Fa wi ben sa kan moksi boenfasi na oen bribi?
Fa wi ben sa kan moksi boenfasi na oen bribi?
„Moksi na oen bribi boenfasi.” — 2 PETRUS 1:5.
1, 2. Foe san ede wi moesoe froewakti taki a pipel foe Jehovah e doe san boen?
ALA TEN Jehovah e doe sani na wan boen fasi. A e doe san de regtfardiki èn boen. Foe dati ede, na apostel Petrus ben kan taki foe Gado leki a sma di kari salfoe kresten ’nanga jepi foe En glori nanga boenfasi’. Soifri sabi foe a boen hemel Tata foe den ben sori den san ben de fanowdoe foe feti na baka wan libi foe a gi di den gi densrefi troetroe na a dini foe Gado. — 2 Petrus 1:2, 3.
2 Na apostel Paulus ben gi deki-ati na kresten foe „kon de sma di e waka baka Gado, leki lobi pikin” (Efeisesma 5:1). Neleki den hemel Tata, den anbegiman foe Jehovah moesoe doe san boen na ini ala situwâsi. Ma san na boenfasi?
San boenfasi wani taki
3. Fa den ben taki finifini san „boenfasi” wani taki?
3 Disiten wortoeboekoe e gi wan finifini froeklari foe „boenfasi” leki na „troetroe boen moraal; boen-ati”. A wani taki „doe reti èn prakseri reti; boen-ati foe eigifasi”. Wan sma nanga boenfasi de regtfardiki. Den ben froeklari finifini san boenfasi wani taki toe leki „akroederi wan markitiki foe san reti”. Gi kresten, a no de foe taki, a „markitiki foe san reti” na Gado e poti dati èn a e tjari dati kon na krin ini en Santa Wortoe, bijbel.
4. Sortoe eigifasi di den kari na 2 Petrus 1:5-7, kresten moesoe wroko tranga na den foe meki den gro?
4 Troe kresten e tjari den libi akroederi den regtfardiki markitiki foe Jehovah Gado èn den e doe wan sani tapoe den diri pramisi foe en foe di den e oefen bribi. Den e hori Petrus rai na prakseri toe: „Foe di leki wan sani di oenoe e doe foe oen sei oenoe e doe ala serjoesoe moeiti, foe moksi na oen bribi boenfasi, na oen boenfasi sabi, na oen sabi dwengi oensrefi, na oen dwengi oensrefi, horidoro, na oen horidoro a gi di oenoe e gi oensrefi na a dini foe Gado, na a gi di oenoe e gi oensrefi na a dini foe Gado brada lobi, na oen brada lobi, lobi” (2 Petrus 1:5-7). Wan kresten moesoe wroko tranga foe kweki den eigifasi disi. Disi no e pasa ini wan toe dei noso jari, ma wan heri libisma libi de fanowdoe foe e doe moeiti doronomo. We, moksi boenfasi na wi bribi, dati wawan na wan tjalensi kaba!
5. San na boenfasi te joe loekoe en foe a sei foe bijbel?
5 M. R. Vincent, wan man di e ondrosoekoe wortoe, e taki dati a fosi bodoi foe a Griki wortoe di den ben vertaal nanga „boenfasi” ben sori tapoe „boen srefisrefi na ala fasi”. Petrus ben gebroiki a meervoud foe a wortoe di a ben taigi kresten foe meki „den toemoesi moi sani”, noso boenfasi foe Gado bekènti na ala sei (1 Petrus 2:9). Te joe loekoe en foe a sei foe bijbel, den no e taki foe boenfasi leki wan eigifasi di no e doe noti, ma leki „moreel makti, moreel krakti, krakti foe sili”. Di a ben taki foe boenfasi, Petrus ben abi na prakseri a heri boen fasi na moreel sei di den ben moesoe sori, wan sani di den e froewakti foe foetoeboi foe Gado sori èn hori densrefi na dati. Ma, foe di wi de onvolmaakti, wi kan doe troetroe san boen ini Gado ai?
