Kresten èn libisma libimakandra ini a ten disi

„Foe mi ede no wan nâsi no sa wani si oenoe na ai.” — MATEUS 24:9.

1. San ben de wan spesroetoe marki foe a krestendom?

DE APARTI foe grontapoe ben de wan spesroetoe marki foe den fosi kresten. Di Krestes ben begi en hemel Tata, Jehovah, a ben taki foe den disipel foe en: „Mi ben gi den a wortoe foe joe, ma grontapoe no ben wani si den na ai, bika den no de wan pisi foe grontapoe, neleki fa mi no de wan pisi foe grontapoe” (Johanes 17:14). Di den ben seni kari Jesus foe kon na fesi Pontius Pilatus, a ben taki: „Mi kownoekondre a no wan pisi foe a grontapoe disi” (Johanes 18:36). Den Kresten Griki Boekoe nanga historiaman e taki dati a troe taki a krestendom foe fosi ben de aparti foe grontapoe.

2. (a) Sani ben sa kenki baka wan pisi ten ini a demakandra foe den bakaman foe Jesus nanga grontapoe? (b) A Kownoekondre foe Jesus ben sa kon nanga jepi foe a teki di den nâsi ben sa teki a krestendom?

² Jesus ben tjari baka ten kon na krin taki wan kenki ben sa kon ini a demakandra foe den bakaman foe en nanga grontapoe èn taki a Kownoekondre foe en ben sa kon nanga jepi foe a teki di grontapoe ben sa teki a krestendom? Nôno. Noti di den bakaman foe en ben moesoe skrifi nanga jepi foe santa jeje baka di Jesus dede, ben taki pikinso srefi foe so wan sani  (Jakobus 4:4 [di skrifi sjatoe bifo 62 G.T.]; 1 Johanes 2:15-17; 5:19 [di skrifi wan sani foe 98 G.T.]). Kontrari foe dati, bijbel e poti a „denoja” foe Jesus èn a kon di a ben sa „kon” ini Kownoekondre makti, makandra nanga „a bosroiti foe a seti foe sani”, di e doro en heimarki ini a „kaba” noso pori foe en (Mateus 24:3, 14, 29, 30; Danièl 2:44; 7:13, 14). Ini a marki di Jesus ben gi foe en pa·rou·siʹa, noso denoja, a ben taki foe den troe bakaman foe en: „Dan sma sa gi oenoe abra na banawtoe èn kiri oenoe èn foe mi ede no wan nâsi no sa wani si oenoe na ai.” — Mateus 24:9.

Troe kresten ini a ten disi

3, 4. (a) Fa wan lomsoe encyclopedie e taki foe den fosi kresten? (b) Nanga sortoe wortoe den e taki na a srefi fasi foe Jehovah Kotoigi leki den e taki foe den fosi kresten?

³ Sortoe kerkigroepoe ini a ten disi froedini gi ensrefi a nen foe de getrow na kresten gronleri èn foe de aparti foe a grontapoe disi, ala di sma no wani si den memre foe en na ai èn e froefolgoe den? We, sortoe kresten organisâsi di de na heri grontapoe, e fiti na ala fasi na san historia skrifi foe den fosi kresten? Ini a tori disi a New Catholic Encyclopedia e taki: „A fosi bigin foe a kresten libimakandra, ala di sma ben si den fosi leki soso wan tra sekte ini a djoe libimakandra, ben sori taki den ben de so aparti ini den leri foe den gado tori èn moro spesroetoe ini a faja foe den memre foe den, di ben de leki kotoigi foe Krestes ’ini heri Judea nanga Samaria èn srefi te na den fara presi foe grontapoe’ (Tori foe den Apostel 1.8).” — Pisi 3, bladzijde 694.

