1-2. San ben o pasa na ini a ten disi soleki fa a profeiti Hagai ben taki?

„FOSI yu denki, den wenkri nanga den owru gebow bigin broko fadon.” „Bruya ben de na ala sei. . . . Wan lo sma taki dati a gronseki disi teki sowan tu miniti. Gi mi, a ben gersi leki a no ben o kaba noiti.” Disi na wan tu sani di sma taki fu a gronseki di ben de na Nepal na ini 2015. Efu yu ben de drape di a rampu disi pasa, yu no ben o frigiti en noiti.

² Ma nownowde wan tra sani e seki grontapu. A e seki ala den pipel èn a e pasa omeni tenti yari kaba. A profeiti Hagai ben taki fu a sani disi. A ben skrifi: „Disi na san Yehovah di e tiri den legre taki: ’Heri esi mi o seki hemel, grontapu, a se, nanga a gron ete wan leisi.’”​—Hag. 2:6.

3. Fu san ede wi kan taki dati Hagai no ben e taki fu wan trutru gronseki?

³ Hagai no ben e taki fu wan trutru gronseki di e tyari soso pori kon. Na presi fu dati a taki fu wan sani di ben o tyari bun bakapisi kon. Yehovah srefi e taigi wi: „Mi o seki ala den pipel èn ala den gudu fu ala den pipel o kon na ini a tempel disi. Mi o furu a heri tempel disi nanga glori” (Hag. 2:7). San a profeititori disi ben wani taki gi den sma di ben e libi na ini a ten fu Hagai? Èn san a wani taki gi wi na ini a ten disi? Wi o kisi piki tapu den aksi disi èn wi o luku tu fa wi kan yepi fu seki den pipel na ini a ten disi.

4. Fu san ede Yehovah ben seni a profeiti Hagai go na a pipel fu en?

⁴ Yehovah ben gi a profeiti Hagai wan prenspari wroko fu du. Ma kow luku san pasa fosi dati. Na ini  537 Fosi Krestes, wan grupu Dyu di ben komoto na ini katibo na Babilon drai go baka na Yerusalem. Soleki fa a sori, dan Hagai ben de wan fu den sma dati. A no langa baka di den doro Yerusalem, den anbegiman fu Yehovah seti a fondamenti fu Yehovah en oso noso tempel (Esra 3:8, 10). Ma syatu baka dati wan sari sani pasa. A pipel lasi-ati èn den tapu fu wroko na a tempel fu di sma ben e gens den (Esra 4:4; Hag. 1:1, 2). Dati meki na ini 520 Fosi Krestes, Yehovah seni Hagai go na den fu gi den deki-ati fu klari a tempel. *​—Esra 6:14, 15.

5. Fu san ede a boskopu fu Hagai ben musu fu de wan trowstu gi a pipel fu Gado?

⁵ A boskopu fu Hagai ben musu yepi den Dyu fu kon abi moro bribi na ini Yehovah. Nanga deki-ati a profeiti taigi den Dyu di ben lasi-ati: „’Ala un pipel fu a kondre musu abi deki-ati tu èn wroko go doro’, na so Yehovah taki. ’Bika mi de nanga unu’, na so Yehovah di e tiri den legre taki” (Hag. 2:4). A musu de taki den wortu „Yehovah di e tiri den legre” gi den deki-ati. Yehovah e tiri wan bun bigi legre fu engel. Dati meki den Dyu ben musu frutrow na en tapu efu den ben wani abi bun bakapisi.

6. San ben o pasa soleki fa a profeititori fu Hagai e sori?

⁶ Yehovah ben seni Hagai fu go taigi den Dyu taki a ben o seki ala den pipel. A boskopu disi ben gi den sma di ben e bow a tempel deki-ati, fu di a ben e sori taki Yehovah ben o seki Persia, a makti kondre di ben e tiri furu pipel na a ten dati. San ben o pasa leki bakapisi fu dati? A fosi sani, na taki a pipel fu Gado ben o kaba bow a tempel. Baka dati, srefi wan tu sma di no ben de Dyu ben o anbegi Yehovah makandra nanga den na ini a nyun tempel. A boskopu dati ben musu fu gi a pipel fu Gado deki-ati trutru!​—Sak. 8:9.

