1-2. San e pasa furu tron te sma teki dopu èn san wi o luku na ini na artikel disi?

 OITI yu luku wan grupu sma di ben de fu teki dopu? Yu e yere fa den e piki den tu aksi fayafaya fosi den teki dopu. Yu e si fa den famiriman nanga den mati fu den e prisiri srefisrefi. Te den sma di teki dopu e opo komoto na ini a watra, dan yu e yere fa sma e naki anu gi den èn yu kan si taki den nyun Kresten disi breiti srefisrefi. Ibri wiki, dusundusun sma na heri grontapu e gi den libi abra na Yehovah Gado èn den e teki dopu fu tron Kotoigi fu en.

² Fa a de nanga yu? Efu yu e prakseri fu teki dopu, dan yu de leki wan leti na ini na ogri grontapu disi fu di yu e „suku Yehovah” (Ps. 14:1, 2). Na artikel disi skrifi gi yu, awinsi yu yongu noso owru. Ma wi di dopu kaba, wani du tranga muiti fu tan dini Yehovah fu ala ten. A no de fu taki dati wi abi furu reide fu dini Yehovah, ma kow go luku dri fu den reide dati.

3. Fu san ede den futuboi fu Yehovah lobi san tru èn san reti? (Psalm 119:128, 163)

³ Yehovah ben taigi a pipel fu en fu „lobi san tru” (Sak. 8:19). Yesus ben gi den bakaman fu en a rai fu suku retidu (Mat. 5:6). Disi wani taki dati wan sma musu angri fu du san reti, san bun, èn san krin na ini Gado ai. Yu lobi san tru èn san reti? Wi de seiker taki yu lobi dati. Yu no lobi lei kwetikweti èn yu no lobi nowan sani di ogri. (Leisi Psalm 119:128, 163.) Wan sma di e lei e teki na eksempre fu Satan, a tiriman fu a grontapu disi (Yoh. 8:44; 12:31). Wán sani di Satan wani du, na taki a wani pori a  santa nen fu Yehovah Gado. Satan tan fruteri lei fu wi Gado sensi di Adam nanga Eva opo densrefi teige Gado na ini Eden. A ben wani meki sma denki taki Yehovah na wan Tiriman di e denki ensrefi nomo èn di e kori libisma fu di a no wani taki den feni bun (Gen. 3:1, 4, 5). Den lei di Satan fruteri fu Yehovah, meki taki sma e denki takru fu Yehovah te na a de fu tide. Te libisma e bosroiti fu no lobi san tru, dan Satan kan meki den du ala sortu sani di no reti èn di ogri.

4. Fa Yehovah sori taki a de „a Gado di no e fruteri lei”? (Luku a prenki.)

⁴ Yehovah na „a Gado di no e fruteri lei” èn a de klariklari fu leri den sma di lobi en fu kon sabi san tru (Ps. 31:5). A leri dati e yepi den so taki Satan no man kori den nanga den lei fu en. Yehovah e leri den futuboi fu en tu fu de eerlijk èn fu du san reti. Disi e yepi den fu abi moro lespeki gi densrefi èn fu abi wan bun konsensi (Odo 13:5, 6). Yehovah du dati gi yu di yu studeri Bijbel? Yu leri taki a pasi fu Yehovah na fu a bun fu ala libisma èn fu yu eigi bun (Ps. 77:13). Dati meki yu wani gi yesi na Gado èn yu wani du san reti (Mat. 6:33). Yu wani meki sma kon sabi san tru èn yu wani sori den taki den sani di Satan fruteri fu wi Gado Yehovah, na soso lei. Fa yu kan du dati?

5. Fa yu kan sori taki yu e horibaka gi san tru èn san reti?

⁵ Yu kan libi na wan fasi di e sori krin taki yu e weigri fu bribi den lei fu Satan èn taki yu e horibaka gi san tru. Yu kan sori taki yu wani Yehovah leki yu Tiriman èn yu wani du san a feni bun. Fa yu kan du dati? Yu musu begi Yehovah èn yu musu gi yusrefi abra na en. Baka dati yu musu dopu so taki sma kan sabi taki yu gi yusrefi abra. Te yu lobi san tru èn san reti, dan dati na wan bun reide fu teki dopu.

