1-2. Efu yu no klari ete fu dopu, dan fu san ede yu no musu lasi-ati? (Luku a prenki na tapu a kafti.)

 EFU yu wani dopu, dan dati na wan moi marki di yu poti gi yusrefi. Yu klari kaba fu teki dopu? Efu yu feni taki yu klari fu dopu èn efu den owruman feni dati bun, dan no draidrai fu du dati na a fosi okasi di yu kisi. Te yu dopu, dan wan moi libi e wakti yu leki futuboi fu Yehovah.

² Ma wan sma taigi yu taki yu musu du wan tu sani ete fu man dopu? Noso na dati yu feni fu yusrefi? Efu dati de so, dan no lasi-ati. Awinsi yu yongu noso owru, yu kan go na fesi so taki yu kan teki dopu.

3. San wan heihei man fu Etiopia ben aksi Filipus, èn sortu aksi e opo kon? (Tori fu den apostel 8:36, 38)

³ Leisi Tori fu den apostel 8:36, 38. Wan heihei man fu Etiopia ben aksi na evangelie preikiman Filipus: „San e tapu mi fu dopu?” Na Etiopiaman ben e angri fu teki dopu, ma a ben klari trutru fu du dati?

4. Fa na Etiopiaman sori taki a ben wani leri moro sani fu Bijbel?

⁴ Na Etiopiaman „ben go na Yerusalem fu anbegi Gado” (Tori 8:27). Sobun, a ben musu fu de wan sma di ben teki a Dyu bribi. A de krin taki a ben kon sabi wan tu sani fu Yehovah fu di a ben leisi den santa Hebrew Buku fu Bijbel. Toku a ben e angri fu kon sabi moro. Fu taki en leti, di Filipus miti a heiheiman na pasi, dan san a man dati ben e du? A ben e leisi a buku fu a profeiti Yesaya (Tori  8:28). Dati ben de dipi tru tori fu Bijbel. A heihei man disi no ben wani kon sabi wan tu fu den prenspari leri fu Bijbel nomo, ma a ben wani leri moro sani.

5. San na Etiopiaman du di a leri sabi den tru tori fu Bijbel?

⁵ A man ben de wan heihei man di ben e wroko gi Kandase, na umakownu fu den Etiopiasma. A man disi „ben e luku ala den gudu fu na umakownu disi” (Tori 8:27). Sobun, a ben musu fu abi furu frantwortu. Toku a meki ten fu anbegi Yehovah. A no ben nofo gi en taki a ben kon sabi den tru tori fu Bijbel, ma a du tu san a ben leri. Dati meki a komoto te na Etiopia fu anbegi Yehovah na a tempel na ini Yerusalem. A ben musu fu teki furu ten nanga moni fu kon na Yerusalem, ma a man ben wani anbegi Yehovah, awinsi san dati ben e aksi fu en.

6-7. Fa a lobi di na Etiopiaman ben abi gi Yehovah kon moro tranga?

⁶ Filipus leri na Etiopiaman wan tu prenspari tru tori fu Bijbel di a no ben sabi ete. Wan fu den tru tori dati ben de taki Yesus na a Mesias (Tori 8:34, 35). A no de fu taki dati a heihei man disi ben breiti srefisrefi fu kon sabi san Yesus ben du gi en. Ma san a du baka di a kon sabi den sani disi? Na Etiopiaman disi ben de wan lespeki man di ben teki a Dyu bribi, èn a ben kan tan leki fa a ben de. Ma na presi fu dati, a lobi di a ben abi gi Yehovah nanga en Manpikin kon moro tranga. Disi meki taki a teki a prenspari bosroiti fu dopu èn fu tron wan bakaman fu Yesus Krestes. Filipus si taki a man ben klari fu dopu, èn dati meki a dopu en.

⁷ Efu yu e teki na eksempre fu na Etiopiaman, dan dati o yepi yu fu sreka so taki yu kan teki dopu. Yu srefi o man taki sondro fu tweifri: „San e tapu mi fu dopu?” Meki wi go luku den srefi sani di na Etiopiaman ben du. A tan leri moro sani, a du san a leri, èn a lobi di a ben abi gi Gado kon moro tranga.

