1-2. (a) Soleki fa Odo 16:31 e sori, dan fa wi musu si den owru brada nanga sisa fu wi? (b) Sortu aksi o kisi piki na ini na artikel disi?

NA INI Arkansas na Amerkankondre yu abi wan presi pe sma kan go koiri. Drape yu kan feni dyamanti na tapu a gron. Ma den dyamanti disi gersi gewoon ston fu di den no koti ete. Dati meki furu sma di e waka pasa drape no sabi taki den ston di den e si na trutru gudu.

² Neleki den dyamanti, den owru brada nanga sisa fu wi warti tu. Gado Wortu e agersi a weti wiwiri fu den nanga wan kroon. (Leisi Odo 16:31; 20:29) Ma efu wi no e luku bun, wi kan frigiti taki wi abi den gudu disi na wi mindri. Te yonguwan e frustan taki den man leri furu fu den owruwan, dan den o warderi den. Na ini na artikel disi wi o piki dri aksi: Fu san ede Yehovah e si den owru brada nanga sisa fu wi leki gudu? Fa Yehovah e gebroiki den owruwan disi? Fa wi kan leri fu na eksempre fu den?

3. Soleki fa Psalm 92:12-15 e sori, dan fu san ede Yehovah e si den owru brada nanga sisa fu wi leki warti sma?

³ Yehovah Gado e si den owru brada nanga sisa fu wi leki warti sma. A sabi suma den de trutru, a sabi sortu moi fasi den abi, èn a e breiti taki den abi den fasi dati. A lobi te den owruwan e sori den yonguwan san den leri na ini ala den yari di den e dini Yehovah (Yob 12:12;  Odo 1:1-4). Yehovah e warderi en tu taki den e tan horidoro (Mal. 3:16). A libi fu den no ben de sondro problema. Toku den tan sori tranga bribi na ini Yehovah. A howpu di den abi gi a ten di e kon, kon moro tranga leki di den leri sabi a waarheid. Èn Yehovah lobi den fu di den e tan fruteri sma fu a nen fu en aladi „den ede-wiwiri kon weti”.​—Leisi Psalm 92:12-15.

4. Sortu sani kan de wan trowstu gi wi brada nanga sisa di kon owru?

⁴ Efu yu e kon owru, dan yu kan bribi taki Yehovah no frigiti a wroko di yu du gi en na ini a ten di pasa (Hebr. 6:10). Yu horibaka fayafaya gi a preikiwroko èn yu hemel Tata breiti nanga dati. Yu pasa tesi, hebi tesi srefi. Ma yu tan gi yesi na den wet fu Bijbel, yu tyari hebi frantwortu èn yu gi trawan leri. Yu e du muiti fu go na fesi makandra nanga Yehovah en organisâsi di e kenki esi-esi. Yu yepi trawan di e du furuten diniwroko èn yu gi den deki-ati. Yehovah Gado lobi yu so te, fu di yu tan gi yesi na en. A pramisi taki „a no o gowe libi den sma di e tai hori na en”! (Ps. 37:28) A e pramisi yu disi: ’Awinsi yu ede-wiwiri kon weti, mi o tan horibaka gi yu’ (Yes. 46:4). Sobun, no denki taki fu di yu kon owru, dan yu no warti moro gi Yehovah en organisâsi. Dati no de so kwetikweti!

5. San den owru brada nanga sisa musu hori na prakseri?

⁵ Owru brada nanga sisa kan horibaka gi Yehovah en organisâsi na furu difrenti fasi. Kande den no tranga moro leki fosi, toku den kisi furu ondrofeni na ini den yari di pasa. Yehovah kan tan gebroiki den na difrenti fasi. Kow luku wan tu eksempre fu fosi nanga now.

6-7. Gi wan tu eksempre fu owrusma na ini Bijbel di kisi blesi fu Yehovah fu di den tan dini en.

⁶ Na ini Bijbel wi kan feni moi eksempre fu sma di tan wroko gi Yehovah aladi den ben kon owru kaba. Moses ben abi sowan 80 yari di a tron Yehovah en profeiti èn a fesiman fu a pipel Israel.  Yehovah ben e gebroiki a profeiti Danièl leki takiman ete di a ben pasa 90 yari kaba. Èn a kan taki na apostel Yohanes ben pasa 90 yari tu di Yehovah meki a skrifi a buku Openbaring.

