1. Fa son sma e firi te den puru wan lobiwan fu den fu a gemeente?

DEN puru wan lobiwan fu yu fu a gemeente? A sani dati kan broko yu ati. Wan sisa di nen Hilda * e taki: „Di mi masra dede baka di wi ben trow 41 yari, dan mi ben denki taki dati ben de a moro hati sani di ben kan pasa nanga mi. Ma dan mi manpikin gowe libi a waarheid, en wefi, nanga den pikin fu en. Dati ben de moro ogri. Noiti ete mi ben e firi so sari.”

2-3. Fa Yehovah e firi te den futuboi fu en e drai baka gi en, soleki fa Psalm 78:40, 41 e sori?

² Prakseri fa Yehovah ben musu fu sari di wan tu fu den engel manpikin fu en drai baka gi en (Yud. 6). Èn prakseri fa a ben hati en di a si taki den Israelsma, a pipel di a ben lobi so te, opo densrefi teige en ibri leisi baka. (Leisi Psalm 78:40, 41.) Yu kan de seiker taki wi lobi-ati hemel Tata e sari tu te wan sma di yu lobi gowe libi en. A e frustan fa a sani dati e hati yu. Fu di a lobi yu meki a o gi yu deki-ati èn a o yepi yu tu.

³ Na ini na artikel disi wi o luku san wi kan du efu wi wani taki Yehovah yepi wi te wan sma di wi lobi drai baka gi en. Wi o luku tu fa wi kan yepi trawan na ini a gemeente efu wan famiri fu den drai baka gi Gado. Ma kow luku fosi sortu denki wi no musu abi te a sani disi pasa.

4. Fa furu papa nanga mama e firi te wan manpikin noso wan umapikin fu den gowe libi Yehovah?

⁴ Te wan manpikin noso wan umapikin gowe libi Yehovah, dan nofo tron a papa nanga mama fu den e denki taki  den ben musu du moro fu yepi a pikin fu tan dini Yehovah. Wan brada di nen Luke, abi wan boi di den puru fu a gemeente. A brada disi taki: „Mi ben feni taki na mi ben abi a fowtu. Mi ben e dren takru dren srefi. Son leisi mi ben e krei èn mi ben e sari.” Wan srefi sortu sani ben pasa nanga Elizabeth. A sisa disi ben tan prakseri: „Kande na mi leki mama meki fowtu. Kande na mi no leri mi pikin a waarheid bun.”

5. Suma abi a fowtu te wan sma gowe libi Yehovah?

⁵ Wi no musu frigiti taki Yehovah gi ibriwan fu wi a grani fu teki wi eigi bosroiti. Disi wani taki dati wi kan bosroiti efu wi o gi yesi na en, noso efu wi no o du dati. Son yonguwan no ben abi papa nanga mama di ben de bun eksempre gi den. Ma toku den bosroiti fu dini Yehovah èn fu tan gi yesi na en. Tra yonguwan abi papa nanga mama di wroko tranga fu leri den fu lobi Yehovah. Ma bakaten den pikin disi gowe libi Yehovah. Sobun, ibriwan fu wi musu bosroiti efu wi o dini Yehovah (Yos. 24:15). Efu yu na wan papa noso wan mama di e sari fu di yu pikin gowe libi Yehovah, dan no denki taki na yu abi a fowtu.

6. San kan pasa nanga wan yongusma te en papa noso mama gowe libi Yehovah?

⁶ Son leisi wan papa noso wan mama e gowe libi Yehovah èn a e gowe libi en osofamiri srefi (Ps. 27:10). A sani disi kan muilek srefisrefi gi den pikin di ben e si den papa noso mama leki wan eksempre. Di Esther en papa gowe libi a waarheid, dan Esther taki: „Mi krei furu fu di mi kon frustan taki a no drifi a ben drifi gowe fu a waarheid, ma nanga en krin frustan a teki a bosroiti fu gowe libi Yehovah. Mi lobi mi papa. Sobun, di den puru en fu a gemeente, dan ala ten mi ben e broko mi ede nanga en. Son leisi mi ben bruya so te, taki mi no ben sabi san fu du.”

