Waka nanga koni ini a tori foe grontapoe
Waka nanga koni ini a tori foe grontapoe
„Tan waka nanga koni te joe abi foe doe nanga den di de na dorosei”. — KOLOSESMA 4:5.
1. Nanga san den fosi kresten ben kisi foe doe èn sortoe rai Paulus ben gi a gemeente na Kolose?
DEN fosi kresten di ben libi ini den foto foe a Romen Kownoekondre ben kisi doronomo foe doe nanga na anbegi foe kroektoe gado, a soekoe di sma ben soekoe prisiri nanga jepi foe hoeroedoe, kerki doe nanga gwenti foe den heidensma. Den sma di ben libi na Kolose, wan foto ini a west-centraal pisi foe Pikin Asia, sondro tweifri ben kisi foe doe nanga na anbegi foe mama-oemagado èn afkodrei foe den Frigiasma foe drape, a heiden filosofie foe den Grikisma di ben go libi drape nanga a juda-ist bribi foe den djoe groepoe. Na apostel Paulus ben gi a kresten gemeente a rai foe „tan waka nanga koni te joe abi foe doe” nanga „den di de na dorosei”. — Kolosesma 4:5.
2. Foe san ede Jehovah Kotoigi ini a ten disi moesoe waka nanga koni te den abi foe doe nanga den di de na dorosei?
2 Ini a ten disi, Jehovah Kotoigi e miti nanga densrefi sortoe fowtoe doe èn moro takroe sani srefi. Den toe, foe dati ede, moesoe oefen foe de nanga koni foe den nanga den di de na dorosei foe a troe kresten gemeente. Foeroe sma ini den kerki nanga politiek groepoe, so boen leki sma foe koranti, radio nanga telefisi, ben gens Jehovah Kotoigi. Sonwan foe den gensman disi, efoe a ben de now nanga a feti di den ben feti nanga den langalanga noso moro foeroe na wan kibrifasi, ben e proeberi foe lagi a nen foe Jehovah Kotoigi èn ben meki sma prakseri sani foe den na fesi sondro foe ondrosoekoe. Neleki fa sma ben si den fosi kresten na wan onregtfardikifasi leki wan „sekte” di ben abi wan don faja gi a bribi foe den èn di ben de kefarlek srefi, na so ini a ten disi Jehovah Kotoigi de nofotron den sma di trawan e prakseri sani foe den na fesi sondro foe ondrosoekoe èn di sma no e froestan. — Tori foe den Apostel 24:14; 1 Petrus 4:4.
Fa foe wini a prakseri di sma e prakseri sani na fesi sondro foe ondrosoekoe
3, 4. (a) Foe san ede grontapoe noiti sa lobi troe kresten, ma san wi moesoe proeberi foe doe? (b) San wan skrifi-oema ben skrifi foe Jehovah Kotoigi di ben de na strafoe na wan Nasi konsentrâsi kampoe?
3 Troe kresten no e froewakti taki grontapoe sa lobi den, di, so leki fa na apostel Johanes e taki, „didon ini a makti foe na ogriwan” (1 Johanes 5:19). Ma tokoe, bijbel e gi kresten a deki-ati foe doe moeiti foe wini sma gi Jehovah èn gi en troe anbegi. Disi wi e doe foe di wi e gi kotoigi langalanga èn nanga a boen fasi fa wi e tjari wisrefi toe. Na apostel Petrus ben skrifi: „Tan tjari oensrefi toemoesi boen na mindri den nâsi, so taki na ini a sani di den e taki kontrari oenoe leki oenoe na ogridoeman, dan leki wan bakapisi foe oen toemoesi boen wroko, di den de kotoigi foe den, den kan gi Gado grani tapoe a dei te a sa ondrosoekoe sani.” — 1 Petrus 2:12.