⁴ Loekoe den wortoe „ben si den . . . leki soso wan tra sekte”, „de so aparti ini den . . . leri foe den”, „faja . . . leki kotoigi”. Èn loekoe now fa a srefi encyclopedie e taki foe Jehovah Kotoigi: „Wan sekte . . . Kotoigi abi na overtoigi krinkrin taki na soso wan toe jari libi foe a kaba foe grontapoe kon. A krakti bribi disi sori foe a de a moro tranga krakti a baka a faja foe den sondro foe den weri. . . . A moro prenspari froeplekti foe ibri memre foe a sekte de, foe gi kotoigi foe Jehovah, foe di a e bariwroko gi En Kownoekondre di de krosibei. . . . Den e si bijbel leki a wan enkri fonten foe den foe bribi èn markitiki foe tjari densrefi . . . Foe wan sma de wan troe Kotoigi a moesoe preiki nanga boen bakapisi awansi fa no fa.” — Pisi 7, bladzijde 864, 865.

5. (a) Ini a tori foe san, den leri foe Jehovah Kotoigi de so aparti? (b) Gi eksempre di e sori taki a bribi foe Jehovah Kotoigi de ini akroederi nanga bijbel.

⁵ Na sortoe fasi den leri foe Jehovah Kotoigi de so aparti? A New Catholic Encyclopedia e kari wan toe foe den fasi: „Den [Jehovah Kotoigi] kroetoe a Dri-wanfasi leki wan falsi anbegi foe heidensma . . . Den e si Jesus leki a moro bigi Kotoigi foe Jehovah, ’wan gado’ (so leki den e vertaal Johanes 1.1), di de na ondro no wan sma moro leki na Jehovah wawan. . . . A dede leki wan libisma èn ben kon na libi baka leki wan jeje Manpikin di no man dede. A Pina foe en nanga en dede ben de a prijs di a pai foe a libisma famiri kisi a reti baka foe libi foe têgo na grontapoe. A no de foe taki dati a ’bigi ipi’ (Ap 7.9) foe troe Kotoigi e howpoe tapoe wan grontapoe Paradijs; soso 144.000 getrow sma (Ap 7.4; 14.1, 4) sa njanboen foe hemel glori nanga Krestes. Den ogrisma sa kisi wan krinkrin pori. . . . Dopoe — di Kotoigi e doe foe di den e doekroen sma go na ondro watra . . . [de] wan dorosei simbôl taki den gi densrefi na a dini foe Jehovah Gado. . . . Jehovah Kotoigi ben kon na ini njoensoe, foe di den e weigri foe teki broedoe . . . Ini a trowlibi foe den, den e hori densrefi finifini na seks nanga wan boen moraal.” Jehovah Kotoigi de kande so aparti ini den tori disi, ma a fasi foe denki di den abi ini ala den tori disi abi wan boen fondamenti na tapoe bijbel. — Psalm 37:29; Mateus 3:16; 6:10; Tori foe den Apostel 15:28, 29; Romesma 6:23; 1 Korentesma 6:9, 10; 8:6; Openbaring 1:5.

6. Sortoe sei Jehovah Kotoigi ben tan teki? Foe san ede?

⁶ Ini 1965 (kande a jari di na artikel ben skrifi) a lomsoe boekoe disi ben taki moro fara taki „den Kotoigi no ben si ete taki den ben de  foe a grontapoe libimakandra pe den ben libi na ini”. A gersi taki a skrifiman ben denki taki baka wan pisi ten èn te a nomroe foe Jehovah Kotoigi ben sa kon moro bigi èn ben sa teki „moro nanga moro eigifasi foe wan kerki di de tra fasi leki wan sekte”, den Kotoigi ben sa tron wan pisi foe a grontapoe disi. Ma dati no ben sori foe de so. Ini a ten disi, ala di den de fo tron moro foeroe leki ini 1965, Jehovah Kotoigi ben hori steifi na a fasi foe den foe denki ini a tori foe a grontapoe disi. „Den no de wan pisi foe grontapoe” neleki fa Jesus „no [ben de] wan pisi foe grontapoe”. — Johanes 17:16.

Den de aparti ma den no abi feantifasi

7, 8. San de troe foe Jehovah Kotoigi ini a ten disi, so leki dati ben troe foe den fosi kresten?

