Soema na Jehovah?

„SOEMA na Jehovah?” Na aksi dati a heimemre Farao, kownoe foe Egipti, ben poti, 3500 jari pasa. So leki fa a sori, dan oproeroefasi ben boeweigi en foe taki moro fara: „Mi no sabi Jehovah kwetikweti.” Toe man di ben e tanapoe na fesi Farao, ben sabi soema na Jehovah. Den ben de den brada na skin fasi, Moses nanga Aron, foe a lo foe Leifi foe Israèl. Jehovah ben seni den foe taigi a tiriman foe Egipti dati a ben moesoe seni den Israèlsma na a sabana foe hori wan fesa foe anbegi Gado. — Exodus 5:1, 2.

Farao no ben wani wan piki tapoe na aksi foe en. Na ondro en tirimakti den priester ben meki na anbegi foe hondrohondro foe den falsi gado go na fesi. We, sma ben si Farao leki wan Gado toe! So leki fa a mythologie foe Egipti e taki, a ben de a manpikin foe Ra, a gado foe a son, èn a ben de a gado Horus, di ben abi wan ede foe wan aka, di tron wan libisma. Den ben kari Farao na den titel leki „a makti gado” nanga „a wan sondro kaba”. Foe dati ede a no ben e froewondroe taki a ben aksi na wan spotoe fasi: „Soema na Jehovah, so taki mi ben sa gi jesi na en sten?”

A no ben de fanowdoe foe Moses nanga Aron piki na aksi dati. Farao ben sabi taki Jehovah ben de a Gado di den Israèlsma, di ben njan pina ini katibo ini Egipti na a ten dati, ben anbegi. Ma Farao nanga ala den Egiptisma ben sa kon sabi heri esi taki Jehovah na a troe Gado. Na a srefi fasi ini a ten disi, Jehovah sa meki en nen nanga a Gadofasi foe en, bekènti gi ibriwan sma na grontapoe (Esekièl 36:23). Foe dati ede wi kan abi winimarki te wi e loekoe fa Jehovah Gado ben gi en nen glori ini Egipti foe owroeten.

Moro hei leki den gado foe Egipti

Di Farao ben aksi na wan oproeroefasi soema na Jehovah, a no ben froewakti den bakapisi di en ben ondrofeni. Jehovah ensrefi ben piki, di a ben e tjari tin plaag na tapoe Egipti. Den plaag dati no ben de nomo foe naki a nâsi. Den ben de foe naki den gado foe Egipti.

Den plaag ben sori a hei di Jehovah ben hei moro den gado foe Egipti (Exodus 12:12; Numeri 33:4). Prakseri na oproeroe, di Jehovah ben kenki a Nijl liba nanga ala den watra foe Egipti tron broedoe! Nanga a wondroe disi, Farao nanga en pipel ben kon sabi taki Jehovah ben de moro hei leki Hapi, a gado foe Nijl liba. A dede foe den fisi ini a Nijl ben de foe naki a relisi foe Egipti, bikasi den ben gi grani na son sortoe foe den fisi. — Exodus 7:19-21.

Baka dati, Jehovah ben tjari wan plaag foe todo na tapoe Egipti. Disi ben meki den lasi froetrow ini na Egipti todo-oema gado, Hekt (Exodus 8:5-14). A di foe dri plaag ben tjari sjen kon tapoe den priester di ben doe towfroewroko, di den no ben man foe doe a srefi wondroe di Jehovah ben doe foe meki a foegoefoegoe santi tron mampira. „A de a finga foe Gado!” den ben bari (Exodus 8:16-19). A gado foe Egipti Tot, foe soema sma ben taki dati en ben seti den gebroiki foe bonoe, no ben man  jepi den man di ben boeweri na wan bedrigi fasi taki den kan dresi sma.