7. Sortu wroko wi e du na ini a ten disi? Fruklari dati.

⁷ San a profeititori fu Hagai wani taki gi wi na ini a ten disi? Ete wan leisi Yehovah o seki ala den pipel èn disi leisi wi e yepi fu du a wroko dati. Denki a tori disi: Na ini 1914, Yehovah poti Yesus Krestes leki Kownu fu en hemel Kownukondre (Ps. 2:6). Disi ben wani taki dati sani no ben o waka bun gi den tiriman fu grontapu, fu di ’a reti ten fu den trakondre sma ben pasa’ kaba. Sobun, a ten di nowan tiriman na grontapu ben e teki presi gi Yehovah ben kon na wan kaba (Luk. 21:24). Fu dati ede, spesrutu sensi 1919, a pipel fu Yehovah e sori sma taki Gado Kownukondre na a wan-enkri howpu gi libisma. A preikiwroko fu a ’bun nyunsu fu a Kownukondre’ seki heri grontapu.​—Mat. 24:14.

8. San furu kondre du di den yere a boskopu disi, soleki fa Psalm 2:1-3 e sori?

⁸ San furu sma du di den yere a boskopu disi? Furu fu den no ben wani yere en srefi. (Leisi Psalm 2:1-3.) Den kondre ati bron. Den e weigri fu saka densrefi na ondro a sma di Yehovah poti leki Tiriman. Den no e si a Kownukondre boskopu di wi e preiki leki „bun nyunsu”. Fu taki en leti, na ini son kondre den tapu a preikiwroko fu wi srefi! Aladi furu fu den  tiriman fu den kondre disi e taki dati den e dini Gado, toku den no wani saka densrefi na en ondro. Neleki den tiriman na ini a ten fu Yesus, den tiriman na ini a ten disi e du ogri nanga den bakaman fu Yesus. Na so den e gens a salfuwan fu Yehovah.​—Tori 4:25-28.

9. Fa Yehovah e pruberi fu yepi sma?

⁹ Soleki fa wi si, dan furu sma no wani arki a boskopu. Ma fa Yehovah e pruberi fu yepi den? Psalm 2:10-12 e taki: „Sobun, un kownu, waka nanga koni. Un krutuman fu grontapu, un teki leri. Dini Yehovah èn sori bigi lespeki gi en. Abi prisiri èn gi en furu grani. Bosi a manpikin, so taki Gado no kisi atibron èn taki a no wai unu puru na a reti pasi, bika en ati e bron esi. Koloku fu den sma di e suku kibri na en.” Yehovah abi switifasi èn a e gi den nofo ten fu teki a yoisti bosroiti. Den kan kenki prakseri ete èn den kan bosroiti fu saka densrefi na ondro Yehovah en Kownukondre. Ma furu ten no de moro. Wi e libi na ini „den lasti dei” fu a grontapu disi (2 Tim. 3:1; Yes. 61:2). Now a prenspari srefisrefi taki sma kon sabi a waarheid èn taki den bosroiti fu dini Yehovah.

10. San son sma ben o du te Yehovah ben o seki den pipel, soleki fa Hagai 2:7-9 e sori?

¹⁰ A profeititori fu Hagai e sori taki son sma ben o arki a boskopu. Hagai taki dati te Yehovah ben o seki den pipel, dan ’den gudu [noso den reti-ati sma] fu ala den pipel ben o kon’ fu anbegi Yehovah. * (Leisi Hagai 2:7-9.) Yesaya nanga Mika ben taki tu dati so wan sani ben o pasa „na ini den lasti dei”.​—Yes. 2:2-4; Mik. 4:1, 2.

11. San wan brada du di a yere a Kownukondre boskopu a fosi leisi?

¹¹ Luku san wan brada di nen Ken èn di e dini now na a edekantoro fu wi du di a  yere a Kownukondre boskopu di e seki grontapu. A e memre krin ete fa a ben e firi di a yere a boskopu disi sowan 40 yari pasa. Ken taki: „A fosi leisi di mi yere a waarheid fu Gado Wortu, mi ben breiti fu kon sabi taki wi e libi now na ini den lasti dei fu a grontapu disi. Mi si taki efu mi ben wani taki Gado feni mi bun èn efu mi ben wani kisi têgo libi, dan mi ben musu sorgu taki mi no de wan pisi fu a grontapu disi di o lasi gowe èn mi ben musu teki a sei fu Yehovah. Mi begi Gado fu yepi mi èn wantewante mi kenki mi libi. Mi drai baka gi a grontapu disi èn mi go suku kibri na Gado Kownukondre di o tan fu ala ten.”

