1. San papa nanga mama wani gi den pikin fu den?

 PAPA NANGA MAMA, wi sabi taki yu wani yepi den pikin fu yu fu kon sabi Yehovah èn fu lobi en. Ma wi no man si Gado. Fa yu kan yepi yu pikin fu bribi taki Gado de trutru èn fu kon krosibei na En?​—Yak. 4:8.

2. Fa papa nanga mama kan leri den pikin fu den fu kon sabi Yehovah?

² Wan prenspari fasi fu yepi den pikin fu kon krosibei na Yehovah na fu studeri Bijbel nanga den (2 Tim. 3:14-17). Ma Bijbel e sori wan tra fasi fa yonguwan kan kon sabi Yehovah. Na ini a buku Odo wan papa e memre en manpikin fu no frigiti den fasi fu Yehovah di de krin fu si na ini den sani di a meki (Odo 3:19-21). Wi o luku wan tu fasi fa papa nanga mama kan gebroiki den sani di Gado meki fu yepi den pikin fu leri sabi Yehovah.

3. Nanga san papa nanga mama musu yepi den pikin fu den?

³ Bijbel e taki dati „sensi grontapu meki, sma man si krin sortu fasi Gado abi, aladi den no man si en. Te den e luku den sani di a meki, den kan frustan” fa Gado de (Rom. 1:20). Papa nanga mama, kande yu lobi fu go koiri nanga den pikin fu yu na moi presi pe furu bon de. Gebroiki a ten dati fu yepi den pikin fu si den tumusi moi fasi fu Yehovah na ini „den sani di a meki”. Meki wi luku san papa nanga mama kan leri fu a fasi fa Yesus ben gi sma leri.

4. Fa Yesus gebroiki den sani di Gado meki fu gi den disipel fu en leri? (Lukas 12:24, 27-30)

 ⁴ Luku fa Yesus ben gebroiki den sani di Gado meki fu gi sma leri. Wan leisi, a aksi den disipel fu en fu luku den fowru nanga den leilibromki. (Leisi Lukas 12:24, 27-30.) Yesus ben kan taki fu iniwan sani di Gado meki, ma a gebroiki wan fowru nanga wan bromki di den disipel fu en ben sabi bun. Kande den disipel ben si fowru e frei na loktu èn bromki di e gro na gron. Kande Yesus ben sori nanga en finga go na den sani disi te a ben taki fu den. San a du baka di a taki fu den eksempre disi? A leri den disipel fu en wan prenspari les fu a bun-ati nanga switifasi fu den hemel Papa. Den leri taki Yehovah o gi den sma di e dini en nyanyan nanga krosi neleki fa a e du dati gi den fowru nanga den bromki.

5. Sortu eksempre papa nanga mama kan gebroiki fu leri den pikin fu Yehovah?

⁵ Papa nanga mama, fa yu kan gi leri neleki Yesus? Yu kan fruteri yu pikin fu wan sani di yusrefi e feni moi, soleki wan meti noso wan bromki di yu lobi. Te yu e taki fu wan fu den sani dati nanga yu pikin, dan yu musu sori en san a sani dati e leri wi fu Yehovah. Baka dati yu kan aksi yu pikin sortu meti noso bromki en lobi. Efu yu e taki fu wan sani di Yehovah meki èn di ensrefi lobi, dan kande a o arki yu moro bun te yu e pruberi fu leri en wan fu den fasi fu Yehovah.

6. San wi kan leri fu na eksempre fu a mama fu Christopher?

⁶ A de so taki papa nanga mama musu teki furu ten fu ondrosuku wan spesrutu meti noso bromki fosi den man fruteri den pikin san dati e leri wi fu Yehovah? Dati no de fanowdu. Yesus no ben fruteri finifini fa den fowru e nyan noso fa den bromki e gro. A tru taki ten na ten a pikin fu yu sa wani sabi moro fu son sani di Gado meki, ma son leisi a nofo kaba fu taki wan simpel sani noso fu poti wan aksi fu meki a frustan san yu wani leri en. Luku san wan brada di nen Christopher e memre fu en yongu yari: „Mi mama ben taki wan tu wortu nomo fu yepi wi warderi den sani na wi lontu. Fu eksempre, te wi ben de krosibei fu bergi, dan a ben taki: ’Luku fa den bergi bigi èn fa den moi! Yehovah a no wan bigi Gado?’ Noso te wi ben de krosibei fu a se, a ben taki: ’Luku a krakti fu den skwala! Gado no abi furu makti?’” Christopher e taki: „Den simpel wortu dati ben meki wi go denki èn den ben abi wan bigi krakti na wi tapu.”

7. Fa yu kan leri den pikin fu yu fu denki dipi fu den sani di Gado meki?

⁷ Te den pikin e kon moro owru, dan yu kan leri den fu poti moro prakseri na den sani di Yehovah meki èn fu leri moro fu Yehovah. Yu kan taki fu wán sani nomo di Gado meki èn aksi den pikin fu yu: „San disi e leri yu fu Yehovah?” Kande yu o fruwondru te yu yere san den e denki.​—Mat. 21:16.