Onvolmaakti ma boen
6. Foe san ede wi kan taki dati wi kan doe san de boen ini Gado ai, ala di wi de onvolmaakti?
6 Wi kisi onvolmaaktifasi nanga sondoe foe wi papa nanga mama, so boen wi kan prakseri kande fa wi kan doe troetroe san boen ini Gado ai (Romesma 5:12). Wi abi Jehovah jepi fanowdoe troetroe efoe wi wani abi krin ati foe san boen prakseri, wortoe nanga doe kan komoto kon na doro. (Teki gersi Lukas 6:45.) Baka di a psalm singiman David, di ben abi berow, ben sondoe nanga Batseiba, a ben begi: „Meki na ini mi, srefi wan soifri ati, o Gado èn poti na ini mi wan njoen jeje, wan di de stanfaste” (Psalm 51:10). David ben kisi a pardon foe Gado èn a jepi di ben de fanowdoe foe feti baka wan boen fasi foe waka nanga libi. Foe dati ede, efoe wi ben doe wan serjoesoe sondoe, ma wi ben teki a jepi foe Gado èn den gemeente owroeman na wan berowfasi, dan wi kan drai go baka na wan boen pasi èn tan na tapoe. — Psalm 103:1-3, 10-14; Jakobus 5:13-15.
7, 8. (a) San de fanowdoe, efoe wi wani tan de boen? (b) Sortoe jepi kresten abi foe di den de boen?
7 Foe sondoefasi di wi kisi foe wi papa nanga mama, wi moesoe tan feti wan doronomo feti na inisei foe wi, foe doe san a pasi foe waka nanga libi foe boenfasi ben sa aksi foe wi. Efoe wi wani tan de boen, dan noiti wi kan gi pasi na wisrefi foe tron srafoe foe sondoe. Na presi foe dati, wi moesoe tron „srafoe foe regtfardikifasi”, ala ten e denki, taki èn e doe sani na wan boenfasi (Romesma 6:16-23). A no de foe taki dati den lostoe foe wi skin nanga den sondoe firi foe wi tranga, èn wi tanapoe na fesi wan strei na mindri den disi èn den boen sani di Gado e aksi foe wi. So boen, san wi moesoe doe?
8 Wan sani de seiker, wi moesoe waka baka a tiri foe Jehovah santa jeje noso wroko krakti. Foe dati ede wi moesoe poti prakseri na a rai foe Paulus: „Tan waka nanga jeje èn oenoe no sa doe no wan lostoe foe skin srefisrefi. Bikasi a skin ini a tori foe den lostoe foe en e go kontrari a jeje èn a jeje kontrari a skin; bikasi den disi de leki feanti foe makandra, so taki joisti den sani di oenoe ben sa wani doe, oenoe no e doe” (Galasiasma 5:16, 17). Ija, leki wan krakti foe regtfardikifasi, wi abi Gado jeje èn leki wan tiriman foe tjari wisrefi na wan boen fasi, wi abi en Wortoe. Wi abi a lobi jepi foe Jehovah organisâsi toe èn a rai foe „a getrow èn koni srafoe” (Mateus 24:45-47). So boen, wi kan feti wan feti nanga boen bakapisi kontrari sondoe firi (Romesma 7:15-25). A no de foe taki, dati efoe wan pori prakseri ben sa kon ini wi prakseri, wi moesoe poeroe en wantewante èn begi foe Gado jepi wi foe kakafoetoe gi iniwan tesi foe handri na wan fasi di no abi boenfasi. — Mateus 6:13.
Boenfasi èn wi prakseri
9. Sortoe fasi foe prakseri wan boen fasi foe tjari wisrefi e aksi?
9 Boenfasi e bigin nanga a fasi fa wan sma e denki. Foe kisi a boen-ati foe Gado, wi moesoe prakseri foe sani di regtfardiki, boen èn di de nanga boenfasi srefisrefi. Paulus ben taki: „Brada, te foe kaba, ala san troe, ala san de foe serjoesoe belang, ala san regtfardiki, ala san krin, ala san switi, ala san boen foe jere, efoe wan boen maniri de, efoe wan sani de foe prèise, na ala den sani dati, oenoe moesoe tan poti memre” (Filipisma 4:8). Wi moesoe poti wi prakseri tapoe sani di regtfardiki, sani di krin èn ala sani di no abi boenfasi no moesoe hari wi. Paulus ben taki: „Den sani di oenoe ben leri so boen, ben teki den èn di oenoe ben jere èn ben si foe mi, doe den sani dati.” Efoe wi de neleki Paulus — boen ini prakseri, taki nanga handri — dan wi sa de boen kompe èn heri boen eksempre ini kresten libifasi, èn ’a Gado foe vrede sa de nanga wi’. — Filipisma 4:9.