⁷ Yu ben abi furu tra owruwan tu di sma no ben sabi èn kande sma no ben poti prakseri na den srefi. Toku Yehovah ben sabi den èn a blesi den fu di den ben tai hori na en. Fu eksempre, Bijbel no e taki furu fu a man Simeon di ben de ’wan reti-ati man di ben e lespeki Gado’. Ma Yehovah ben sabi en èn a gi en a grani fu si a beibi Yesus èn fu taki wan profeititori di abi fu du nanga Yesus nanga en mama (Luk. 2:22, 25-35). Prakseri na umaprofeiti Ana tu di no ben abi masra moro. A ben abi 84 yari, ma „ala ten a ben de na ini a tempel”. Fu di a ben gwenti go na a tempel, meki Yehovah gi en wan bigi blesi. Wan leisi en srefi si a beibi Yesus. Simeon nanga Ana ben warti gi Yehovah.​—Luk. 2:36-38.

8-9. Fa wan sisa horibaka gi Yehovah en organisâsi baka di en masra dede?

⁸ Na ini a ten disi, furu owru brada nanga sisa na bun eksempre gi yonguwan. Luku na ondrofenitori fu Sisa Lois Didur. A ben abi 21 yari nomo di a bigin dini leki spesrutu pionier na ini Kanada. Bakaten, en nanga en masra John du kringwroko furu yari langa. Bakaten den go dini moro leki 20 yari na a Betel fu Kanada. Di Lois ben abi 58 yari, en nanga John kisi a kari fu go dini na Ukraini. San den ben o du? Den ben feni taki den ben owru tumusi fu go dini na wan tra kondre? Nôno. Den froisi go na Ukraini èn John tron wan fu den brada fu a Bijkantoro Komte drape. Di John dede seibi yari baka dati, dan Lois bosroiti fu tan dini na ini Ukraini. Now Lois abi 81 yari èn a e dini ete na a Betel fu Ukraini pe furu sma lobi en.

⁹ Kande sma no e poti so furu prakseri moro na den sortu sisa disi leki di den masra ben de na libi. Ma toku disi no wani taki dati den no prenspari moro. Yehovah abi furu warderi gi sisa di horibaka gi den masra omeni yari langa èn di e tai hori na en te now ete (1 Tim. 5:3). Boiti dati, den e gi den yonguwan furu deki-ati.

10. Fruteri fu a moi eksempre fu Tony.

¹⁰ Furu owru brada nanga sisa e tan na presi pe den e sorgu gi owrusma. Yehovah e si den brada nanga sisa disi leki gudu tu. Wan brada di nen Tony e tan na so wan presi. A dopu na ini Pennsylvania na Amerkankondre na ini augustus 1942 di a ben abi 20 yari. Syatu baka dati, a weigri fu go na ini a legre. Dati meki a ben musu koti strafu tu nanga afu yari  langa. En nanga en wefi Hilda kweki tu pikin na ini a waarheid. Na ini den yari di pasa, Tony dini na ini dri gemeente leki fesiman opziener. * A dini tu leki kring konmakandra opziener. Boiti dati, a hori konmakandra nanga Bijbelstudie na wan strafu-oso. Now Tony abi 98 yari, ma a no tapu fu wroko gi Yehovah. A e tan du ala san a man fu dini Yehovah èn fu wroko skinskin nanga a gemeente pe a de.

11. Fa wi kan sori taki wi e warderi den owruwan di e libi na presi pe den e sorgu gi owrusma?

¹¹ Fa wi kan sori warderi gi den owru brada nanga sisa di e tan na presi pe den e sorgu gi owrusma? Den owruman kan yepi den fu teki prati na den sani di a gemeente e du. Wi kan go luku den noso wi kan taki nanga den nanga yepi fu video chat. Wi wani poti spesrutu prakseri na den wan di e tan na presi di de farawe fu a gemeente pe den e go. Efu wi no luku bun, dan wi kan frigiti den owruwan disi. Kande sonwan fu den no lobi taki fu densrefi noso kande den no feni taki a sani dati fiti. Ma wi o leri furu fu den te wi e meki ten fu taki nanga den fu arki den te den e fruteri wi fu den moi sani di den ondrofeni na ini Yehovah en organisâsi.

