Doe wan sani tapoe den pramisi foe Gado foe di joe e oefen bribi

„En [Jehovah Gado] gi wi na wan frifasi den diri èn toemoesi gran pramisi.” — 2 PETRUS 1:4.

1. San e jepi wi foe oefen troetroe bribi?

JEHOVAH wani taki wi moesoe oefen bribi ini den pramisi foe en. Tokoe, „bribi a no wan sani di ala sma abi” (2 Tesalonikasma 3:2). Na eigifasi disi na wan froktoe foe Gado santa jeje noso wroko krakti (Galasiasma 5:22, 23). Foe dati ede, soso den sma di Jehovah jeje e tjari kan oefen bribi.

2. Fa na apostel Paulus e gi wan finifini froeklari foe „bribi”?

² Ma san na bribi? Na apostel Paulus e kari en „a krin sori foe troe sani di no de foe si”. A krinfasi foe den troe sani disi di no de foe si tranga sote, taki den e teki bribi leki a de a srefi leki den troe sani disi. Den e taki toe taki bribi na „a seiker froewakti foe sani di wan sma e howpoe na tapoe” bikasi denwan di abi na eigifasi disi abi wan djaranti taki ala sani di Jehovah Gado pramisi, de so seiker taki a de leki den kon troe kaba. — Hebrewsma 11:1.

Bribi nanga den pramisi foe Jehovah

3. San salfoe kresten sa ondrofeni efoe den e oefen bribi?

³ Foe plisi Jehovah, wi moesoe oefen bribi ini den pramisi foe en. Na apostel Petrus ben sori disi ini a di foe toe brifi foe en di ben skrifi nanga jepi foe santa jeje, wan sani foe 64 G.T. A ben tjari kon na ondro a prakseri foe en kompe salfoe kresten taki efoe den ben e oefen bribi, den ben sa si a kontroe foe Gado en „diri èn toemoesi gran pramisi”. So, den „ben sa kon tron sma di ben sa abi wan prati ini a fasi fa Gado de” leki kompe erfgenaam nanga Jesus Krestes ini a hemel Kownoekondre. Nanga bribi èn nanga a jepi foe Jehovah Gado, den ben loesoe komoto foe katibo na den kroektoe gwenti nanga doe foe a grontapoe disi (2 Petrus 1:2-4). Èn prakseri pikinso nomo! Den sma di e oefen troe bribi e njanboen foe a srefi fri di e pasa ala warti sani ini a ten disi.

4. Sortoe eigifasi wi sa moksi na wi bribi?

⁴ Bribi ini den pramisi foe Jehovah nanga tangi foe a fri di Gado gi wi, moesoe boeweigi wi foe doe ala san wi kan foe kon tron kresten di e gi wan boen eksempre. Petrus ben taki: „Leki wan sani di oenoe e doe foe oen sei oenoe e doe serjoesoe moeiti, foe moksi na oen bribi boenfasi, na oen boenfasi sabi, na oen sabi dwengi oensrefi, na dwengi oensrefi horidoro, na oen horidoro a gi di oenoe e gi oensrefi na a dini foe Gado, na a gi di oenoe e gi oensrefi na a dini foe Gado brada lobi, na oen brada lobi, lobi” (2 Petrus 1:5-7). Petrus so boen e gi wi wan lijst di a ben sa de wan koni sani foe wi sei foe ben sa tan hori en na prakseri. Meki wi go loekoe den eigifasi disi moro krosibei.

Prenspari pisi foe bribi

5, 6. San na boenfasi èn fa wi kan moksi en na wi bribi?

⁵ Petrus ben taki dati boenfasi, sabi, dwengi wisrefi, horidoro, a gi di wi e gi wisrefi na a dini foe Gado, brada lobi nanga lobi, moesoe moksi a wan kon na a trawan èn na a bribi foe wi. Wi moesoe wroko tranga foe meki den eigifasi disi tron prenspari pisi foe wi bribi. Foe eksempre, boenfasi a no wan eigifasi di wi e sori aparti foe bribi. W. E. Vine, wan man di e ondrosoekoe wortoe, e tjari kon na ondro a prakseri foe sma taki na 2 Petrus 1:5, „boenfasi e poti leki wan fanowdoe eigifasi na a oefen di  wan sma e oefen bribi”. Ibriwan foe den tra eigifasi di Petrus ben kari, moesoe de wan pisi toe foe wi bribi.