6. Sortu reide Psalm 45:4 e gi yu fu lobi Yesus Krestes?

⁶ Fu san ede yu lobi Yesus Krestes? Luku wan tu bun reide fu san ede wi musu lobi Yesus, na Psalm 45:4. (Leisi en.) Yesus lobi san tru, a e leri wi fu abi sakafasi èn a lobi san reti. Efu yu lobi san tru èn san reti, dan a no de fu taki dati yu  lobi Yesus Krestes tu. Prakseri fa Yesus no ben frede fu opo taki gi san tru èn san reti (Yoh. 18:37). Ma fa Yesus e leri wi fu abi sakafasi?

7. San yu lobi fu a sakafasi fu Yesus?

⁷ A fasi fa Yesus tyari ensrefi e leri wi fu abi sakafasi. Fu eksempre, noiti a suku glori gi ensrefi, ma a gi en Papa ala glori (Mark. 10:17, 18; Yoh. 5:19). Fa a sakafasi fu Yesus e meki yu firi? A no e gi yu deki-ati fu lobi Gado en Manpikin èn fu waka na en baka? Seiker. Fu san ede Yesus abi sakafasi? Fu di a lobi en Papa di abi sakafasi èn a e teki na eksempre fu en (Ps. 18:35; Hebr. 1:3). Te yu e luku fa Yesus sori den fasi fu Yehovah, dan yu no e kon lobi en?

8. Fu san ede wi breiti taki Yesus na wi Kownu?

⁸ Wi breiti taki Yesus na wi Kownu fu di en na a moro bun Tiriman. Yehovah srefi gi en Manpikin leri èn a poti en leki Tiriman (Yes. 50:4, 5). Prakseri tu fa Yesus gi a libi fu en fu a bun fu wi fu di a lobi wi (Yoh. 13:1). Fu di Yesus na yu Kownu, meki yu musu lobi en nanga yu heri ati. Yesus taki dati den wan di lobi en trutru, noso den wan di a e si leki en mati, e sori taki den lobi en te den e gi yesi na den komando fu en (Yoh. 14:15; 15:14, 15). A de wan bigi grani trutru fu de wan mati fu Yehovah en Manpikin.

9. Fa a dopu fu den bakaman fu Krestes de a srefi leki a di fu Krestes?

⁹ Wan fu den komando fu Yesus, na taki den bakaman fu en musu teki dopu (Mat. 28:19, 20). Yesus srefi gi den na eksempre. Te wi e luku a dopu fu Yesus, dan wi e si taki a e difrenti na son fasi fu a dopu fu den bakaman fu en. (Luku a faki „ Fa a dopu fu Yesus èn a dopu fu den bakaman fu en e difrenti”.) Ma na tra fasi, a dopu fu Yesus èn a di fu den bakaman fu en na a srefi. Di Yesus teki dopu, dan a gi ensrefi na en Papa fu du a wani fu en (Hebr. 10:7). Na so a de tu taki te den bakaman fu Yesus e teki dopu, den e sori sma taki den no e libi moro fu du san den srefi wani, ma den e poti a wani fu Gado na a fosi presi na ini den libi. Na a fasi disi den e teki na eksempre fu a Masra fu den.

