„A Pikinwan” Tron „wan Dusun”
„A Pikinwan” Tron „wan Dusun”
„A pikinwan srefi sa tron wan dusun, èn a pikinwan sa tron wan makti nâsi.”—YESAYA 60:22.
1, 2. (a) Fu san ede dungru e tapu grontapu na ini a ten disi? (b) Fa a leti fu Yehovah skèin moro nanga moro na tapu en pipel?
„DUNGRU srefi sa tapu grontapu, èn deki dungru den nationaal grupu; ma na yu tapu Yehovah sa skèin, èn na yu tapu na eigi glori fu en sa de fu si” (Yesaya 60:2). Den wortu disi e taki heri bun fa a situwâsi de na grontapu sensi 1919. Krestenhèit weigri fu erken a marki taki Yesus Krestes de Kownu, „a leti fu grontapu” (Yohanes 8:12; Mateus 24:3). Fu a „bigi atibron” fu Satan ede, na edeman fu „den grontapu tiriman fu a dungru disi”, meki a di fu 20 yarihondro ben de a moro ogri-atiwan, a ten na ini a historia fu libisma di tyari moro pori kon leki na iniwan tra ten (Openbaring 12:12; Efeisesma 6:12). Moro furu sma e libi na ini dungru na yeye fasi.
2 Ma toku leti e skèin na ini a ten disi. Yehovah ’e skèin’ na tapu den futuboi fu en, a salfu fikapisi, di de den sma di e teki presi na grontapu gi en hemel „uma” (Yesaya 60:1). Spesrutu di den ben kon fri fu katibo na Babilon na ini 1919, den sma disi ben skèin a glori fu Gado èn den ’meki a leti fu den skèin gi sma’ (Mateus 5:16). Fu 1919 te go miti 1931, a Kownukondre leti ben e skèin moro faya di den wan disi ben puru ala den denki fu Babilon di ben tai den ete. A nomru fu den ben kren kon tron furu tin dusun fu di Yehovah meki en pramisi kon tru: „Mi sa tyari den wan fu Israèl di tan abra, kon na wan. Mi sa meki den kon de wán, leki ipi skapu na ini wan koi, leki wan ipi na ini a weigron fu en; den sa furu nanga sma” (Mika 2:12). Na ini 1931, a glori fu Yehovah na tapu en pipel ben kon moro krin srefi di den ben teki a nen Yehovah Kotoigi.—Yesaya 43:10, 12.
3. Fa a ben kon na krin taki a leti fu Yehovah ben o skèin na tapu tra sma tu boiti den salfuwan?
3 Yehovah ben o skèin soso na tapu a fikapisi fu a „pikin ipi”? (Lukas 12:32) Nôno. The Watch Tower fu 1 september 1931 ben taki fu wan tra grupu. Na ini wan moi fruklari fu Esekièl 9:1-11, a ben sori taki a man nanga a enkikokro fu wan skrifiman, di kari na ini den vers dati, na a salfu fikapisi. Suma a „man” dati e marki na den fesi-ede? „Tra skapu”, den wan di abi a howpu fu libi fu têgo na tapu wan paradijs na grontapu (Yohanes 10:16; Psalm 37:29). Na ini 1935 den ben si taki a grupu disi fu „tra skapu” ben de a „bigi ipi . . . di komoto na ala nâsi”, di na apostel Yohanes ben si na ini wan fisyun (Openbaring 7:9-14). Fu sensi 1935 te leki now, den ben du furu fu tyari a bigi ipi kon na wan.
4. Suma na den „kownu” nanga den „nâsi” di kari na Yesaya 60:3?
4 Na ini a profeititori fu Yesaya den e fruteri fu a wroko disi fu tyari sma kon na wan, taki: „Den nâsi seiker sa go na yu leti, èn kownu na a brenki fu yu leti di e skèin” (Yesaya 60:3). Suma na den „kownu” di kari dyaso? A fikapisi fu den 144.000 di makandra nanga Yesus Krestes, na kompe-tiriman fu a hemel Kownukondre èn di teki fesi na ini a wroko fu gi kotoigi (Romesma 8:17; Openbaring 12:17; 14:1). Na ini a ten disi a nomru fu den wan tu dusun fu a salfu fikapisi di de ete pikin srefisrefi moro a nomru fu den „nâsi”, den wan di abi a howpu fu libi na grontapu èn di e go na Yehovah fu kisi leri fu en èn den di e gi trawan a kari fu du a srefi sani.—Yesaya 2:3.