10. Fa a doe di wi e doe 1 Korentesma 14:20 ini wi eigi libi sa jepi wi foe tan de boen?
10 Efoe a de a winsi foe wi foe tan boen ini wi prakseri èn na so fasi plisi wi hemel Tata, dan a de fanowdoe taki wi poti a rai foe Paulus ini wi libi: „No tron jongoe pikin na ini krakti foe froestan sani, ma de njoenjoen pikin na ini san ogri; ma na a tra sei, de bigisma na ini froestan” (1 Korentesma 14:20). Disi wani taki dati wi leki kresten no e soekoe sabi foe ogridoe noso ondrofeni ini ogridoe. Na presi foe wi gi wi prakseri na okasi foe kon de takroe na a fasi disi, dan na wan konifasi wi e teki a bosroiti foe tan sondro ondrofeni èn leki beibi di no sabi noti na a kontren disi. Na a srefi ten, wi e froestan krinkrin taki immoraliteit nanga ogridoe na sondoefasi ini Gado ai. Wan soifri lostoe di komoto na wi ati foe plisi en, foe di wi boen, sa de wini gi wi, foe di a sa boeweigi wi foe tan farawe foe doti fasi foe ontspanning èn tra krakti foe a grontapoe disi di didon ini a makti foe Satan èn di e wroko na wan kroektoe fasi tapoe a froestan foe wi. — 1 Johanes 5:19.
Boenfasi èn a taki foe wi
11. Sortoe fasi foe taki, a boen di wi boen e aksi foe wi èn ini a tori disi, sortoe eksempre wi abi ini Jehovah Gado nanga Jesus Krestes?
11 Efoe wi prakseri boen, dan disi ben sa moesoe abi wan dipi krakti tapoe san wi e taki. A boen di wan sma boen e aksi foe sma taki den krin, gosontoe, troe èn e bow sma (2 Korentesma 6:3, 4, 7). Jehovah na „a Gado foe waarheid” (Psalm 31:5). A de getrow ini ala den sani di a e doe èn den pramisi foe en de seiker, foe di a no kan lei (Numeri 23:19; 1 Samuèl 15:29; Titus 1:2). A Manpikin foe Gado, Jesus Krestes, „foeroe nanga no-froedini boenfasi nanga waarheid”. Di a ben de na grontapoe, ala ten a ben taki a waarheid so leki fa a ben kisi dati foe en Tata (Johanes 1:14; 8:40). Moro ete, Jesus „no ben doe no wan sondoe èn no wan triki den ben feni ini en mofo” (1 Petrus 2:22). Efoe wi de troetroe foetoeboi foe Gado nanga Krestes, wi taki sa de troe èn wi fasi foe tjari wisrefi sa de opregti, neleki „waarheid di tai lontoe wi djonkoe.” — Efeisesma 5:9; 6:14.
12. Gi sortoe fasi foe taki wi moesoe komoto na pasi efoe wi wani de boen?
12 Efoe wi boen, son sortoe fasi foe taki de di wi no sa gebroiki. Wi sa meki a rai foe Paulus tiri wi: „Meki ala takroe bitafasi nanga atibron nanga babari nanga skempi taki, poeroe komoto na oen mindri makandra nanga ala takroefasi.” „Meki den no taki srefi na oenoe mindri foe hoeroedoe nanga ala sortoe doti libi noso gridifasi, so leki a e fiti den santawan; so srefi toe no wan sjen libifasi, no wan law takitaki, no wan fisti fasi foe tjari oensrefi, no dondon taki, no doti taki, sani di no de boen maniri, ma moro boen a taki foe tangi” (Efeisesma 4:31; 5:3, 4). A sa de wan kowroe-ati gi tra sma foe de na ini wi mindri, bikasi wi regtfardiki ati e poesoe wi foe no taki na wan fasi di no de foe kresten.
13. Foe san ede kresten moesoe basi a tongo?
13 Wan winsi foe plisi Gado èn taki sani di boen sa jepi wi foe basi wi tongo. Foe di wi kisi sondoe firi wi alamala e misi ini wortoe ten na ten. Tokoe, a disipel Jakobus e taki dati „efoe wi e poti ton ini a mofo foe asi”, den e go na ala sei pe wi wani den go sondro trangajesi. Foe dati ede, wi moesoe wroko tranga foe poti wan ton gi a tongo èn proeberi foe gebroiki en na boen fasi nomo. Wan tongo di sma no man basi „na wan grontapoe foe no regtfardikifasi” (Jakobus 3:1-7). Ibri sortoe takroe fasi foe a kroektoe grontapoe disi abi foe doe nanga a tongo di sma no man basi. A tongo de frantiwortoe foe den sortoe sani di e doe sma ogri, so leki a gi foe falsi kotoigi, skempi nanga gongosa (Jesaja 5:20; Mateus 15:18-20). Èn te wan oproeroe tongo e taki skempi, srapoe noso gongosa taki, dan a foeroe nanga vergif di e tjari dede kon. — Psalm 140:3; Romesma 3:13; Jakobus 3:8.