4 Skrifi-oema Sylvia Salvesen ben taki ini en boekoe Forgive—But Do Not Forget, foe oema Kotoigi di ben de kompe foe en ini wan Nasi konsentrâsi kampoe: „Den toe oema dati, Keit nanga Margaret, èn foeroe trawan, ben jepi mi foeroe, no wawan nanga a bribi foe den, ma na praktis fasi toe. Den ben tjari den fosi krin pisipisi krosi gi wi di wi ben abi gi den soro foe wi . . . Foe taki en sjatoe, wi ben feni wisrefi na mindri sma di ben winsi taki a ben sa go boen nanga wi èn di ben sori den switi firi foe den nanga san den ben doe.” Fa dati na wan moi kotoigi foe „denwan di de na dorosei”!
5, 6. (a) Sortoe wroko Krestes e doe ini a ten disi èn san wi no moesoe frigiti noiti? (b) Fa wi moesoe de nanga sma foe grontapoe èn foe san ede?
5 Wi kan doe foeroe foe poeroe a prakseri di sma e prakseri sani na fesi sondro foe ondrosoekoe, nanga jepi foe a koni fasi fa wi e tjari wisrefi gi sma na dorosei. A troe, wi e libi ini a ten pe wi Kownoe di e tiri, Krestes Jesus, e prati sma foe den nâsi, „neleki fa wan skapoeman e prati den skapoe foe den bokoboko” (Mateus 25:32). Ma no frigiti noiti taki Krestes na a Kroetoeman; na en na a sma di e bosroiti soema na „den skapoe” èn soema na „den bokoboko”. — Johanes 5:22.
6 Disi moesoe abi krakti na tapoe a fasi fa wi e handri nanga den sma di no de wan pisi foe Jehovah organisâsi. Wi e denki foe den kande leki grontapoe sma, ma den na wan pisi foe a grontapoe foe libisma di „Gado ben lobi . . . so foeroe taki a ben gi en wan enkri gebore Manpikin, so taki ibriwan sma di e poti bribi na ini en no ben sa go pori, ma ben sa abi têgo libi” (Johanes 3:16). A moro boen foe si den leki sma di kan tron skapoe, na presi foe bosroiti sani na fesi taki den na bokoboko, ala di joe no ondrosoekoe. Sonwan di fosi ben gens a waarheid na wan ogrifasi, de now Kotoigi di gi densrefi na a dini foe Jehovah. Èn foeroe foe den sma disi den ben wini fosi, foe di sma ben handri na wan switifasi, bifo den ben doe wan sani tapoe a kotoigi di sma ben gi kotoigi na den langalanga. Loekoe, foe eksempre, a prenki na bladzijde 15.
Den de nanga faja, den no e dwengi sma
7. Sortoe sani a paus ben kroetoe, ma sortoe aksi wi kan poti?
7 Paus Johanes Paulus a wan di foe Toe, ben kroetoe sekte ini algemeen, èn Jehovah Kotoigi spesroetoe, di a ben taki: „A faja pe pikinmoro den e dwengi sma èn di son sma e gebroiki foe feni njoen disipel, foe go oso foe oso noso foe stòp sma na den oekoe foe den strati, na wan falsi sekte fasi foe soekoe foe gersi a faja foe den apostel nanga zendeling.” Wi kan aksi wisrefi efoe a faja foe wi na wan „falsi sekte fasi foe soekoe foe gersi a faja foe den apostel nanga zendeling”, dan pe a troetroe faja gi na evangeliumwroko de foe feni? Wi kan de seiker taki a no de na mindri den lomsoesma noso srefi na mindri den anitrisma noso memre foe den ortodox kerki.