⁷ Di Robert M. Grant ben skrifi ini en boekoe Early Christianity and Society, a ben teki den wortoe foe a di foe toe jarihondro apologist (man di ben feti gi a bribi), Justinus Martyr taki, di ben skrifi sani foe krin den kresten: „Efoe kresten ben de sma di ben opo densrefi kontrari makti, den ben sa go kibri densrefi, so taki den ben man doro a marki foe den. . . . Den na den moro boen sma di e wroko makandra nanga keiser, foe meki vrede kon èn foe meki ala sani waka boen.” Na a srefi fasi, sma sabi Jehovah Kotoigi ini a ten disi na heri grontapoe, leki sma di lobi vrede èn borgroe di e tjari densrefi na wan boenfasi. Tirimakti, osortoe wan toe, sabi taki den no abi foe frede Jehovah Kotoigi.

⁸ Wan Noord-Amerkan man di e skrifi ede artikel, ben skrifi: „Wan sma moesoe abi wan fasi foe denki di no e froedrage sani èn di e prakseri takroe foe sma, foe bribi taki Jehovah Kotoigi de wan kefar gi iniwan politiek tiri; den na sma di no e soekoe foe trowe makti èn den lobi vrede so leki wan kerkigroepoe lobi vrede.” Jean-Pierre Cattelain e skrifi ini en boekoe L’objection de consciences (Konsensi fonfon): „Den Kotoigi e saka densrefi volmaakti na lanti ondro èn moro foeroe den e gi jesi na den wet; den e pai belasting èn den no e proeberi foe blaka a tiri, kenki noso pori den, bika den no e broko den ede nanga den afersi foe a grontapoe disi.” Cattelain e go doro foe taki moro fara taki soso efoe Lanti wani a libi foe Jehovah Kotoigi, di den gi krinkrin na Gado abra, den e weigri foe gi jesi. Ini a tori disi den gersi den fosi kresten boen. — Markus 12:17; Tori foe den Apostel 5:29.

Den tirigroepoe no ben froestan den

9. San na wán toemoesi aparti difrenti na mindri den fosi kresten èn disiten lomsoe, ini a tori foe de aparti foe grontapoe?

⁹ Moro foeroe foe den Romen keiser no ben froestan den fosi kresten èn den ben froefolgoe den. The Epistle to Diognetus, di son sma denki taki a de foe a di foe toe jarihondro G. T., e sori foe san ede èn a e tjari kon na krin: „Kresten e libi ini grontapoe, ma den no de wan pisi foe grontapoe èn den no abi foe doe nanga en toe.” Na a tra sei, a di foe Toe Konmakandra foe a Vaticaan, ben taki ini en Kerkileri Reglementi foe a Kerki, taki lomsoesma moesoe „soekoe a kownoekondre foe Gado, foe di den e kisi foe doe nanga grontapoe afersi” èn „e wroko foe meki a grontapoe foe inisei kon santa”.

10. (a) Fa den tirigroepoe ben si den fosi kresten? (b) Fa sma e si Jehovah Kotoigi nofo tron èn san den e doe?

¹⁰ Historiaman E. G. Hardy e taki dati den lomsoe keiser ben si den fosi kresten leki „sma di ben wisiwasi pikinso èn nanga faja”. A Fransi historiaman Étienne Trocmé e taki foe „a wisiwasi di den Griki nanga Romen lantiman di ben kisi boen skoro, ben tan wisiwasi san den ben si leki wan toemoesi freimde Owstoe sekte [den kresten]”. Brifi di Plinius a Moro Jongoewan, Romen tiriman foe Bitania, nanga keiser Trajanus ben skrifi gi makandra, e sori taki moro foeroe den tirigroepoe no ben sabi fa a krestendom ben de troetroe. Na a srefi fasi ini a ten disi, nofo tron sma no e froestan Jehovah Kotoigi èn den tirigroepoe foe grontapoe e wisiwasi den srefi. Ma disi no e froewondroe den Kotoigi èn den no e lasi-ati foe disi toe. — Tori foe den Apostel 4:13; 1 Petrus 4:12, 13.

