1. San e fruwondru sma te den e kon na den konmakandra fu wi fu a fosi leisi? (Luku a fowtow.)

 PRAKSERI wan trowpaar di e kon na wan konmakandra na ini wan Kownukondre zaal fu Yehovah Kotoigi fu a fosi leisi. A trowpaar e fruwondru srefisrefi te den e si fa den brada nanga sisa sori switifasi gi den èn fa den e sori lobi gi makandra. Te den e drai go baka na oso, na uma e taigi en masra: ’Den Yehovah Kotoigi de tra fasi. Mi ben lobi en.’

2. Fu san ede son sma tapu fu dini Yehovah?

² A lobi na mindri a pipel fu Yehovah na wan tumusi aparti sani trutru. Ma a no de so taki Yehovah Kotoigi no abi nowan fowtu (1 Yoh. 1:8). O moro wi e kon sabi den sma na ini a gemeente, o moro wi man si son fowtu fu den (Rom. 3:23). A de wan sari sani taki son sma meki taki den fowtu fu trawan tapu den fu dini Yehovah.

3. Fa sma kan sabi suma na trutru bakaman fu Krestes? (Yohanes 13:34, 35)

³ Luku a thema tekst fu na artikel disi ete wan leisi. (Leisi Yohanes 13:34, 35.) Fa sma kan sabi suma na trutru bakaman fu Krestes? Bijbel e taki dati den abi lobi. A no e taki dati den no abi nowan fowtu. Luku tu taki Yesus no taki: ’Na a fasi disi unu o sabi taki unu na mi disipel.’ A taki: „Na a fasi disi ala sma o sabi taki unu na mi disipel.” Na so fasi Yesus sori taki a no soso den  disipel fu en ben o sabi suma na den tru bakaman fu en, ma sma di no de memre fu a Kresten gemeente ben o si tu taki disipel fu Krestes e sori lobi gi makandra sondro fu suku wini gi densrefi.

4. San son sma wani sabi kande fu tru Kresten?

⁴ Kande sma di no de Yehovah Kotoigi e aksi: ’Fa lobi e yepi wi fu si suma na trutru bakaman fu Yesus? Fa Yesus sori lobi gi den apostel fu en? Èn fa wi kan sori lobi neleki Yesus na ini a ten disi?’ A bun efu Kotoigi prakseri den piki tapu den aksi dati, bika disi o yepi wi fu sori moro lobi, spesrutu te wi e kisi fu du nanga den fowtu fu makandra.​—Ef. 5:2.

5. Fruteri san den wortu fu Yesus na ini Yohanes 15:12, 13 wani taki.

⁵ Yesus ben fruteri krin taki den bakaman fu en ben o sori wan spesrutu sortu lobi. (Leisi Yohanes 15:12, 13.) Luku san Yesus ben taigi den fu du: „Lobi makandra neleki fa mi lobi unu.” San dati wani taki? Yesus ben fruteri moro fara taki disi na wan lobi pe wan sma lobi tra sma moro leki ensrefi. Na wan lobi di e meki taki wan Kresten de klariklari fu dede gi en Kresten brada noso sisa te dati de fanowdu. b

6. Fa Gado Wortu e leri wi taki lobi de prenspari srefisrefi?

⁶ Gado Wortu e leri wi taki lobi de prenspari srefisrefi. Furu sma lobi den Bijbeltekst disi: „Gado na lobi” (1 Yoh. 4:8). „Yu musu lobi tra sma leki fa yu lobi yusrefi” (Mat. 22:39). „Lobi e tapu bun furu sondu” (1 Petr. 4:8). „Lobi no e kaba noiti” (1 Kor. 13:8). Den vers disi nanga tra vers e sori krin taki a  de tumusi prenspari fu sori a moi fasi disi.

7. Fu san ede Satan noiti no kan meki sma kon na wán fu sori tru lobi?

⁷ Furu sma e aksi: ’Fa wi kan sabi sortu bribi na a tru bribi? Ala kerki e taki dati den abi a tru bribi, ma ibriwan fu den e leri wan tra sani fu Gado.’ Satan seti someni falsi kerki nanga bribi taki sma e feni en muilek fu sabi sortuwan tru. Ma Satan noiti no kan meki sma fu heri grontapu kon na wán fu sori tru lobi gi makandra. Yehovah wawan kan du dati. Wi sabi dati fu di tru lobi e kon fu Yehovah. Soso den sma di e kisi santa yeye nanga blesi fu en man sori trutru lobi gi makandra (1 Yoh. 4:7). A musu fruwondru wi dan taki Yesus ben taki dati soso den bakaman fu en ben o sori trutru lobi?

8-9. Fa a lobi na mindri Yehovah Kotoigi ben abi krakti tapu furu sma?

