GI TROWPAAR
3: Lespeki
SAN A WANI TAKI
Trowpaar di e lespeki makandra e broko den ede nanga makandra awinsi den no e agri fu wan sani. A buku Ten Lessons to Transform Your Marriage e taki: „Den no o du sani di e meki taki den no e agri nanga makandra. Na presi fu dati den e tan taki nanga makandra fu den problema di den abi. Den e arki bun san a trawan abi fu taki èn den e suku fu lusu a problema na wan fasi di e tyari wini kon gi den ala tu.”
BIJBELTEKST: „Lobi . . . no e suku en eigi bun.”—1 Korentesma 13:4, 5.
„Fu abi lespeki gi mi wefi wani taki dati mi e warderi en, mi no wani du noti fu hati en firi èn mi no wani du sani di o pori a trowlibi fu wi.”—Micah.
FU SAN EDE A PRENSPARI
Efu trowpaar no e lespeki makandra, den kan bigin taki grofu nanga makandra èn den o taki sani di e sori taki den no e warderi makandra. Sabiman e taki dati disi na den fosi sani di sma e du fosi den broko trow.
„Efu yu e taki grofu nanga yu frow, efu yu e taigi en hati sani noso wisiwasi en, dan a o firi leki a no warti noti èn a no o frutrow yu moro. Den sani disi kan pori yu trowlibi.”—Brian.
SAN YU KAN DU
AKSI YUSREFI
Poti prakseri wan heri wiki na a fasi fa yu e taki nanga yu patna èn na den sani di yu e du. Baka dati aksi yusrefi:
’O furu leisi mi krutu mi patna èn o furu leisi mi preise en?’
’Na sortu fasi mi sori lespeki gi en?’
TAKI NANGA YU PATNA FU DEN SANI DISI
San e meki taki yu e firi taki yu trowpatna e lespeki yu?
Sortu sani di yu trowpatna e du noso taki e meki yu firi leki a no e lespeki yu?
SAN YU KAN DU
Un skrifi dri fasi fa unu ben o wani taki unu sori moro lespeki gi makandra. Luku san yu patna skrifi èn du muiti fu wroko na den penti disi.
Skrifi den fasi fu yu patna di yu lobi. Taigi yu patna o furu prisiri yu abi fu di a abi den fasi disi.
„Fu abi lespeki gi mi masra wani taki dati mi e sori en taki mi wani taki a de koloku èn taki mi e warderi en. A no ala ten wi abi fu du wan kefalek sani fu sori dati. Furu tron na den moro pikin sani di yu e du noso taki e sori taki yu e lespeki yu patna.”—Megan.
A no te yu denki taki yu e lespeki yu patna, dan dati de so. Ma san moro prenspari na taki yu trowpatna musu firi taki yu e lespeki en.
BIJBELTEKST: „Un musu abi trutru sari-ati, bun-ati, sakafasi, safri-ati, nanga pasensi.”—Kolosesma 3:12.
Kande yu lobi den tori disi tu
A WAKTITOREN
Sori lespeki gi yu trowpatna
Fa masra nanga wefi kan taki na wan lespeki fasi nanga makandra?