Fayafaya Futuboi fu Yehovah
5. (a) Sortu tru tori e sori taki a faya fu Yehovah en pipel no kon swaki? (b) Sortu kondre ben abi kefalek moi gro na in 1999? (Luku a tabel tapu bladzijde 17 te go miti 20.)
5 ¡Den disiten Kotoigi fu Yehovah ben sori wan kefalek bigi faya na ini a di fu 20 yarihondro disi! Èn ala di a druk e kon na den tapu moro nanga moro, toku a faya fu den no ben kon swaki di a yari 2000 ben e doro. Den ben si a komando fu Yesus leki wan seryusu sani ete: „Meki disipel fu sma fu ala nâsi” (Mateus 28:19, 20). A nomru fu aktief preikiman fu a bun nyunsu na ini a lasti dienstyari fu a di fu 20 yarihondro ben doro wan nyun heimarki fu 5.912.492 preikiman. Ala nanga ala den ben gebroiki wan kefalek moi nomru fu 1.144.566.849 yuru fu taki nanga tra sma fu Gado èn fu den prakseri fu en. Den ben tyari 420.047.796 gobaka na sma di abi belangstelling èn den ben hori 4.433.884 fri oso-bijbelstudie nanga sma. ¡Dati na wan kefalek moi nomru di e sori wi taki a diniwroko ben du fayafaya!
6. Sortu nyun sani ben seti gi den pionier, èn sortu bakapisi dati ben abi?
6 A mun yanuari di pasa, a Tiri Skin ben meki bekènti taki wan kenki ben o de na ini den yuru di den pionier musu wroko. Furu sma ben gebroiki na okasi disi fu go na ini a gewoon pionierwroko noso a yepi-pionierwroko. Fu eksempre, na ini den fosi fo mun na ini a yari 1999, a bijkantoro fu Bakrakondre kisi fo tron moro furu formulier gi a gewoon pionierwroko leki a srefi pisi ten na ini a yari 1998. Ghana e fruteri: „Sensi a momenti di a nyun yuru gi a gewoon pionierwroko ben bigin, dan a nomru fu wi gewoon pionier kren doronomo.” Na ini a dienstyari 1999, a nomru fu pionier na heri grontapu be doro 738.343 — wan kefalek moi buweisi fu a ’faya di den abi gi tumusi bun wroko’.—Titus 2:14.
7. Fa Yehovah blesi a wroko di den futuboi fu en du fayafaya?
7 ¿Yehovah blesi a wroko disi di du fayafaya? Iya. Nanga yepi fu Yesaya a e taki: „¡Opo yu ai èn luku lontu! Den tyari den alamala kon makandra; den kon na yu. Fu farawe den eigi manpikin fu yu e tan kon, èn den umapikin fu yu, di den sa sorgu na a seibere” (Yesaya 60:4). Den salfu „manpikin” nanga den salfu „umapikin” di ben tyari kon makandra e dini Gado fayafaya ete. Èn now den tra skapu fu Yesus e tyari kon makandra fu de sei nanga sei nanga den salfu „manpikin” nanga „umapikin” na ini 234 kondre nanga èilanti fu den se.
„Ibri Bun Wroko”
8. Sortu „bun wroko” den Kotoigi fu Yehovah e du?
8 Kresten abi a frantwortu fu preiki a bun nyunsu fu a Kownukondre èn fu yepi sma di abi belangstelling meki den tron disipel. Ma den de „srekasreka gi ibri bun wroko” (2 Timoteus 3:17). So bun, den e sorgu na wan lobi fasi gi na osofamiri fu den, den lobi fu ontfanga sma, èn den e fisiti sikisma (1 Timoteus 5:8; Hebrewsma 13:16). Èn friwani wrokoman e yepi fu du den wroko leki a bow di Kownukondre zaal e bow — wan wroko di e gi kotoigi tu. ¡Na ini Togo, baka di den ben kaba bow wan zaal, dan den sma di abi frantwortu na ini wan charismatisch kerki fu a birti ben wani sabi fu san ede Yehovah Kotoigi ben man bow den eigi gebow ala di a kerki ben musu yuru sma fu du a srefi wroko disi! Togo e fruteri taki a bow di den e bow bun Kownukondre zaal abi so wan bun krakti na den birtisma tapu taki son sma e pruberi fu yuru oso noso fu bow oso na ini den birti pe Kownukondre zaal o bow.
