Fu san ede a man di Boas ben kari „mi mati” taki dati a ben o „lasi” efu a ben o trow nanga Rut? (Rut 4:1, 6)

Na ini Bijbel ten a ben de so taki te wan man ben kon dede sondro taki a ben abi pikin, dan wan tu sani ben de di sma ben musu hori na prakseri: San ben o pasa nanga a gron fu a man? A de so taki a nen fu a famiri ben o lasi gowe? A Wet fu Moses e gi piki tapu den tu aksi disi.

San ben pasa nanga a gron fu wan man di ben kon dede noso di ben seri en gron fu di a ben kon pôti? Wan brada fu a man noso wan krosibei famiri ben kan bai a gron dati, so taki a ben o tan na ini a famiri.​—Lef. 25:23-28; Num. 27:8-11.

San ben musu du so taki a nen fu a famiri fu a man no lasi gowe? Wan brada fu a man ben musu trow nanga a frow fu en leki fa dati pasa nanga Rut. Te wan man ben o trow nanga a frow fu en brada, dan den ben kan kisi wan pikin di ben o tyari a nen fu a man di dede èn a pikin disi ben o kisi a gron fu a man. Na a lobi-ati sani disi meki tu taki wan sma ben o sorgu gi a frow fu a man.​—Deut. 25:5-7; Mat. 22:23-28.

Luku na eksempre fu Naomi. A ben trow nanga wan man di ben nen Elimeilek. Ma di Elimeilek nanga den boi fu en kon dede, Naomi no ben abi nowan sma fu sorgu en (Rut 1:1-5). Di Naomi drai go baka na Yuda, a taigi Rut, a frow fu en manpikin, taki a ben musu aksi Boas fu bai a gron fu den. Boas ben de wan krosibei famiri fu Elimeilek (Rut 2:1, 19, 20; 3:1-4). Ma Boas ben sabi taki wan tra famiriman ben de di ben de moro krosibei. Na ini Bijbel Boas e kari a man disi „mi mati”. A man disi ben de a fosiwan di ben abi na okasi fu bai a gron.​—Rut 3:9, 12, 13.

Di a man yere a tori, dan a man ben wani yepi Rut (Rut 4:1-4). A man ben sabi taki a ben o abi fu pai, ma a ben sabi tu taki Naomi ben owru tumusi fu meki wan pikin di ben o kisi a gron fu Elimeilek. Na en ben o kisi a gron èn na so a ben o kon moro gudu.

Ma di a man si taki a ben o abi fu trow nanga Rut, a no ben wani a gron moro. A taki: „Mi no o man bai a gron, noso mi o lasi” (Rut 4:5, 6). Fu san ede a no ben wani moro?

Te en noso wan tra sma ben o trow nanga Rut èn den ben o kisi wan boi, dan a boi disi ben o kisi a gron fu Elimeilek. Ma fu san ede a man ben feni taki a ben o „lasi” efu a ben o trow nanga Rut? Bijbel no e taki noti fu a tori. Ma kande disi ben de wan tu fu den sani di a no ben wani:

• A fosi sani na taki a moni di a ben o pai fu bai a gron fu Elimeilek ben o lasi, fu di te fu baka a no a man ben o kisi a gron, ma a boi fu Rut.

• A di fu tu sani na taki na en ben o abi fu sorgu gi Naomi nanga Rut.

• A di fu dri sani na taki efu a ben o kisi tra pikin nanga Rut, dan en eigi pikin ben o abi fu prati den gudu fu en nanga den pikin fu Rut.

• A di fu fo sani na taki efu a man disi no ben abi tra pikin, dan a boi fu Rut ben o abi a reti fu kisi a gron fu Elimeilek nanga a gron fu a man. Te a man ben o dede, dan a gron fu en ben o go na wan pikin di no ben o tyari en nen, ma a nen fu Elimeilek. Sobun, fu di a man no ben wani lasi den gudu fu en, meki a no ben wani yepi Naomi. A gi Boas, wan tra famiriman, na okasi fu teki a frantwortu na en tapu. Boas du en fu di a ben wani taki ’a famirigudu tan tapu a nen fu a man di dede’.​—Rut 4:10.

Soleki fa a sori, dan a man ben denki en eigi nen nomo nanga den gudu fu en. A no ben denki tra sma èn san a ben kan du gi den. Ma aladi a no ben wani en nen go lasi, tog nowan sma na ini a ten disi sabi fa a nen. A no kisi a moi grani tu di Boas kisi. Boas nen kari leki wan fu den afo fu Yesus Krestes, a Mesias. Na wan sari sani taki a man disi ben denki en srefi nomo èn taki a lasi na okasi fu yepi wan sma di ben de na nowtu.​—Mat. 1:5; Luk. 3:23, 32.