Fu dwengi yusrefi wani taki

• fu wakti nanga pasensi fu kisi san yu wani

• fu dwengi den firi fu yu

• fu du den wroko di yu musu du awinsi yu no lobi den

• fu poti trawan na a fosi presi

Pikin di man dwengi densrefi kan taki nôno na ini situwâsi pe den ben kan du wan sani di no bun. Ma furu tron pikin di no man dwengi densrefi kan

• atibron esi

• stress hebi

• smoko noso dringi tumusi furu sopi

• abi a gwenti fu nyan sani di no gosontu

Wan ondrosuku e sori taki pikin di man dwengi densrefi, nofo tron e abi wan moro bun gosontu te den kon bigi. Den no e abi so furu broko-ede nanga moni èn den no e kisi problema nanga skowtu. Professor Angela Duckworth di yepi nanga na ondrosuku disi, èn di e gi les na a Universiteit fu Pennsylvania e taki: „Noiti a o tyari takru bakapisi gi yu te yu e dwengi yusrefi.”

Leri fu taki nôno èn hori yusrefi na dati.

BIJBELTEKST: „Te unu taki ’iya’, dan meki a tan iya. Te unu taki ’nôno’, dan meki a tan nôno.”​—Mateyus 5:​37.

Son pikin e bigin rigeri nanga den papa nanga mama te den no man feni san den wani. Son leisi den e du dati srefi pe tra sma de. Efu a papa noso mama gi den san den wani, dan a pikin o tan du a sani disi ibri leisi te a wani wan sani.

Ma te a papa nanga mama taki nôno èn den e hori densrefi na dati, dan a pikin e leri wan prenspari sani fu a libi​—taki a no ala ten wi o man kisi san wi wani. A moi fu si san Datra David Walsh taki: „Furu tron sma di leri a prenspari sani disi e de nanga moro prisiri na ini a libi.” A e taki moro fara: „Wi no ben o sori den pikin fu wi taki wi lobi den efu wi e gi den a firi leki den kan kisi ala san den wani.” *

Efu yu no e gi yu pikin ala san a wani nownow, a o moro makelek gi en bakaten fu dwengi ensrefi. Bijvoorbeeld, a o man hori ensrefi fu no gebroiki drugs, fu no abi seks fosi a trow noso fu du iniwan sani di kan poti en noso trawan na ini problema.

Leri yu pikin fu sabi san o de den bakapisi te a du wan bun sani èn te a du wan ogri.

BIJBELTEKST: „Bika san wan sma e sai, na dati a sa koti tu.”​—Galasiasma 6:7.

Yu pikin musu frustan taki ala san a e du abi bakapisi èn taki efu a no leri fu dwengi ensrefi, dati no o tyari bun bakapisi gi en. Fu eksempre, efu a boi fu yu e atibron esi, a kan taki sma no o wani bumui nanga en. Ma efu a e leri fu hori ensrefi fu no atibron noso fu wakti nanga pasensi, dan sma o lobi en. Yepi yu pikin fu frustan taki ala ten sani e go moro bun te a leri fu dwengi ensrefi.

Leri yu pikin fu sabi san moro prenspari

BIJBELTEKST: „Kon sabi san na den moro prenspari sani.”​—Filipisma 1:​10.

Fu dwengi yusrefi no wani taki nomo taki yu e hori yusrefi fu no du sani di no bun. Ma a wani taki tu dati yu e du san yu musu du awansi yu no lobi a sani dati. A prenspari taki yu pikin e leri fu sabi san na den moro prenspari sani èn fu du den sani dati fosi. Fu eksempre, a musu meki en huiswerk fosi, dan a kan go prei.

De wan bun eksempre.

BIJBELTEKST: „Mi gi unu na eksempre, so taki unu kan du tu san mi du gi unu.”​—Yohanes 13:15.

Yu pikin e si fa yu e du te yu atibron. Meki a pikin si taki te yu e dwengi yusrefi sani e waka bun. Bijvoorbeeld, te yu pikin du wan sani di e meki yu ati bron, yu e man hori yusrefi?