9. San Yehovah Kotoigi du di rampu miti den?
9 Sontron a de fanowdu fu du wan tra sortu bun wroko. Na ini a dienstyari di pasa, furu kondre ben ondrofeni rampu, èn nofotron den fosi sma di ben de na den presi drape fu gi yepi ben de Yehovah Kotoigi. Fu eksempre, a bigi winti Mitch ben pori wan bigi pisi fu Honduras. Heri esi a bijkantoro ben seti nowtu komte fu orga a wroko fu gi yepi. Den Kotoigi fu Honduras èn den kotoigi fu furu tra kondre ben gi krosi, nyanyan, dresi, nanga tra prenspari sani. Den Regionaal Bow Komte ben gebroiki a bekwaamfasi fu den fu bow den oso baka. Heri esi, den brada fu wi di ben ondrofeni takru bakapisi fu a rampu ben kisi yepi so taki den ben kan go du den aladei sani fu den baka. Na ini Ekwador, Yehovah Kotoigi ben kon yepi den brada fu den di kefalek bigi frudu ben pori wan tu oso fu den. Baka di wan lantiman ben si a bun fasi fa den ben handri nanga a situwâsi, dan a ben taki: „¡Efu mi ben kan gebroiki a grupu disi, dan mi ben o du wondru! Sma leki unu musu de na ala presi fu grontapu.” Den sortu bun wroko disi e prèise Yehovah Gado èn a de wan buweisi fu ’a gi di wi e gi wisrefi na ini a dini fu Gado di bun gi ala sani’.—1 Timoteus 4:8.
Den „E Frei Kon Neleki wan Wolku”
10. Ala di a nomru fu den salfuwan saka, fu san ede a nen fu Yehovah e meki bekènti leki noiti bifo?
10 Yehovah e aksi now: „Suma na den wan disi di e frei kon neleki wan wolku, èn neleki doifi na den olo fu den doifikoi fu den? Bika na mi tapu den èilanti srefi sa howpu, den sipi fu Tarsis tu soleki na a bigin, fu tyari den manpikin fu yu kon fu farawe . . . Trakondre-sma trutru sa bow den skotu fu yu, èn den eigi kownu fu den sa dini yu” (Yesaya 60:8-10). Den fosiwan di ben du wan sani nanga a leti di Yehovah ben ’skèin’ ben de den „manpikin” fu en, den salfu Kresten. Baka dati den „trakondre-sma” ben kon, a bigi ipi, di e dini den salfu brada na wan loyaal fasi, èn den e waka na den baka fu preiki a bun nyunsu. So bun, ala di a nomru fu den salfuwan e saka, toku sma e meki a nen fu Yehovah bekènti na heri grontapu leki noiti bifo.
11. (a) San e du te now ete èn sortu bakapisi dati ben abi na ini 1999? (b) Sortu kondre ben abi kefalek moi nomru fu sma di ben dopu na ini 1999? (Luku a tabel tapu bladzijde 17 te go miti 20.)
11 Leki wan bakapisi fu dati, furu milyun sma e kon ipi-ipi na makandra „neleki doifi na den olo fu den doifikoi fu den”, èn den e feni kibri na ini a Kresten gemeente. Furu hondro dusun e kon ete ibri yari, èn a pasi opo ete gi moro fu den. Yesaya e taki: „Den doro fu yu trutru sa tan opo doronomo; den no sa tapu srefi na dei noso na neti, so taki den kan tyari kon gi yu den gudu fu den nâsi” (Yesaya 60:11). A yari di pasa, 323.439 sma ben dopu leki simbôl taki den gi den libi abra na Yehovah, èn toku a no tapu den doro ete. „Den warti sani fu ala den nâsi”, den memre fu a bigi ipi e kon ipi-ipi ete pasa den doro (Hagai 2:7). No wan fu den di wani gowe libi a dungru, e seni gowe baka (Yohanes 12:46). ¡Meki a de so taki no wan fu den disi e lasi a warderi di den abi gi a leti!
Den No E Frede, ala di Gens De
12. Fa den sma di lobi a dungru pruberi fu kiri a faya?
12 Den sma di lobi a dungru no lobi a leti fu Yehovah (Yohanes 3:19). Son sma e pruberi srefi fu kiri a leti dati. Disi a no wan sani di wi no ben fruwakti. Srefi Yesus, „a tru leti di e gi leti na ibri sortu libisma”, den ben spotu en, den ben gens en, èn te fu kaba en eigi kondreman ben kiri en (Yohanes 1:9). Na ini a di fu 20 yarihondro sma ben spotu Yehovah Kotoigi tu, den ben poti den na strafu-oso, den ben tapu a wroko fu den, èn den ben kiri den srefi, fu di den ben skèin a leti fu Yehovah na wan getrow fasi. Na ini den yari di no pasa so langa ete, den gensman bigin panya lei nanga yepi fu den sani soleki radio nanga telefisi, fu den sma di e skèin a leti fu Gado. Wan tu fu den wani meki sma bribi taki Yehovah Kotoigi na sma di kan du trawan ogri èn taki a wroko fu den musu tapu. ¿Den sortu gensman disi ben man du san den ben abi na prakseri?