12. Fa a tempel fu Yehovah kon furu nanga gudu na ini den lasti dei disi?

¹² A de krin taki Yehovah e blesi en pipel. Na ini den lasti dei disi wi si taki bun furu sma bigin anbegi Yehovah. Na ini 1914 wan tu dusun nomo fu wi ben de. Ma now moro leki aiti milyun sma e dini Gado fayafaya èn ibri yari milyunmilyun sma e hori a Memrefesa makandra nanga den. Na so a fesidyari fu Yehovah en tempel kon furu nanga „den gudu fu ala den pipel”. A tempel disi na ala den sani di Yehovah seti, so taki sma kan anbegi en na a yoisti fasi. Den kenki di den sma disi tyari kon na ini den libi, meki taki a nen fu Yehovah kisi glori tu.​—Ef. 4:22-24.

13. Sortu tra profeititori kon tru fu di moro nanga moro sma e anbegi Yehovah? (Luku a fowtow na tapu a kafti.)

¹³ Den moi sani disi di e pasa meki tu taki tra profeititori kon tru, soleki a wan na ini Yesaya kapitel 60. Vers 22 fu a kapitel dati e taki: „A pikin grupu o tron wan grupu fu dusun èn a pikin pipel o tron wan makti pipel. Mi, Yehovah, o meki disi pasa esi-esi te a ten doro.” Fu di so furu sma bigin anbegi Yehovah, meki wan tumusi moi sani e pasa. Den sma disi e kon nanga difrenti sortu koni èn den de klariklari fu yepi nanga a preikiwroko fu ’a bun nyunsu fu a Kownukondre’. Leki bakapisi fu dati, a pipel fu Yehovah kan gebroiki den koni dati di  Yesaya ben kari „a merki fu den pipel” (Yes. 60:5, 16). Den man nanga uma disi e du a preikiwroko na ini 240 kondre èn den e yepi meki buku nanga tra sani na ini moro leki 1000 tongo.

14. Sortu bosroiti sma musu teki now?

¹⁴ Na ini den lasti dei disi Yehovah e seki den pipel fu dwengi den fu teki wan bosroiti. Den o horibaka gi Gado Kownukondre, noso den o poti den frutrow na ini den tiriman fu a grontapu disi? Disi na a bosroiti di den alamala musu teki. A pipel fu Yehovah e gi yesi na den wet fu a kondre pe den e tan, ma den no e teki sei na ini den politiek afersi fu a grontapu disi (Rom. 13:1-7). Den sabi taki a Kownukondre na a wan-enkri lusu gi den problema fu libisma. A Kownukondre dati no de wan pisi fu a grontapu disi.​—Yoh.18:36, 37.

15. Sortu bigi tesi a pipel fu Gado o kisi soleki fa a buku Openbaring e sori?

¹⁵ A buku Openbaring e sori taki na ini den lasti dei a pipel fu Gado o kisi tesi èn den o abi fu sori taki den e tai hori na Gado. Den o kisi hebi gens nanga frufolgu. Den tiriman fu a grontapu disi o wani dwengi wi fu „anbegi” den èn den o frufolgu den sma di e weigri fu horibaka gi den (Openb. 13:12, 15). Den o ’dwengi ala sma, mofinawan nanga heihei sma, guduman nanga pôti sma, friman nanga srafu, fu meki sma poti wan marki na tapu den reti-anu, noso na tapu den fesi-ede’ (Openb. 13:16). Na ini owruten sma ben e bron wan marki na tapu a skin fu srafu fu sori taki den srafu na fu den. Na agersi fasi, sma na ini a ten disi o fruwakti tu taki ibri sma abi wan marki na tapu den anu noso tapu den fesi-ede fu sori gi suma den e horibaka. A fasi fa den e denki èn den sani di den e du o sori taki den e horibaka gi den tiriman fu a grontapu disi.