⁶ Na a fosi presi, wi moesoe moksi boenfasi na wi bribi. Foe abi boenfasi wani taki foe doe san boen na Gado ai. Gi a Griki wortoe di den vertaal djaso nanga „boenfasi”, son vertaling e gebroiki „boen-ati” (New International Version; The Jerusalem Bible; Today’s English Version). Boenfasi e boeweigi wi ati foe no doe san ogri noso foe no meki ogri pasa nanga wi kompe libisma (Psalm 97:10). A e poesoe sma toe foe doe sani na wan deki-atifasi foe a wini gi trawan na jeje fasi, skin fasi èn fasi foe firi.

7. Foe san ede wi moesoe moksi sabi na wi bribi nanga boenfasi?

⁷ Foe san ede Petrus e gi wi deki-ati foe moksi sabi na wi bribi nanga boenfasi? We, te wi e tanapoe na fesi njoen tjalensi gi a bribi foe wi, wi abi sabi fanowdoe efoe wi wani si a difrenti na mindri boen nanga ogri (Hebrewsma 5:14). Nanga jepi foe bijbelstudie nanga ondrofeni foe di wi e gebroiki Gado Wortoe èn e sori praktis koni ini wi aladei libi, wi e meki wi sabi kon moro foeroe. Na a tra sei, dati e meki taki wi kan tan hori wi bribi èn tan doe san boen te wi de na ondro tesi. — Odo 2:6-8; Jakobus 1:5-8.

8. San na dwengi wisrefi èn fa a e moksi na horidoro?

⁸ Foe jepi wi foe kakafoetoe gi tesi nanga bribi, wi moesoe moksi na wi sabi dwengi wisrefi. A Griki wortoe gi „a dwengi wisrefi” e sori tapoe a man di wi man basi wisrefi. A froktoe disi foe a jeje foe Gado e jepi wi foe sori taki wi e skotoe wisrefi ini wi denki, wi wortoe nanga a fasi fa wi e tjari wisrefi. Te wi e tan horidoro foe dwengi wisrefi, wi e moksi horidoro na en. A Griki wortoe foe „horidoro” wani taki horidoro na wan deki-atifasi, a no wani taki wan sari fesi, foe di a no kan tra fasi foe lon gi problema. Na foe a prisiri di ben de na en fesi, meki Jesus ben froedrage a pina-oedoe (Hebrewsma 12:2). A krakti di Gado e gi wi makandra nanga horidoro e tranga wi bribi èn e jepi wi foe prisiri te wi de na ini banawtoe, kakafoetoe gi tesi èn foe no meki a kon so fara foe no hori wisrefi na gronprakseri te wi e ondrofeni froefolgoe. — Filipisma 4:13.

9. (a) San na a gi di wi e gi wisrefi na a dini foe Gado? (b) Foe san ede wi sa moksi brada lobi na a gi di wi e gi wisrefi na a dini foe Gado? (c) Fa wi kan moksi lobi na wi brada lobi?

⁹ Na wi horidoro wi moesoe moksi a gi di wi e gi wisrefi na a dini foe Gado — dipi lespeki, anbegi nanga dienst gi Jehovah. Wi bribi e gro te wi e oefen a gi di wi e gi wisrefi na a dini foe Gado èn e si fa Jehovah e handri nanga en pipel. Tokoe, efoe wi wani sori gadofasi, wi abi brada lobi fanowdoe. Te joe loekoe en boen, „a sma di no lobi en brada, di a ben si, no kan lobi Gado, di a no ben si” (1 Johanes 4:20). Wi ati moesoe poesoe wi foe sori troe lobi gi tra foetoeboi foe Jehovah èn foe soekoe a boen foe den ala ten (Jakobus 2:14-17). Ma foe san ede den e taigi wi foe moksi lobi na wi brada lobi? So leki fa a sori dan Petrus ben bedoel taki wi moesoe sori lobi gi ala libisma, no soso gi wi brada. A lobi disi wi e sori spesroetoe te wi e preiki a boen njoensoe èn e jepi sma na jeje fasi. — Mateus 24:14; 28:19, 20.