7. Fa Yehovah e firi te den puru wan yonguwan en papa noso mama fu a gemeente?

⁷ Yonguwan, efu den puru yu papa noso mama fu a gemeente, dan wi e firi gi yu fu di a sani dati na wan hati sani. Yu kan de seiker taki Yehovah sabi heri bun fa a sani disi e hati yu. A lobi yu èn a breiti taki yu e tan gi yesi na en. Wi leki yu brada nanga sisa breiti tu. No frigiti taki a no yu abi a fowtu fu den bosroiti di yu papa noso mama teki. Soleki fa wi ben taki kaba, Yehovah gi ala sma a grani fu teki den eigi bosroiti. Ibri sma di gi ensrefi abra na Gado èn di teki dopu, musu „tyari en eigi lai”.​—Gal. 6:5.

8. San famiriman kan du, aladi den e howpu taki a lobiwan fu den drai kon baka na Yehovah? (Luku sosrefi a faki „ Drai kon baka na Yehovah”.)

⁸ Te wan lobiwan fu yu drai baka gi Yehovah, dan wi kan frustan taki yu e tan howpu taki wan dei a o drai kon baka. Ma san yu kan du aladi yu e wakti? Yu kan du muiti fu tranga yu eigi bribi. Te yu e du dati, dan yu o de wan bun eksempre gi tra sma na ini a famiri èn kande srefi gi a sma  di den puru fu a gemeente. Yu o kisi krakti tu fu man horidoro aladi yu e sari. Meki wi go luku wan tu sani di yu kan du.

9. Na sortu fasi yu kan kisi krakti fu Yehovah? (Luku sosrefi a faki „ Bijbeltekst di kan trowstu yu te wan sma fu yu gowe libi Yehovah”.)

⁹ Du ala san yu man fu tan abi wan tranga bribi. A prenspari taki yu e tan tranga yu eigi bribi èn a di fu den famiriman fu yu. Fa yu kan du dati? Yu o kisi krakti te yu e tan leisi Gado Wortu, te yu e denki dipi fu en, èn te yu e go na den Kresten konmakandra. Joanna en papa nanga en sisa ben gowe libi waarheid. Joanna e taki: „Mi e firi so korostu te mi e leisi fu den sma na ini Bijbel soleki Abigayil, Ester, Yob, Yosef, nanga Yesus. Na eksempre fu den e gi mi deki-ati èn a e yepi mi fu no denki so takru fu a situwâsi fu mi. Den Broadcasting singi e gi mi furu deki-ati tu.”

10. Fa Psalm 32:6-8 e yepi wi fu horidoro te wi e sari?

¹⁰ Fruteri Yehovah ala den broko-ede fu yu. Te yu e sari, dan no tapu fu begi. Begi yu lobi-ati Gado fu yepi yu fu si sani na a fasi fa en e si sani. Begi en fu „gi yu koni èn fu sori yu a pasi di yu musu waka”. (Leisi Psalm 32:6-8.) A no de fu taki dati a kan muilek gi yu fu fruteri Yehovah fa yu e firi trutru. Ma Yehovah e frustan heri bun fa yu e firi èn a e gi yu deki-ati fu taigi en san de na tapu yu ati.​—Eks. 34:6; Ps. 62:7, 8

11. Fu san ede wi musu horibaka gi a bosroiti di den owruman teki fu puru wan sma fu a gemeente, soleki fa Hebrewsma 12:11 e sori? (Luku sosrefi a faki „ Te den puru wan sma fu a gemeente”.)

