Bribi Kan Kenki Yu Libi

„A KAN trutru fu abi bun markitiki sondro wan Gado.” Disi ben de a fruklari fu wan agnosticus. Na uma disi ben taki dati a ben kweki den pikin fu en nanga hei moreel markitiki, èn taki den fu den sei, ben kweki den pikin fu den nanga den srefi sortu hei markitiki — èn sondro taki den ben bribi na ini Gado.

¿Disi wani taki dati a no de fanowdu fu bribi na ini Gado? Soleki fa a sori, dan na dati a sma disi ben prakseri. Èn a tru taki a no abi fu de so, taki ibriwan sma di no e bribi na ini Gado na wan takru sma. Na apostel Paulus ben taki fu „sma fu den nâsi” di no sabi Gado ma di „e du den sani fu a wet, fu densrefi” (Romesma 2:14). Ala sma — so srefi agnostici — ben gebore nanga wan konsensi. Furu fu den e pruberi fu du san a konsensi fu den e taigi den fu du, srefi ala di den no e bribi na ini a Gado di gi den na inisei firi dati di e taigi den san bun èn san ogri.

Ma wan tranga bribi na ini Gado — wan bribi di gron tapu Bijbel — na wan krakti sani di e buweigi wi fu du bun, moro leki soso a konsensi fu wi di e tiri wi. Wan bribi di gron tapu a Wortu fu Gado, Bijbel, e leri a konsensi, èn a e meki a konsensi si moro fini san bun noso san ogri (Hebrewsma 5:14). Ma bribi e tranga sma tu fu tan abi hei markitiki ala di den de na ondro hebi druk. Fu eksempre, na ini a di fu 20 yarihondro, furu kondre ben de na ini a makti fu kruka politiek tiri di ben dwengi sma di ben abi bun moreel markitiki kande, fu du kefalek ogri-ati sani. Ma den sma di e bribi trutru na ini Gado ben weigri fu skoifi den gronprakseri fu den na wan sei, srefi ala di a libi fu den ben de na ini kefar. Na tapu fu dati, wan bribi di gron tapu Bijbel kan kenki sma. A kan fri den libi di ben o lasi kande èn a kan yepi sma fu no du seryusu sondu. Luku wan tu eksempre.

Bribi Kan Kenki na Osofamiri Libi

„Nanga yu bribi yu du sani di no ben man.” Na so wan krutubakra fu Ingrisikondre ben taki  di a ben teki a bosroiti fu meki John nanga Tania sorgu den pikin fu den. Na a ten di lantiman ben luku na afersi fu John nanga Tania, dan den no ben trow èn den ben abi wan takru osofamiri libi. John, di ben abi wan problema nanga drug èn di ben abi a gwenti fu dòbel, ben go du ogri fu feni moni gi den takru gwenti fu en. A no ben sorgu den pikin fu en èn a mama fu den pikin. So bun, sortu „wondru” ben pasa?

Wan dei, John ben yere en brada manpikin ben e taki fu Paradijs. Fu di a ben wani sabi moro, meki a ben aksi a papa nanga mama fu a boi. A papa nanga mama na Kotoigi fu Yehovah, èn den ben yepi John fu kon sabi moro fu Paradijs na ini Bijbel. Pikinsopikinso John nanga Tania ben kisi wan bribi di gron tapu Bijbel èn dati ben kenki den libi. Den ben trow akruderi wet èn den no ben du den takru gwenti fu den moro. Den lantiman di ben ondrosuku na osofamiri libi fu den ben si wan sani, di no so langa pasa ete, no ben o man — wan koloku osofamiri na ini wan krin oso, wan bun presi pe den kan kweki pikin. A krutubakra ben abi leti fu taki dati a „wondru” disi ben pasa bika John nanga Tania ben feni a nyun bribi.

Dusundusun kilometer fara fu Ingrisikondre, wan yongu wefi na ini den krosibei Owstusei kondre ben o tron wan fu den sma di de ini wan kefalek sari situwâsi. A ben abi na prakseri fu broko trow tu leki fa den furu milyun sma di e du dati ibri yari. A ben abi wan pikin, ma en masra ben owru srefisrefi moro en. Fu dati ede den famiri fu en ben gi en a deki-ati fu broko a trow, èn a ben bigin sreka sani trutru kaba fu du dati tu. Ma a ben studeri Bijbel nanga wan Kotoigi fu Yehovah. Di a Kotoigi ben kon sabi san na a situwâsi, dan a ben sori en san Bijbel e taki fu a trowlibi — fu eksempre, taki a trowlibi na wan presenti fu Gado èn a no wan sani di wi musu prakseri lekti fu en (Mateus 19:4-6, 9). Na uma ben prakseri na ensrefi: ’A de wan freimde sani taki na uma disi, wan sma di no sabi mi, e pruberi fu hori mi osofamiri libi bun, ala di den sma di sabi mi bun, wani broko mi osofamiri libi.’ A nyun bribi di a ben leri ben yepi en fu hori en trowlibi bun.