 „Ala sei sma e taki sani kontrari en”

11. (a) San den ben taki foe den fosi kresten èn san den ben taki foe Jehovah Kotoigi? (b) Foe san ede Jehovah Kotoigi no e teki prati na politiek?

¹¹ Den ben taki foe den fosi kresten: „Foe a sekte disi, wi sabi taki ala sei sma e taki sani kontrari en” (Tori foe den Apostel 28:22). Ini a di foe toe jarihondro G.T., a heidenman Selsus, ben taki dati krestendom ben hari soso den moro lagi pisi foe libisma libimakandra. A srefi sani den e taki toe foe Jehovah Kotoigi taki „moro foeroe den e komoto na den wisiwasi sma foe wi libisma libimakandra”. Kerki historiaman Augustus Neander ben skrifi taki „den ben taki foe den kresten leki sma di grontapoe no e teri èn di sma no ben man gebroiki gi no wan afersi foe a libi; . . . èn sma ben aksi taki, efoe ala sma ben de neleki den kresten, san ben sa pasa nanga den afersi ini a libi?” Bika Jehovah Kotoigi e hori densrefi foe no teki prati na politiek, den toe nofo tron e kisi a nen taki den na sma di joe no man gebroiki ini a libisma libimakandra. Ma fa den ben kan de sma di e feti gi politiek afersi èn na a srefi joeroe de sma di e feti gi Gado Kownoekondre leki a wan enkri howpoe gi libisma? Jehovah Kotoigi e gi jesi na den wortoe foe na apostel Paulus: „Teki prati ini pina leki wan toemoesi boen sroedati foe Krestes Jesus. No wan sroedati di de na dienst, e go moksi ensrefi na ini afersi foe den borgroe, foe di a marki foe en na foe satisferi a sma di ben teki en na dienst.” — 2 Timoteus 2:3, 4, Revised Standard Version, wan boekoe di ala kerki makandra skrifi.

12. Ini sortoe prenspari tori foe de aparti, Jehovah Kotoigi e gersi den fosi kresten?

¹² Profesor K. S. Latourette e skrifi ini en boekoe A History of Christianity (A historia foe a krestendom): „Wan foe den sani di den fosi kresten ben de tra fasi na ini leki a Græco-Romen grontapoe, ben de a teki di den no ben teki prati na orlokoe. Ini den fosi dri jarihondro no wan sani di skrifi foe kresten èn di doro a ten foe wi, ben gi kresten pardon foe teki prati na orlokoe.” A boekoe foe Edward Gibbon, The History of the Decline and Fall of the Roman Empire e taki: „A no ben man, taki kresten sondro foe libi wan moro santa wroko, ben kan teki a ròl foe sroedati, lantiman noso kownoe.” Na a srefi fasi Jehovah Kotoigi e teki wan posisi foe tan dorodoro neutraal èn den e waka baka den bijbel gronleri di skrifi na Jesaja 2:2-4 èn na Mateus 26:52.

13. Foe sortoe sani den e kragi Jehovah Kotoigi, ma san troetori e sori?

¹³ Den feanti foe Jehovah Kotoigi e kragi den taki den e broko osofamiri. A troe taki kefal de foe osofamiri di ben prati èn di wan noso moro foe den memre ben tron Jehovah Kotoigi. Jesus ben taki na fesi dati disi ben sa pasa (Lukas 12:51-53). Ma nomroe foe lantiboekoe e sori taki trow di e broko foe a reide disi, na wan sani di no e pasa foeroe. Na mindri Jehovah Kotoigi na Fransikondre, foe eksempre, a de so taki gi ibri dri trowpaar joe abi wan trowpaar di abi wan trowpatna di no de wan Kotoigi. Ma tokoe a nomroe foe brokotrow na mindri den trowlibi disi foe wan Kotoigi nanga wan sma di no de wan Kotoigi, no de moro hei leki a gemiddelde nomroe foe Fransikondre. Foe san ede? Den apostel Paulus nanga Petrus ben gi kresten di trow nanga sma di no de na bribi, a koni rai di skrifi nanga jepi foe santa jeje èn Jehovah Kotoigi e doe moeiti foe waka baka den wortoe foe den (1 Korentesma 7:12-16; 1 Petrus 3:1-4). Efoe wan moksi trowlibi e broko, dan moro foeroe na a patna di no de wan Kotoigi, e doe a fosi stap. Na a tra sei, foeroe doesoen nanga doesoen trowlibi ben kisi kibri bika den trowpatna ben tron Jehovah Kotoigi èn ben bigin foe poti bijbel gronleri ini den libi.