8. San wi musu du, soleki fa Yohanes 17:3 e sori?

⁸ Leisi Yohanes 17:3. A sani di Yesus taki na ini a tekst yepi yu fu teki a bosroiti fu studeri Bijbel? Na dati yepi furu fu wi. Ma wi musu tan leri moro sani? Iya. Noiti wi o kaba ’leri sabi a wan-enkri tru Gado’ (Preik. 3:11). Wi o tan leri sani fu ala ten. O moro wi e leri, o moro wi e kon krosibei na Yehovah.​—Ps. 73:28.

9. San wi musu du baka te wi kon sabi de prenspari tru tori fu Bijbel?

⁹ Te wi e bigin leri sani fu Yehovah, dan  wi e leri soso den moro prenspari leri fu Bijbel. Na ini a brifi di na apostel Paulus skrifi gi den Hebrewsma, a ben kari den leri dati „den moro makriki sani”. Disi no ben wan taki dati „den fosi sani fu Bijbel” no ben prenspari gi en. Na presi fu dati, a ben e agersi den sani dati nanga merki di wan beibi abi fanowdu fu tan na libi (Hebr. 5:12; 6:1). Ma a ben gi ala Kresten a rai tu fu tan leri moro sani èn fu kon sabi den dipi tru tori fu Gado Wortu. Yu e angri fu kon sabi den dipi tori fu Bijbel? Yu wani tan leri moro fu Yehovah èn fu den sani di a abi na prakseri fu du so taki yu kan tan go na fesi?

10. Fu san ede son sma feni en muilek fu studeri?

¹⁰ Ma furu fu wi feni en muilek fu studeri. Fa a de nanga yu? Yu leri leisi èn studeri bun na skoro? Yu ben lobi studeri èn yu feni taki yu kon sabi furu sani? Noso yu feni taki yu no man leri so bun? Efu dati de so, dan yu no de yu wawan. Awinsi fa a no fa, Yehovah kan yepi yu. A no abi fowtu èn en na a moro bun leriman.

11. Fa Yehovah e sori taki en na a „Gran Leriman”?

¹¹ Yehovah e kari ensrefi ’yu Gran Lerimanʼ (Yes. 30:20, 21). A de wan Leriman di abi pasensi, a abi switifasi, èn a e frustan wi. A e suku bun na ini den studenti fu en (Ps. 130:3). Èn noiti a e fruwakti moro fu wi leki san wi man du. Hori na prakseri taki na en meki yu edetonton èn dati na wan moi kado di a gi yu (Ps. 139:14). Wi alamala e angri fu leri sani. Wi Mekiman wani taki wi e tan leri sani fu têgo èn a sani dati musu gi wi prisiri. Sobun, a de wan koni sani taki wi e angri fu kon sabi Bijbel tru tori now (1 Petr. 2:2). Poti marki di yu man doro èn kon abi a gwenti fu leisi èn studeri Bijbel (Yos. 1:8). Yehovah o yepi yu fu kon lobi leisi sani fu en. A o yepi yu tu fu tan leri moro sani fu en.

12. Fu san ede wi musu studeri a libi nanga a diniwroko fu Yesus?

¹² Meki ten ibri dei fu denki dipi fu a libi fu Yesus èn fu a diniwroko fu en. Efu wi wani dini Yehovah, dan a prenspari taki wi e waka soifri baka Yesus, spesrutu na ini a muilek ten disi (1 Petr. 2:21). Yesus ben taigi den disipel fu en taki problema ben o miti den (Luk. 14:27, 28). Ma a ben de seiker taki den tru bakaman fu en ben o man tan gi yesi na Gado, neleki en (Yoh. 16:33). Studeri a libi fu Yesus finifini èn poti marki gi yusrefi fu teki na eksempre fu en na ini yu aladei libi.

13. San yu musu tan aksi Yehovah èn fu san ede?

¹³ Sabi wawan no sari. Yu abi sabi fanowdu fu kon sabi Yehovah moro bun, fu kon lobi en èn fu poti bribi na ini en (1 Kor. 8:1-3). Te yu e leri sabi Yehovah moro bun, dan tan aksi en fu yepi yu fu kon abi moro bribi (Luk. 17:5). A de klariklari fu piki den sortu begi dati. Te yu kon abi trutru bribi fu di yu kisi soifri sabi fu a Gado fu wi, dan Gado o yepi yu fu go na fesi.​—Yak. 2:26.