8. Fa wi moesoe doe a kotoigi di wi e gi oso foe oso, ala di wi e howpoe foe abi sortoe boen bakapisi?
8 Tokoe, foe man boeweisi a kragi, taki wi e gi kotoigi na wan fasi di e dwengi sma, no troe, dan ala ten wi moesoe abi switifasi, lespekifasi èn boen maniri te wi e bigin taki nanga sma. A disipel Jakobus ben skrifi: „Soema koni èn abi froestan foe sani na oen mindri? Meki a sori, na ini en toemoesi boen waka nanga libi, den wroko foe en nanga wan safri-atifasi di fiti koni” (Jakobus 3:13). Na apostel Paulus e froemane wi foe „no lobi foe feti” (Titus 3:2). Foe eksempre, na presi foe kroetoe den sani langalanga di wan sma, di wi e gi kotoigi, e bribi, dan foe san ede wi no e sori opregti belangstelling gi den prakseri di a sma e tjari kon na fesi? Froeteri a sma baka dati a boen njoensoe so leki dati de foe feni ini bijbel. Foe di wi e teki wan positief fasi foe bigin taki nanga sma èn e sori troetroe lespeki gi sma nanga tra bribi, wi sa jepi den foe kisi wan moro boen fasi foe denki, foe arki èn kande den sa si a waarde di a bijbel boskopoe abi. A bakapisi kan de taki son sma sa kon „gi Gado glori”. — 1 Petrus 2:12.
9. Fa wi kan doe a rai di Paulus ben gi (a) na Kolosesma 4:5? (b) na Kolosesma 4:6?
9 Na apostel Paulus ben gi a rai: „Tan waka nanga koni te joe abi foe doe nanga den di de na dorosei, foe di oenoe e bai a joisti ten gi oensrefi” (Kolosesma 4:5). A man J. B. Lightfoot, di e tjari den lasti wortoe disi kon na krin, ben skrifi: „No meki wan okasi pasa, foe taki èn doe san kan meki a belang foe Gado go na fesi.” (Na wi poti den wortoe skoinsi.) Ija, wi moesoe de klariklari nanga wortoe èn nanga san wi e doe na a joisti ten. So wan koni abi na ini toe taki wi e teki wan joisti ten foe a dei foe go na sma. Efoe sma e weigri a boskopoe foe wi, dan a de so foe di sma no e warderi en noso foe di wi ben go na wan ten di kande a no ben fiti den sma? Paulus ben skrifi toe: „A taki foe oenoe moesoe de ala ten nanga switifasi, a moesoe abi sowtoe, so taki oenoe sabi fa oenoe moesoe gi ibriwan sma wan piki” (Kolosesma 4:6). Disi wani taki wi moesoe prakseri sani na fesi èn abi troe lobi gi den sma na wi sei. Meki wi pristeri a Kownoekondre boskopoe ala ten nanga switifasi.
De nanga lespeki èn de „klariklari gi ibri boen wroko”
10. (a) Sortoe rai na apostel Paulus ben gi den kresten di ben libi na Kreta? (b) Fa Jehovah Kotoigi ben de eksempre ini a waka di den ben waka baka a rai foe Paulus?
10 Wi no kan swaki den bijbel gronleri. Na a tra sei, wi no moesoe hari taki nanga sma foe aksi, di no abi foe doe nanga wi kresten soifri retifasi, efoe a no de fanowdoe. Na apostel Paulus ben skrifi: „Tan memre den [kresten na Kreta] foe saka densrefi èn foe gi jesi na lanti nanga tirimakti leki tiriman, foe de klariklari gi ibri boen wroko, foe no taki, na wan takroe fasi foe no wan sma, foe no lobi foe feti, foe abi reidelekfasi èn foe sori ala safri-atifasi na ala sma” (Titus 3:1, 2). Bijbel sabiman E. F. Scott, ben skrifi foe a pisi disi: „No wawan kresten ben moesoe gi jesi na tirimakti, ma den moesoe de klariklari gi ibri boen wroko. Disi . . . wani taki dati, te na okasi e aksi dati, dan kresten moesoe de na mindri den fosi sma di e sori taki den e prakseri a libisma libimakandra. Doronomo presi ben sa kan teki faja èn doronomo siki èn difrenti rampoe ben sa kan kon, efoe ala boen borgroe ben sa wani foe jepi den sma na den sei.” Na heri grontapoe wi ben abi foeroe eksempre foe rampoe di ben de èn Jehovah Kotoigi ben de na mindri den fosi wan di ben bigin foe jepi sma. Den no jepi den brada foe den wawan, ma sma na dorosei toe.
