1-2. (a) Fu san ede nyun trowpaar musu frutrow na tapu Yehovah? (Psalm 37:3, 4) (b) San wi o luku na ini na artikel disi?

YU E sreka sani fu trow, noso yu trow no so langa pasa? Efu dati de so, dan a no de fu taki dati yu wani abi wan koloku libi nanga a sma di yu lobi so furu. Ma a no ala ten sani e go so makelek na ini a trowlibi, èn wan trowpaar musu teki prenspari bosroiti tu. Efu un sabi fa fu lusu problema èn efu unu e teki koni bosroiti, dan unu o de koloku un heri libi langa. Efu unu e frutrow tapu Yehovah, dan unu o man teki koni bosroiti, unu o de moro bun trowpatna, èn unu o de moro koloku. Ma efu unu no e hori na prakseri fa Gado e si sani, dan un kan kisi problema di o meki a trowlibi moro muilek, èn dati kan meki taki un no o de koloku.​—Leisi Psalm 37:3, 4.

² Aladi na artikel disi skrifi spesrutu gi nyun trowpaar, toku den sani di wi o leri kan yepi ala sma di trow fu lusu den problema di kan opo kon. Na artikel o sori wi san wi kan leri fu getrow man nanga uma di kari na ini Bijbel. Den Bijbel eksempre disi o leri wi moi sani di wi kan gebroiki na ini wi libi èn sosrefi te wi trow. Wi o si tu san wi kan leri fu trowpaar na ini a ten disi.

3-4. Sortu tesi nyun trowpaar kan kisi?

³ Kande son sma e gi nyun trowpaar deki-ati fu libi leki fa ala tra sma e libi. Fu eksempre, a kan taki papa nanga mama èn sosrefi tra famiri e poti druk na tapu wan trowpaar  fu meki pikin wantewante. Kande mati noso famiri di wani taki sani waka bun nanga a trowpaar, e poti druk na den tapu fu bai wan oso èn fu abi furu moi sani na ini na oso.

⁴ Efu wan trowpaar no luku bun, dan den kan teki bosroiti di kan poti den na ini bigi paiman. Efu den du dati, dan a masra nanga a wefi o abi fu wroko moro furu soso fu pai den paiman dati. A grontapuwroko fu den kan meki taki den no abi ten moro fu studeri Bijbel nanga densrefi, fu hori na Osofamiri Anbegi, èn fu du a diniwroko. A kan taki den no e go na ala konmakandra soso fu wroko moro furu so taki den kan abi moro moni, noso fu no lasi den wroko. A bakapisi na taki den no o man du son sani na ini a diniwroko fu Yehovah di ben kan gi den prisiri.

5. San yu e leri fu na eksempre fu Klaus nanga Marisa?

⁵ Furu eksempre e sori taki te wi e gebroiki furu fu wi ten fu kon gudu, dan dati o meki taki wi no o de koloku. Luku san wan trowpaar di nen Klaus nanga Marisa leri fu a tori disi. * Di den ben trow, den ala tu ben e wroko heri wiki, èn disi ben meki taki den ben abi furu moni èn ben kan bai san den wani. Ma toku den no ben de koloku trutru. Klaus e taki: „Wi ben abi moro sani leki san wi ben abi fanowdu, ma wi no ben poti nowan marki fu du moro gi Yehovah. Fu taki en leti, a libi fu wi ben bruya èn wi ben abi furu stress.” Kande yu srefi kon frustan taki te yu e poti tumusi furu prakseri na gudu, dan yu no o de koloku. Efu dati de so, dan yu no abi fu lasi-ati. Te yu e luku den bun eksempre fu sma, dan dati kan yepi yu fu tyari kenki kon. Meki wi luku fosi san masra kan leri fu na eksempre fu Kownu Yosafat.