14. Gi sortoe toe fasi foe markitiki ini a tori foe taki wan kresten moesoe tan farawe?
14 So leki fa Jakobus e sori, wi ben sa de toefesi sma efoe „wi e blesi Jehovah” foe di wi e taki boen foe Gado, ma baka ten wi no e gebroiki wi tongo joisti, foe di wi „e floekoe sma”, begi taki ogri kon na den tapoe. Fa a de wan sondoe foe sidon singi prèise singi gi Gado èn baka dati wi e go na dorosei èn taki takroe foe kompe bribiman! Switi nanga bita watra no man koekoe kon na tapoe foe a srefi peti. Efoe wi e dini Jehovah, tra sma abi a reti foe froewakti taki wi e taki boen sani na presi foe wortoe di froeferi. Meki foe dati ede wi tegoe foe takroe taki èn soekoe foe taki sani di sa de boen gi den sma di wi abi demakandra nanga den èn bow den na jeje fasi. — Jakobus 3:9-12.
Boenfasi èn den sani di wi e doe
15. Foe san ede a de so prenspari foe tan farawe foe a teki foe triki pasi?
15 Foe di a taki èn a prakseri foe kresten moesoe de boen, fa a de nanga den doe foe wi? Foe de boen ini a fasi fa wi e tjari wisrefi na a wan enkri fasi foe meki Gado feni wi boen. No wan foetoeboi foe Jehovah kan drai en baka gi boenfasi èn go teki triki bidrigifasi foe handri èn abi a prakseri taki Gado ben sa feni so wan sani boen. Odo 3:32 e taki: „Bika a sma nanga triki de wan tegoe sani gi Jehovah, ma en froetrow demakandra de nanga den opregtiwan”. Efoe wi e warderi wi demakandra nanga Jehovah Gado, den wortoe dati di e meki sma go denki, moesoe tapoe wi foe go prakseri foe doe ogri noso foe doe wan sani di lai nanga triki. We, na mindri den seibi sani di de wan tegoe sani gi a sili foe Jehovah joe abi „wan ati di e meki ogri plan”! (Odo 6:16-19) Meki wi tan farawe doronomo foe den sortoe doe dati èn doe san boen, foe a boen foe wi kompe libisma èn a glori foe wi hemel Tata.
16. Foe san ede kresten no moesoe abi foe doe nanga no wan hoigri doe?
16 A sori foe boenfasi e aksi taki wi de eerlijk (Hebrewsma 13:18). Wan sma di e hoigri èn di den doe foe en no de akroederi en wortoe, no abi boen fasi. A Griki wortoe di den e vertaal nanga „hoigriman” (hy·po·kri·tesʹ), wani taki „wan sma di e piki” èn a e sori toe tapoe wan preiman tapoe a podium. Foe di den Griki nanga Romen preiman ben weri masker, den ben kon gebroiki a wortoe disi leki wan metafoor (wan sortoe agersitori) gi wan sma di e doe neleki sani de so. Hoigriman na „sma di no de getrow”. (Teki gersi Lukas 12:46 nanga Mateus 24:50, 51.) Hoigrifasi (hy·poʹkri·sis) kan sori toe tapoe ogridoe nanga trikifasi (Mateus 22:18; Markus 12:15; Lukas 20:23). Fa a de wan sari sani te wan sma di e froetrow trawan e ondrofeni kori nanga switi lafoefesi, switi taki nanga doe di de sani nomo di na soso skèin! Ma, na a tra sei a e meki wi ati firi boen te wi sabi taki wi abi foe doe nanga kresten di warti foe wi froetrow den. Èn Gado e blesi wi foe di wi de boen èn sondro hoigrifasi. En boen-ati de na tapoe den sma di e sori „brada lobi sondro hoigrifasi” èn di abi „bribi sondro hoigrifasi”. — 1 Petrus 1:22; 1 Timoteus 1:5.
Boenfasi na boen-atifasi di e wroko
17, 18. Fa wi sa handri nanga trawan efoe wi e sori a froktoe foe a jeje, boenfasi?