Farao ben kon leri sabi soema Jehovah ben de. Jehovah ben de a Gado di ben kan meki en prakseri bekènti nanga jepi foe Moses, èn te foe kaba meki den kon troe, foe di a e tjari toemoesi froewondroe plaag na tapoe den Egiptisma. So srefi Jehovah ben kan bigin èn tjari den naki akroederi en wani kon na wan kaba. Ma, a sabi disi no ben boeweigi Farao foe saka ensrefi na ondro Jehovah. Na presi foe dati, a heimemre tiriman foe Egipti ben tan kakafoetoe gi Jehovah nanga tranga-ede.

Na a ten foe a di foe fo plaag, bigi freifrei ben pori a kondre, den ben frei na bosoe go na ini den oso, èn so leki fa a sori, den ben frei ipi-ipi ini loktoe, di srefi ben de wan sani di sma ben anbegi èn di den ben meki tron wan sma ini a gado Sjoe noso ini na oemagado Isis, oema-kownoe foe hemel. A Hebrew wortoe gi na insekt disi den ben vertaal nanga „bigi freifrei”, „dagoe freifrei” èn „asege”. (Njoen Grontapoevertaling; Septuaginta; Young). Efoe na asege ben de ini a tori, dan den Egiptisma ben kisi kwinsi foe den insekt, di den ben teki leki wan santa sani, èn den sma no ben kan waka sondro foe masi den ondro den foetoe. Awansi fa a no fa, a plaag disi ben leri Farao wan njoen sani foe Jehovah. Ala di den gado foe Egipti no ben man foe kibri den anbegiman foe den gi den asege, Jehovah ben man foe kibri en pipel. A plaag disi nanga ala den plaag di ben kon baka dati, ben kwinsi den Egiptisma, ma no den Israèlsma. — Exodus 8:20-24.

A di foe feifi plaag ben de wan pestsiki di ben kon na tapoe den meti di den Egiptisma ben kweki. A naki disi ben tjari sjen kon tapoe Hator, Apis nanga na oemagado foe a loktoe Nut, di den prenki leki wan kaw (Exodus 9:1-7). A di foe siksi plaag ben tjari sweri kon na tapoe libisma nanga meti, èn a ben lagi den gado Tot, Isis nanga Pta, di sondro reti ben kisi a nen taki den abi a koni foe dresi. — Exodus 9:8-11.

A di foe seibi plaag ben de alen foe pisipisi ijs, nanga faja na mindri den pisipisi ijs. A naki disi ben gi a gado Respoe sjen, foe di den ben prakseri taki en de a basi foe dondroe faja, nanga Tot, di sma ben taki dati a e tiri na alen nanga a dondroe (Exodus 9:22-26). A di foe aiti naki, a plaag foe sprenka, ben sori taki Jehovah de moro hei leki Min, a gado foe meki pikin, èn di den prakseri ben a de a wan di e kibri den sani di prani (Exodus 10:12-15). A di foe neigi naki, wan doengroe foe dri dei na tapoe Egipti, ben wisiwasi den gado foe Egipti so leki Ra nanga Horus, den gado foe son. — Exodus 10:21-23.

Ala di neigi plaag ben tjari pori kon, tokoe Farao ben weigri foe fri den Israèlsma. En tranga-atifasi ben kon diri srefisrefi gi Egipti, di Gado ben tjari a di foe tin èn lasti plaag kon — a dede foe den fosi geborewan foe libisma nanga meti. Srefi a fosi gebore manpikin foe Farao ben dede, ala di den ben si en leki wan gado. So boen Jehovah ’ben tjari a dede kroetoe na tapoe ala den gado foe Egipti’. — Exodus 12:12, 29.

Now Farao seni kari Moses nanga Aron kon èn a ben taki: „Opo, komoto a mindri foe mi pipel, joe nanga den tra manpikin foe Israèl, èn gowe, dini Jehovah, joisti leki fa joe ben taki. Teki so boen den skapoe nanga den kaw foe joe, joisti leki fa joe ben taki, èn gowe. Èn joe moesoe blesi mi toe.” — Exodus 12:31, 32.