10. Fu san ede a lobi di yu abi gi Yesus musu gi yu deki-ati fu teki dopu?

¹⁰ Yu e bribi taki Yesus na Yehovah en wan-enkri Manpikin èn taki en na a Kownu di Gado poti fu tiri wi. Yu sabi taki Yesus abi sakafasi èn taki a sori den srefi fasi fu en Papa. Yu leri taki a gi sma di ben de nanga angri nyanyan, taki a trowstu sma di ben lasi-ati, èn taki a dresi srefi den sikiwan (Mat. 14:14-21). Yu si fa a e tiri a gemeente fu en na ini a ten disi (Mat. 23:10). Èn yu sabi taki na ini a ten di e kon a o du moro sani leki Kownu fu Gado Kownukondre. Fa yu kan sori taki yu lobi en? Na te yu e teki na eksempre fu en (Yoh. 14:21). Wan prenspari sani di yu kan du, na fu gi yusrefi abra na Yehovah èn fu teki dopu.

11. San na a moro prenspari reide fu teki dopu?

¹¹ San na a moro prenspari reide fu teki dopu? Yesus ben sori san na a moro bigi komando fu Gado di a taki: „Un musu lobi Yehovah un Gado nanga un heri ati, nanga un heri libi, nanga un heri frustan, èn nanga ala un krakti” (Mark. 12:30). Na so yu lobi Gado tu?

12. Fu san ede yu lobi Yehovah? (Luku a prenki.)

¹² Bun furu reide de fu lobi Yehovah. Fu eksempre, yu kon frustan taki en na  „a sma di e gi libi” èn taki „ibri bun presenti nanga ibri kado di bun dorodoro” e kon fu en (Ps. 36:9; Yak. 1:17). Ibri bun sani di yu abi e kon fu wi lobi-ati Gado di lobi gi sma sani.

13. Fu san ede a lusu-paiman na so wan moi kado?

¹³ A lusu-paiman na wan moi kado di Gado gi wi. Fu san ede wi kan taki dati? Luku a matifasi fu Yehovah nanga a Manpikin fu en. Yesus ben taki: „A Tata lobi mi” èn a ben taki tu: „Mi lobi a Tata” (Yoh. 10:17; 14:31). A matifasi fu den kon moro tranga na ini den milyardmilyard yari di den ben de makandra (Odo 8:22, 23, 30). Prakseri fa a ben musu hati Yehovah di a gi pasi taki en Manpikin pina èn dede. Yehovah lobi libisma so te taki a ben de klariklari fu gi en lobi Manpikin leki wan srakti-ofrandi, so taki yu nanga trawan kan libi fu têgo (Yoh. 3:16; Gal. 2:20). Wan moro bun reide fu lobi Gado no de.

14. San na a moro bun marki di yu kan poti na ini yu libi?

¹⁴ A lobi di yu abi gi Yehovah kon moro tranga di yu leri sabi en moro bun. A no de fu taki dati yu wani kon moro krosibei fu en now èn fu ala ten. Èn yu man du dati. A e gi yu deki-ati na wan switi fasi fu prisiri en ati (Odo 23:15, 16). Yu kan  du dati nanga den sani di yu e taki èn den sani di yu e du. A fasi fa yu e libi o sori taki yu lobi Yehovah trutru (1 Yoh. 5:3). Dati na a moro bun marki di yu kan poti na ini yu libi.

15. Fa yu kan sori taki yu lobi Yehovah?

¹⁵ Fa yu kan sori taki yu lobi Yehovah? A fosi sani, na taki yu musu begi fu gi yusrefi abra na a wan-enkri tru Gado (Ps. 40:8). Baka dati yu musu teki dopu na fesi tra sma fu sori taki yu gi yusrefi abra na Gado. Soleki fa wi ben si kaba na ini na artikel disi, a dopu fu yu na wan moi momenti na ini yu libi, ma a de wan prenspariwan tu. Now, yu no e libi moro gi yusrefi, ma gi Yehovah Gado (Rom. 14:8; 1 Petr. 4:1, 2). A kan gersi leki disi na wan bigi bosroiti di yu musu teki, èn na so a de tu. Ma a bosroiti disi o gi yu okasi fu abi a moro bun libi. Fa so?