6. Fa Kownu Yosafat du san skrifi na Odo 3:5, 6 di wan bigi legre kon feti nanga en?

⁶ Masra, un feni son leisi taki un no man tyari ala den frantwortu fu unu? Efu dati de so, dan yu kan leri wan sani fu Kownu Yosafat. Fu di Yosafat ben de kownu, meki a ben abi a frantwortu fu sorgu taki sani go bun nanga a heri pipel! Fa a ben tyari a prenspari frantwortu dati? Yosafat ben du san a man fu kibri a pipel. A meki den foto fu Yuda kon moro tranga èn a seti wan bigi legre fu moro leki 1.160.000 srudati (2 Kron. 17:12-19). Bakaten Yosafat ben kon de na ini wan bigi problema. Wan bigi legre fu den Amonsma, den Moabsma, nanga den man fu a bergikontren fu Seyir ben wani feti nanga en, en famiri, èn nanga en pipel (2 Kron. 20:1, 2). San Yosafat du? A aksi Yehovah fu yepi en èn fu gi en krakti. Yosafat du san skrifi na  Odo 3:5, 6. (Leisi en.) Te wi e leisi a begi fu en na ini 2 Kroniki 20:5-12, dan wi kan si taki Yosafat ben abi sakafasi èn taki a ben frutrow tapu en lobi-ati hemel Papa. Fa Yehovah piki a begi fu Yosafat?

7. Fa Yehovah piki a begi fu Yosafat?

⁷ Yehovah gebroiki wan Leifisma di nen Yahasiyel fu taigi Yosafat san a ben musu du. Yehovah taigi en: „Na go un musu go drape nomo. Tanapu kánkan èn luku fa Yehovah o frulusu unu” (2 Kron. 20:13-17). A de krin taki nowan sma ben fruwakti taki a ben o kisi sowan rai. A no wan libisma ben taigi en fu du a sani disi, ma na Yehovah srefi. Yosafat ben frutrow a Gado fu en nanga en heri ati èn a du san Yehovah taigi en. Di den go na a feti, Yosafat no poti den moro bun srudati na fesisei, ma na den singiman di no ben abi fetisani ben e waka na fesisei. Yehovah du san a pramisi Yosafat. A wini a legre fu den feanti.​—2 Kron. 20:18-23.

8. San masra kan leri fu na eksempre fu Yosafat?

⁸ Masra, un kan leri wan sani fu na eksempre fu Yosafat. Yu abi a frantwortu fu sorgu yu osofamiri, dati meki yu e wroko tranga fu kibri yu osofamiri so taki sani kan go bun. Te problema e opo kon, dan a kan taki yu e firi leki yu man lusu den problema yusrefi. Ma no du dati, no frutrow tapu yu eigi krakti. Na presi fu dati, begi Yehovah te yu de yu wawan èn aksi en fu yepi yu. Èn begi Yehovah fayafaya makandra nanga yu frow. Suku rai na Yehovah te yu e studeri Bijbel èn den sani di na organisâsi meki fu yepi wi, èn wroko nanga den rai dati. Te yu o meki Bijbel yepi yu fu teki bosroiti, dan kande trawan no o lobi dati èn den o taki srefi taki yu don. Kande sowan e taki dati yu o man kibri yu osofamiri soso te yu abi furu moni èn furu gudu. Ma yu no musu frigiti na eksempre fu Yosafat. Den bosroiti fu en ben sori taki a ben frutrow tapu Yehovah. Yehovah no gowe libi Yosafat fu di Yosafat tai hori na en, èn a no o gowe libi yu tu (Ps. 37:28; Heb. 13:5). Sortu tra sani trowpaar kan du so taki den kan abi wan koloku trowlibi?

9. San wi sabi fu a profeiti Yesaya nanga en frow?

⁹ Gi a profeiti Yesaya nanga en frow na anbegi fu Yehovah ben de a moro prenspari sani na ini den libi. Yesaya ben de wan profeiti èn a kan taki en frow ben du wan srefi sortu wroko, fu di Bijbel e kari en na „umaprofeiti” (Yes. 8:1-4). Disi e sori taki gi Yesaya nanga en frow na anbegi fu Yehovah ben de a moro prenspari sani na ini den libi. Den de wan moi eksempre gi trowpaar na ini a ten disi.

10. Te trowpaar e studeri Bijbel profeititori, dan fa dati kan yepi den fu du ala san den man na ini a diniwroko?

¹⁰ Trowpaar na ini a ten disi kan poti Yehovah na a fosi presi na ini den libi te den e du ala san den man na ini a diniwroko. Den kan tranga den bribi na ini Yehovah te den e studeri Bijbel profeititori makandra èn te den e si fa den e kon tru ala ten * (Tit. 1:2). Den kan luku san den srefi kan du fu yepi meki son Bijbel profeititori kon tru. Wan fu den profeititori  disi na a di fu Yesus, di a ben taki na fesi dati a bun nyunsu ben o preiki na heri grontapu fosi a kaba kon (Mat. 24:14). Efu wan trowpaar de seiker taki Bijbel profeititori o kon tru, den o wani du ala san den man gi Yehovah.