Bakapisi di a wan de tra fasi foe a trawan

10. (a) Fa wi sa doe efoe boenfasi, sabi, dwengi wisrefi, horidoro, a gi di wi e gi wisrefi na a dini foe Gado, brada lobi nanga lobi, moksi na wi bribi? (b) San e pasa te wan sma di e taki en na wan kresten no abi den eigifasi disi?

¹⁰ Efoe wi e moksi boenfasi, sabi, dwengi wisrefi, horidoro, gi wisrefi na a dini foe Gado, brada lobi nanga lobi na a bribi foe wi, wi sa denki, taki èn handri na fasi di Gado feni boen. Na a tra sei, efoe wan sma di e taki dati en na wan kresten no e sori den eigifasi disi, a e kon breni na jeje fasi. A ’e tapoe en ai gi a leti’ di e komoto foe Gado èn e frigiti taki den ben meki en kon krin foe sondoe di a ben doe na fesi (2 Petrus 1:8-10; 2:20-22). Meki noiti wi broko kindi na a fasi dati so taki wi lasi bribi ini den pramisi foe Gado.

11. San wi kan froewakti nanga reti foe loyaal salfoewan?

¹¹ Loyaal salfoe kresten abi bribi ini den pramisi foe Jehovah èn den e meki ala moeiti foe  meki a kari di a kari den èn a teki di a teki den poeroe na mindri foe trawan kon de seiker. Awasi sani de na den pasi foe naki foetoe fadon, wi kan froewakti taki den sa tan sori den gado eigifasi. Gi den getrow salfoewan ’a pasi opo bigi gi den foe go ini a têgo Kownoekondre foe Jesus Krestes’ nanga jepi foe na opobaka foe den foe kisi jeje libi na hemel. — 2 Petrus 1:11.

12. Fa wi moesoe froestan den wortoe foe 2 Petrus 1:12-15?

¹² Petrus ben kon froestan taki a ben sa dede heri esi, èn a ben froewakti foe kisi kande wan opobaka foe hemel libi. Ma so langa leki a ben de na libi ini a „tabernakel disi” — en libisma skin — a ben proeberi foe bow bribi ini kompe bribiman èn ben meki den opo doe wan sani foe di a ben memre den na den sani di ben de fanowdoe foe kisi a boen foe Gado. Baka di a ben hari foetoe èn dede, den jeje brada nanga sisa foe Petrus ben kan bow den bribi foe di den ben e memre den wortoe foe en baka. — 2 Petrus 1:12-15.

Bribi ini a profeiti wortoe

13. Fa Gado ben gi kotoigi di e meki sma bribi kon moro tranga ini na afersi foe a kon di Krestes sa kon?

¹³ Gado srefi ben gi kotoigi di e tranga sma bribi foe a seikerfasi foe a kon di Jesus sa kon „nanga krakti èn glori” (Mateus 24:30; 2 Petrus 1:16-18). Foe di heiden priester ben mankeri boeweisi, den ben froeteri falsi tori foe den gado foe den, ala di, Petrus, Jakobus nanga Johanes ben de kotoigi di si Krestes granifasi ini a transfiguratie (Mateus 17:1-5). Den ben si taki a ben kisi glori èn den ben jere a babari foe a sten foe Gado srefi di ben erken Jesus leki En lobi Manpikin. Na erken foe sani dati èn a brenki sori di Krestes ben kisi, a ten dati, ben de wan di a ben grani nanga glori di den ben  gi en. Foe a tjari kon na krin disi foe a sei foe Gado, Petrus ben kari a presi, so leki a sori dan a ben de tapoe wan pikin bergi di komoto foe a bergi Hermon, „a santa bergi”. — Teki gersi Exodus 3:4, 5.