¹¹ Horibaka gi a bosroiti di den owruman  teki. Te den e puru wan sma fu a gemeente, dan disi na wan fasi fa Yehovah e piri-ai gi a sma dati fu di a lobi en. A sani disi bun gi a sma di den puru fu a gemeente èn gi ala tra sma. (Leisi Hebrewsma 12:11.) Ma efu sma na ini a gemeente e fruteri yu taki den owruman no teki wan bun bosroiti di den puru a sma fu a gemeente, dan hori na prakseri taki kande a sma fruteri yu wán sei fu a tori nomo. Wi no sabi precies san pasa. Dati meki a bun fu abi a frutrow taki den owruman di koti krutu, du ala muiti fu hori densrefi na Bijbel gronprakseri èn taki a sma di poti den fu koti krutu „na Yehovah”.​—2 Kron. 19:6.

12. Sortu wini son sma kisi di den no bumui moro nanga wan famiriman fu den di den owruman puru fu a gemeente?

¹² Te yu e horibaka gi a bosroiti di den owruman teki fu puru wan famiriman fu yu fu a gemeente, dan kande dati kan yepi en fu drai kon baka na Yehovah. Elizabeth di wi ben kari kaba, e taki: „A ben muilek srefisrefi fu no bumui moro nanga a manpikin fu wi. Ma di a drai kon baka, a taki dati a ben bun taki den ben puru en fu a gemeente. Bakaten a taki dati a ben leri furu bun sani. Mi kon si taki piri-ai fu Yehovah bun ala ten.” Elizabeth en masra Mark e taki tu: „Bakaten a manpikin fu wi taigi wi taki wan fu den sani di meki taki a drai kon baka, na fu di wi du soifri san wi ben musu du. Mi breiti so te taki Yehovah yepi wi fu tan gi yesi na en.”

13. San kan yepi yu te yu e sari?

¹³ Taki nanga mati di e frustan fa yu e firi. Bumui nanga lepi Kresten di kan yepi yu fu no lasi howpu (Odo 12:25; 17:17). Joanna di wi ben kari kaba e taki: „Na ini mi ati, mi ben e firi leki mi wawan de. Ma di mi ben taki nanga mati di mi ben e frutrow, dan dati yepi mi fu horidoro.” Ma san yu kan du te son sma na ini a gemeente e taigi yu sani di e meki yu firi brokosaka?

14. Fu san ede wi musu „tan frudrage makandra èn gi makandra pardon nanga wi heri ati”?

¹⁴ Abi pasensi nanga yu brada nanga sisa. A no de fu taki dati a no ala sma o taki den yoisti sani ala ten (Yak. 3:2). Wi alamala abi fowtu, sobun, a no musu fruwondru yu efu son sma no o sabi san den musu taki, noso efu den e taki wan tu sani di e hati yu. No frigiti a rai di na apostel Paulus ben gi: „Tan frudrage makandra èn gi makandra pardon nanga un heri ati, srefi te wan sma feni taki wan trawan du wan hati sani nanga en” (Kol. 3:13). Wan sisa di abi wan famiriman di den ben puru fu a gemeente e taki: „Son brada nanga sisa ben wani gi mi deki-ati, ma sondro fu den sabi den taki sani di hati mi. Yehovah yepi mi fu gi den pardon.” San a gemeente kan du fu yepi den tra famiriman di e tan gi yesi na Yehovah?

15. Te den puru wan sma fu a gemeente, dan san kan yepi den famiriman fu den?

¹⁵ Sori switifasi nanga lobi gi den famiriman di e tan gi yesi na Yehovah. Wan sisa di nen Miriam e taki dati a ben e senwe fu go na den konmakandra, baka di den ben puru en brada fu a gemeente. A e taki: „Mi ben frede san sma ben o taki. Ma furu brada nanga sisa ben e sari tu fu a sani di pasa. Den no ben mandi nanga mi brada èn den no taki nowan takru sani fu en. Na den yepi mi fu no firi taki mi de mi wawan.” Wan tra sisa e memre: „Baka di den puru a boi fu wi fu a gemeente, dan bun mati fu wi kon trowstu wi. Sonwan fu den taigi wi taki den no ben sabi san fu taki. Den krei nanga wi, noso den seni wan karta gi wi fu gi wi deki-ati.”

