Papa nanga mama di e gi wan bun voorbeeld e du tu san den e leri den pikin. Fu eksempre, yu no kan fruwakti fu yu pikin taki a o de eerlijk efu yu e taigi en: „Taigi en taki mi no de na oso.” Soso fu di yu no wani taki nanga a sma di kon luku yu.

„Son sma lobi taki a sani disi: „Du san mi e taki, ma no du san mi e du.” Ma a sani dati no e wroko na pikin-nengre. Den de leki wan spons di e soigi ala sani di de na den lontu. Den e luku ala san wi e taki èn e du. Efu wisrefi no e du san wi e leri den, den o taki fu en.”​—David.

BIJBELTEKST: „Yu e preiki gi sma: „No fufuru”, ma yu e fufuru?”​—Romesma 2:21.

Papa nanga mama abi furu krakti tapu den pikin fu den moro leki ini wan tra sma, srefi den speri fu den no abi so furu krakti tapu den. Dati wani taki na yu na a moro bun sma fu yepi den pikin fu yu fu waka a yoisti pasi. Ma yusrefi musu du tu san yu e leri den.

„Yu kan taki wan sani wán hondro leisi èn kande tog a pikin no e arki. Ma a wán leisi di yu no du san yu taki, a pikin o taki fu dati. Den pikin fu wi e luku ala san wi e du, srefi te wi denki taki den no e du dati.”​—Nicole.

BIJBELTEKST: „A koni fu hemel . . . no e hoigri.”​—Yakobus 3:17.

Luku sortu maniri nanga gwenti yusrefi abi. San na den sani di yu e luku? Fa yu e libi nanga yu patna èn nanga den pikin fu yu? Sortu mati yu abi? Yu e poti prakseri na trawan? Fu taki en leti, te yu ben o luku yusrefi yu ben o wani taki den pikin fu yu de leki yu?

„Mi nanga mi masra no e leri den pikin fu wi sani di wisrefi no e du.”​—Christine.

Aksi pardon te yu meki wan fout. Den pikin sabi kaba taki yu e meki fout. Te yu taki „sorry,” gi awinsi yu patna noso den pikin fu yu, dan disi na wan moi fasi fu leri den fu de eerlijk èn fu abi sakafasi.

„Den pikin fu yu musu man yere taki yu e meki fout èn taki yu e taki sorry. Efu den no e yere yu e taki dati, dan noiti den o leri fu taki sorry èn den o suku fu kibri den fowtu fu den.”​—Robin.