Wan sari situwâsi di abi krakti tapu na osofamiri libi, abi fu du nanga a puru di sma e puru bere. Wan rapport fu den Verenigde Nâsi ben bereken taki sma e puru ibri yari moro leki 45 milyun beibi di no gebore ete, fu espresi. Ibriwan fu den sani disi na wan sari sani di e pasa. A sabi di de na ini Bijbel ben yepi wan uma na ini den Filipijnen fu no tron wan fu den sma dati.

Den Kotoigi fu Yehovah ben miti na uma disi, èn a ben teki wan bijbelstudie na ini a brochure di nen San Gado e aksi foe wi? * èn a ben bigin studeri Bijbel. Wan tu mun na baka, a ben fruklari fu san ede a ben teki wan bijbelstudie. Na uma ben de nanga bere di den Kotoigi ben kon na en a fosi leisi, ma en nanga en masra ben bosroiti fu puru a bere. Ma a fowtow na tapu bladzijde 24 fu a brochure di e sori a beibi di no gebore ete, ben naki na ati fu na uma. A Bijbel fruklari di ben gi tu èn di ben taki dati a libi na wan santa sani bika ’Gado na a fonten fu libi’ ben overtoigi en fu hori en beibi (Psalm 36:9). Now en na a mama fu wan moi èn gosontu beibi.

Bribi E Yepi den Sma Di Trawan E Wisiwasi

Na ini Etiopia, tu man di ben weri leki pôti man, ben kon na wan konmakandra di den Kotoigi fu Yehovah e hori fu anbegi Gado. Na a kaba fu a konmakandra, na wan switifasi wan Kotoigi ben taigi den sma suma na en. Den man ben begi en fu gi den wan sani. A Kotoigi no ben gi den moni, ma wan moro bun sani. A ben gi den deki-ati fu leri bribi na ini Gado, di „abi moro bigi waarde leki gowtu” (1 Petrus 1:7). Wan fu den ben arki èn a ben bigin studeri Bijbel. Disi ben kenki en libi. Di a bribi fu en ben gro, dan a ben tapu nanga smoko, a ben tapu fu dringi furu sopi, a ben tapu nanga hurudu, èn a ben tapu fu gebroiki qat (wan drug di kan meki sma tron wan srafu fu en). A ben leri fa a musu sorgu gi ensrefi na presi fu begi sma sani èn now a e libi wan krin libi di e waka bun.

Na ini Italiakondre, wan man di abi 47 yari, ben kisi a strafu fu sidon tin yari na ini strafu-oso èn den ben poti en na ini wan lawman ati-oso. Wan Kotoigi fu Yehovah di abi primisi fu go na ini strafu-oso fu gi sma yepi na yeye fasi, ben studeri  Bijbel nanga en. A man ben go na fesi esi-esi. Bribi ben kenki en libi so furu taki now tra strafuman e go na en fu suku rai fa fu handri nanga den problema fu den. En bribi di gron tapu Bijbel ben meki taki den tiriman fu a strafu-oso ben lespeki en, ben gi en grani èn ben frutrow en.

Na ini den yari di no pasa so langa ete, den koranti ben skrifi sani fu den borgu orloku na ini Afrika. Den sani di ben gi groskin trutru, ben de den tori fu den yongu boi di e leri fu de srudati. Den pikin disi di sma e gi drug, e handri nanga den na wan ogri-ati fasi, èn e dwengi den fu du bun takru sani nanga den famiri fu den di no e kruderi kwetikweti nanga a fasi fa libisma e du, so taki den kan de seiker taki den pikin disi sa de loyaal nanga den heri sili na a grupu di den e feti gi. ¿Wan bribi di gron tapu Bijbel tranga nofo fu kenki a libi fu den sortu yongu sma disi? Na ini tu kefal a ben de so trutru.