Den na kresten, den a no sma di e bribi ini wan Dri-wanfasi

14. Foe sortoe sani den ben kragi den fosi kresten èn foe san ede a de wan sani di e gi foe lafoe?

¹⁴ Wan sani di e gi foe lafoe na disi taki ini a Romen Grontapoemakti, wan foe den sani di den ben kragi den fosi kresten foe dati, ben de taki den ben de sma di no ben bribi ini Gado. Dr. Augustus Neander e skrifi: „Den sma di e  weigri foe erken den gado foe den heiden, atheïstsma, . . . ben de a nen di den kresten ben kisi moro foeroe foe sma.” Fa a de wan freimde sani taki heidensma di no ben anbegi „no wan gado, ma den wrokosani di libisma anoe meki, oedoe nanga ston”, ben gi kresten, di ben anbegi a libi Mekiman èn no den foeroe gado, a dreiginen foe atheïstsma. — Jesaja 37:19.

15, 16. (a) San son kerkisma ben taki foe Jehovah Kotoigi, ma sortoe aksi disi e meki kon? (b) San e sori taki Jehovah Kotoigi na troetroe kresten?

¹⁵ So a de wan sani di e gi foe lafoe toe, taki ini a ten disi son heimakti ini krestenhèit e weigri foe erken taki Jehovah Kotoigi na kresten. Foe san ede? Foe di den Kotoigi e trowe a Dri-wanfasi. So leki fa a krestenhèit e skrifi finifini, foe di den e prakseri sani na fesi foe sma sondro foe ondrosoekoe sani, dan „den sma di e teki Krestes leki Gado, na den na kresten”. Kontrari foe disi, wan disiten wortoeboekoe, e taki foe a zelfstandig naamwortoe „kresten” leki „wan sma di e bribi ini Jesus Krestes èn di e waka baka den leri foe en” èn „krestendom” leki „wan fasi foe bribi di abi en fondamenti na tapoe den leri foe Jesus Krestes èn a bribi taki a ben de a manpikin foe Gado.” Sortoe groepoe den wortoe disi, di e taki finifini foe sani, e fiti moro boen?

¹⁶ Jehovah Kotoigi e teki Jesus en eigi kotoigi ini a tori foe soema a de. A ben taki: „Mi na Gado Manpikin”, èn no „Mi na Gado a Manpikin”. (Johanes 10:36; teki gersi Johanes 20:31.) Den e teki den wortoe foe na apostel Paulus di skrifi nanga jepi foe santa jeje èn di e taki foe Krestes: „Di, ala di a ben de na a fasi foe Gado, no ben si, foe de a srefi leki Gado, leki wan sani di moesoe teki nanga tranga” * (Filipisma 2:6, The New Jerusalem Bible). A boekoe The Paganism in Our Christianity (A heidenfasi ini a krestendom foe wi) e taki: „Jesus Krestes noiti ben kari so wan sani [wan Dri-wanfasi, pe ala sma de a srefi leki a trawan], èn na no wan presi ini a Njoen Testamenti a wortoe ’Dri-wanfasi’ de foe feni. Drihondro jari baka a dede foe wi Masra fosi a Kerki ben teki a prakseri dati; èn a roetoe foe a prakseri de krinkrin wan heiden sani.” Jehovah Kotoigi e teki a bijbel leri di abi foe doe nanga Krestes. Den na kresten, den a no sma di e bribi ini wan Dri-wanfasi.