17 Efoe wi e moksi boenfasi na wi bribi, dan wi sa meki moeiti foe no prakseri, taki èn doe sani di Gado no man feni boen. Ma, a sori foe kresten boenfasi e aksi toe taki wi sori boen-atifasi di e wroko. Te joe loekoe en boen, dan den ben taki finifini foe boenfasi leki boen-atifasi. Èn boen-atifasi na wan froktoe foe a santa jeje foe Jehovah, no a wroko foe soso libisma moeiti (Galasiasma 5:22, 23). Te wi e sori a froktoe foe a jeje foe boen-atifasi, wi sa abi a joisti fasi foe denki foe tra sma èn foe prèise den foe den boen eigifasi foe den nanga ala di den abi onvolmaaktifasi. Den ben dini Jehovah na wan getrowfasi foeroe jari? Dan wi moesoe sori den respeki èn taki boen foe a dienst foe den gi Gado. Wi hemel Tata e poti prakseri tapoe a lobi di den e sori gi en nen èn den boen wroko foe bribi èn so wi moesoe doe toe. — Nehemia 13:31b; Hebrewsma 6:10.
18 Boenfasi e meki wi abi pasensi, e froestan sma, e abi sari-ati. Efoe wan kompe anbegiman foe Jehovah e ondrofeni banawtoe noso lasi-ati, dan wi sa taki na wan fasi di e gi trowstoe èn proeberi foe gi en wan pikinso korostoe firi, so leki fa wi lobi hemel Tata e gi wi wan korostoe firi (2 Korentesma 1:3, 4; 1 Tesalonikasma 5:14). Wi e sori taki wi e firi gi den sma di de nanga sari, kande foe di den lasi wan lobiwan ini dede. Efoe wi kan doe ala san wi man foe froelekti a pina di sma e pina, wi sa doe dati, bikasi wan jeje di boen e dwengi sma foe doe sani na wan lobi èn boen-ati fasi.
19. Fa trawan sa handri kande nanga wi efoe wi boen ini prakseri, wortoe nanga doe?
19 Neleki fa wi e blesi Jehovah foe di wi e taki boen foe en, na so tra sma sa blesi wi kande, efoe wi de boen ini prakseri, wortoe nanga doe (Psalm 145:10). Wan koni odo e taki: „Blesi de gi na ede foe a sma di de regtfardiki, ma foe a sei foe a mofo foe den ogrisma, dati e tapoe ogridoe” (Odo 10:6). Wan ogri èn takroe sma e mankeri a boenfasi di ben sa meki tra sma lobi en. A e koti san a e sai, bika sma no kan blesi en nanga krin ati foe di den e taki boen foe en (Galasiasma 6:7). Fa disi de krinkrin moro betre gi den sma di e prakseri, taki èn e doe na fasi di boen leki foetoeboi foe Jehovah! Den e wini a lobi, froetrow nanga respeki foe tra sma, di e kisi a firi foe blesi den èn taki boen foe den. Moro fara, a boenfasi foe Gado di den abi leki bakapisi blesi foe Jehovah di pasa ala warti sani. — Odo 10:22.
20. Sortoe krakti prakseri, taki nanga doe di boen, kan abi tapoe a gemeente foe Jehovah pipel?
20 Prakseri, taki nanga doe di boen, sa de seiker foe a boen foe a gemeente foe Jehovah pipel. Te kompe bribiman tjari respekifasi foe prakseri go abra na makandra, brada lobi e kon de bogobogo na den mindri (Johanes 13:34, 35). Taki di boen, di abi na ini toe serjoesoe prèise nanga deki-ati gi trawan, e meki wan waran firi foe wrokomakandra èn foe wánfasi de (Psalm 133:1-3). Èn doe di boen di e waran sma ati, e gi trawan faja foe doe wan sani na tapoe na wan srefi fasi. San moro prenspari leki dati, a sori foe kresten boenfasi abi leki bakapisi a boen-ati èn blesi foe wi boen hemel Tata, Jehovah. Meki foe dati ede a tron a marki foe wi di wi wani doro, foe doe wan sani tapoe den diri pramisi foe Gado foe di wi e oefen bribi. Èn foe troe meki wi doe ala serjoesoe moeiti foe moksi boenfasi na wi bribi.
San na den piki foe oenoe?
□ Fa joe ben sa taki finifini san „boenfasi” wani taki èn foe san ede onvolmaakti sma kan de boen?
□ Sortoe prakseri, boenfasi e tjari kon?
□ Fa boenfasi moesoe abi krakti tapoe wi taki?
□ Sortoe krakti, boenfasi moesoe abi tapoe den doe foe wi?
□ San na wan toe winimarki foe a boen di wan sma boen?
[Aksi foe a tori disi]
[Prenki na tapoe bladzijde 29]
Foe di switi nanga bita watra no man koekoe kon na tapoe foe a srefi fonten, tra sma e froewakti taki den foetoeboi foe Jehovah sa taki soso boen sani