ati krinkrin”. Ma te wi e leisi fa Yehovah frulusu en pipel na ini owruten èn te wi e denki den sani di a o du ini a ten di e kon, dan wi o man „tanapu leti-opo èn opo un ede luku go na loktu”, fu di wi de seiker taki a frulusu fu wi de krosibei.​​—Lu 21:26, 28