14. Fa a transfiguratie foe Jesus moesoe abi krakti na wi bribi tapoe?

¹⁴ Fa a transfiguratie foe Jesus moesoe wroko tapoe a bribi foe wi? Petrus ben taki: „A profeiti wortoe de moro fasti gi wi, èn oenoe e doe boen foe poti prakseri na tapoe neleki na tapoe wan lampoe di e skèin na ini wan doengroe presi, te leki a dei e krin èn wan deistari e opo kon ini oen ati” (2 Petrus 1:19). „A profeiti wortoe” so leki fa a sori, no ben abi na ini soso den profeiti tori foe a Mesias ini den Hebrew Boekoe, ma so srefi toe a froeteri foe Jesus taki a ben sa kon „nanga krakti èn bigi glori”. Fa a wortoe „ben kon de moro fasti” nanga jepi foe a transfiguratie? A sani dati di ben pasa ben meki a profeiti wortoe foe a glori kon di Krestes ben sa kon ini Kownoekondre makti, kisi moro krakti.

15. San de toe ini a poti foe prakseri tapoe a profeiti wortoe?

¹⁵ Foe meki wi bribi kon de moro tranga, wi moesoe poti prakseri tapoe a profeiti wortoe. Disi wani taki studeri a wortoe dati, takimakandra foe en tapoe kresten konmakandra èn fiti den rai foe en na ini joe libi (Jakobus 1:22-27). Wi moesoe meki a de „wan lampoe di e skèin ini wan doengroe presi”, di e skèin leti ini wi ati (Efeisesma 1:18). Na a fasi dati nomo, a sa tiri wi te leki a „deistari” noso „a krin mamanten stari”, Jesus Krestes, sori ensrefi ini glori (Openbaring 22:16). A tjari kon na krin dati sa wani taki pori gi den sma di no abi bribi èn blesi gi denwan di e oefen bribi. — 2 Tesalonikasma 1:6-10.

16. Foe san ede wi kan abi bribi taki ala den profeiti pramisi ini Gado Wortoe sa kon troe?

¹⁶ Den profeiti foe Gado no ben de koni man nomo di ben taki koni sani na fesi, bikasi Petrus ben taki: „No wan profeititaki de na Boekoe, di wan sma kan poeroe so leki fa en wani. Bikasi libisma no ben taki profeititori nanga den wani, ma na Gado ben meki sma taki sani leki fa santa jeje ben tjari den” (2 Petrus 1:20, 21). Foe eksempre, David ben taki: „A jeje foe Jehovah na dati ben gi mi den sani foe taki” (2 Samuèl 23:1, 2). Èn Paulus ben skrifi: „Ala den Boekoe, ben skrifi nanga jepi foe santa jeje” (2 Timoteus 3:16). Foe di na Gado jeje ben meki den profeiti foe en taki, wi kan abi a bribi taki ala den pramisi ini en Wortoe sa kon troe.

Den ben abi bribi ini den pramisi foe Gado

17. Sortoe pramisi ben de a fondamenti foe a bribi foe Abel?

¹⁷ Den pramisi foe Jehovah ben de a fondamenti foe a bribi foe a ’bigi wolkoe’ foe en kotoigi di ben de bifo a kresten ten (Hebrewsma 11:1–12:1). Foe eksempre, Abel ben abi bribi ini a pramisi foe Gado foe a „siri” di ben sa masi na ede foe „a sneki”. Boeweisi ben de foe a kontroe foe a kroetoestrafoe foe Gado gi a papa nanga mama foe Abel. Na dorosei foe Eden, Adam nanga en osofamiri ben njan brede na ini a sweti foe den fesi bikasi a gron di ben kisi floekoe ben meki maka nanga brantimaka. Kande Abel ben si fa Eva tranga lostoe ben go na en Masra èn ben si taki Adam ben basi en. A de seiker taki Eva ben taki foe a skin-ati di a ben abi te a ben de nanga bere. Èn cherub èn a kotisei foe wan feti-owroe di ben drai lontoe, ben e hori wakti tapoe a pasi di ben e go na a djari foe Eden (Genesis 3:14-19, 24). Ala den sani disi ben gi wan „krin sori foe sani” di ben gi Abel a djaranti taki fri ben sa kon nanga jepi foe a Siri di den ben pramisi. Foe di Abel ben handri nanga bribi, a ben tjari wan òfer gi Gado di ben boeweisi foe abi moro bigi waarde leki di foe Kain. — Hebrewsma 11:1, 4.