⁸ Soleki fa Yesus ben taki na fesi, furu sma kon si suma na den tru bakaman fu en fu di den si a tru lobi di den e sori gi makandra. Fu eksempre, wan brada di nen Ian e memre a fosi kongres pe a ben go. A ben hori na ini wan sport-stadion krosibei fu en oso. Wan tu mun na fesi, Ian ben go drape fu luku wan prei. A e taki: „A kongres ben de heri tra fasi leki dati. Den Kotoigi ben abi switifasi èn den ben weri krosi di fiti. Den pikin fu den ben abi bun maniri.” A e taki moro fara: „Ma san ben naki mi ati moro, na taki mi ben kan si na den sma disi taki den ben de koloku èn taki den ben de nanga prisiri, wan sani di mi ben angri fu abi. Mi no man memre nowan fu den lezing di ben hori, ma a fasi fa den Kotoigi ben tyari densrefi mi no o frigiti noiti moro.” c Wi man tyari wisrefi na a fasi disi fu di wi lobi makandra trutru. Fu di wi lobi den brada nanga sisa fu wi, meki wi e sori switifasi gi den èn wi e lespeki den.

⁹ Wan brada di nen John ben ondrofeni wan srefi sani di a bigin go na den gemeente konmakandra. „A naki mi ati di mi si fa ala sma drape ben e sori switifasi. . . . Gi mi, den sma dati ben gersi santa sma. A trutru lobi di den sori, meki mi kon si taki mi ben feni a tru bribi.” d Den sortu ondrofenitori disi e sori krin taki a pipel fu Yehovah na tru Kresten.

10. O ten spesrutu wi abi na okasi fu sori taki wi lobi den brada nanga sisa fu wi? (Luku a futuwortu tu.)

¹⁰ Soleki fa wi ben taki na a bigin, nowan fu wi Kresten brada noso sisa de sondro fowtu. Son leisi den sa taki wan sani noso du wan sani di e meki wi mandi e (Yak. 3:2). Spesrutu na den momenti dati wi abi na okasi fu sori nanga den sani di wi e taki èn di wi e du, taki wi lobi den. San wi kan leri fu na eksempre fu Yesus?​—Yoh. 13:15.

11. Sortu takru fasi Yakobus nanga Yohanes ben sori? (Luku a fowtow.)

¹¹ Yesus no ben fruwakti fu den bakaman fu en taki den ben musu du sani sondro fowtu. Na presi fu dati, a ben  yepi den fu kenki den swakifasi fu den so taki Yehovah ben kan feni den bun. Wan leisi tu fu den apostel, Yakobus nanga Yohanes, ben seni a mama fu den go aksi Yesus fu gi den wan prenspari presi na ini a Kownukondre (Mat. 20:20, 21). Nanga disi Yakobus nanga Yohanes sori taki den ben abi heimemre èn taki den ben wani de prenspari moro trawan.​—Odo 16:18.

12. Yakobus nanga Yohanes wawan ben sori takru fasi? Fruklari dati.

¹² A no Yakobus nanga Yohanes wawan ben sori takru fasi na a momenti dati. Luku fa den tra apostel ben firi: „Di den tin trawan yere disi, den mandi srefisrefi nanga den tu brada” (Mat. 20:24). A kan taki Yakobus, Yohanes nanga den tra apostel ben abi wan bigi kesekese nanga makandra. Kande den trawan ben taki wan sani leki: ’Suma na unu fu aksi gi wan moro hei presi na ini a Kownukondre? Un denki un bun moro wi? A no unu wawan wroko tranga nanga Yesus. Wi e frudini wan prenspari presi tu neleki unu!’ Awinsi san pasa, den apostel frigiti na a momenti dati taki den ben musu sori lobi nanga switifasi ala ten gi makandra.

13. San Yesus du di a si den swakifasi fu den apostel fu en? (Mateyus 20:25-28)

¹³ San Yesus du na ini a situwâsi dati?  A no ben mandi na den tapu. A no ben taki dati a o go suku moro bun apostel di e sori moro sakafasi èn di e sori lobi gi makandra ala ten. Na presi fu dati, Yesus ben abi pasensi nanga den èn a ben taki nanga den, fu di a ben sabi taki den ben wani du san bun. (Leisi Mateyus 20:25-28.) A tan gi den leri na wan lobi-ati fasi aladi den ben haritaki nanga makandra baka fu suma moro bigi.​—Mark. 9:34; Luk. 22:24.