11, 12. (a) Fa kresten moesoe handri nanga tirimakti? (b) San a wani taki foe saka wisrefi na tirimakti ondro ini a tori foe a bow foe Kownoekondrezaal?
11 A srefi pisi disi foe a brifi foe Paulus gi Titus e poti krakti toe na tapoe o prenspari a de foe abi wan lespeki fasi gi tirimakti. Jongoe kresten di, foe di den de neutraal, e kon na fesi kroetoebakra, moesoe hori spesroetoe na prakseri taki den moesoe waka nanga koni te joe abi foe doe nanga den di de na dorosei. Den kan doe foeroe foe meki a nen foe Jehovah en pipel go na fesi noso foe doe ogri na dati, nanga fa den e loekoe na dorosei, a fasi fa den e tjari densrefi èn a fasi fa den e taki nanga den tirimakti dati. Den moesoe „gi . . . en di e aksi foe grani, a grani dati”, èn feti gi densrefi nanga dipi lespeki. — Romesma 13:1-7; 1 Petrus 2:17; 3:15.
12 „Tirimakti” na sma foe kondre toe di e wroko gi lanti. Now di moro nanga moro Kownoekondrezaal e bow, wi no kan wai pasi gi a wroko di wi moesoe wroko nanga den tirimakti foe a kondre. Nofotron owroeman e miti sma di e prakseri sani foe wi na fesi sondro foe ondrosoekoe. Ma wi ben kon si taki, pe den sma di e teki presi gi a gemeente, ben meki wan boen matifasi kon de nanga den tirimakti èn ben wroko makandra nanga a bowkomisi foe a foto, dan den ben kan poeroe a prakseri disi di den ben prakseri sani na fesi sondro foe ondrosoekoe. Nofotron wan boen kotoigi e gi na sma di fosi na fesi foe dati ben sabi pikinso noso no ben sabi noti foe Jehovah Kotoigi èn a boskopoe foe den.
’Efoe a kan, de ini vrede nanga ala sma’
13, 14. Sortoe rai Paulus ben gi kresten na Rome èn fa wi kan doe disi ini a matifasi foe wi nanga sma na dorosei?
13 Paulus ben gi kresten di ben libi ini a heiden Rome, a rai di e kon now: „No pai no wan sma ogri foe ogri. Sorgoe foe toemoesi boen sani na fesi foe ala sma. De, efoe a kan, foe so fara a e anga foe oenoe, ini vrede nanga ala sma. No teki refrensi gi oensrefi, lobiwan, ma gi pasi na a atibron; bika a skrifi: ’Refrensi na foe mi; mi sa pai baka, Jehovah e taki.’ Ma, ’efoe oen feanti abi angri, gi en sani foe njan; efoe watra e kiri en, gi en wan sani foe dringi; bika te oenoe e doe disi, dan oenoe sa poti faja krofaja na tapoe en ede.’ No meki ogri wini oenoe, ma tan wini ogri nanga jepi foe boen.” — Romesma 12:17-21.
14 Wi leki troe kresten no kan wai pasi srefisrefi gi a miti di den e miti nanga gensman, te wi e handri nanga sma na dorosei. Ini a pisi na tapoesei, Paulus e sori taki a pasi foe koni de foe doe moeiti foe wini gens nanga jepi foe switifasi. Neleki faja krofaja, den doe disi foe switifasi kan smelter a feantifasi poeroe èn wini a gensman foe handri na wan moro switi fasi nanga Jehovah pipel, kande e wiki srefi a belangstelling foe en gi a boen njoensoe. Te disi e pasa, dan boen wini ogri.