18, 19. Na sortoe fasi Abraham nanga Sara ben oefen bribi?

¹⁸ Den fositen tata Abraham, Isak nanga Jakob toe ben abi bribi ini den pramisi foe Jehovah. Abraham ben oefen bribi ini a pramisi foe Gado taki ala famiri foe grontapoe ben sa kisi blesi nanga jepi foe en èn taki a siri foe en ben sa kisi wan kondre (Genesis 12:1-9; 15:18-21). En manpikin Isak nanga en granpikin Jakob ben de „erfgenaam foe a srefi pramisi dati”.  Nanga bribi Abraham „ben tan leki wan freimdesma ini a kondre foe a pramisi” èn ben e froewakti „a foto di abi troetroe fondamenti”, Gado hemel Kownoekondre di na ondro en a ben sa kisi wan opobaka komoto na dede foe kon libi na grontapoe (Hebrewsma 11:8-10). Joe abi a srefi sortoe bribi?

¹⁹ A wefi foe Abraham, Sara, ben abi so wan 90 jari èn a ben pasa a jari foe kan kisi pikin krinkrin, di a ben oefen bribi ini a pramisi foe Gado èn ben kisi a krakti „foe a hori bere” èn meki Isak. So boen, gi a 100-jari owroe Abraham, „di ben de so boen leki dede” ini a tori foe meki pikin, te foe kaba „pikin ben meki gi en, ipi-ipi neleki den stari foe hemel”. — Hebrewsma 11:11, 12; Genesis 17:15-17; 18:11; 21:1-7.

20. Ala di den fositen tata no ben si a heri kontroe foe den pramisi foe Gado di a ben pramisi den, dan san den ben doe dan?

²⁰ Den getrow fositen tata dede sondro foe den si a heri kontroe foe den pramisi foe Gado gi den. Tokoe, „den ben si den [pramisi sani] foe farawe èn ben gi den odi èn den ben meki bekènti na poebliki taki den de freimdesma nanga wakaman ini a kondre”. Foeroe geslakti foe sma ben pasa bifo a Pramisi Kondre ben tron a famirigoedoe foe den bakapikin foe Abraham. Ma, den heri libi den fositen tata di ben frede Gado, ben oefen bribi ini den pramisi foe Jehovah. Bikasi noiti den ben lasi bribi, den sa kisi wan opobaka heri esi foe libi ini a grontapoe kontren foe a „foto” di Gado ben sreka na fesi gi den, a Messian Kownoekondre (Hebrewsma 11:13-16). Na a srefi fasi, bribi kan meki wi tan loyaal na Jehovah ala di kande wi no si a wantewante kontroe foe ala den froewondroe pramisi foe en. So srefi a bribi foe wi sa boeweigi wi foe gi jesi na Gado, so leki fa Abraham ben doe. Èn neleki fa a gi en bakapikin wan jeje famirigoedoe, na so wi kan jepi den pikin foe wi foe oefen bribi ini den pramisi foe Jehovah. — Hebrewsma 11:17-21.