12. Sortu brada nanga sisa wi kan feni na ini wi eigi gemeente?

¹² Kande a sa fruwondru wi fu si taki wi srefi abi owruwan na ini wi gemeente di de moi eksempre. Wan sisa di nen Harriette dini Yehovah omeni tenti yari langa na ini a gemeente fu en na ini New Jersey na Amerkankondre. Bakaten a froisi go tan nanga en umapikin. Den brada na ini a nyun gemeente pe a ben de teki ten fu leri sabi en èn den kon si taki den ben kan leri furu fu en. A gi den deki-ati nanga den tori di a fruteri den fu a preikiwroko di a ben e du di a leri sabi a waarheid na ini den yari baka 1920. Na a ten dati skowtu ben kan hori sma te den ben e preiki. Dati meki ala ten a ben e waka nanga wan tifibosro te a ben de na ini a preikiwroko. Fu taki en leti, tu leisi na ini 1933 skowtu sroto en wan wiki na ini strafu-oso. Na den pisi ten dati, a masra fu en di no ben de wan Kotoigi, horibaka gi en èn a sorgu gi den dri yongu pikin fu den. A de krin taki wi musu abi furu warderi gi owru brada nanga sisa leki Harriette.

13. Fa na organisâsi fu Yehovah e si den owruwan?

¹³ Den owru brada nanga sisa fu wi prenspari gi Yehovah èn gi na organisâsi fu en. Den si fa Yehovah blesi en organisâsi na difrenti fasi èn fa a blesi den tu. Den leri prenspari sani fu den fowtu di den meki. Wi musu si den leki sma di abi furu koni èn wi kan leri fu na ondrofeni fu den (Odo 18:4). Efu yu e teki ten fu leri sabi den, dan a bribi fu yu o kon moro tranga èn yu o leri furu fu den.

14. San Deuteronomium 32:7 e taigi yonguwan fu du?

¹⁴ Du muiti fu taki nanga den owruwan (Leisi Deuteronomium 32:7.) Kande den no e si so bun moro, kande den no e waka so esi moro, èn kande den no e taki so tranga moro, ma toku den no wani sidon nomo. Boiti dati, den kon abi „wan bun nen” na Yehovah (Preik. 7:1). No frigiti fu san ede den prenspari so gi  Yehovah. Tan sori lespeki gi den. De leki Elisa. A ben de nomonomo fu tan nanga Elia na a lasti dei di den ben de makandra. Dri leisi Elisa taki: „Mi no o gowe libi yu.”​—2 Kow. 2:2, 4, 6.

15. Sortu aksi wi kan poti gi den owruwan?

¹⁵ Poti aksi gi den owruwan fu sori den taki yu wani kon sabi den moro bun (Odo 1:5; 20:5; 1 Tim. 5:1, 2). Aksi den sani soleki: „Di yu ben moro yongu, dan san gi yu na overtoigi taki yu ben feni a waarheid?” „Fa den sani di yu ondrofeni yepi yu fu kon moro krosibei na Yehovah?” „San yepi yu fu tan dini Yehovah nanga prisiri?” (1 Tim. 6:6-8) Baka dati, arki te den o fruteri yu fu a libi fu den.

16. Fa wan owru sma nanga wan yongu sma e kisi deki-ati te den e taki nanga makandra?

¹⁶ Te wan owru sma nanga wan yongu sma e taki nanga makandra, dan den ala tu e kisi deki-ati (Rom. 1:12). Unu leki yonguwan o si moro krin fa Yehovah e sorgu gi den futuboi fu en èn na owru sma o firi taki sma lobi en. A o prisiri fu fruteri fa Yehovah blesi en.

17. Fu san ede wi kan taki dati den owru brada nanga sisa fu wi e kon moro moi dei fu dei?

¹⁷ A moi fu wan sma e lasi gowe te a e kon moro owru, ma den wan di e tai hori na Yehovah e kon moro moi gi en dei fu dei (1 Tes. 1:2, 3). Fu san ede disi de so? Fu di omeni yari langa den sma disi meki a yeye fu Gado leri den èn yepi den fu kon abi moi fasi. O moro wi kon sabi den warti owru brada nanga sisa fu wi, o moro wi o lespeki den èn o moro wi o leri fu den. Iya, wi o si den leki trutru dyamanti!

18. San wi o luku na ini a tra artikel?

¹⁸ A gemeente e kon moro tranga te den yonguwan e warderi den owruwan èn te den owruwan e warderi den yonguwan. Na ini a tra artikel wi o luku fa den owruwan kan sori taki den e warderi den yonguwan na ini a gemeente.