11. Fa Preskela nanga Akwila ben sori taki den ben poti Kownukondre afersi na a fosi presi na ini den libi?

¹¹ Yongu trowpaar kan leri fu Preskela nanga Akwila, wan Dyu trowpaar di ben e libi na ini Rome. A trowpaar disi tron Kresten baka di den yere a bun nyunsu fu Yesus. A no de fu taki dati den ben abi wan bun libi. Ma wantronso den heri libi kenki di grankownu Klawdiyus gi a komando taki ala Dyu ben musu komoto na ini Rome. Prakseri fa a sani disi kenki a libi fu Akwila nanga Preskela. Den ben abi fu gowe libi a birti di den ben sabi, den ben musu suku wan tra oso èn den ben musu bigin a bisnis fu den na wan nyun presi. Den meki a heri situwâsi dati tapu den fu du ala san den man gi Yehovah? Kande yu sabi a piki kaba. Di Akwila nanga Preskela froisi go na Korente den bigin wroko makandra nanga a gemeente, èn makandra nanga na apostel Paulus den tranga den brada nanga sisa drape. Bakaten, den froisi go na tra foto pe moro preikiman ben de fanowdu (Tori 18:18-21; Rom. 16:3-5). Akwila nanga Preskela ben abi wan koloku trowlibi fu di den ben abi furu fu du.

12. Fu san ede trowpaar musu poti marki di den wani doro na ini a diniwroko?

¹² Trowpaar na ini a ten disi, kan teki na eksempre fu Preskela nanga Akwila èn poti Kownukondre afersi na a fosi presi na ini den libi. A moro bun te den e taki fu den sani disi fosi den trow. Te wan trowpaar e poti marki di den wani doro na ini a diniwroko èn te den e meki muiti fu doro den marki disi, dan den o si Yehovah en anu na ini den libi (Preik. 4:9, 12). Luku na eksempre fu Russell nanga Elizabeth. Russell e taki: „Fosi wi  trow, wi taki finifini fu den sani di wi wani du gi Yehovah.” Elizabeth e taki: „Wi du dati so taki den bosroiti di wi ben o abi fu teki bakaten, no ben o tapu wi fu doro den marki disi.” Russell nanga Elizabeth ben man froisi go na Mikronesia fu yepi pe moro preikiman ben de fanowdu.

13. Soleki fa Psalm 28:7 e sori, dan san o de a bakapisi te wi e frutrow tapu Yehovah?

¹³ Neleki Russell nanga Elizabeth, furu trowpaar bosroiti fu no abi tumusi furu tra frantwortu na ini den libi so taki den kan du ala san den man fu preiki èn fu gi sma leri. Te wan trowpaar abi leki marki fu du ala san den man gi Yehovah èn te den e wroko makandra fu doro a marki disi, dan den o kisi furu wini fu dati. Den o si fa Yehovah e sorgu gi den, den o frutrow moro na en tapu, èn den o de koloku trutru.​—Leisi Psalm 28:7.

14. Fa na apostel Petrus nanga en frow ben sori taki den ben bribi a pramisi di skrifi na ini Mateyus 6:25, 31-34?

¹⁴ Trowpaar kan leri wan sani tu fu na eksempre fu na apostel Petrus nanga en frow. Sowan siksi mun teleki wan yari baka di na apostel Petrus miti Yesus fu a fosi leisi, a ben musu teki wan prenspari bosroiti. Petrus ben e du fisiwroko fu sorgu ensrefi. Dati meki di Yesus ben aksi Petrus fu tron wan bakaman fu en, dan Petrus ben musu prakseri sortu bakapisi dati ben o abi gi en osofamiri (Luk. 5:1-11). Petrus bosroiti fu go preiki makandra nanga Yesus. Dati ben de wan bun bosroiti! Èn wi kan de seiker taki a frow fu Petrus ben horibaka gi a bosroiti fu en. Bijbel e sori taki baka di Yesus kisi wan opobaka, kande Petrus ben tyari en frow son leisi te a ben du a diniwroko (1 Kor. 9:5). A musu fu de so taki fu di Petrus frow ben de wan bun eksempre, meki a no ben de wan muilek sani gi Petrus fu gi Kresten masra nanga wefi den rai di a skrifi na ini Bijbel (1 Petr. 3:1-7). Wi kan de seiker taki Petrus nanga en frow ben e bribi taki Yehovah ben o sorgu den efu den ben o poti a Kownukondre na a fosi presi na ini den libi.​—Leisi Mateyus 6:25, 31-34.