16. Soleki fa Psalm 41:12 e sori, dan san Yehovah o du gi den wan di e tan dini en?

¹⁶ Nowan enkri sma lobi fu gi trawan sani moro leki Yehovah. Awinsi san yu gi en, ala ten a o gi yu omeni leisi moro leki dati (Mark. 10:29, 30). Srefi na ini na ogri grontapu disi a o gi yu wan koloku libi, bun furu blesi nanga ala sani di yu abi fanowdu. Èn dati na soso a bigin. Te yu dopu, dan yu kan tan dini yu lobi Papa fu têgo. A lobi di yu nanga yu Papa abi gi makandra o kon moro tranga èn neleki en yu o libi fu têgo.​—Leisi Psalm 41:12.

17. Sortu sani yu kan gi Yehovah di a no abi ete?

¹⁷ Te yu gi yusrefi abra na Gado èn teki dopu, dan yu o abi a grani fu gi yu Papa wan tumusi warti sani. A gi yu ibri bun sani èn ibri moi momenti di yu ben abi oiti. Èn yu fu yu sei kan gi a sma di abi hemel nanga grontapu wan sani di a no abi ete. Fu taki en leti, yu kan dini en nanga yu heri ati (Yob 1:8; 41:11; Odo 27:11). A no de fu taki dati disi na a moro bun fasi fu libi. A de krin taki a lobi di yu abi gi Yehovah, na a moro bun reide fu teki dopu.

18. Sortu sani yu kan aksi yusrefi?

 ¹⁸ Sobun, fa yu o piki na aksi: ’Yu o teki dopu?’ Na yu wawan man piki na aksi disi. Ma san kan yepi yu, na te yu e aksi yusrefi: ’Fu san ede mi e wakti fu teki dopu?’ (Tori 8:36) Memre den dri reide di wi luku na ini na artikel disi. A fosiwan, na taki yu lobi san tru èn san reti. Aksi yusrefi: ’Mi wani si a dei te ala sma o taki san tru èn o du san reti?’ A di fu tu sani, na taki yu lobi Yesus Krestes. Aksi yusrefi: ’Mi wani Gado Manpikin leki mi Kownu èn mi wani waka na en baka?’ A di fu dri sani, a moro prenspariwan, na taki yu lobi Yehovah. Aksi yusrefi: ’Mi wani dini Yehovah fu meki en ati prisiri?’ Efu yu e piki den aksi disi nanga ’iya’, dan fu san ede yu no e teki dopu?​—Tori 16:33.

19. Fu san ede yu no musu tweifri fu teki dopu? Fruklari dati. (Yohanes 4:34)

¹⁹ Efu yu e tweifri fu teki dopu, dan luku wan agersitori di Yesus fruteri. (Leisi Yohanes 4:34.) Na ini a vers disi, Yesus e taki dati fu du a wani fu en Papa de leki nyanyan gi en. Fu san ede? Fu di nyanyan bun gi libisma. Yesus ben sabi taki iniwan sani di Yehovah e aksi fu wi bun gi wi. Yehovah no wani taki wi du wan sani di o tyari takru bakapisi kon gi wi. Yehovah wani taki wi teki dopu? Iya (Tori 2:38). Sobun, yu kan de seiker taki yu o kisi wini te yu e gi yesi na a komando fu teki dopu. Efu yu no ben o tweifri fu nyan a moro bun nyanyan, dan fu san ede yu ben o tweifri fu teki dopu?

20. San wi o luku na ini a tra artikel?

²⁰ Fu san ede so furu sma e wakti fu teki dopu? Kande furu fu den sma disi ben o taki: „Mi no klari ete fu teki dopu.” Fu taki en leti, a bosroiti di yu musu teki fu gi yusrefi abra na Yehovah èn fu teki dopu, na a moro prenspari bosroiti di yu o teki oiti. Sobun yu musu teki ten fu denki bun fosi yu teki a bosroiti dati èn yu musu du muiti fu doro den marki fu teki dopu. Ma efu trutru yu wani teki dopu, dan san yu kan du nownow kaba fu sreka yusrefi? Wi o luku a piki tapu na aksi dati na ini a tra artikel.