8. Sortu okasi den papa nanga mama na ini Israel ben abi te den ben e „waka na strati”?

⁸ Na ini Israel, papa nanga mama ben kisi a rai fu leri den pikin den wet fu Yehovah te den ben e waka „na strati” (Deut. 11:19). Den strati ben pasa na ini den boitipresi fu Israel. Drape den ben kan si ala sortu meti, fowru, nanga bromki. Te den osofamiri fu Israel ben e pasa  na tapu den pasi dati, dan den papa nanga mama ben abi na okasi fu taki nanga den pikin fu den sani di Yehovah meki. Kande unu leki papa nanga mama abi den sortu okasi disi tu fu gebroiki den sani di Gado meki fu gi den pikin fu unu leri. Luku fa son papa nanga mama du dati.

9. San yu kan leri fu Anita nanga Katya?

⁹ Anita, b wan mama di e tan na ini wan bigi foto fu India e taki: „Te wi e go luku wi famiri na boiti, dan wi e si dati leki wan okasi fu yepi den pikin fu wi fu kon sabi den tumusi moi sani di Yehovah meki. Mi feni taki te den pikin fu mi de fara fu den druk strati nanga dyugudyugu fu a foto, dan a moro makelek fu taki nanga den fu den sani di Gado meki.” Papa nanga mama, den pikin fu yu no o frigiti a ten di den ben abi nanga yu na wan moi presi. Katya, wan sisa fu Moldafia, e taki: „Den momenti fu mi pikin-nengre ten di mi man memre bun ete na di mi ben de na boiti makandra nanga mi papa nanga mama. Mi de nanga tangi taki den leri mi sensi mi yongu yari fu teki a ten fu luku san Yehovah meki èn fu leri sabi en moro bun nanga yepi fu den sani dati.”

10. San papa nanga mama kan du efu a muilek gi den fu go koiri na wan boitipresi? (Luku a faki „ Yepi gi papa nanga mama”.)

¹⁰ San yu kan du efu yu no man go na wan boitipresi? Amol, di e tan na India, e taki: „Na a presi pe mi e tan, papa nanga mama musu wroko langa yuru èn a diri fu go na boiti. Ma yu kan koiri go na wan moi dyari noso wan balkon fu wan gebow fu si den sani di Yehovah meki èn fu taki fu den moi fasi fu en.” Efu yu e luku bun, dan krosibei fu yu oso yu kan si furu sani di Yehovah meki èn di yu kan sori den pikin fu yu (Ps. 104:24). Kande yu o si  fowru, insekt, bromki, nanga tra sani. Karina fu Doisrikondre e taki: „Mi mama lobi bromki. Sobun di mi ben de wan pikin meisje, dan a ben sori mi moi bromki te wi ben e waka makandra.” Papa nanga mama, na organisâsi fu wi meki furu video nanga buku di e taki fu sani di Gado meki èn yu kan gebroiki den sani dati tu fu gi den pikin fu yu leri. Iya, awinsi pe yu e tan, yu kan yepi den pikin fu yu fu poti prakseri na san Gado meki. Meki wi poti prakseri now na wan tu fasi fu Yehovah di yu kan sori den pikin fu yu.

11. Fa papa nanga mama kan yepi den pikin fu si a lobi fu Yehovah?

¹¹ Fu yepi den pikin fu si a lobi fu Yehovah, yu kan meki den poti prakseri na a moi fasi fa furu meti e sorgu den pikin fu den (Mat. 23:37). Yu kan sori den tu taki wi man prisiri fu someni difrenti sani di Gado meki. Karina, di wi ben kari na fesi, e taki: „Te wi ben e koiri, dan mi mama ben taigi mi fu teki ten fu luku fa ibri bromki de aparti èn fa wi kan si a lobi fu Yehovah na ini a moi fasi fa a bromki meki. Now, baka someni yari, mi e luku den bromki bun ete. Mi e si fa ibriwan meki tra fasi èn fa den alamala abi difrenti kloru. Den e tan memre mi o furu Yehovah lobi wi.”

12. Fa papa nanga mama kan yepi den pikin fu si a koni fu Gado? (Psalm 139:14) (Luku a fowtow.)

¹² Yepi den pikin fu si a koni fu Gado. A de krin taki a koni fu Yehovah bigi moro di fu wi (Rom. 11:33). Fu eksempre, yu kan sori den fa a watra di e tron wolku e go fu a wan presi na a trawan sondro problema (Yob 38:36, 37). Yu kan fruteri den tu fu a kefalek moi fasi fa a libisma skin meki. (Leisi Psalm 139:14.) Luku fa wan papa di nen Vladimir ben du dati. A e taki: „Wan dei a boi fu wi fadon fu en baisigri, dan a kisi mankeri. Baka wan tu dei a soro fu en kon betre. Mi nanga mi wefi fruteri en taki Yehovah meki a skin fu wi na so wan fasi taki a kan meki ensrefi kon bun baka. Wi sori en taki yu no man si a sani disi na nowan fu den sani di libisma meki. Fu eksempre, wan wagi no man meki ensrefi kon bun baka te a broko.  A sani disi yepi wi boi fu si a koni fu Yehovah.”