Bribi prenspari gi kresten

21. Foe Gado kan feni wi boen ini a ten disi, san moesoe de toe ini na oefen di wi e oefen bribi?

²¹ A no de foe taki, dati moro sani de foe bribi leki foe abi froetrow ini a kontroe foe den pramisi foe Jehovah. Na a heri historia foe libisma, a ben de fanowdoe foe oefen bribi ini Gado na ala sortoe fasi efoe wi wani foe kisi a boen foe en. Paulus ben tjari kon na krin taki „sondro bribi a no kan taki wi plisi [Jehovah Gado] na wan boen fasi, bikasi a sma di e kon na Gado moesoe bribi taki a de èn taki a e kon tron wan sma di e gi paiman na en di e soekoe En serjoesoe” (Hebrewsma 11:6). Foe Jehovah kan feni wi boen ini a ten disi, wan sma moesoe oefen bribi ini Jesus Krestes èn ini a froeloesoe ofrandi di Gado ben gi nanga jepi foe en (Romesma 5:8; Galasiasma 2:15, 16). A de neleki fa Jesus Krestes srefi ben taki: „Gado ben lobi libisma sote taki a ben gi en wan enkri gebore Manpikin, so taki ibriwan sma di sori bribi na ini en, no ben sa pori, ma ben sa abi têgo libi. A sma di e oefen bribi ini a Manpikin abi têgo libi; a sma di e tranga jesi a Manpikin no sa gi a libi, ma na atibron foe Gado e tan na en tapoe.” — Johanes 3:16, 36.

22. Sortoe pramisi a Mesian Kownoekondre sa meki kon troe?

²² Jesus e prei wan prenspari rol ini a kontroe foe den pramisi foe Gado ini a tori foe a Kownoekondre di kresten e begi foe en (Jesaja 9:6, 7; Danièl 7:13, 14; Mateus 6:9, 10). So leki fa Petrus ben sori wi, dan a transfiguratie ben meki a profeiti wortoe foe a kon foe Jesus ini Kownoekondre makti nanga glori, kisi moro krakti. A Mesian Kownoekondre sa meki wan  tra pramisi foe Gado kon troe, bikasi Petrus ben skrifi: „Njoen hemel nanga njoen grontapoe de di wi e froewakti so leki a ben pramisi èn na drape regtfardikifasi sa de” (2 Petrus 3:13). Wan srefi sortoe profeititori ben kon troe di den djoe katiboman ini Babilon ben go baka na den mamakondre ini 537 b.G.T. ondro wan tiri nanga Serubabel leki granman èn Josua leki heipriester (Jesaja 65:17). Ma Petrus ben sori tapoe wan ten di ben moesoe kon ete te „den njoen hemel” — a hemel Mesian Kownoekondre — ben sa tiri tapoe „wan njoen grontapoe”, regtfardiki libisma libimakandra di e libi na a grontapoe disi. — Teki gersi Psalm 96:1.

23. Foe sortoe aksi foe boenfasi wi sa taki now?

²³ Leki loyaal foetoeboi foe Jehovah èn bakaman foe en lobi Manpikin, Jesus Krestes, wi ati e angri foe a pramisi njoen grontapoe foe Gado. Wi sabi taki a de krosibei èn wi abi a bribi taki ala den warti pramisi foe Jehovah sa kon troe. Foe wi tjari wisrefi na wan fasi di Gado sa feni boen, wi moesoe tranga wi bribi foe di wi e moksi na en boenfasi, sabi, dwengi wisrefi, horidoro, a gi di wi e gi wisrefi na a dini foe Gado, brada lobi nanga lobi. * Na a penti disi kande na aksi kan kon: Fa wi kan sori boenfasi? Èn fa a boenfasi foe wi sa de foe a boen foe tra sma, spesroetoe gi wi kresten kompe, di ben doe wan sani tapoe den pramisi foe Gado foe di den e oefen bribi?

[Foetoewortoe]

San na den piki foe joe?

□ Fa wi kan froeklari finifini san na „bribi”?

□ Sortoe eigifasi moesoe moksi na wi bribi, so leki fa 2 Petrus 1:5-7 e taki?

□ Sortoe krakti a transfiguratie foe Jesus moesoe abi tapoe wi bribi?

□ Sortoe eksempre foe bribi Abel, Abraham, Sara nanga tra sma foe owroeten ben gi?

[Aksi foe a tori disi]

[Prenki na tapoe bladzijde 23]

Joe sabi fa a transfiguratie foe Jesus kan abi krakti tapoe a bribi foe wan sma?