15. Oten kresten moesoe loekoe boen spesroetoe te den e waka nanga koni te joe abi foe doe nanga den di de na dorosei?
15 Foe waka nanga koni te joe abi foe doe nanga den di de na dorosei, de spesroetoe prenspari ini oso pe wán foe den trowpatna no teki waarheid ete. Efoe sma e hori densrefi na bijbel gronleri, dan dati e meki moro boen trowmasra, moro boen wefi, moro boen papa, moro boen mama èn pikin di e gi jesi moro èn e studeri moro tranga na skoro. Wan sma di no de na bribi moesoe man si a gosontoe krakti di bijbel gronleri abi na tapoe wan sma di de na bribi. So boen, wan toe sma „den kan wini den sondro wan wortoe nanga a waka nanga libi” foe osofamiri memre di gi densrefi na a dini foe Jehovah. — 1 Petrus 3:1, 2.
’Doe boen na ala sma’
16, 17. (a) Nanga sortoe ofrandi Gado plisi srefisrefi? (b) Fa wi moesoe „doe san boen” na wi brada èn nanga den sma di de na dorosei toe?
16 A moro bigi boen di wi kan doe gi a sma na wi sei na foe tjari a boskopoe foe libi gi en èn leri en foe kon boen baka nanga Jehovah nanga jepi foe Jesus Krestes (Romesma 5:8-11). Foe dati ede na apostel Paulus e froeteri wi: „Meki wi tjari nanga jepi foe en [Krestes] ala ten a tangi ofrandi gi Gado, dati na a froktoe foe den mofoboeba di e meki a nen foe Gado bekènti na poebliki” (Hebrewsma 13:15). Paulus e taki moro fara: „Boiti dati, no frigiti foe doe boen èn foe prati sani nanga trawan, bika den sortoe ofrandi dati e plisi Gado srefisrefi” (Hebrewsma 13:16). Boiti taki wi e gi kotoigi na poebliki, wi no moesoe frigiti foe „doe boen”. A de wan prenspari pisi foe na ofrandi di e plisi Gado srefisrefi.
17 A no de foe taki, dati wi e doe boen na wi brada na jeje fasi, di kande de ini nowtoe na emotioneel fasi, na jeje fasi, na skin fasi noso na a sei foe goedoe. Paulus ben sori disi di a ben skrifi: „Meki wi, so langa a ten boen ete, doe boen na ala sma, ma spesroetoe na denwan di abi a srefi bribi leki wi” (Galasiasma 6:10; Jakobus 2:15, 16). Ma wi no moesoe frigiti den wortoe: „Meki wi doe boen na ala sma.” Foe handri na wan switifasi nanga wan famiri, a sma na wi sei noso wan kompe wrokoman, kan doe foeroe foe poeroe a prakseri di sma e prakseri sani foe wi na fesi sondro foe ondrosoekoe èn kan opo na ati foe a sma gi waarheid.
18. (a) Foe sortoe kefar wi moesoe tan farawe? (b) Fa wi kan gebroiki wi kresten boenfasi leki wan jepi gi a kotoigiwroko di wi e doe na poebliki?
18 Foe doe disi, a no de fanowdoe foe de krosibei mati foe den sma na dorosei. Den sortoe demakandra dati kan de wan kefar gi wi (1 Korentesma 15:33). Èn no wan prakseri de foe de mati nanga grontapoe (Jakobus 4:4). Ma wi kresten boenfasi, kan horibaka gi a preikiwroko foe wi. Na son kondre a e kon moeilek moro nanga moro foe taki nanga sma na den oso foe den. Son flat-oso abi jepisani di e tapoe wi foe kisi foe taki nanga den sma di e libi ini den oso. Ini den goedoe kondre a telefon e pristeri wan njoen fasi foe preiki. Na moro foeroe kondre, den kan doe stratiwroko. Ma tokoe ini ala kondre, foe abi boen fasi, boen maniri, switifasi èn e jepi sma, e opo okasi foe poeroe a prakseri di sma e prakseri sani na fesi sondro foe ondrosoekoe èn foe gi wan boen kotoigi.