13. Fa papa nanga mama kan yepi den pikin fu si a krakti fu Gado? (Yesaya 40:26)

¹³ Yehovah e aksi wi fu luku go na loktu èn fu prakseri a bigi krakti fu en di e hori ala stari na den presi. (Leisi Yesaya 40:26.) Yu kan aksi den pikin fu yu fu luku go na loktu èn fu go denki fu den sani di den e si. Luku san wan sisa fu Taiwan, e memre fu en pikin-nengre ten: „Wan leisi mi mama tyari mi go sribi na boiti, dan wi ben kan si ala den stari na loktu fu di wi no ben de na foto pe tumusi furu leti de. Na a ten dati mi ben e denki taki mi no ben o man tan dini Yehovah nanga mi heri ati, fu di tra pikin na skoro ben meki en muilek gi mi. Mi mama taigi mi fu denki a krakti di Yehovah gebroiki fu meki ala den stari na loktu èn taki a kan gebroiki a srefi krakti dati fu yepi mi fu pasa iniwan tesi. Baka a fakansi dati, di mi si den sani di Gado meki, mi ben wani kon sabi Yehovah moro bun èn mi kisi moro deki-ati fu dini en.”

14. Fa papa nanga mama kan gebroiki sani di Yehovah meki fu sori taki a de wan koloku Gado?

¹⁴ Den sani di Yehovah meki e sori taki a de koloku èn a wani taki wi de koloku tu. Sabiman kon si taki furu meti soleki fowru nanga fisi lobi prei (Yob 40:20). Oiti den pikin fu yu lafu di den si wan meti e prei? Kande den si wan pikin pusipusi lon na baka wan bal noso wan pisi titei, noso pikin dagu di e lolo na gron nanga makandra. Wan tra leisi te den pikin fu yu e lafu te den si meti e prei, dan yu kan memre den taki wi e dini wan koloku Gado.​—1 Tim. 1:11.

15. San kan yepi papa nanga mama fu kon sabi san den pikin fu den e denki? (Odo 20:5) (Luku a fowtow.)

¹⁵ Son leisi papa nanga mama e feni en muilek fu meki den pikin fu den taki fu den problema di e miti den. Efu yu de na ini so wan situwâsi, dan yu musu pruberi fu kon sabi san de na ini na ati fu yu pikin. (Leisi Odo 20:5.) Son papa nanga  mama e feni en moro makelek fu du dati te den de makandra nanga den pikin fu den na wan presi pe den kan prisiri fu den sani di Gado meki. Fu san ede? Wan reide na taki drape yu no abi so furu sani di kan hari a prakseri fu den pikin noso fu a papa nanga mama. Wan papa na ini Taiwan di nen Masahiko e fruteri wan tra reide: „Te mi nanga mi frow e go na dorosei nanga den pikin fu kren bergi noso fu waka na sesyoro, dan nofo tron den pikin e firi moro bun fu taki. Dati meki a moro makelek gi wi fu meki den fruteri san den e denki.” Katya, di wi ben kari na fesi, e taki: „Nofo tron baka skoro mi mama ben tyari mi go na wan moi park. Na ini a tiri presi dati mi ben feni en moro makelek fu fruteri en san pasa na skoro noso san ben moro mi.”

16. Fa osofamiri kan prisiri fu den moi sani di Gado meki?

¹⁶ Te osofamiri e prisiri nanga makandra fu den moi sani di Gado meki, dan dati kan gi osofamiri na okasi tu fu rostu èn fu du moi sani nanga makandra. Disi kan yepi den fu lobi makandra moro. Bijbel e taki dati „wan ten de fu lafu” èn „fu dyompodyompo fu prisiri” (Preik. 3:1, 4). Yehovah meki moi presi na grontapu pe wi kan du sani di wi lobi. Furu osofamiri lobi fu go na boiti, na busi, noso na presi pe bergi de. Son pikin lobi fu lon prei na dorosei, fu luku meti, noso fu swen na ini wan liba, wan kriki noso na sesyoro. Wi abi someni okasi fu prisiri na moi presi èn fu den sani di Yehovah meki!

17. Fu san ede papa nanga mama musu yepi den pikin fu prisiri fu den sani di Gado meki?

¹⁷ Na ini a nyun grontapu fu Gado, papa nanga mama èn den pikin fu den o man prisiri moro fu den sani di Gado meki. Na a ten dati, den no o frede meti èn den meti no o frede wi (Yes. 11:6-9). Fu têgo wi o man prisiri fu den sani di Yehovah meki (Ps. 22:26). Ma papa nanga mama, no wakti teleki a ten dati fosi yu o bigin yepi yu pikin fu prisiri fu den sani di Gado meki. Te yu e gebroiki den sani di Gado meki fu leri den pikin fu Yehovah, dan a kan taki den o agri nanga san Kownu David ben taki: „Yehovah . . . nowan sma kan du den sani di yu e du.”​—Ps. 86:8.