Na ini Liberia, Alex ben wroko leki wan yepiman fu wan priester na ini a Katolik Kerki. Ma di a ben abi 13 yari, a ben go na ini wan feti grupu èn ben tron wan pikin-nengre srudati di ben abi wan takru nen na furu sma. Fu kon kisi deki-ati na ini a feti, dan a ben go du bonu. Alex ben si taki furu fu den kompe fu en ben lasi libi, ma en ben tan na libi. Na ini 1997 a ben miti Kotoigi fu Yehovah èn a ben si taki den no ben wisiwasi en. Na presi fu dati, den ben yepi en fu leri san Bijbel e taki fu ogri di e du nanga tranga. Alex ben gowe libi a legre. Di a bribi fu en ben bigin gro, dan a ben gi yesi na a komando fu Bijbel: „Meki a kaba fu du ogri èn meki a du bun; meki a suku vrede èn du muiti fu kisi en.”​—1 Petrus 3:11.

Na a ten dati, wan fositen pikin-nengre srudati di nen Samson ben kon na ini a foto pe Alex ben libi now. A ben de wan memre fu wan singigrupu fu kerki, ma na ini 1993 a ben tron wan srudati èn a ben bigin gebroiki drug, a ben du afkodrei, èn hurudu. Na ini 1997 a ben kon fri fu srudati wroko. Samson ben go na Monrovia fu go na ini wan spesrutu veiligheid legre, di wan mati ben overtoigi en fu studeri Bijbel nanga den Kotoigi fu Yehovah, èn dati ben abi leki bakapisi taki a ben kisi wan bribi di gron tapu Bijbel. Disi ben gi en deki-ati fu gowe libi a feti di a ben gwenti feti. Now Alex nanga Samson e libi na ini vrede èn den e libi wan moreel libi. ¿Wan tra sani de, boiti wan bribi di gron tapu Bijbel, di ben kan kenki a libi fu sma di trawan ben du den a kefalek takru ogri disi?

A Yoisti Bribi

Disi na soso wan tu fu den bun furu eksempre di wi ben kan kari fu sori a krakti fu trutru bribi di gron tapu Bijbel. A no de fu taki, dati a no ala sma di e fruklari nomo taki den e bribi na ini Gado e libi akruderi den hei markitiki fu Bijbel. Iya, son atheïst e libi moro bun libi kande leki sma di e taki dati den na Kresten. Dati na fu di a bribi di gron tapu Bijbel abi nanga moro fu du leki soso a fruklari di wan sma e fruklari taki a e bribi na ini Gado.

Na apostel Paulus ben kari bribi „a seiker fruwakti fu sani di wan sma e howpu na tapu, a krin buweisi fu tru sani, ma di sma no e si” (Hebrewsma 11:1). So bun, bribi na wan tranga frutrow — di gron tapu krin buweisi — na ini sani di wi no man si. A wani taki spesrutu taki wan sma no musu tweifri srefisrefi taki Gado de, taki a abi belangstelling gi wi, èn taki a e blesi den sma di e du a wani fu en. Na apostel Paulus ben taki tu: „A sma di e kon na Gado, musu bribi taki a de èn taki a e tron a sma di e pai den wan di e suku en seryusu.”​—Hebrewsma 11:6.

A ben de a bribi disi di ben kenki a libi fu John, Tania, nanga den trawan di ben kari na ini na artikel disi. A ben meki den luku nanga tranga frutrow na ini Gado Wortu, Bijbel, fu yepi den teki bosroiti. A ben yepi den fu tyari syatuten ofrandi, so taki den no e go libi wan libi di makriki, ma di no bun. Ala di ibriwan fu den ondrofenitori ben difrenti fu makandra, toku den alamala ben bigin na a srefi fasi. Wan Kotoigi fu Yehovah ben studeri Bijbel nanga den sma disi, èn den sma disi ben kon ondrofeni taki a tru san Bijbel e taki: „A wortu fu Gado de libilibi èn a abi krakti” (Hebrewsma 4:12). A krakti fu Gado Wortu ben yepi ibriwan fu den fu kisi wan tranga bribi di ben kenki a libi fu den na wan bun fasi.

Den Kotoigi fu Yehovah e wroko fayafaya na ini moro leki 230 kondre nanga èilanti fu se. Den e gi yu a kari fu abi wan bijbelstudie. Fu san ede? Bika den abi na overtoigi taki wan bribi di gron tapu Bijbel kan tyari bigi kenki kon na ini yu libi tu.

[Futuwortu]

[Prenki na tapu bladzijde 3]

Bribi di gron tapu Bijbel e kenki libi na wan bun fasi

 [Sma di abi a reti fu a prenki na tapu bladzijde 2]

Titel fu a karta fu Biblia nieświeska fu Szymon Budny, 1572