A sma di e kibri en pipel

Den Israèlsma teki pasi gowe, ma heri esi a ben gersi gi Farao leki den ben wakawaka lontoe ini a sabana sondro foe sabi pe den e go. En nanga den foetoeboi foe en ben e aksi now: „San wi ben doe now, taki wi ben seni Israèl gowe, so taki den no man doe srafoewroko gi wi moro langa?” (Exodus 14:3-5). A lasi foe a nâsi disi leki srafoe, ben sa de wan hebi naki na ekonomia sei gi Egipti.

Farao tjari en legre kon makandra èn ben go baka Israèl so fara leki Pi-Hakirot (Exodus 14:6-9). Na a fasi fa sroedati e si a situwâsi, dan a ben sori boen gi den Egiptisma bikasi den Israèlsma ben de ini wan trapoe na mindri a se nanga den bergi. Ma Jehovah ben doe wan sani foe kibri den Israèlsma foe di a e poti wan wolkoe na mindri den nanga den Egiptisma. Na a sei foe den Egiptisma, „a ben sori foe de wan wolkoe makandra nanga doengroe”, dati meki a ben tapoe a ròs di den ben wan ròs den. Na a tra  sei foe a wolkoe a ben krin, „Jehovah ben gi faja na neti” gi Israèl. — Exodus 14:10-20.

Den Egiptisma ben abi a fasti bosroiti foe foefoeroe ala sani foe den Israèlsma èn foe kiri den, ma a wolkoe ben tapoe den foe si den Israèlsma foe ròs den (Exodus 15:9). Di a wolkoe ben poeroe, fa a de wan wondroe sani! Den watra foe a Redi Se ben prati, èn den Israèlsma ben abra go na a tra sei tapoe drei gron! Farao nanga en legre go leki wan dondroe tapoe na gron foe a se, nanga a fasti bosroiti foe kisi den ini katibo èn foe foefoeroe ala sani foe den fosi srafoe foe den. Ma, a heimemre tiriman foe Egipti no ben froewakti taki a Gado foe den Hebrewsma ben o doe wan sani. Jehovah ben bigin foe tjari broeja na den Egiptisma foe di a e poeroe den wiel foe den wagi foe den. — Exodus 14:21-25a.

„Meki wi lowé gi ibri demakandra nanga Israèl!”, na so den tranga man foe Egipti ben bari, „bikasi Jehovah foe troe e feti gi den kontrari den Egiptisma”. Farao nanga den man foe en ben kon froestan disi toemoesi lati. Sondro kefar na a tra sjoro, Moses ben langa en anoe na a se èn den watra ben kon baka èn ben kiri Farao nanga den legre foe en. — Exodus 14:25b-28.

Den lès di ben leri nanga ondrofeni

Foe dati ede, dan, soema na Jehovah? Heimemre Farao ben kisi wan piki tapoe na aksi dati. Den sani di ben pasa na Egipti ben sori taki Jehovah na a wan enkri troe Gado, heri tra fasi leki den „gado di de noti” foe den nâsi (Psalm 96:4, 5). Nanga jepi foe en krakti di pasa marki, Jehovah „ben meki hemel nanga grontapoe”. En de a Bigi Froeloesoeman toe, a Sma di ’tjari en pipel Israèl komoto foe a kondre Egipti, nanga marki, wondroe, wan tranga anoe, nanga bigi sani di e gi frede’ (Jeremia 32:17-21). Fa disi de wan boen boeweisi taki Jehovah man foe kibri en pipel!

Farao ben leri den lès dati nanga bita ondrofeni. Foe taki en leti, a lasti lès ben kostoe en libi (Psalm 136:1, 15). A ben sa de moro koni foe en efoe a ben sori sakafasi di a ben aksi: „Soema na Jehovah?” Dan, a tiriman dati ben kan handri akroederi a piki di a ben kisi. Kolokoe taki, foeroe sma ini a ten disi e leri soema na Jehovah. Èn sortoe eigifasi a abi? San en e aksi foe wi? Meki a de so taki, a tra artikel sa meki joe kisi moro warderi, gi a wan enkri Sma di nen Jehovah. — Psalm 83:18.

[Sma di abi a reti foe a prenki na tapoe bladzijde 3]

Pictorial Archive (Near Eastern History) Est.