Tapoe a mofo foe gensman
19. (a) San wi kan froewakti foe di wi no e plisi sma? (b) Fa wi kan doe moeiti foe waka baka na eksempre foe Danièl èn foe doe a rai di Petrus ben gi?
19 Jehovah Kotoigi a no sma di e soekoe foe plisi libisma èn den no e frede libisma toe (Odo 29:25; Efeisesma 6:6). Den e froestan dorodoro taki awansi den e doe moeiti foe de boen eksempre foe sma di e pai belasting èn foe de boen borgroe, tokoe gensman sa panja ogri leitori foe den èn na wan wisiwasi fasi den sa taki foe den (1 Petrus 3:16). Foe di den sabi disi meki den e proeberi foe waka baka Danièl, foe soema den feanti foe en ben taki: „Ini a Danièl disi wi no sa feni no wan enkri leitori, noso wi ben sa moesoe feni dati kontrari en ini a wet foe en Gado” (Danièl 6:5). Noiti wi sa swaki bijbel gronleri foe plisi sma. Na a tra sei, wi no e soekoe foe kisi skin-ati leki wan martelaar. Wi e doe moeiti foe libi ini vrede èn foe poti prakseri tapoe a rai foe den apostel: „Bikasi disi na a wani foe Gado, taki, nanga a doe di oenoe e doe boen, oenoe e tapoe a soso-taki foe den sma di no de reidelek.” — 1 Petrus 2:15.
20. (a) Foe san wi abi na overtoigi èn sortoe deki-ati Jesus ben gi wi? (b) Fa wi kan tan waka nanga koni te wi abi foe doe nanga den di de na dorosei?
20 Wi abi na overtoigi taki a posisi foe wi foe de aparti foe grontapoe, de krinkrin ini akroederi nanga bijbel. Den fosi jarihondro kresten e horibaka gi dati. Wi e kisi deki-ati foe Jesus wortoe: „Ini grontapoe oenoe abi banawtoe, ma abi deki-ati! Mi wini grontapoe” (Johanes 16:33). Wi no e frede. „Ija, soema na a sma di sa meki oenoe ondrofeni lasi efoe oenoe e meki moeiti foe doe boen? Ma efoe oenoe moesoe pina foe regtfardikifasi ede, dan oenoe de kolokoe. Ma no frede a sani di den e frede èn no kon broeja toe. Ma santa Krestes leki Masra na ini oen ati, de ala ten klariklari foe opo taki gi oensrefi na fesi ibriwan sma di e aksi wan reide foe oenoe foe a howpoe di de na ini oenoe, ma doe disi nanga safrifasi èn nanga dipi lespeki” (1 Petrus 3:13-15). Ala di wi e handri na a fasi disi, wi sa tan waka nanga koni te wi abi foe doe nanga den di de na dorosei.
Foe loekoe sani sjatoe
□ Foe san ede Jehovah Kotoigi moesoe waka nanga koni te den abi foe doe nanga den di de na dorosei?
□ Foe san ede troe kresten no kan howpoe noiti taki grontapoe sa lobi den, ma san den moesoe proeberi foe doe?
□ San moesoe de a fasi fa wi e handri nanga sma foe grontapoe èn foe san ede?
□ Foe san ede wi moesoe „doe san boen” no wawan na wi brada, ma nanga den sma di de na dorosei toe?
□ Fa a waka di wi e waka nanga koni te den abi foe doe nanga den di de na dorosei, kan jepi wi nanga a kotoigiwroko foe wi na poebliki?
[Aksi foe a tori disi]
[Prenki na tapoe bladzijde 15]
Troe kresten na Fransikondre e jepi den sma na den sei baka wan froedoe
[Prenki na tapoe bladzijde 17]
Kresten fasi foe handri na wan switifasi kan doe foeroe foe poeroe a prakseri di sma e prakseri sani na fesi sondro foe ondrosoekoe
[Prenki na tapoe bladzijde 20]
Kresten moesoe de „klariklari gi ibri boen wroko”