14. Na ini sortu kulturu den apostel fu Yesus gro kon?

¹⁴ Yesus ben hori na prakseri taki a kulturu pe den apostel gro kon ben abi krakti na den tapu (Yoh. 2:24, 25). Den gro kon na ini wan libimakandra pe den kerki fesiman ben feni taki wan sma prenspari soso te a abi biginen noso wan hei posisi (Mat. 23:6). Den Dyu kerki fesiman ben feni tu taki den ben bun moro trawan f (Luk. 18:9-12). Yesus ben frustan taki a denki disi ben kan abi krakti tapu a fasi fa den apostel ben denki fu densrefi èn fu trawan (Odo 19:11). A no ben fruwakti fu den disipel fu en taki den no ben o meki fowtu noiti èn a no ben mandi na den tapu te den ben meki fowtu. A ben sabi taki den ben abi wan bun ati. Dati meki a sori pasensi èn a leri den fu sori sakafasi nanga lobi na presi fu denki taki den prenspari noso hei moro trawan.

15. San wi kan leri fu a sani di pasa na mindri Yakobus, Yohanes nanga den tra disipel?

¹⁵ Wi kan leri furu fu san pasa nanga Yakobus èn Yohanes. A no bun taki den aksi Yesus fu gi den prenspari presi na ini a Kownukondre. Ma den tra apostel ben fowtu tu, fu di den meki a situwâsi tyari pratifasi kon. Ma Yesus ben sori switifasi nanga lobi gi ala den 12 apostel. San wi kan leri fu disi? San prenspari na taki wi no musu luku nomo san trawan e du, ma sosrefi san wi e du te den e meki fowtu. San kan yepi wi? Te wi mandi tapu wan Kresten brada noso sisa fu wi, wi kan aksi wisrefi: ’Fu san ede a sani e trobi mi so? A meki wan swakifasi fu mi kon na krin di mi musu kenki? A sma di hati mi abi problema na ini en libi kande? Mi kan sori lobi èn gi a sma pardon awinsi mi feni taki mi abi leti fu mandi?’ O moro wi e sori lobi gi makandra, o moro wi e sori taki wi na tru bakaman fu Yesus.

16. San moro wi kan leri fu na eksempre fu Yesus?

¹⁶ Na eksempre fu Yesus e leri wi tu taki wi musu pruberi fu frustan wi brada nanga sisa (Odo 20:5). A tru taki Yesus ben man si na ini na ati fu sma. Wi no man du dati. Ma wi kan abi pasensi nanga den brada nanga sisa fu wi te den meki fowtu (Ef. 4:1, 2; 1 Petr. 3:8). A moro makelek fu du dati efu wi e leri sabi den. Luku wan eksempre.

17. Sortu bun sani wan kring-owruman ondrofeni fu di a kon sabi wan brada moro bun?

¹⁷ Wan kring-owruman di e dini na Owstu-Afrika e memre wan brada na ini wan fu den gemeente. A ben feni taki a  brada disi no ben abi switifasi. San a kring-owruman du? A e taki: „Na presi fu wai pasi gi a brada, mi teki a bosroiti fu kon sabi en moro bun.” Di a kring-owruman du dati, dan a kon sabi wan tu sani fu a brada en libi di ben abi krakti tapu a fasi fa a ben tyari ensrefi. A kring-owruman e fruteri moro fara: „Di mi kon frustan o muilek a ben de gi a brada disi fu tyari kenki kon èn omeni kenki a tyari kon kaba, dan mi kisi warderi gi en. Wi kon tron bun mati.” Iya, te wi e pruberi fu frustan den brada nanga sisa fu wi, dan nofo tron wi e feni en moro makelek fu sori lobi gi den.

18. San wi kan aksi wisrefi efu wan brada noso sisa hati wi? (Odo 26:20)

¹⁸ Kande wi feni son leisi taki a de fanowdu fu go taki nanga wan brada noso sisa di hati wi. Ma a bun fu aksi wisrefi den sani disi fosi: ’Mi e frustan krinkrin san pasa?’ (Odo 18:13) ’A kan taki a no fu espresi a brada noso sisa hati mi?’ (Preik. 7:20) ’Oiti misrefi meki so wan fowtu?’ (Preik. 7:21, 22) ’A problema o kon moro bigi efu mi e go taki nanga a sma?’ (Leisi Odo 26:20.) Efu wi e teki a ten fu prakseri den aksi disi, dan kande wi o si taki lobi gi wi brada noso sisa o yepi wi fu tapu a tori.

19. San na yu fasti bosroiti?

¹⁹ Yehovah Kotoigi e sori taki den na tru disipel fu Yesus fu di den e sori lobi gi makandra. Ibriwan fu wi e sori taki wi na tru bakaman fu Yesus efu wi e sori lobi gi wi brada nanga sisa awinsi den e meki fowtu. Te wi e sori lobi na a fasi disi, dan wi kan yepi trawan fu si suma abi a tru bribi so taki den kan kon dini Yehovah a Gado fu lobi makandra nanga wi. Meki wi abi a fasti bosroiti fu tan sori a tru Kresten lobi.