Fu di a bigi banawtu e kon, meki wi musu du a preikiwroko fu wi nanga moro faya (Odo 24:11, 12, 20). Efu wi wani yepi sma, dan wi kan gebroiki den JW.ORG karta fu gi den deki-ati fu leisi Gado Wortu èn fu go tapu a website fu wi. A karta abi wan code na tapu di e tyari sma go na a felem Fu san ede wi musu studeri Bijbel? A e yepi sma tu fu kon sabi fa den kan aksi fu kisi wan Bijbelstudie. Son sma no wani teki den buku fu wi, ma den wani go tapu a website fu wi. No draidrai fu gi den wan JW.ORG karta. Ma no libi den karta gi sma di no wani sabi moro fu a wroko di wi e du.

Yu kan prati den karta gi sma di yu e miti na ini na aladei libi. Yu kan taigi den: „Mi kan gi yu wan sani? A karta disi e sori fa yu kan go tapu wan website pe yu kan leisi sani noso luku felem di abi fu du nanga difrenti sortu tori” (Yoh. 4:7). Den JW.ORG karta pikin, sobun te yu abi wan tu fu den na yu, dan yu kan prati den gi sma te yu kisi na okasi fu du dati.