SAN SMA E TAKI

Furu sma e si dòbel leki wan sani fu abi prisiri, so langa lanti no e krutu en. Fu eksempre te den e si taki lanti e horibaka gi loterij so taki den kan yepi den kondreman.

SAN BIJBEL E TAKI

Bijbel no e taki spesrutu fu a dòbel di sma e dòbel, ma wan tu gronprakseri de di e sori fa Gado e denki fu a tori disi.

Moro furu a de so, taki te wan sma e dòbel, dan a e wini moni aladi trawan e lasi. Disi no e kruderi nanga a warskow fu Bijbel di e taki dati un musu „luku bun taki unu no kisi bigi-ai na nowan fasi” (Lukas 12:15). Fu taki en leti, na bigi-ai e meki taki wan sma e dòbel. Den bedrijf di e seri lòt e meki reklame taki sma kan wini bigi moni, ma den no e taigi den taki a kans bigi taki den no o wini. Fu di den sabi taki den sma di e dòbel e dren taki den o kon gudu, meki den e sori sma taki den kan wini bigi moni. Na presi fu yepi den sma fu no kon abi bigi-ai, den bedrijf e gi den sma deki-ati taki den kan feni moni na wan makriki fasi.

Dòbel e meki sma e denki densrefi nomo. Den wani wini a moni di tra sma lasi. Na presi fu dati Bijbel e gi a deki-ati taki „Ibriwan sma no musu tan suku en eigi bun, ma a musu suku a bun fu trawan” (1 Korentesma 10:24). Wan fu den tin komando e taki: „Un no musu abi bigi-ai gi . . . iniwan tra sani di de fu en” (Eksodes 20:17). Te wan sma di e dòbel wani wini, dan e a howpu taki den trawan lasi fu kan feni a moni fu den.

Bijbel e warskow wi tu fu no si koloku leki wan sortu krakti di kan meki wi kisi blesi. Na ini owruten Israel son sma no ben abi nofo bribi na ini Gado, na presi fu dati den bigin „seti wan tafra gi a gado fu Koloku.” Gado ben feni en bun taki den ben e anbegi „a gado fu Koloku”? Nôno, a ben taigi den: „Unu tan du sani di mi no feni bun. Na den sani di mi no lobi, na dati unu du.”​—Yesaya 65:11, 12.

A tru, taki na ini son pisi fu grontapu lanti e gebroiki a moni fu bedrijf pe sma e dòbel fu pai gi skoro, fu meki a ekonomia go na fesi èn gi tra sani di den kondreman abi fanowdu. Awinsi den e du bun sani nanga a moni dati toku a fasi fa den kon na a moni no kenki​—Na sowan fasi den e gi sma deki-ati fu abi bigi-ai, fu denki densrefi nomo èn fu denki taki den kan kon na moni sondro fu wroko gi dati.

„Un no musu abi bigi-ai gi . . .  iniwan tra sani di de fu en.”​—Eksodes 20:17.

SAN BIJBEL E TAKI

Bijbel e warskow taki „den sma di wani kon gudu nomonomo e kisi tesi èn den e fadon go na ini wan trapu. Den wani go du ala sortu dondon sani èn den e kisi ala sortu takru lostu di o meki taki den kisi pori” (1 Timoteyus 6:9). Wan sma di e dòbel abi „bigi-ai” èn bigi-ai takru so te taki Bijbel e kari en makandra nanga wan tu tra eigi fasi di wi no musu abi srefisrefi.​—Efeisesma 5:3.

Sma e dòbel fu di den wani kon gudu na wan makriki fasi èn a e meki den kon abi lobi gi moni. Bijbel e taki lobi gi moni na „a rutu fu ala sortu ogri sani.” Efu wan sma kweki a lobi dati, a kan abi krakti tapu en heri libi èn a kan broko en ede so te taki a e pori en matifasi nanga Gado. Na wan agersi fasi, Bijbel e sori wi taki den wan di kweki lobi gi moni e „gi densrefi furu pen, neleki na dyuku den dyuku densrefi.”​—1 Timoteyus 6:​10.

Bigi-ai e meki taki wan sma no e de tevrede nanga san a abi èn a e meki taki wan sma no de koloku moro. „Solfru no o sari a sma di lobi solfru èn efu wan sma lobi gudu, dan a moni di a e meki no o sari en.”​—Preikiman 5:​10.

Milyunmilyun sma di bigin dòbel wan tu leisi nomo fadon na ini wan trapu èn den no man tapu moro nanga dòbel. Ondrosuku sori taki a problema disi de na ala sei èn milyunmilyun sma na ini Amerkankondre no man tapu nanga dòbel.

Wan odo e taki: „Awinsi wan sma di abi bigi-ai kon kisi furu gudu, toku a no o kisi blesi bakaten” (Odo 20:21). Dati meki sma di no man tapu nanga dòbel lasi ala den moni, den wroko, den mati, den hati den firi fu den lobiwan fu den, èn den pori den osofamiri libi. Te wan sma e fiti den gronprakseri na ini Bijbel, dan dati kan yepi en fu wai pasi gi den takru bakapisi di dòbel kan abi tapu en libi. Te a e du disi a o de nanga prisiri tu.

„Den sma di wani kon gudu nomonomo e kisi tesi èn den e fadon go na ini wan trapu. Den wani go du ala sortu dondon sani èn den e kisi ala sortu takru lostu di o meki taki den kisi pori.”​—1 Timoteyus 6:9.