16. Fu san ede a prenspari now fu sori krin taki wi e horibaka gi Yehovah nanga wi heri ati?

¹⁶ Wi o teki a marki disi èn wi o horibaka gi den tiriman fu a grontapu disi? Den sma di e weigri fu teki a marki disi o kisi problema èn ogri o miti den. A buku Openbaring e taki moro fara: „Nowan sma kan bai noso seri sani, boiti den sma di abi a marki” (Openb. 13:17). Ma a pipel fu Gado sabi san Gado o du nanga den sma di abi a marki di Openbaring 14:9, 10 e taki fu en. A pipel fu Gado no o teki a marki dati. Na presi fu dati den o skrifi na tapu den anu: „Mi na fu Yehovah” (Yes. 44:5). Now na a ten fu sori krin taki wi e horibaka gi Yehovah nanga wi heri ati. Efu wi e du dati, dan Yehovah o breiti fu taki dati wi na fu en!

17. Yehovah e sori taki a abi pasensi, ma san wi no musu frigiti?

¹⁷ Na ini den lasti dei disi Yehovah sori taki a abi bun furu pasensi. A no wani taki nowan sma kisi pori (2 Petr. 3:9). A gi ala sma na okasi fu sori berow èn fu teki a yoisti bosroiti. Ma a pasensi fu en o kaba wan dei. Den sma di e weigri fu horibaka gi Gado Kownukondre o ondrofeni a srefi sani di pasa nanga a kownu fu Egepte na ini a ten fu Moses. Yehovah ben taigi a kownu dati: „Nownow kaba mi kan langa mi anu fu naki yu nanga yu pipel nanga wan takru siki èn fu figi unu alamala puru na grontapu. Ma  fu taki en leti, mi meki yu tan na libi fu sori yu mi krakti èn fu meki sma na heri grontapu sabi mi nen” (Eks. 9:15, 16). Te fu kaba ala pipel o abi fu frustan taki Yehovah na a wan-enkri tru Gado (Esek. 38:23). Fa disi o pasa?

18. (a) San Yehovah o seki tu soleki fa Hagai 2:6, 20-22 e sori? (b) Fa wi du sabi taki den wortu fu Hagai o kon tru na ini a ten di e kon?

¹⁸ Leisi Hagai 2:6, 20-22. Hondrohondro yari baka a ten fu Hagai, Yehovah meki na apostel Paulus skrifi taki den wortu na ini den tekst disi ben o kon tru na ini a ten di e kon. Paulus ben skrifi: „Now a pramisi: ’Mi o seki grontapu ete wan leisi. Ma a no grontapu wawan. Mi o seki hemel tu.’ We, den wortu ’ete wan leisi’, e sori taki Gado o puru den sani di man seki (sobun, sani di Gado no ben meki), so taki den sani di no man seki, kan tan” (Hebr. 12:26, 27). A seki disi no de leki a wan di skrifi na Hagai 2:7. Disi leisi te Yehovah o seki hemel nanga grontapu, dan den sma di e weigri fu si en leki a Moro Hei Tiriman o kisi têgo pori neleki a kownu fu Egepte.

19. San no o seki èn fa wi du sabi dati?

¹⁹ San no o seki noso kisi pori? Paulus ben taki moro fara: „Now di wi sabi taki wi o kisi wan kownukondre di no man seki, dan meki wi sorgu taki Gado tan sori wi bun-ati. Na dati o meki taki wi man du santa wroko gi Gado na wan fasi di a feni bun, fu di wi e frede en èn e lespeki en” (Hebr. 12:28). Iya, te Yehovah seki ala sani fu a lasti leisi, dan soso Gado Kownukondre o tan abra. A o tan tanapu kánkan fu ala ten!​—Ps. 110:5, 6; Dan. 2:44.

20. Sortu bosroiti sma musu teki èn fa wi kan yepi den?

²⁰ Ten no de fu lasi! Sma musu teki wan bosroiti. Efu den tan libi soleki fa a grontapu disi wani, dan den o lasi den libi. Ma efu den du muiti fu kenki den libi soleki fa Gado wani, dan den o kisi têgo libi (Hebr. 12:25). Te wi e preiki, dan wi kan yepi sma fu teki a prenspari bosroiti disi. Meki wi yepi moro sma fu horibaka gi Gado Kownukondre. Meki wi tan hori na prakseri san wi Masra Yesus taki: „A bun nyunsu disi fu a Kownukondre o preiki gi sma na heri grontapu, so taki sma fu ala kondre kan yere dati, èn dan a kaba o kon.”​—Mat. 24:14.