14. Fa na apostel Petrus sori taki a prenspari fu du san wi leri? (Luku a prenki.)

¹⁴ Na apostel Petrus ben sori o prenspari a de taki den bakaman fu Krestes e tan du san den leri. A ben poti prakseri na a Bijbel tori fu Noa. Yehovah ben taigi Noa taki a ben o tyari wan frudu kon fu pori den ogri sma fu a ten dati. Ma aladi Noa nanga en osofamiri ben sabi taki  wan frudu ben o kon, toku dati no ben wani taki ete dati den ben o kisi kibri. Luku taki Petrus ben taki fu a ten fosi a Frudu di „Noa ben e meki na ark” (1 Petr. 3:20). Iya, den sani di Noa nanga en osofamiri ben leri fu Yehovah, meki taki den bow na ark di ben de wan bigi boto (Hebr. 11:7). Baka dati Petrus agersi den sani di Noa du nanga a dopu di wan sma e dopu. A skrifi: „Now a dopu e frulusu unu na wan srefi sortu fasi” (1 Petr. 3:21). Neleki fa Noa nanga en osofamiri ben e wroko tranga omeni yari langa fu bow na ark, na so yu musu wroko tranga fu sreka yusrefi so taki yu kan teki dopu. San yu musu du fu man sreka yusrefi so taki yu kan teki dopu?

15. San a wani taki fu abi trutru berow?

¹⁵ Wan fu den fosi sani di wi musu du, na fu sori berow gi den sondu fu wi (Tori 2:37, 38). Te wi e sori trutru berow, dan wi o man tyari trutru kenki kon. Yu tapu fu du sani di Yehovah no feni bun? Yu tapu fu libi wan yayolibi, yu tapu nanga smoko, noso yu tapu fu taki doti taki? (1 Kor. 6:9, 10; 2 Kor. 7:1; Ef. 4:29). Efu yu no du dati ete, dan tan meki muiti fu tyari kenki kon. Taki nanga a sma di e studeri Bijbel nanga yu noso aksi den owruman fu a gemeente fu yepi yu. Efu yu yongu èn yu e libi ete nanga yu papa nanga mama, dan aksi den fu yepi yu fu tapu nanga takru gwenti di kan tapu yu fu teki dopu.

16. San wi musu du efu wi wani tan anbegi Yehovah?

¹⁶ A prenspari tu fu tan anbegi Yehovah. Disi wani taki dati wi musu go na den Kresten konmakandra èn wi musu teki prati na den (Hebr. 10:24, 25). Èn te yu doro a marki fu go preiki, dan sorgu taki yu e du dati doronomo. O moro yu e teki prati na a wroko disi di e kibri sma libi, o moro dati o gi yu prisiri (2 Tim. 4:5). Efu yu yongu èn efu yu e libi ete nanga yu papa nanga mama, dan aksi yusrefi: ’Mi papa nanga mama musu memre mi ala ten fu go na den konmakandra noso fu go na ini a preikiwroko? Noso a de so taki mi srefi e go?’ Te yu srefi e du  den sani dati, dan yu e sori taki yu abi bribi, taki yu lobi Yehovah Gado èn taki yu e warderi den sani di a gi yu. Den sani disi e sori taki yu e „dini Gado fayafaya”. Den de leki kado di yu e gi Yehovah (2 Petr. 3:11; Hebr. 13:15). Yehovah breiti nanga ala den kado di wi e gi en nanga prisiri. (Luku 2 Korentesma 9:7.) Wi e du den sani dati fu di wi breiti taki wi man gi Yehovah den moro bun sani di wi abi.