16. Fa a gemeente kan tan horibaka gi famiriman di e dini Yehovah ete?

¹⁶ Tan horibaka gi den famiriman di e dini Yehovah ete. Spesrutu na ini a pisi ten disi den abi yu lobi nanga deki-ati fanowdu (Hebr. 10:24, 25). Son leisi, den famiriman disi kon si taki sma na ini a gemeente no ben wani bumui moro nanga den. No meki a sani dati pasa. Spesrutu yonguwan di abi wan papa noso mama di gowe libi a waarheid, musu firi taki wi lobi den èn wi musu gi den deki-ati. Maria en masra ben gowe libi waarheid èn en osofamiri. Maria taki: „Sonwan fu den mati fu mi ben e kon na mi oso, den ben e bori gi mi, èn den ben e yepi mi fu studeri nanga den pikin fu mi. Den ben e firi gi mi èn den ben e krei nanga mi. Den ben opo taki gi mi di sma bigin fruteri lei fu mi. A sani dati gi mi furu deki-ati.”​—Rom. 12:13, 15.

17. Fa owruman kan trowstu den wan di e sari?

¹⁷ Owruman, gebroiki ibri okasi fu tranga den famiriman di e dini Yehovah ete. Unu leki owruman abi a prenspari frantwortu fu trowstu brada nanga sisa di abi famiriman di gowe libi Yehovah (1 Tes. 5:14). Taki nanga den fosi den konmakandra èn baka den konmakandra fu gi den deki-ati. Go luku den èn begi gi den. Wroko makandra nanga den na ini a preikiwroko noso gi den wan kari fu kon na yu Osofamiri Anbegi. Owruman musu poti prakseri na den wan di e sari. Den musu  sori tu taki den lobi den èn taki den e firi gi den.​—1 Tes. 2:7, 8.

18. Soleki fa 2 Petrus 3:9 e sori, dan san Gado wani taki den sma di drai baka gi en musu du?

¹⁸ Yehovah „no wani taki wan sma lasi libi”. A wani taki ala sma musu kisi na okasi fu sori berow. (Leisi 2 Petrus 3:9.) Awinsi wan sma du wan seryusu sondu, toku a libi fu a sma dati prenspari gi Gado ete. Yehovah pai wan hei prijs gi ibriwan fu wi: A libi fu en lobi Manpikin. Na wan lobi-ati fasi, Yehovah e yepi den wan di gowe libi en, fu drai kon baka na en. A e howpu taki den o wani du dati, soleki fa wi si na ini na agersitori fu a lasi manpikin (Luk. 15:11-32). Furu sma di ben gowe libi a waarheid drai kon baka na den lobi-ati hemel Tata, èn a gemeente ben breiti fu gi den wan switikon. Elizabeth di wi ben kari kaba, ben breiti fu si taki en manpikin kon baka na ini waarheid. A e taki: „Mi breiti taki furu brada nanga sisa gi wi deki-ati fu no lasi howpu.”

19. Fu san ede wi kan tan frutrow tapu Yehovah?

¹⁹ Wi kan frutrow tapu Yehovah ala ten. Noiti a e gi wi rai di kan tyari problema kon gi wi. A de wan Papa di de klariklari fu yepi sma èn a e firi gi den. A lobi ala sma di lobi en èn di e anbegi en. Yu kan de seiker taki Yehovah no o gowe libi yu te yu abi broko-ede (Hebr. 13:5, 6). Mark, di wi ben kari kaba, taki: „Yehovah noiti no gowe libi wi. Ala ten a e yepi wi te wi abi problema.” Yehovah o tan gi yu „a krakti di bigi pasa marki” (2 Kor. 4:7). Iya, awinsi wan lobiwan fu yu gowe libi waarheid, toku yu man dini Yehovah go doro èn yu no abi fu lasi howpu taki a o drai kon baka.