13. San ben de a bakapisi fu a koni fasi fa den brada ben fruteri den sani soleki radio nanga telefisi fa sani de trutru nanga a wroko fu wi?
13 Nôno. Pe a e fiti, dan Yehovah Kotoigi gebroiki den sani soleki radio nanga telefisi fu fruklari fa sani de trutru. A bakapisi ben de taki sma ben meki a nen fu Yehovah bekènti na ala sei na ini koranti nanga tijdschrift èn na tapu radio nanga telefisi. Disi ben abi bun bakapisi na ini a preikiwroko. Fu eksempre, na ini Deinsikondre, wan programa na tapu a telefisi fu a kondre ben taki fu a tori „Fu san ede a bribi fu den Deinsisma e swaki”. Den ben poti aksi gi Yehovah Kotoigi, èn so srefi gi sma fu tra relisi. Baka dati, wan uma di ben si a programa, ben taki: „A ben de krin fu si suma ben abi a yeye fu Gado.” Den ben bigin studeri nanga en.
14. San den gensman sa musu erken heri esi, nanga syen?
14 Yehovah Kotoigi sabi taki furu sma na ini a grontapu disi sa gens den (Yohanes 17:14). Toku a profeititori fu Yesaya e tranga den: „Na yu den manpikin fu den wan di kwinsi yu musu boigi go; èn ala den wan di no e handri nanga yu nanga lespeki musu boigi na den ondrofutu fu yu, èn den sa musu kari yu a foto fu Yehovah, Sion fu a Santa Wan fu Israèl” (Yesaya 60:14). Nanga syen den gensman sa musu erken heri esi taki, fu taki en leti, den ben feti nanga Gado srefi. Suma kan wini so wan feti?
15. Fa Yehovah Kotoigi „soigi a merki fu den nâsi”, èn fa disi ben de fu si na ini a leriwroko nanga a preikiwroko fu den?
15 Yehovah e pramisi tu: „Mi sa meki yu tron srefi wan sani di sma kan prodo nanga dati te ten di no skotu . . . Yu sa soigi a merki fu den nâsi trutru, èn a bobi fu kownu yu sa soigi; èn yu sa kon sabi seiker taki mi Yehovah, na yu Frulusuman” (Yesaya 60:15, 16). Iya, Yehovah na a Frulusuman fu en pipel. Efu den e frutrow na en tapu, dan den sa tan „te ten di no skotu”. Èn den sa „soigi a merki fu den nâsi”, fu di den sa gebroiki wan tu gudu di den kan kisi fu horibaka gi a tru anbegi. Fu eksempre, a bun fasi fa den e gebroiki computer nanga komunikâsi teknik e meki en moro makriki fu vertaal A Waktitoren na ini 121 tongo èn Ontwaakt! na ini 62 tongo na a srefi ten. Den meki wan spesrutu computer programa fu yepi vertaal a Nieuwe-Wereldvertaling go na ini tra tongo, èn a vertaling disi e gi furu prisiri. Di a Kresten Griki Buku fu Bijbel ben tyari kon na doro na ini Krowâsiatongo na ini 1999, dan dusundusun sma ben krei fu prisiri. Wan owru brada ben taki: „Mi wakti langa tapu a Bijbel disi. ¡Now mi kan dede na ini vrede!” Moro leki 100 milyun eksemplaar fu a Nieuwe-Wereldvertaling, efu na a heri Bijbel noso pisi fu en, prati na sma na ini 34 tongo.
Hei Moreel Markitiki
16, 17. (a) Fu san ede a prenspari fu hori wisrefi na den hei markitiki fu Yehovah ala di disi muilek? (b) Sortu ondrofenitori e sori taki yongusma kan sorgu taki a grontapu disi no e pori den?