15. San yu leri fu na ondrofenitori fu Tiago nanga Esther?

¹⁵ Efu yu trow wan pisi ten kaba, dan san yu kan du fu tan abi na angri fu du moro gi Yehovah? Wan sani di yu kan du na fu leri fu tra trowpaar. Fu eksempre, yu kan leisi den artikel di nen „Den ben de klariklari fu go.” Den sortu artikel disi ben yepi Tiago nanga Esther, wan trowpaar na ini Brasyonkondre, fu kon kisi na angri fu go yepi pe moro preikiman ben de fanowdu. Tiago e fruteri: „Fu di wi ben leisi den ondrofenitori di e sori fa Yehovah yepi den futuboi fu en na ini a ten disi, dan wisrefi ben wani ondrofeni fa Yehovah ben o yepi wi èn sorgu wi.” Bakaten a trowpaar disi froisi go na Paragwai, èn sensi a yari 2014 den e preiki gi sma drape di e taki Potogisitongo. Esther e taki: „Wan tekst di wi ala tu lobi srefisrefi na Efeisesma 3:20. Furu leisi wi si fa den wortu disi kon tru na ini a diniwroko fu wi.” Na ini a brifi di Paulus skrifi gi den Efeisesma, a pramisi taki Yehovah ben o gi wi moro leki san wi aksi en. Yehovah du trutru san a pramisi!

16. Pe yongu trowpaar kan go suku rai di kan yepi den fu doro den marki di den abi?

 ¹⁶ Yongu trowpaar kan leri wan sani fu trawan di leri fu frutrow tapu Yehovah. Son trowpaar e du a furuten diniwroko bun langa kaba. Kande yu kan aksi den san yu kan du fu man doro den marki fu yu. Te yu e du dati, dan yu e sori taki yu e frutrow tapu Yehovah (Odo 22:17, 19). Den owruman kan yepi yongu trowpaar tu fu poti marki na ini a diniwroko èn fu doro den marki dati.

17. San pasa nanga Klaus nanga Marisa, èn san wi kan leri fu na ondrofenitori fu den?

¹⁷ Ma son leisi a kan pasa taki wi no man doro den marki di wi ben wani doro. Dati na san ben pasa nanga Klaus nanga Marisa di wi ben kari na a bigin. Baka di den trow dri yari, den froisi gowe fu pe den ben e tan èn den gi den nen fu du bow-wroko na a bijkantoro fu Fensikondre. Ma den yere taki den no ben o man tan drape moro langa leki siksi mun. Na a bigin den ben lasi-ati. Ma a no langa baka dati, den kisi a kari fu leri taki Arabiatongo. Èn now den e prisiri srefisrefi taki den kan dini na ini wan tra kondre pe sma e taki Arabiatongo. Te Marisa e prakseri baka fa sani ben de, dan a e fruteri: „Mi ben frede fu du wan sani di noiti mi ben du ete, èn mi ben musu frutrow krinkrin tapu Yehovah. Ma mi si taki ala ten Yehovah yepi wi na wan fasi di wi no ben fruwakti. Baka di mi ondrofeni a sani disi, dan mi leri fu frutrow moro tapu Yehovah.” Soleki fa na eksempre disi e sori, dan yu kan de seiker taki Yehovah sa blesi yu ala ten te yu e frutrow dorodoro na en tapu.

18. San trowpaar kan du so taki den kan tan frutrow tapu Yehovah?

¹⁸ A trowlibi na wan kado fu Yehovah (Mat. 19:5, 6). A wani taki trowpaar musu prisiri nanga a kado disi (Odo 5:18). Yongu trowpaar, a ben o bun fu luku san unu e du nanga un libi. Yu e du ala san yu man fu sori Yehovah taki yu e warderi a kado di a gi yu? Taki nanga Yehovah fu a tori disi te yu e begi. Suku sortu gronprakseri na ini en Wortu e fiti na ini yu situwâsi. Èn gebroiki den rai di Yehovah e gi yu. Un kan de seiker taki unu o abi wan koloku libi di e gi yu furu wini, efu unu poti ala un prakseri na a diniwroko fu Yehovah!