Den no e moksi densrefi nanga tra kerki

17. Foe san ede Jehovah Kotoigi no e wroko makandra nanga kerkigroepoe noso bribigroepoe di moksi kon na wán?

¹⁷ Toe tra sani di den e kragi foe Jehovah Kotoigi, de taki den e weigri foe teki prati ini kerkigroepoe di moksi kon na wán èn taki den e doe san den e kari „a wroko foe meki disipel foe di den e dwengi den sma”. Den ben kragi den fosi kresten toe foe den toe sani disi. Krestenhèit, nanga den lomsoe, ortodox nanga anitri memre, sondro tweifri na wan pisi foe a grontapoe disi. Neleki Jesus, Jehovah Kotoigi „no de wan pisi foe grontapoe” (Johanes 17:14). Fa den ben kan kon de wán nanga kerki organisâsi, nanga jepi foe bribigroepoe di moksi kon na wán, di e horibaka gi leri nanga bribi di no de wan kresten sani?

18. (a) Foe san ede sma no man kroetoe Jehovah Kotoigi foe di den e taki dati den wawan abi a troe relisi? (b) Sortoe sani den lomsoesma no abi, ala di den e bribi taki den abi a troe relisi?

 ¹⁸ Soema abi a reti foe kroetoe Jehovah Kotoigi foe di den e bribi, neleki den fosi kresten, taki den wawan abi a wan enkri troe relisi? Srefi a Lomsoe Kerki, ala di na wan hoigrifasi, e taki dati a e wroko makandra nanga den moksi kerkigroepoe, tokoe e meki bekènti: „Wi e bribi taki a wan enkri troe relisi disi e tan de ini a Lomsoe nanga Apostel Kerki, di Masra Jesus ben gi a wroko foe panja disi na mindri ala sma, di a ben taigi den apostel foe en: ’Go foe dati èn meki disipel foe ala nâsi.’” (Vaticaan Konmakandra, wan di foe toe, „Froeklari foe kerki fri”). Ma a de krin, taki so wan bribi no de nofo foe gi lomsoesma a krakti foe abi wan faja sondro foe weri foe go doro foe meki disipel.

19. (a) Sortoe sani Jehovah Kotoigi abi a fasti bosroiti foe doe èn nanga sortoe boeweigi foe ati? (b) San wi sa go ondrosoekoe ini na artikel di e kon now?

¹⁹ Jehovah Kotoigi abi a faja dati. Den abi a fasti bosroiti foe tan gi kotoigi, so langa Gado wani foe den doe so (Mateus 24:14). A kotoigi foe den, den e doe nanga faja, ma den no e dwengi sma. Lobi gi den sma na den sei de a krakti baka disi, no foe di den no wani si libisma na ai. Den e howpoe taki someni libisma leki a kan sa kisi kibri (1 Timoteus 4:16). Neleki den fosi kresten, den e doe moeiti foe „de ini vrede nanga ala sma” (Romesma 12:18). Fa den e doe disi wi sa taki foe dati ini na artikel di e kon now.

[Foetoewortoe]

Foe loekoe sani sjatoe

□ San ben de a marki foe fosi kresten èn fa Jehovah Kotoigi gersi den?

□ Ini sortoe tori Jehovah Kotoigi e sori taki den na boen borgroe?

□ Fa den tirigroepoe ben si den fosi kresten èn dati de tra fasi ini a ten disi?

□ San na overtoigi foe den Kotoigi di e taki dati den abi a waarheid, e meki den doe?

[Aksi foe a tori disi]

[Prenki na tapoe bladzijde 9]

Jehovah Kotoigi abi a fasti bosroiti foe tan gi kotoigi so langa Gado wani den foe doe so

[Prenki na tapoe bladzijde 14]

Pilatus ben taki: „Loekoe! A libisma” — a Sma di no ben de wan pisi foe grontapoe. — Johanes 19:5

[Sma di abi a reti foe a prenki]

„Ecce Homo” foe A. Ciseri: Florence, Galleria d’Arte Moderna /Alinari/Art Resource, N.Y.