16 Yesus ben taki: „A sma di e du tegu sani, no wani si a leti na ai” (Yohanes 3:20). Na a tra sei, den wan di e tan na ini a leti, lobi den hei markitiki fu Yehovah. Yehovah e gebroiki Yesaya fu taki: „Èn a pipel fu yu, den alamala sa de regtfardiki” (Yesaya 60:21a). A kan de wan tyalensi fu tan hori den regtfardiki markitiki na ini wan grontapu pe seks hurudu, lei, gridi, nanga heimemre de na so furu presi. Fu eksempre, na ini son kondre a e go bun nanga na ekonomia èn a makriki fu lasi pasi èn fu feti tranga fu kon gudu. Ma Paulus ben warskow: „Den sma di abi a fasti bosroiti fu kon gudu, e kon ini wan tesi èn wan trapu èn furu don èn takru lostu, di e meki sma fadon go na ini pori” (1 Timoteus 6:9). ¡A de wan sari sani te wan sma fadon so dipi na ini den bisnis afersi taki a e òfer den sani di de trutru prenspari, soleki Kresten demakandra, santa diniwroko, moreel gronprakseri, nanga den frantwortu na ini en osofamiri!
17 Spesrutu gi den yonguwan a kan muilek fu hori densrefi na regtfardiki markitiki, te so furu fu den speri fu den e gebroiki drug èn e du hurudu. Na ini Sranan, wan moi boi ben go na wan meisje na skoro di abi 14 yari èn a ben aksi a meisje fu abi seks nanga en. A meisje ben weigri, èn a ben fruklari taki Bijbel e taki dati sma di no trow no mag du den sortu sani disi. Den tra meisje na skoro ben dreigi a meisje èn den ben pruberi fu dwengi en fu kenki en prakseri, fu di den ben taki dati ala sma wani abi seks nanga a boi dati. Toku a yongu meisje ben tan kánkan. Wan tu wiki na baka, ondrosuku ben sori taki a boi ben abi HIV èn a ben kon siki seryusu. A meisje ben breiti taki a ben gi yesi na a komando fu Yehovah fu ’tan farawe fu hurudu’ (Tori fu den Apostel 15:28, 29). Yehovah Kotoigi breiti srefisrefi nanga den yonguwan na den mindri di e tanapu kánkan fu du san bun. A bribi fu den, èn di fu den papa nanga mama, ’e moi’ — e tyari grani gi — a nen fu Yehovah.—Yesaya 60:21b.
Yehovah Meki Sani Gro
18. (a) Sortu bigi sani Yehovah du gi en pipel? (b) Sortu buweisi de taki a gro sa go doro, èn sortu glori fruwakti de gi den wan di e tan nanga a leti?
18 Iya, Yehovah e skèin leti na tapu en pipel, a e blesi den, a e tiri den, èn a e tranga den. Na ini a di fu 20 yarihondro, den si taki den wortu fu Yesaya kon tru: „A pikinwan srefi sa tron wan dusun, èn a pikinwan sa tron wan makti nâsi. Misrefi, Yehovah, sa meki a go moro esi na ini en eigi ten” (Yesaya 60:22). Fu den wan tu sma nomo na ini a yari 1919, „a pikinwan” tron moro leki „wan dusun”. ¡Èn a kaba fu a gro disi no de ete! A yari di pasa 14.088.751 sma ben fisiti a Memrefesa fu a dede fu Yesus. Furu fu den sma disi no ben de aktief Kotoigi. Wi breiti taki den ben fisiti a prenspari fesa dati, èn wi e gi den a kari fu tan waka go miti a leti. Yehovah e skèin leti fayafaya ete na tapu en pipel. A doro fu en organisâsi opo ete. Fu dati ede, meki ala sma abi a fasti bosroiti fu tan nanga a leti fu Yehovah. ¡Wi sa kisi bigi blesi na ini a ten disi! ¡Èn a sa gi wi bigi prisiri na ini a ten di e kon te ala sani di Gado kria sa prèise Yehovah èn sa prisiri na ini a krin leti fu en glori!—Openbaring 5:13, 14.
¿Yu Kan Tyari Disi Kon na Krin?
• Suma skèin a glori fu Yehovah na ini den lasti dei disi?
• San e sori taki a faya fu Yehovah en pipel no kon moro swaki?
• San na wan tu bun wroko di den Kotoigi fu Yehovah e du furu?
• Sortu frutrow wi abi, ala di sma e gens wi fayafaya?
[Aksi fu a tori disi]
[Raportu na tapu bladzijde 17-20]
1999 DINIWROKO RAPORTU FU YEHOVAH KOTOIGI NA HERI GRONTAPU
(Luku a tijdschrift)
[Prenki na tapu bladzijde 15]
Sma e go ipi-ipi ete na a organisâsi fu Yehovah
[Prenki na tapu bladzijde 16]
Wi breiti taki Yehovah libi a doro bradi opo gi den sma di lobi a leti