17-18. Sortu prenspari fasi o yepi yu fu go na fesi so taki yu kan teki dopu èn fa dati kan yepi yu? (Odo 3:3-6)

¹⁷ Te yu e tan go na fesi fu doro den marki fu teki dopu, dan tesi o miti yu. Son sma ben kan krutu yu fu di yu tron wan Kresten, kande den e gens yu srefi (2 Tim. 3:12). Kande yu e du tranga muiti fu tapu nanga wan sani di no bun, ma toku yu e du a sani dati baka son leisi. Noso kande yu e fruferi taki yu musu wakti so langa fosi yu doro a marki di yu wani doro. San o yepi yu fu horidoro? Wan prenspari sani di o yepi yu, na lobi gi Yehovah.

¹⁸ A lobi di yu abi gi Yehovah na wan moi sani èn a de a moro prenspari fasi di yu abi. (Leisi Odo 3:3-6.) Te yu lobi Gado nanga yu heri ati, dan dati o yepi yu fu tan dini en te problema miti yu. Bijbel e taki furu leisi fu a tranga lobi di Yehovah abi gi den futuboi fu en. Disi wani taki dati noti a o gwe libi den futuboi fu en, noso taki a o tapu fu lobi den (Ps. 100:5). Gado meki wi fu gersi en (Gen. 1:26). Fa yu kan sori a srefi lobi dati?

19. Fa yu kan sori moro warderi gi den sani di Yehovah du gi yu? (Galasiasma 2:20)

¹⁹ Wan sani di yu kan du, na fu sori warderi gi den sani di Yehovah du gi yu (1 Tes. 5:18). Aksi yusrefi ibri dei: ’Fa Yehovah sori lobi gi mi tide?’ Baka dati, taigi Yehovah tangi te yu e begi èn kari den sani di a du gi yu. Neleki Paulus, frustan taki Yehovah e du bun gi yu fu di a lobi yu. (Leisi Galasiasma 2:20.) Aksi yusrefi: ’Mi wani sori en tu taki mi lobi en?’ Te yu lobi Yehovah, dan dati o yepi yu fu tan kakafutu gi tesi èn fu hori doro te problema e miti yu. Disi o gi yu deki-ati tu fu tan anbegi Yehovah, èn na so yu Papa o man si ibri dei taki yu lobi en.

20. San a wani taki fu gi yusrefi abra na Yehovah èn o prenspari a bosroiti disi de?

 ²⁰ Te fu kaba a lobi di yu abi gi Yehovah o gi yu deki-ati fu taki wan spesrutu begi. Yu o gi yusrefi abra na Gado. Hori na prakseri taki te yu gi yusrefi abra na Gado, dan yu o abi a moi howpu disi: Yu kan de fu en fu ala ten. Te yu gi yusrefi abra na Yehovah, dan dati wani taki dati yu pramisi fu dini en na ini bun ten èn na ini ogri ten. Noiti moro yu o abi fu pramisi en a sani dati. A tru taki te wi gi wisrefi abra na Yehovah, dan dati na wan seryusu bosroiti. Ma prakseri a sani disi: Yu o teki furu bosroiti na ini yu libi, sonwan fu den o de heri bun bosroiti, ma nowan bosroiti di yu o teki o bun moro a wan di yu o teki fu gi yusrefi abra na Yehovah (Ps. 50:14). Satan o pruberi fu meki a lobi di yu abi gi Yehovah kon swaki, fu di a wani taki yu trangayesi yu Papa. No meki Satan wini noiti! (Yob 27:5) A tranga lobi di yu abi gi Yehovah o yepi yu fu tan du san yu pramisi en èn dei fu dei yu o kon moro krosibei na yu hemel Papa.

21. Fu san ede wi kan taki dati te wan sma dopu dan dati a no ala ete?

²¹ Baka te yu gi yusrefi abra na Yehovah, dan taigi den owruman fu yu gemeente taki yu wani dopu. Ma hori na prakseri ala ten taki te yu dopu, dan dati a no ala ete. Now yu o gebroiki yu libi fu dini Yehovah èn yu o tan du dati fu ala ten. Sobun, yu musu kon abi moro lobi gi Yehovah. Poti marki gi yusrefi so taki a lobi fu yu kan kon moro tranga dei fu dei. Disi o gi yu deki-ati fu teki dopu. A dei dati o de wan moi dei. Ma disi na a bigin nomo. Meki a de so taki a lobi di yu abi gi Yehovah nanga en Manpikin tan gro fu ala ten!